Գեյապատում. բացահայտեք նաեւ բոսյակներին

Տպագրվել է «Հայկական Ժամանակ» օրաթերթի՝ 2004 թվականի սեպտեմբերի 28-ի համարում

«Հայ արիական միաբանություն» կուսակցության նախագահ Արմեն Ավետիսյանի նախաձեռնությունը՝ հրապարակել հայ քաղաքական էլիտայի գեյերի ցանկը, աննախադեպ շփոթ է առաջացրել թե՛ ԱԺ-ում, թե՛ կառավարությունում: Երեկ մի քանի պատգամավոր մեր թերթի միջոցով Արմեն Ավետիսյանին թասիբի գցեցին՝ պահանջելով, որ անհապաղ հրապարակի գեյ պաշտոնյաների ցուցակը: «Եթե արիական միաբանության նախագահը նման հայտարարություն է արել, պետք է տեր լինի իր ասածին եւ հրապարակի այդ անունները: Ի վերջո, այսքան պատգամավոր կա, եւ այդ  մարդկանց վրայից կասկածը պետք է դուրս գա: Բայց, եթե նա այդ անունները չհրապարակի, ես պաշտոնապես հայտարարելու եմ, որ հոմոսեքսուալիստն ինքն է»,- երեկ ասաց ՀՀԿ պատգամավոր Աշոտ Աղաբաբյանը: Իսկ «Ժողպատգամավոր» խմբի անդամ Վլադիմիր Բադալյանը հայտարարեց. «Կա՛մ այդ տղան պետք է տա այդ անունները, կա՛մ պարզապես նա ու նրա «պապան» իրենք են տղամարդ ման գալիս»:

Ինչեւէ, երեկ ԱԺ-ում տիրող տրամադրությունից ակնհայտ էր, որ պատգամավորներն իսկապես զայրացած ու մասամբ էլ զգուշացած են Ավետիսյանի սպառնալիքներից: «Այս թեմայի շրջանառությունից հետո ամեն օր այս կամ այն պատգամավորն ու նախարարը, այլեւս բացահայտ ձեւով, իրենց կողքը մի շեկ աղջիկ են նստեցնում եւ պրոսպեկտով աննպատակ վերեւ-ներքեւ են անում, որ իրենց աղջկա հետ տեսնեն եւ իրենց վրայից գեյ լինելու կասկածը դուրս գա»,- վերջին օրերին նման օրինաչափություն է նկատել Էջմիածնից ընտրված պատգամավոր Հակոբ Հակոբյանը: Իսկ ՀՀԿ խմբակցության ղեկավար Գալուստ Սահակյանի դիտարկմամբ՝ մեր թերթում այս դելիկատ թեմայի հրապարակումը խիստ  հիգիենիկ ազդեցություն է թողել ԱԺ-ի վրա. «Պատգամավորներն այնքան են վախեցած, որ իրար հանդիպելիս առաջվա նման այլեւս չեն համբուրվում եւ բավարարվում են ձեռքսեղմումով»:

Եւ չնայած այս թեման մեր բարձրաստիճան պաշտոնյաներից շատերին անկհայտորեն նյարդայնացնում է, այդուհանդերձ, երեկ փորձեցինք մեր մի քանի պատգամավորից ճշտել, թե ինչպես են վերաբերվում «Հայ արիական միաբանության» նախաձեռնությանը: ԱԺ պատգամավոր, հայտնի գործարար Ռուբեն Հայրապետյանը, ի տարբերություն իր որոշ գործընկերների, որոնք  Արմեն Ավետիսյանի նախաձեռնությունը համարում են մարդու իրավունքների ոտնահարում, այն կարծիքին է, որ նա հայրենանվեր գործ է անում. «Եթե իսկապես նա այդ անունները հրապարակի, հայրենանվեր գործ արած կլինի: Ի վերջո, դա երկրի անվտանգությանն առնչվող հարց է, եւ ճիշտ կլինի, որ իմանանք, թե ովքեր են այդ մարդիկ»: 

Տրամագծորեն հակառակ կարծիքի է պատգամավոր Հմայակ Հովհաննիսյանը: «Եթե արիական միաբանության նախագահը գիտի, թե ովքեր են գեյեր, նշանակում է՝ նա այդ մարդկանց հետ նման կարգի կապերի մեջ է եղել, եւ ինքն էլ ունի այդ օրիգինալ կողմնորոշումից»,- ենթադրում է նա: Իսկ ինչպե՞ս է գործարար պատգամավոր Հարություն Փամբուկյանը վերաբերում Ա.Ավետիսյանի այն պնդմանը, թե գեյերի մեջ կան նաեւ հայտնի գործարարներ: «Չեմ պատկերացնում»,- մեր հարցին ի պատասխան երեկ ասաց գործարար պատգամավորը: Ու քանի որ երեկ ԱԺ-ում էր նաեւ Կենտրոնական բանկի նախագահ Տիգրան Սարգսյանը, մենք նրան եւս հարցրինք, թե ինչպես է վերաբերում Ավետիսյանի նախաձեռնությանը: Տիգրան Սարգսյանը նախընտրեց լինել կարճ եւ կոնկրետ. «Ես ուշադրություն չեմ դարձնում նման նախաձեռնություններին»:

Այդուհանդերձ, երեկ պատգամավորները, մի կողմ թողած օրակարգի հարցերը, միջանցքներում լրջորեն քննարկում էին հետեւյալ հարցերը՝ արդյո՞ք գեյերը մեղավոր են, որ իրենք ոչ ավանդական սեռական կողմնորոշում ունեն, եւ արդյո՞ք նրանց հայտնաբերելուց հետո պետք է վերջիններիս բոյկոտ հայտարարել: Պատգամավորներին հուզող այս հարցերի պատասխանը երեկ փորձեցինք ստանալ հոգեբույժից: «Սթրես» հանրապետական կենտրոնի գլխավոր բժիշկ, հոգեբույժ Սամվել Սուքիասյանի պնդմամբ՝ հոմոսեքսուալիզմը ոչ թե ֆիզիկական, այլ հոգեկան շեղում է եւ պաշտոնապես դասվում է հոգեկան շեղումների շարքին. «Հոմոսեքսուալիզմը  հոգեկան շեղում է եւ մտցված է հոգեկան հիվանդությունների ցանկի մեջ: Նման հոգեկան շեղման պատճառները տարբեր կարող են լինել՝ դաստիարակությունը, միջավայրը, անձի շեղումները, նաեւ՝ այլ  հոգեկան շեղումները»:

Իսկ նման պաշտոնյան իրավունք ունի՞ պաշտոնավարելու: «Ես համարում եմ, որ ղեկավարը, ով էլ նա լինի՝ երկրի նախագահ, թե  հիվանդանոցի ղեկավար, բոլոր կողմերով առողջ մարդ պետք է լինի»,- սա է հոգեբույժի կարծիքը: Այլ է ՀՀ գլխավոր մաշկավեներոլոգ Կարեն Բաբայանի տեսակետը. «Թող Սուքիասյանը հայտնագործություններ չանի. եթե նրա տրամաբանությամբ առաջնորդվենք, ուրեմն՝ Ամերիկայի 30 տոկոսը, որ ոչ ավանդական սեռական կողմնորոշում ունի, գի՞ժ է: Եթե դուք իմ անձնական կարծիքն եք հարցնում, ապա ինձ համար բացարձակապես միեւնույն է, թե այդ նախարարը, պատգամավորը կամ բարձրաստիճան մեկ այլ պաշտոնյան իր աշխատանքային օրվա ավարտից հետո ինչ է անում:

Եթե նա, որպես մասնագետ, իր ոլորտում պրոֆեսիոնալ է, բայց ձեռքի հետ նաեւ հոմոսեքսուալիստ է՝ ի՞նձ ինչ: Իսկ ինչո՞ւ չեն ուզում հրապարակել այն պաշտոնյաների ցուցակը, որոնք նորմալ օրիենտացիա ունեն, բայց ողջ օրը պոռնիկների հետ են: Եւ ո՞վ է ասել, որ դա ավելի նորմալ եւ բարոյական է: Այդ դեպքում նրանց անուններն էլ թող հրապարակեն, որովհետեւ ողջ երկիրը դրանով է զբաղված»,- առաջարկում է հանրապետության գլխավոր մաշկավեներոլոգը: Ինչեւէ, ե՞րբ է պատրաստվում «ՀԱՄ» նախագահը հանդարտեցնել քաղաքական վերնախավի կրքերը: «Երեկ մեր գրասենյակ էր եկել նախագահի աշխատակազմի մի ներկայացուցիչ եւ հետաքրքրվում էր, թե որքանով է մեր ունեցած տեղեկությունը ռեալ, եւ երբ կհրապարակվեն այդ անունները:

Այս օրերին ինձ զանգահարել են  նաեւ բազմաթիվ պատգամավորներ, բարձրաստիճան պաշտոնյաներ, որոնք նույնպես հետաքրքրվում են, թե երբ են հնչելու այդ անունները: Իհարկե, եղել են նաեւ բազում անանուն զանգեր, որոնք խորհուրդ են տալիս նման բան չանել, քանզի այդ մարդիկ ունեն ընտանիք եւ երեխաներ: Սակայն ես ձեր թերթին արդեն ասել եմ՝ այդ անունները հրապարակվելու են. այդ մարդիկ Նոր տարվա սեղանի շուրջ նստելու են վարկաբեկված ու խայտառակ եղած»,- կրկին վստահեցրեց Արմեն Ավետիսյանը:

Նաիրա Զոհրաբյան