Ամբողջ ինտրիգն այն է, թե եկող տարի ինչ կառավարարություն կլինի. Արմեն Ռուստամյան

Դեռ կտեսնեք քննարկումներ, մտքերի ու գաղափարների բախումներ, դեռ խորհրդարանը լիարժեք կսկսի գործել 2018 թվականի ապրիլից. սեպտեմբերի 15-ին, անդրադառնալով լրագրողների դիտարկմանը, թե ներկայիս ԱԺ-ն կարծես այնքան էլ ակտիվ չէ, որակապես լավ չի աշխատում, հատկապես ՀՅԴ-ն՝ ասաց ԱԺ ՀՅԴ խմբակցության ղեկավար Արմեն Ռուստամյանը եւ ավելացրեց, թե հիմա բոլոր ուժերը դեռ սպասողական մարտավարություն են վարում, եւ վաղ է այդպիսի հետեւություններ անելը:

Ռուստամյանը շեշտեց, թե դեռ 2018 թվականի ապրիլից հետո են քաղաքական ուժերը ստանալու նոր գործիքներ, նոր հնարավորություններ, ինչը էապես կփոխի քաղաքական գործընթացների բովանդակությունը:

«Հարաբերական անդորրը կամ պասիվությունը հատուկ է հենց այդ փոփոխական շրջաններին, երբ բոլորը սպասում են, թե ինչ սպասումներ կառաջանան, ինչ վերադասավորումներ, ու այդ առումով բուն գործընթացը կսկսի: Ամբողջ ինտրիգն այն է, թե եկող տարի ինչ կառավարություն կլինի, սա՞ կմնա, թե՞ կփոխվի, ու հետեւաբար հեռուն գնացող կարծիքներ չենք ուզում հայտնել»,- նշեց ՀՅԴ խմբակցության ղեկավարը՝ հավելելով, թե ինչքան ապրիլը մոտենա, աժիոտաժն այնքան կմեծանա:

Լրագրողները Ռուստամյանին հարց ուղղեցին, թե Սերժ Սարգսյանի պաշտոնավարման 10 տարիներին ՀՅԴ-ն եղել է իշխանություն, այնուհետեւ՝ ընդդիմություն, հիմա նորից իշխանություն. այս առումով, նախ՝ կա արդյո՞ք Սերժ Սարգսյանի տված մի խոստում, որ իրականացել է, եւ ՀՅԴ-ն առկա վիճակի կապակցությամբ իր պատասխանատվությունը չի՞ զգում: Արմեն Ռուստամյանը պատասխանեց, թե նախ՝ անլուրջ են այն բոլոր քաղաքական ուժերը, որոնք իրենց մեղքի բաժինը կամ պատասխանատվությունը չեն տեսնում, նշանակում է իրենք չկան: Եթե քաղաքական ուժը կա, ընդգծեց ՀՅԴ խմբակցության ղեկավարը, ուրեմն ինչ-որ չափով պետք է ինքն իրեն պատասխանատու զգա ու պատասխանատվություն կրի: Հենց այդ պատասխանատվությունից ելնելն էլ, ըստ Ռուստամյանի, ՀՅԴ-ին բերեց նոր կոալիցիոն գործընկերության:

«Սերժ Սարգսյանն, ըստ էության, ընդունեց մեր առաջարկած 7 կետը: Հայաստանի ընթացքի մեջ տեղի է ունեցել բեկում, մենք նոր ընթացք ենք որդեգրել, դա պայմանավորված էր հենց Սերժ Սարգսյանով: Ղարաբաղի խնդրի հետ կապված, Ցեղասպանության խնդրի հետ կապված կտրուկ փոփոխություններ են տեղի ունեցել այս ընթացքում, կառավարության գործունեությունը շատ ավելի թափանցիկ է դարձել, էլի բավականին փոփոխություններ են տեղի ունեցել, որի արդյունքները դեռ երեւալու է»,- ասաց Արմեն Ռուստամյանը:

Նրա դիտարկմամբ, խնդիրներ կան, բայց ոչ մի ուրիշ ուժ այդ խնդիրների լուծման այլ եղանակ չի առաջարկում եւ արձանագրեց, որ Հայաստանի այս իրավիճակում՝ ծանր ու շրջափակված, կամաց-կամաց փոփոխություններ են կատարվում, ինչը կարեւոր է: Նոր կոալիցիայի անհրաժեշտության ու ԲՀԿ-ի կոալիցիա մտնելու հավանականության համատեքստում էլ ՀՅԴ խմբակցության ղեկավարը նշեց, թե միակ տարբերակը, որ քաղաքական ներկա գործակցությունը փոփոխության ենթարկվի, կամ այդ համագործակցությունը վերանա, պետք է վերանա այն առարկան, որի շուրջ ՀՀԿ-ն ու ՀՅԴ-ն պայմանավորվել են համագործակցել:

«Մենք որեւէ մեկի հետ չունենք հարաբերվելու տաբու, մեր երկրում որեւէ թշնամի չունենք, մենք ունենք գործընկերներ, կարող ենք ունենալ նաեւ գաղափարական հակառակորդներ եւ ոչ այլ կարգի հակառակորդներ: Եթե մենք այսօր որեւէ ուժի հետ ունենք համընկնող տեսակետներ, մենք այսօր էլ կարող ենք համագործակցել: Այդ համագործակցությունը այսօր էլ կա: Մենք միշտ էլ պատրաստ ենք որեւէ քաղաքական ուժի հետ համագործակցել. հիմա դա կոալիցիոն, թե ինչ ձեւաչափով կլինի, ես հիմա չեմ կարող ասել, երբ կգա ժամանակն ու նման հայցով կդիմի Ծառուկյան դաշինքը, մենք կոալիցիայով կքննարկենք»,- ասաց Արմեն Ռուստամյանը, իսկ հարցին՝ իսկ դուք երրորդ գործընկերոջ կարիքն ունե՞ք, Ռուստամյանը պատասխանեց՝ մենք ողջ ժողովրդի կարիքն ունենք:

ԱԺ ՀՅԴ խմբակցության ղեկավարն անդրադարձավ նաեւ սեպտեմբերի 14-ին Թուֆենկյան հյուրանոցի մոտ տեղի ունեցած կրակոցներին ու սպանությանը, այս առումով նշելով, թե չի կարծում, թե երկրում կրիմինալը զարգացման գագաթնակետին է հասել, դա սովորական ռազբորկա էր, որը բոլոր երկրներում էլ լինում է, այլ ոչ համակարգային խնդիր, բայց նշեց, թե կարեւոր է, որ իրավապահ մարմինները ճիշտ ու ժամանակին արձագանքեն: Իսկ այս հարցի համատեքստում սկիզբ առած քննարկումների վերաբերյալ, թե պետք է Վանոն վերադառնա, եւ որ իշխանություններն են պատասխանատու, քանի որ անհրաժեշտ ջանքեր չեն գործադրում կրիմինալն արմատախիլ անելու ուղղությամբ, Ռուստամյանը նշեց, թե ոստիկանապետ Վլադիմիր Գասպարյանն իր չափով պետք է պատասխանատվություն զգա ու ստանձնի, եւ վստահություն հայտնեց, որ դա հենց այդպես է, բայց նաեւ հավելեց. «Ես չեմ ուզում վերադառնան Վանոյի ժամանակները, այնպես չէ, որ այն ժամանակ կրիմինալիզացիա չկար, թեկուզ հիշենք, այն հայտնի սպանությունները: Եթե այն ժամանակ ամեն ինչ ճիշտ լիներ, այսօր այս վիճակը չէր լինի. ամեն մեկը պետք է իր գործերը ճիշտ կատարի»: