Այս սեփականատերերի ձեռը կրակն ենք ընկել. Երևանի փոխքաղաքապետ Կամո Արեյանը գետնանցումում էր

Երեւանի քաղաքապետի առաջին տեղակալ Կամո Արեյանին այսօր առավոտյան հանդիպեցինք Գրիգոր Լուսավորիչ-Հակոբ Պարոնյան փողոցների խաչմերուկի ստորգետնյա անցումում:

Սա մի տարածք է, որը հայտնի է իր գարշահոտությամբ, անբարեկարգ վիճակով ու նաեւ ոչ անվտանգ լինելով: Մինչդեռ վերջին տարիներին այն, իբր թե վերանորոգվել է: Քաղաքապետարանից մեր հարցմանն այդ ընթացքում պատասխանել էին, որ վերանորոգման աշխատանքների համար հատկացվել է 19 միլիոն դրամ, ինչն այդ ժամանակ համարժեք էր 45 հազար ԱՄՆ դոլարին:

Փոխքաղաքապետին խնդրի շուրջ մի քանի հարց ուղղեցինք:

- Պարոն Արեյան, մարդիկ Ձեզ այստեղ հաճախ են տեսնում: Ի՞նչ նպատակով եք այցելում:

- Ճիշտն ասած՝ ուզում ենք սա կարգի բերել (ձեռքով ցույց է տալիս տարածքի քիչ թե շատ փակ ու ավերված հատվածը, որտեղ նախկինում, թերեւս խանութներ են գործել- Ա.Զ.): Սեփականատեր ունի սա: Կարծես դարձել է իմ անձնական հսկողության թեման՝ մաքրություն, հիգիենիկ վիճակ, ախտահանում: Ուղղակի այս սեփականատետերի ձեռը կրակն ենք ընկել: Պետք է հրավիրեմ, ասեմ՝ կարգի բերեք ձեր սեփականությունը: Սա էլ է սեփականություն, նա էլ, այն մյուսն էլ:

- Կարծեմ թե, բավական ժամանակ է՝ ունեք այդ նպատակը, ու սայլը տեղից չի շարժվում:

- Չի կարողանում, ասում է՝ ես միջոցներ չունեմ կառուցելու, մաքրելու: Ասում եմ՝ գոնե բեր, ցանկապատիր, ապահով վիճակ ստեղծվի, մնացածը մնա հետիոնտնի համար նորմալ տարածք:

- Ովքեր են սեփականատերերը: Երեքն էլ տարբե՞ր են:  

- Չեմ էլ ճանաչում: Այո, տարբեր: Երկու տարբեր անձինք են, բայց հիմնականը սրա տերն է: Երկու անգամ ընդունել եմ, մարդավարի, քաղաքավարի, օրենքով, կարգով բացատրել՝ ձեր սեփականությունը բերեք պատշաճ տեսքի, որ մենք կարողանանք լուսավորություն եւ մաքրությունն ապահովել: Հիմա նորից նախատեսվում է այս պատերը մաքրել տարեմուտին, որ կարողանք նաեւ լուսավորությունը միշտ պահել հսկողության տակ: Իրենց (սեփականատերերի-Ա.Զ.) պատճառով լուսավորությունը գրեթե ամեն շաբաթ մենք նորոգում ենք:

- Ինչո՞ւ իրենց պատճառով:

- Որովհետեւ տարբեր ցանկությունների տեր մարդկանց համար գիշերը շատ հարմար տեղ է սա: Ջարդում են, որպեսզի գիշերեն այստեղ: Մի խոսքով՝ ուզում ենք այս ամբողջը կարգի բերել ե՛ւ սանիտարահիգիենիկ, ե՛ւ բարեկարգման տեսանկյունից, մինչեւ կիրճի ափը:

- Ամենաշատը 5 տարի առաջ այս տարածքի վերանորոգման համար 45 հազար դոլարի չափով գումար պիտի ծախսված լիներ: Այստեղ դուք տեսնո՞ւմ եք 45 հազար դոլարի աշխատանք:

- Վերանորոգում մեկ անգամ ենք արել, ես չգիտեմ՝ 45 հազար դոլարը ով է հորինել:

- Քաղաքապետարանից մեր հարցմանն են ժամանակին պատասխանել:

- Մեր բյուջետային ֆինանսավորումները դրամով է: 2013 թվականին էր, այո, հիմնական աշխատանքներն արվել են՝ պատերը, հենապատերը, թասակները, բոլոր աստիճանավանդակները կարգի էին բերվել: Բայց սա ունի խրոնիկ թերություն՝ կապիտալ մասով: Սրա ծածկույթը վատն է եւ անընդհատ ջրեր են ներթափանցում: Հիմա էն մի թեւը, որ նայեք, ծեփը թափվել է:

- Տեսել ենք, ու դա նաեւ վտանգավոր է մարդկանց համար:

-  Իմ մասնագիտական կարծիքն այն է, որ ամբողջովին՝ կապիտալ պետք է փոխվի սրա ծածկը: Դրա անալոգը Իսահակյան-Աբովյան-Մոսկովյան միջանկյալ հատվածում ստորգետնյա անցումն է: Հին ստորգետնյա անցում է: Նույն խնդիրն ուներ, որի սեփականտերը հիմնովին կատարեց ջրամեկուսացումը:

- Հիմա եթե այս դեպքում մարդն ասում է՝ գումար չունի ու ոնց որ թե պարտավորություն էլ չունի տարածքը կարգի բերելու, ինչ է անելու քաղաքապետարանը:  

- Պարտավորություն ունի, օրենքի առաջ պարտավոր է իր սեփական գույքը պատշաճ պահելու: Սա օրենքի պահանջ է: Պերմանենտ եթե մենք իրեն անընդհատ վարչական տուգանքի ենթարկենք... Բայց հրավիրել ենք քաղաքապետարան, պահանջ ենք դրել, որ կարգի բերի իր սեփականությունը: Եթե ոչ, ստիպված ենք մենք մեր հերթին միջամտել՝ հարցին իրավական լուծում տալու առումով եւ, ինչու չէ, միջոցներ ձեռնարկել՝ այս հակահիգիենիկ վիճակն այստեղից վերացնելու համար ինչ-որ պատնեշ տեղադրել: Պարզ ասեմ՝ հանուն քաղաքի, հանուն բնակչի ստիպված ենք մենք համագործակցել նաեւ իրենց հետ եւ կարգի բերել: Իսկ ինչ մնում է խնդրին, խնդիրը շատ հստակ է, այստեղ կապիտալ պետք է փոխվի ծածկը:

- «Պետք է» ճիշտ լինելո՞ւ իմաստով, թե՞ նաեւ նախատեսվում է:

- Նախատեսել ենք հետագայում համալիր սրա օգտագործումը դարձնել ավելի բարեկարգ, նորմալ, հիգիենիկ վիճակում:

- 2018-ի բյուջեի նախագծում դա կա՞:

- Չէ, այդպիսի կապիտալ աշխատանք չկա, բայց կաշխատենք ձեւ գտնել գոնե որոշ հատվածներում ջրամեկուսացման խնդիրը լուծելու: