Քրեական դատավարության օրենսգիրքը ծալել, շպրտել եք մի կողմ.ծռերի պաշտպանները լքեցին դահլիճը

Ավան եւ Նոր Նորք վարչական շրջանների ընդհանուր իրավասության դատարանում դատավոր Արտուշ Գաբրիելյանի նախագահությամբ շարունակվում է «Սասնա ծռեր» խմբի 18 անդամի գործով արտագնա դատական նիստը:

Մինչ նիստի մեկնարկը դատական կարգադրիչները հերթական անգամ արգելեցին փաստաբաններ Մուշեղ Շուշանյանի եւ Դավիթ Գյուրջյանի մուտքը նիստերի դահլիճ՝ կրկին, ըստ նրանց, զննություն չանցնելու պատճառով:

Նիստը սկսվեց առանց «Սասնա ծռեր խմբի 18 անդամի: Պաշտպանական կողմի հարցին, թե որտե՞ղ են իրենց պաշտպանյալները նախագահող դատավորը պատասխանեց, որ նրանց նկատմամբ դատարանը նախորդ նիստի ժամանակ դատական սանկցիա է կիրառել:

Նիստերի քարտուղարուհին ի պատասխան դատավորի հարցին, ասաց, թե Մուշեղ Շուշանյանը, Դավիթ Գյուրջյանը եւ եւս մի քանի պաշտպաններ նիստին չեն ներկայացել՝ դատարանին անհայտ պատճառով: Սա զայրացրեց պաշտպանական կողմին: Մասնավորապես՝ Լուսինե Սահակյանը ուշադրություն դարձրեց այն հանգամանքի վրա, որ երեկ իրեն նույն պայուսակով թույլ չեն տվել մտնել նիստերի դահլիճ, իսկ այսօր նույն պայուսակը կրկին ազդանշան է տվել, սակայն վերջինս անարգել մտել է ներս: Դատավորն էլ արձագանքեց. «Նենց տպավորություն ա, որ էդ սարքը կողմնակալ է, մեկին ազդանշան տալիս, է մյուսին՝ ոչ: Մեզ համար անհասկանալի է, թե ինչ է կատարվում, ընդ որում, մեզ համար անհասկանալի է, թե ինչո՞ւ են ֆիքսվել նույն Մուշեղ Շուշանյանի վրա, գոնե մյուս պաշտպաններին թույլ են տալիս որոշ օրեր մուտք գործել, իսկ նրան գրեթե երբեք թույլ չեն տվել մտնել: Իսկ դատարանն էլ համառորեն նշանակում է հանրային պաշտպան Մուշեղ Շուշանյանի պաշտպանյալների համար»,- ասաց Լուսինե Սահակյանը:

Պաշտպանները մի քանի անգամ միջնորդեցին ընդմիջում հայտարարել եւ ապահովել Մուշեղ Շուշանյանի եւ Դավիթ Գյուրջյանի ներկայությունը, սակայն դատարանն այդ միջնորդությունն անգամ քննության չառավ, ապա հավելեց, թե Շուշանյանն ու Գյուրջյանը օրենքի պահանջը չեն կատարել: Լուսինե Սահակյանն էլ նկատեց, որ եթե փաստաբանները բացեին իրենց պայուսակը, ապա դա կլիներ օրենքի պահանջի խախտում: «Կոնկրետ փաստաբանների նկատմամբ հետապնդում է սկսվել»,- դիմելով դատավորին ասաց փաստաբաններից Գրիշա Բալասանյանը: Ինեսսա Պետրոսյանն էլ շարունակեց Բալասանյանին՝ հետապնդումը սկսվում է հենց դատարանի մուտքից:  

Լարված իրավիճակ սկսվեց հատկապես այն ժամանակ, երբ դատավորն անցավ մեղադրող դատախազների բացարկի հարցը քննարկելուն: Պաշտպաններին զայրացրեց այն հանգամանքը, որ բացարկի հարցը քննարկվում է առանց մի քանի պաշտպանների ներկայության: «Երբ հաջորդ նիստին կբարեհաճեն ներկա գտնվել, կրկին կկրկենք...Պաշտպանի բացակայությամբ այո՛, շարունակում եմ նիստը, քանի որ սա նախապատրաստական փուլ է: Հաջորդ դատական նիստին, երբ նրանք գան զրկված չեն...»,- գրեթե բղավելով ասաց դատավորը:  Ինեսսա Պետրոսյանն էլ դատավորից հետաքրքրվեց, թե Քրեական դատավարության օրենսգիրքը քանի՞ անգամ է նախատեսում նախապատրաստական փուլ: Ի պատասխան Արտուշ Գաբրիելյանն ասաց՝ թիվ գոյություն չունի: «Ոնց գոյություն չունի, նույն բանը 10 անգամ պիտի անենք»,- զարմացած հարցրեց Պետրոսյանը.

- Այո:

- Ո՞նց

- Հենց ըտենց:

Փաստաբան Լուսինե Սահակյանն էլ ասաց, որ մեղադրողներին բացարկի միջնորդություն ներկայացնելու հնարավորությունից զրկված է: «Մեր կոլեգաները չեն գտնվում դատարանի դահլիճում: Եվ բացի դա, մեր պաշտպանյալները չեն գտնվում: Սա դնենք մի կողմ, դա այլ հարց է: Մենք պահանջում են, որպեսզի դատարանը նախ եւ առաջ ապահովի մեր կոլեգաների ներկայությունը: Այնուհետեւ, պարզել, թե ամբաստանյալներից ով այս պահի դրությամբ չունի պաշտպան, պարզել, եթե կա ամբաստանյալ, որ մնացել է անպաշտպան, եթե կան այդպիսիք, ապա քրեական դատավարության օրենսգրքի համաձայն՝ գործի քննությունը հետաձգել: Քրդատը հստակ պահանջում է, որ եթե պաշտպանը չի ներկայանում դատարան, եթե հնարավոր չէ նրան այլ պաշտպանով փոխարինել, ապա նիստը պետք է հետաձգվի: Սա քրեական դատավարութան օրենսգիրքն է, որ ո՛չ դուք, ո՛չ մեղադրողները չեն կարող փոխել: Այլ օրենսգիրք, եթե ունեք, տվեք ծանոթանանք, թե ինչ օրենսգրքից եք օգտվում: Հիմա ունեմ բացարկ մեղադրողներին, մեղադրողները նստած են այստեղ, համատարած խախտում է տեղի ունենում: Քրեական դատավարության օրենսգիրքն ուղղակի գցել եք ոտքի տակ, տրորել, ծալել շպրտել եք, իսկ մեղադրողները նստած ոչինչ չեն անում: Եթե դատարանն իր առջեւ նպատակ է դրել 7 տարի դատական նիստ անելուն, մենք այդպիսի նպատակ չունենք: Ուստի խնդրում եմ քննարկել իմ միջնորդությունը, որից հետո կանդրադառնանք մեղադրողների բացարկին: Այլապես ես կլքեմ նիստերի դահլիճը, որովհետեւ ի տարբերություն ձեզ, ես հարգում եմ Քրեական դատավարության օրենսգիրքը, չեմ ծալել, գցել մի կողմ, ես հարգում եմ նաեւ իմ վստահորդներն, իմ մասնագիտությունը»,- դատավորին բացատրեց Սահակյանը:

Ի պատասխան դատավորն ասաց, որ եթե պաշտպանները կատարեին կարգադրիչների օրինական պահանջները, կկարողանային մուտք գործել նիստերի դահլիճ: «Հիմա եթե դատական կարգադրիչն ասի՝ հատակ մաքրեք, փաստաբանները պիտի մաքրե՞ն»,- զայրացած ասաց Սահակյանը: Վերջինիս միջնորդությունն առանց քննելու դատարանը կրկին անցավ մեղադրողների բացարկի հարցը քննարկելուն, ինչից հետո Սահակյանը հայտարարեց, որ չի պատրաստվում ներկա գտնվել ապօրինություններին, եւ լքեց նիստերի դահլիճը: Դահլիճը լքեցին նաեւ փաստաբաններ Արայիկ Պապիկյանը եւ Հրանտ Գեւորգյանը:

Դատավորը հեռացավ խորհրդակցական սենյակ՝ նրանց վարքագծի վերաբերյալ որոշում կայացնելու: Ապա՝ վերադառնալով նրանց նկատմամբ հերթական սանկցիան կիրառեց: «Հիմա որ մենք ձեզ չենք կարում սանկցիա տանք, հետո՞»,- բղավեց փաստաբան Ինեսսա Պետրոսյանը, ինչից հետո դատավորը նրա նկատմամբ սանկցիա կիրառեց՝ նախազգուշացման տեսքով: