Առաջինը Քոչարյանին պիտի սպանեին

10/07/2010 schedule09:27

Վերը բերված մեջբերումը մի հատված է անցած տարվա մայիսի 23-ին ՀՀ պետական եկամուտների կոմիտեի նախագահ Գագիկ Խաչատրյանի դեմ մահափորձ կազմակերպելու դեպքի առիթով հարուցված քրեական գործի մեղադրականից: Այս գործով դատավարությունը, որը ընթանում է Կենտրոն եւ Նորք-Մարաշ վարչական շրջանների ընդհանուր իրավասության դատարանում` դատավոր Գագիկ Ավետիսյանի նախագահությամբ, երեկ վերսկսվեց: Գործով ամբաստանյալի աթոռին են նստած ՀՀ նախկին ՆԳՆ «Չղջիկներ» ջոկատի հրամանատար Գագիկ Մաթեւոսյանը (Մուսկուլ Գագո), նրա զինակիցներ Վազգեն Կարապետյանը, Արայիկ Ոսկանյանը եւ Գրիգոր Գրիգորյանը, ինչպես նաեւ` Արտակ Ղուկասյանը եւ Ռաֆայել Մասումյանը (երգիչ Աֆոն): Նրանց մեղադրանք է առաջադրված ՀՀ քրեական օրենսգրքի մի քանի հոդվածներով` սպանության փորձ, պետական գործչի սպանության փորձ եւ այսպես շարունակ: Մինչ Ռոբերտ Քոչարյանի եւ Սերժ Սարգսյանի նկատմամբ մահափորձի մտադրության վարկածի մանրամասներին անդրադառնալը հիշեցնենք, որ Գագիկ Խաչատրյանի նկատմամբ կազմակերպված մահափորձն, ըստ մեղադրանքի, իբր կազմակերպվել է Արաբկիրի նախկին թաղապետ Ալբերտ Երիցյանի որդու` Ռոբերտ Երիցյանի պատվերով, ով դրա համար 150 հազար դոլար է վճարել: Նա Գագիկ Խաչատրյանի դեմ թշնամացած է եղել այն բանից հետո, երբ վերջինս, որպես մաքսային կոմիտեի նախագահի պաշտոնակատար, 2008-ի ապրիլին Սերժ Սարգսյանի մոտ կազմակերպված խորհրդակցության ժամանակ իրեն նվաստացրել է: Այդ միջադեպից հետո Ռոբերտ Երիցյանն ազատվել է ՀՀ մաքսային կոմիտեի մաքսանենգության դեմ պայքարի վարչության պետի պաշտոնից: Խաչատրյանի դեմ մահափորձ պետք է իրականացվեր վերջինիս տան հարեւանությամբ անավարտ շինությունում տեղադրված ռումբը պայթեցնելու միջոցով: Սակայն շինության պահակի կողմից պայթուցիկը հայտնաբերվելու պատճառով մահափորձը ձախողվել էր: Նախկինում անդրադարձել ենք այս գործի` Ռոբերտ Քոչարյանի եւ Սերժ Սարգսյանի դեմ իբր մահափորձ կազմակերպելու վարկածին: Նախնական տարբերակով նման մտադրությունը նախաքննության մարմինը, ավելի կոնկրետ` ՀՀ ԱԱԾ-ն, փորձել էր ներկայացնել, իբր Գագիկ Մաթեւոսյանի ընդդիմադիր գործիչների հետ ունեցած կապերի արդյունք: Գործի նյութերում, մասնավորապես հարցաքննությունների ընթացքում նույնիսկ ՀՀ առաջին նախագահ Լեւոն Տեր-Պետրոսյանի անունն է հնչեցվել: Բայց Մաթեւոսյանին ընդդիմության հետ կապելու տարբերակը հօդս էր ցնդել, քանի որ նա առերես հարցաքննություններից մեկի ժամանակ նշել էր իր եւ Սերժ Սարգսյանի եղբոր` Սաշիկ Սարգսյանի մտերիմ հարաբերությունների մասին: Արդյունքում, ԱԱԾ-ն հրաժարվել էր Մաթեւոսյանին որպես «ընդդիմության քիլլեր» ներկայացնելու տարբերակից, բայց «դարի մահափորձի» վարկածից չեն հրաժարվել, եւ այն տեղ է գտել նաեւ մեղադրականում: Ըստ այդմ, Քոչարյանի եւ Սարգսյանի մահափորձերը պետք է իրականացվեին «աստրոլիտ» անունով ինչ-որ հատուկ հեղուկ պայթուցիկով, որի մասին Արտակ Ղուկասյանն իմացել է ինտերնետից: Այն փշրտող (ըստ մեղադրականի) գործողության պայթուցիկ է, որը հեղուկ վիճակում` գետնին լցվելուց եւ չորանալուց հետո 3-4 օր կարող է պահպանել պայթունավտանգ բոլոր հատկությունները` նույնիսկ անձրեւի ազդեցությունից հետո: Արտակ Ղուկասյանն իբր փորձել է տնայնագործական պայմաններում պատրաստել այդ նյութը, բայց ի վերջո նրան չի հաջողվել այդ անել: Իսկ Ռոբերտ Քոչարյանին եւ Սերժ Սարգսյանին պայթեցնելու բուն արարողությունը, ըստ մեղադրականի, պետք է տեղի ունենար հետեւյալ կերպ. նախ այդ «հրաշք հեղուկը» պետք է լցվեր Ռոբերտ Քոչարյանի ավտոմեքենայի ճանապարհին եւ պայթեցվեր հեռակառավարվող պայթուցիչով: Իսկ արդեն Ռոբերտ Քոչարյանի թաղման ժամանակ պետք է նույն հեղուկով մշակվեր գերեզմանատեղին եւ հարակից տարածքն ու պայթեցվեր: Այլ կերպ ասած, ըստ մեղադրականի, Գագիկ Մաթեւոսյանն իբր իշխանական վերնախավի ցեղասպանության պես մի բան է ցանկացել անել: Այսպիսի սահմռկեցուցիչ սցենար ներկայացնելուց հետո մեղադրականում նշվում է, որ երբ նյութը պատրաստվել է ու փորձարկվել, պարզվել է, որ այն պատրաստ չէ: «Այդ իսկ պատճառով Գագիկ Մաթեւոսյանի կողմից որոշվել է հանցավոր մտադրության իրականացումը հետաձգել` մինչեւ այլ հանցագործությունների կատարման արդյունքում ստացված եկամուտների հաշվին հագեցված լաբորատորիայում անհրաժեշտ ուժգնության պայթուցիկ նյութի ստացումը, սակայն հետագայում` ընդհուպ մինչեւ ձերբակալվելն, այդ ուղղությամբ որեւէ լրացուցիչ գործողություններ չեն հասցրել կատարել»,- նշված է մեղադրականում: Գագիկ Մաթեւոսյանին եւ նրա ընկերներին վերագրվող հաջորդ չհաջողված մահափորձը, ըստ մեղադրականի, նախատեսված է եղել իրականացնել ՀՀ տրանսպորտի եւ կապի փոխնախարար Հրանտ Բեգլարյանի դեմ` 2007-ի աշնանը: Սակայն մոտիվը ոչ թե վերջինիս պաշտոնական դիրքն է եղել, այլ բիզնեսը, քանի որ Հրանտ Բեգլարյանը «Մետրոշինվերանորոգում» ՓԲԸ-ի երեք հիմնադիրներից մեկն է: Ըստ մեղադրականի, Գագիկ Մաթեւոսյանն Արտակ Ղուկասյանին ասել է, թե Բեգլարյանի սպանության համար իրենց վճարելու են 100 հազար դոլար: Սակայն այն այդպես էլ չի իրականացվել, չնայած, անհրաժեշտ բոլոր տվյալները զոհի առօրյայի վերաբերյալ ճշտված են եղել: Մեղադրականում ակնարկ կա նաեւ Գագիկ Մաթեւոսյանի եւ նրա ընկերների ՀՀ հարկային պետական ծառայության օպերատիվ հետախուզության վարչության նախկին պետ Շահեն Հովասափյանի սպանության հետ կապ ունենալու մասին: Ավելին, չնայած Հովասափյանը 2006-ի սեպտեմբերի 6-ին սպանվել է, բայց Մաթեւոսյանը մեղադրվում է Հովասափյանի դեմ մահափորձ կազմակերպելու մեջ: Իհարկե, մեղադրականում խոսվում է նաեւ ուրիշ «ծրագրված», բայց այդպես էլ չիրականացված հանցագործությունների մասին, սակայն դրանցում արծարծվող անունները հնչեղ չեն: Մյուս կողմից, այս գործով մեղադրականի հետ ծանոթանալուց հետո այնպիսի տպավորություն է ստեղծվում, որ Գագիկ Մաթեւոսյանը եւ նրա ընկերները չհաջողված մահափորձերի եւ կողոպուտների մասնագետներ են, ովքեր ինչ-որ բաներ են պարբերաբար ծրագրել, այդ նպատակով գումարներ են ծախսել, բայց այդպես էլ իրենց նպատակները չեն իրագործել: Երեկվա դատական նիստում մեղադրող դատախազ Հովսեփ Սարգսյանը հրապարակեց մեղադրական եզրակացությունը: Դատավորի այն հարցին, թե արդյոք դուք ձեզ մեղավոր ճանաչում եք, բոլոր ամբաստանյալները, բացառությամբ Արայիկ Ղուկասյանի, միաբերան բացասական պատասխան տվեցին` նշելով, որ գործը սարքված է: Իսկ Արտակ Ղուկասյանը հայտարարեց, թե ինքը հետագայում իր դիրքորոշումը կհայտնի: Վերջինիս նման պատասխանը ինչ-որ տեղ անսպասելի էր, քանի որ նա նախաքննության ընթացքում ոչ միայն իրեն մեղավոր է ճանաչել, այլ մեղադրանքի հիմքում դրված բոլոր վարկածներն ու պնդումները վերցված են հենց նրա ցուցմունքներից: Նա ցուցմունք տալու հարցում որեւէ կերպ չի կաշկանդվել եւ գրել ու գրել է: Թերեւս, դրանով էր պայմանավորված այն հանգամանքը, որ դատարանի դահլիճում երեկ նրան ընդհանուր ամբաստանյալներից առանձին էին նստեցրել` այնպես, որ կարելի էր կարծել նա ոչ թե մեղադրյալ է, այլ գործով տուժող: ՎԱՀԱԳՆ ՀՈՎԱԿԻՄՅԱՆ

Տպել
1406 դիտում

Քաղաքացիների ուղարկած խախտումների լուսանկարներն ու տեսանյութերը վարչապետը հրապարակել է ֆեյսբուքյան իր էջում

Կապանի գործով տուժողի նկատմամբ անվտանգության միջոց է կիրառվել. պաշտպանական կողմը աննախադեպ է որակում

Բժիշկները պայքարում են արդեն 50 օր թոքերի արհեստական օդափոխության սարքով շնչող պացիենտի կյանքի համար. Գևորգ Սիմոնյան

Եվրամիությունն այնքան էլ ուրախ չէ G7-ի կազմում Ռուսաստանին հետ կանչելու Թրամփի առաջարկով

Պարետի որոշմամբ ՀՀ-ում կարգելվեն շղթայական ռեակցիայի (ՊՇՌ) մեթոդով լաբորատոր հետազոտությունները

Դժգոհ չենք լինի, եթե այս տարի ՀՀ-ում ներքին զբոսաշրջության 150 տոկոս աճ ունենանք, 2019-ին 41 տոկոս ունեինք. վարչապետ

Խնդրում եմ հակահամաճարակային կանոնների խախտման դեպքերը նկարահանեք եւ ուղարկեք իմ ֆեյսբուքյան էջին. վարչապետ

Վանաձորի «Գլորիա» ֆաբրիկան պարետի որոշմամբ վաղը առավոտից կփակվի 72 ժամով. վարչապետ

Այրվել են Թումանյան եւ Նալբանդյան խաչմերուկում տեղադրված 4 աղբամանները. հրդեհողները 26-ամյա տղա ու 23-ամյա աղջիկ են

Երկրում դե յուրե շատ խիստ ռեժիմ է սահմանված այսօր, խնդիրը դե ֆակտոյի մեջ է. վարչապետ

Վանաձորի «Գլորիա» ֆաբրիկայի աշխատողները տեղափոխվում են գերբեռնված ավտոբուսով. վարչապետը լուսանկար է հրապարակել

Sputnik-ի պրոդյուսերից բացի, ԱՄՆ-ում տուժել են այլ ԶԼՄ-ների աշխատակիցներ. նահանգապետը ներողություն է խնդրել (տեսանյութ)

Դեպի ԵՄ երկրներ թռիչքների արգելքը չի վերաբերում միջազգային ավիաընկերություններին. քաղավիացիայի կոմիտեի արձագանքը

Իրավապահների վրա առանձնակի պատասխանատվություն է դրված. սահմանված կանոնների խախտումներին կլինի կոշտ ու չոր վերաբերմունք

Հայկական ավիացիայի մուտքը Եվրոպական Միության օդային տարածք արգելվեց. Հայաստանն այդպիսի 16 երկրներից մեկն է

Արարատ Միրզոյանը եւ իր ընտանիքի անդամները կորոնավիրուսի թեստ են հանձնել, պատասխանները բացասական են

Ուժեղացված վերահսկողություն է իրականացվել Մալաթիա-Սեբաստիա վարչական շրջանի նախադպրոցական ուսումնական հաստատություններում

Մարտի համեմատությամբ կորոնավիրուսային հիվանդության դեպքերն ապրիլին աճել են 3, մայիսին՝ 13 անգամ. ՀՎԿԱԿ տնօրեն

12 մարզադաշտերը, որոնք 10 օրից պետք է սկսեին ընդունել Եվրո 2020-ի խաղերը, եթե չլիներ կորոնավիրուսը

Կայացվել է 1393 կազմակերպության գործունեության դադարեցման որոշում