Լոռիում նախորդ տարի թրաֆիքինգի դեպք է արձանագրվել

2017թ. ընթացքում Վանաձորում արձանագրվել է թրաֆիքինգի 1 դեպք: Ուսումնասիրելով Ոստիկանության Լոռու մարզային վարչության տարեկան հաշվետվությունը, տեղեկանում ենք, որ դեպքը տեղի է ունեցել Վանաձորի Բազումի բաժնում:

Մարզում նախորդ տարի արձանագրվել են սեռական անձեռնմխելիության դեմ ուղղված 3 հանցագործություն, որոնցից մեկը, որը տեղի է ունեցել Վանաձորում, շարունակում է մնալ չբացահայտված: 2016թ.-ի համեմատությամբ դեպքերը 5-ով նվազել են: Նշված սեռական անձեռնմխելիության դեմ ուղղված հանցագործություններից 1-ը բռնաբարության կամ բռնաբարության փորձի դեպք է:

Մեկ տարվա ընթացքում մարզում արձանագրվել են կոռուպցիոն բնույթի 44 հանցագործություն, որոնցից 5-ը՝ Վանաձորում, 5-ը՝ Սպիտակի տարածաշրջանում, 10-ը՝ Ստեփանավանի, 10-ը՝ Տաշիրի, 4-ը՝ Թումանյանի:

Արձանագրված կոռուպցիոն բնույթի հանցագործություններից 6-ը յուրացման դեպքեր են, 3-ը՝ կաշառքի հետ կապված, 12-ը` պաշտոնեական լիազորությունների չարաշահման, 3-ը պաշտոնեական լիազորությունների անցման, 7-ը` պաշտոնեական կեղծիքի, 2-ը՝ պաշտոնեական անփութության, 4-ը՝ պաշտոնեական դիրքի օգտագործմամբ անօրինական միգրացիայի կազմակերպման, 2-ը համակարգչային տեխնիկայի միջոցով հափշտակություն դեպքեր են, 4-ը առեւտրային կամ այլ կազմակերպությունների ծառայողների կողմից լիազորությունները չարաշահելու դեպքեր են: 2016թ.-ին մարզում արձանագրվել են կոռուպցիոն բնույթի 35 հանցագործություն:

Հայտնաբերվել է թմրամիջոցների ապօրինի շրջանառության 58 դեպք, որոնցից 16-ը՝ իրացման: 2016թ.-ի հետ համեմատած դեպքերի թիվը նույնն է, միայն իրացման դեպքերն են աճել 2-ով:

Հայտնաբերված դեպքերով առգրավվել է 0.844 գր. կոդեին, 2487.43 գր մարիխուանա, 0.44 գր հաշիշ, 0.155 գր. հոգեմետ դեղամիջոց /ֆենոբարբիտալ/, 0.032 գր. այլ թմրամիջոցներ 22.9 գր. քացախաթթվի անհիդրիդ: 

2017թ. ընթացքում Լոռիում գրանցվել է հրազենի ապօրինի շրջանառության 72 դեպք, նախորդ տարվա 64-ի դիմաց: 72 դեպքերից 31-ը գրանցվել է Վանաձորում:

Հայտնաբերվել եւ առգրավվել է 6 անվանում 12 միավոր զենք, 4 անվանում զինամթերք, այդ թվում՝ 4 հատ ատրճանակ, 2 հատ ինքնաձիգ, 2 հատ ողորկափող հրացան, 2 հատ ակոսավոր հրացան, 1 հատ ինքնաշեն հրացան, 1 հատ այլ զենք, 1 հատ ճայթիչ, 7գր. պայթուցիկ նյութ, 8 հատ սառը զենք եւ 219 հատ տարբեր տրամաչափի փամփուշտներ:

2017թ. ընթացքում տարված բացատրական աշխատանքների արդյունքում գրանցվել է զենք զինամթերքի կամավոր հանձնման 80 դեպք: