Կադրային կրճատումներ. հիվանդը սպասում է վիրահատության, բուժաշխատողները «բունտ» են անում

Աբովյանում գտնվող տուբերկուլոզի դեմ պայքարի ազգային կենտրոնում (տուբդիսպանսերում) հայտարարվել է զանգվածային կադրային կրճատումների մասին, ինչի առիթով այսօր՝ նոյեմբերի 1-ին, իրենց բողոքն էին հայտնում թե՛ գործազուրկ դարձող աշխատակիցները, թե՛ հիվանդներն ու նրանց խնամող հարազատները:

Օպտիմալացման ճանապարհին որոշվել է միավորել կենտրոնի թոքային վիրաբուժության եւ արտաթոքային բաժանմունքները: Արտաթոքային բաժանմունքում կրճատման ենթակա է համարվել 15-20 աշխատակից՝ միջին եւ կրտսեր բուժանձնակազմից: Նրանք ասում էին, որ աշխատանքը կորցնելու դեպքում կանգնելու են սոցիալական բարդագույն խնդիրների առաջ ու հայտնվելու են անելանելի վիճակում:

Հիվանդների հարազատներն էլ մտահոգություն էին հայտնում, որ համատեղությամբ աշխատողները մյուս բաժանմունքից կարող են վարակ փոխանցել արդեն վարակից զերծ իրենց հարազատին: Որոշները նույնիսկ ասում էին, թե այդ մտավախությամբ այսօր հրաժարվել են սննդից:

Այսօր նաեւ չի կատարվել նշանակված վիրահատությունը: Արտաթոքային բաժանմունքի ղեկավար Լեւոն Խալաթյանը հրաժարվել է վիրահատարան մտնել:

«Եղբորս նախապատրաստել են վիրահատության, այսօր՝ ժամը 11-ին պետք է վիրահատեին, ու ոչ ոք տիրություն չի անում: Հիմա պատկերացրեք մեր հիվանդի հոգեկան վիճակը: Մարդիկ շրջաններից եկել են, որ սատար կանգնեն նրան, ու՝ անտերություն՝ տնօրենի ու փոխտնօրենի ամբիցիաների ու քմահաճույքի պատճառով: Բժիշկ Խալաթյանն ասում է՝ ես չունեմ անձնակազմ, որոնց հետ կանգնեմ, վիրահատություն անեմ, ողնաշարային բժիշկների անձնակազմին բոլորին կրճատել են: Աշխատողները բունտ են արել: Բժիշկն էլ ասում է՝ էս վիճակով ոնց վիրահատություն անեմ, որովհետեւ իմ ճնշումը բարձրացել է 180-ի: Ու ես չգիտեմ՝ տվյալ դեպքում ինչ կլինի մեր հիվանդի կարգավիճակը, որովհետեւ ինքը (բաժանմունքի վարիչը,-խմբ.) սպառնում է՝ եթե իմ աշխատակազմի գոնե մեծամասնությանը չվերականգնեն իրենց աշխատանքին, ես դիմում կգրեմ, կազատվեմ: Դուք հիմա պատկերացրեք այս հիվանդների վիճակը եւ այսօրվա վիճակը, որ բերեն նոր մասնագետ, որը նոր պիտի ծանոթանա հիվանդի կարգավիճակի հետ, որի հետ մեկ ամիս տառապել է, չարչարվել է բժիշկը, որ հասցնի վիրահատության վիճակին: Էլ չեմ ասում մեր մասին»,- ներկայացրեց Անդրանիկ Ավետյանը:

Արտաթոքային բաժանմունքի ղեկավար Լեւոն Խալաթյանն armtimes.com-ի հարցին պատասխանելով՝ վստահեցրեց, որ ստեղծված իրավիճակի հետեւանքով ճնշումը բարձրացել էր եւ վատ ինքնազգացողության պատճառով է, որ ի վիճակի չի եղել բարդ վիրահատություն կատարել: Ամեն դեպքում նա որոշել է կանգնել աշխատակիցների կողքին եւ պայքարել: Ասաց, որ կենտրոնի տնօրենի հետ քննարկումներ են ընթանում, որպեսզի կրճատումից խուսափեն գոնե բուժաշխատողների մի մասը:  

«Թյուրիմացություն է տեղի ունեցել, ինքն այսօր նախարարությունում է եղել, ամեն ինչը կվերանայվի: Ինձ թվում է՝ վաղը՝ մինչեւ օրվա վերջ ամեն ինչ պարզ կլինի»,- հույս հայտնեց Խալաթյանը: Հարցին, թե տրամաբանակա՞ն է համարում, որ մեկ այլ բաժանմունքի աշխատակիցները միեւնույն ժամանակ աշխատեն կրճատվողների բաժանմունքում, նա պատասխանեց. «Բայց ո՞վ է մեզ հարցնում»: Ապա ավելացրեց. «Իմ կարծիքն է, որ բաժանմունքն անհրաժեշտություն է երկրի, ժողովրդի համար, պետք է պահպանվի եւ աշխատի իր ծավալով: Սա միակ այսպիսի բաժանմունքն է հանրապետությունում, ու այստեղ ծայրահեղ ծանր հիվանդներ են՝ բոլորը ողնաշարային խնդիրներով, անկողնային եւ կարիք ունեն թե՛ վիրահատության, թե՛ խնամքի, թե՛ ամեն ինչի»:

Բուժհաստատությունում խոսվում էր, որ այս օպտիմալացումը կառավարության որդեգրած համապատասխան քաղաքականության արձագանքն է: armtimes.com-ի հարցին՝ զուտ դա՞ է կրճատումների պատճառը, թե կա՞ օբյեկտիվ անհրաժեշտություն, Լեւոն Խալաթյանը պատասխանեց. «Դե հիմա եթե դա մեր կառավարության որոշումն է, որ պետք է օպտիմիզացիա արվի... Ես մեկ «օպտիմիզացիա», մեկ էլ «բարեփոխում» բառերը  որ լսում եմ, սարսափում եմ, որովհետեւ դրանից ոչ մի լավ բան չի սպասվում»:

Թե՛ Խալաթյանը եւ թե՛ Տուբերկուլոզի դեմ պայքարի ազգային կենտրոնի տնօրեն Արմեն Հայրապետյանը հերքեցին պնդումները, որ վարակը կարող է բուժաշխատողների միջոցով մի բաժանմունքից մյուսը տեղափոխվել:  

Տնօրենը, նաեւ խոսելով կրճատումների մասին, հայտարարեց, թե օպտիմալացումն ինքնանպատակ չէ, դա բխում է ինչպես ծառայությունների որակը բարելավելու նպատակից, այնպես էլ այն հանգամանքից, որ տուբերկուլոզով հիվանդացության դեպքերը նվազում են, ու պետք է աշխատել ծախսարդյունավետության սկզբունքով: Նա նշեց, որ օպտիմալացումը շարունակական պրոցես է, եւ տարբեր բաժանմունքներ միավորվել են նաեւ 2014 թվականին:

Հաստատությունում, ըստ Հայրապետյանի, այսօր բուժում է ստանում 90-100 հիվանդ, այնինչ աշխատակիցների թիվը 360-ն է: Նրանցից մոտ 80-ը երկու ամիս առաջ ծանուցվել է նոյեմբերի 1-ին կրճատվելու մասին: Հիմա մտածում են այդ թիվը նվազեցնելու մասին:

armtimes.com-ի հարցին, թե քանի՞ հիվանդի դեպքում է, ըստ չափորոշիչների նախատեսվում ունենալ 360 աշխատակից, Արմեն Հայրապետյանը պատասխանեց, որ այդ համեմատությունը տեղին չէ, չնայած ինքը բուժաշխատողների ու հիվանդների թվի անհամապատասխանությամբ էր փորձում հիմնավորել կրճատումների անհրաժեշտությունը: «Քանի հիվանդով չէ... 30 մահճակալը ունենում է 1 բուժքույրական պոստ, որտեղ 6 հոգի է: Մենք հիմա ունենք 170 մահճակալ»,- նշեց նա:

Ինչ վերաբերում է այսօր նշանակված վիրահատությունը հետաձգվելուն, Տուբերկուլոզի դեմ պայքարի ազգային կենտրոնի ղեկավարը ասաց. «Մի քանի օրից կիրականացվի: Բժիշկն էլ կարող է հիվանդանալ»:

Տպել
4777 դիտում

Դատի տալը ցանկացած քաղաքացու սահմանադրական իրավունքն է. Վանեցյան

Շատ տարբեր իրադարձություններ են արյունաբանական կենտրոնի բացումն ու երկու կենտրոնների միավորումը․ Աննա Հակոբյան

«Իմ քայլը» բարեգործական հիմնադրամի իրականացրած եւ իրականացվելիք ծրագրերը․ ներկայացնում է Աննա Հակոբյանը

Առնվազն զուգարանների հարցը մի քանի մեծ ավտոկայաններում պետք է լուծվի. Աշոտ Մնացականյան

9 մլն պարտք Արցախի հյուրանոցին. 2015-ին նկարահանված Եվա ֆիլմի գումարը հայկական կողմը մինչեւ օրս չի վճարել

«Ժպիտների քաղաք» հիմնադրամը քաղցկեղով հիվանդ 100 երեխաների բուժման համար գործունեության 5 ամիսներին ծախսել է 70 մլն դրամ

«Իմ քայլը» հիմնադրամի հաշվեհամարին իր գործունեության վեց ամսվա ընթացքում մուտք է եղել 859 մլն 55 հազար դրամ․ Ա․ Հակոբյան

ԵՊՀ-ում կատարած բացահայտումների ամբողջ ծավալը չէ, որ ներառված է հետաքննության այս փուլում. ՊՎԾ

Տեղեկատվությունը չի համապատասխանում իրականությանը. Աննա Նաղդալյան

ԵԱՀԿ ՄԽ համանախագահներն Ալիեւի հետ քննարկել են ԼՂ հակամարտության կարգավորման հեռանկարները

Պետք է հնարավոր պայմանները ստեղծենք, որ մեր դատավորները սրա-նրա ձեռքին նայելու անհրաժեշտություն չունենան․ վարչապետ

Գարեգին Բ-ն հանդիպում է ունեցել վերապատրաստման դասընթացներին մասնակցող եկեղեցականների հետ

Կառավարությունը որոշեց․ դատավորներն ու ԲԴԽ անդամները կներառվեն սոցփաթեթի շահառուների շրջանակում

ԱՆ-ը հրապարակել է չարորակ հիվանդությունների բուժումն անվճար իրականացնող բուժհաստատությունների ցանկը

«ՀԱՅԲԻԶՆԵՍԲԱՆԿ» ՓԲԸ խորհրդի նախագահ է նշանակվել Արսեն Միքայելյանը  

Վարչապետի որոշմամբ Արմինե Մարգարյանը նշանակվել է Անվտանգության խորհրդի գրասենյակի ղեկավար

Փակ է լինելու «Թումանյան» կայարանից Օձունի խաչմերուկ ճանապարհահատվածը․ պայթեցման աշխատանքներ են ընթանում

Գործադիրը հավանություն չտվեց ԲՀԿ-ական պատգամավորների՝ «Արհմիությունների մասին» օրենքում փոփոխություն կատարելու նախագծին

30 փամփուշտ, պարկուճներ, վնասված Lexus․ ինքնաձիգի գործադրմամբ սպանության փորձ՝ Տավուշում

Արամ Սիմոնյանն ասել է, որ եթե իր դեմ քրգործ հարուցվի, ԵՊՀ-ն պետք է պաշտպանվելու համար․ նախարար (տեսանյութ)