Նոր կյանքի նախկին գյուղապետն ու մանկապարտեզի նախկին տնօրենը հայտնվել են դատարանում

Արարատի մարզի Նոր կյանքի նախկին գյուղապետ, այժմ Արարատի մարզպետարանի աշխատակազմի ղեկավարի պաշտոնակատար Մայիս Աբրահամյանը եւ Նոր կյանքի մանկապարտեզի նախկին տնօրեն Քնարիկ Ամիրյանը հայտնվել են դատարանում:

Ավելի վաղ տեղեկացրել էինք, որ Նոր կյանքի գյուղապետ Գարիկ Սարգսյանը դիմել էր դատախազություն, որպեսզի ուսումնասիրվեր մանկապարտեզի նախկին տնօրենի եւ նախկին գյուղապետի մասնակցությամբ բացահայտված հնարավոր կեղծիքները: Համայնքի նախկին ղեկավար Մայիս Աբրահամյանի մասով քրգործ չէր հարուցվել, իսկ մանկապարտեզի նախկին տնօրեն Քնարիկ Ամիրյանի մասով հարուցվել էր: Բացի դա Քնարի Ամիրյանը գործող գյուղապետ Գարիկ Սարգսյանի հասցեին մեղադրանքներ էր հնչեցրել, իսկ Սարգսյանը դիմել էր իրավապահներին՝ պահանջելով սուտ մատնության հատկանիշով քրգործ հարուցել, սակայն ոստիկանությունը քրեական գործ հարուցելը մերժել էր:

Նոր կյանքի գյուղապետը արդեն մի քանի ամիս է դատական կարգով առանձին-առանձին բողոքարկում է ոստիկանության Արարատի բաժնի կողմից կայացված երկու որոշումները: Գարիկ Սարգսյանի փաստաբան Ռուսամ Բադասյանն armtimes.com-ի հետ զրույցում ասաց, որ այսօր Վայոց ձորի եւ Արարատի մարզի ընդհանուր իրավասության դատարանում (նստավայրը Վեդի) երկու գործով էլ նիստ է կայացել: «Այսօր դատարանում քննարկվում էր քրեական գործ չհարուցելու երկու որոշում: Մեկը վերաբերվում էր ավագանու նիստերի արձանագրությունները կեղծելու եւ պաշտոնական լիազորություններն անցելու վերաբերյալ մեր հայտնած տվյալների հիման վրա քրեական գործի հարուցումը մերժվելուն: Նախորդ դատական նիստը չէր կայացել, քանի որ շահագրգիռ անձինք պետք է ներգրավվեին: Այդ դեպքում նախկին համայնքապետ Մայիս Աբրահամյանն էր, որն այսօրվա դատական նիստին ներկայացել էր, իր դիրքորոշումը հայտնեց բողոքի վերաբերյալ»,- ասաց Ռուստամ Բադասյանը՝ նշելով, որ ինքը միջնորդել էր, որպեսզի դատական նիստն անցներ դռնփակ ռեժմիով: Փաստաբանն իր այս միջնորդությունը պայմանավորեց նրանով, որ եթե քրեական գործի հարուցումը մերժելու մասին որոշումը վերացվի, նոր քննություն ընթանա, ապա ներկայիս հնարավոր հրապարակայնությունը հետագայում կխանգարի նախաքննությանը:

Անդրադառնալով դատավարական հսկողություն իրականացրած դատախազի դիրքորոշմանը, փաստաբանը տարակուսանք հայտնեց: «Վերջինս նշում էր, թե ի՞նչ կապ ունի՝ գյուղապետն ոււմ է օտարել համայնքի գույքը: Իր դստե՞րը, կնոջը, թե՞, օրինակ՝ Պողոսին: Կարծում եմ՝ նույնիսկ մեկնաբանության կարիք չունի, թե ինչ կարեւոր նշանակություն ունի այն հանգամանքը, թե պաշտոնատար անձն ում է օտարել հողամասը: Դա քրեական գործով առանցքային նշանակություն ունեցող փաստ է, որն ուսումնասիրության կարիք ունի: Հենց դրանով է հիմնավորվում, թե արդյո՞ք մարդը կարող էր ունենալ շահագրգռվածություն ավագանու նիստն անցկացնելու, չանցկացնելու, կեղծելու մասով»,- ասաց Ռուստամ Բադասյանը՝ պնդելով, որ քրեական գործը պետք է հարուցված լիներ եւ չպետք  է ոստիկանությունը բավարարվեր ավագանու անդամների բացատրություներով, այլ պետք է հարուցվեր քրեական գործ եւ դատաձեռագրաբանական մի շարք փորձաքննություններ անցկացվեր՝ պարզելու համար, թե արդյո՞ք ավագանու անդամներն իսկապես ստորագրել են ավագանու արձանագրությունների տակ: Բադասյանն նկատում է, որ Մայիս Աբրահամյանի եւ Քնարիկ Ամիրյանի նախկին գործունեության վերաբերյալ կատարված բացահայտումներից հետո միայն Քնարիկ Ամիրյանի մասով քրական գործ հարուցվեց, դատաձեռագրաբանական փորձաքննություն նշանակվեց, իսկ Մայիս Աբրահամյանի մասով՝ ոչ:

Նոր կյանք գյուղի մանկապարտեզի նախկին տնօրենի մասնակցությամբ այսօր տեղի ունեցած մյուս դատական գործի ժամանակ կրկին քննության առարկա է դարձել ոստիկանության կողմից քրեական գործ հարուցելը մերժելու մասին որոշումը: Այդ նիստին ներկա է եղել նախկին տնօրեն Քնարիկ Ամիրյանը: «Վերջինս իր դիրքորոշումը հայտնեց: Այստեղ եւս դատախազի գործողությունները, արտահայտած մտքերը բավական տարակուսանք են առաջացնում: Միակ հիմքը, որով քրեական գործը հարուցելու պահանջը մերժվել է, այն է, որ Քնարիկ Ամիրյանը բացատրություն է տվել, որ ինքը դիտավորություն չի ունեցել սուտ մատնություն կատարելու: Այսինքն, ոստիկանությունն ու դատախազությունը բավարարվում են ընդամենը մարդու գրավոր բացատրություներով, որտեղ հայտնում են՝ ոչ, մենք հանցագործությւոն չենք կատարել: Դա նույնն է, որ սպանություն կամ բռնաբարություն կատարելու մեջ կասկածվողին հրավիրեն եւ հարցնեն՝ սպանություն, բռնաբարություն կատարե՞լ եք, ասի՝ ոչ ու մերժեն քրեական գործ հարուցելու պահանջը: Առնվազն լուրջ չէ»,- նկատեց Գարիկ Սարգսյանի փաստաբանը:

Երկու գործով էլ հաջորդ նիստը նշանակվել է դեկտեմբերի 1-ին, որին պետք է ներկա լինեն նաեւ ոստիկանության աշխատակիցները, որոնք մերժել են քրեական գործ հարուցելու պահանջը: «Դատարանում մենք չառարկեցինք, որ ոստիկանության ներկայացուցիչների բացակայությամբ շարունակվի գործի քննությունը: Դատարանը հարկ համարեց ոստիկանության ներկայացուցիչներին ներգրավել գործով եւ այդ նպատակով նիստը հետաձգվեց եւ հրավիրվեց դեկտեմբերի 1-ին»,- եզրափակեց Ռուստամ Բադասյանը: