Ներկա-բացակա. կոճակ սեղմողները աշխատել են գերազանց 

13/06/2018 schedule14:25

Տպագրվել է «Հայկական Ժամանակ» օրաթերթի՝ 2005 թվականի հունիսի 10-ի համարում

Ինչքան վատ է աշխատում մեր խորհրդարանը, այնքան ԱԺ քարտուղարության տրամադրած տեղեկանքը՝ պատգամավորների բացակայությունների վերաբերյալ, գնալով հուսադրող է դառնում: Անցած՝ գարնանային նստաշրջանում նախատեսված էր խորհրդարանի 6 հերթական նիստ, որից երկուսը տեղի չի ունեցել քվորումի բացակայության պատճառով, իսկ մնացած նիստերն էլ մի կերպ էին կազմակերպվում՝  գրանցման քվեարկությունները մի քանի անգամ կրկնելուց եւ իրար փոխարեն գրանցվելուց հետո: Ու մինչ լրագրողները կանխատեսում էին, որ գարնանային նստաշրջանում անհարգելի բացակայած պատգամավորների թիվը, չհաշված ընդդիմադիրներին, անցնելու է մեկ տասնյակը, երեկ պարզեցինք, որ  պատգամավորներն աշխատել են իրենց չխնայելով:

Համենայնդեպս, բացականեր, բացի «Արդարություն» եւ «Ազգային միաբանություն» խմբակցություններից, գրեթե չկան: Ու եթե ընդամենը երկու պատգամավորի՝ Գագիկ Ծառուկյանի եւ Մխիթար Վարագյանի դեպքում է ԱԺ քարտուղարությունը տեղեկանք տրամադրել, որ վերջիններս չեն մասնակցել քվեարկությունների կեսից ավելիին, ապա բազմաթիվ այլ պատգամավորներ, որոնք եւս անհիշելի ժամանակներից ոտք չեն դրել խորհրդարան, պարզվում է, ոչ միայն ներկա են եղել նիստերին, այլ նաեւ մասնակցել են բոլոր քվեարկություններին:

Մասնավորապես, եթե որեւէ մեկին թվում է, թե խորհրդարանում ինքը գրեթե չի տեսել, կամ՝ քվեարկությունների կեսին հաստատ չեն մասնակցել պատգամավորներ Ալեքսանյան Սամվելը, Արզաքանցյան Տիգրանը, Գուլոյան Մուրադը, Գեւորգյան Նահապետը, Հակոբյան Գեւորգը, Հակոբյան Հակոբը (Lեդի), Համբարձումյան Արկադին, Հայրապետյան Ռուբենը, Մանուկյան Աբրահամը, Միքայելյան Սասունը, Մխիթարյան Արշակը, Սահակյան Սամվելը, Սարգսյան Ալեքսանդրը, Սարգսյան Լեւոնն ու Փամբուկյանը Հարությունը, ապա նման բան մտածողները լուրջ թյուրիմացության մեջ են, քանզի, ինչպես ասում է ԱԺ քարտուղարության պետ Թաթուլ Սողոմոնյանը՝ կա համակարգիչ, որի տրամադրած արդյունքի համաձայն, այդ պատգամավորները չեն բացակայել, անկախ նրանից՝ ընդհանրապես մտե՞լ են խորհրդարանի շենք, թե՞ ոչ:

Իսկ որ պատգամավորների վերոնշյալ խումբն անցած նստաշրջանում խորհրդարանում գրեթե չի երեւացել, դա ապացուցելու համար համակարգչին հղումն անելն անիմաստ է: Նրանք չեն երեւացել, սակայն նրանց բոլոր կոճակները պարտաճանաչորեն սեղմվել են այդ գործում մեր խորհրդարանում առկա բազմաթիվ պրոֆեսիոնալների կողմից, որոնցից շատերն արդեն յուրացրել են մի մատով իրենց, արմունկով՝ կողքինի կոճակը սեղմելու մասնագիտական նրբությունները: Ինչ վերաբերում է Գագիկ Ծառուկյանին եւ Մխիթար Վարագյանին, ապա, մեզ հասած տեղեկությամբ, ԱԺ-ում կոճակ սեղմելու «գործ» դրած պատգամավորներից մեկը նրանց եւս առաջարկել է իր ծառայությունները, սակայն վերջիններս հրաժարվել են: Համենայնդեպս, երեկ թե՛ Ծառուկյանի եւ թե՛ Վարագյանի օգնականներն ԱԺ նախագահին դիմում էին պատրաստում՝ վերջիններիս բացակայությունները հիմնավորող գրություններով:

Այսպիսով, էլի մնացին «Արդարություն» եւ «Ազգային միաբանություն» խմբակցությունների 23 պատգամավորները, որոնք բոյկոտել են գարնանային ողջ նստաշրջանը: Եւ չնայած հատուկ ընդդիմության համար փոխվեց ԱԺ կանոնակարգն ու ընդդիմությանը շանս տրվեց բոյկոտը հարգելի համարելու համար յուրաքանչյուր քվեարկությունից առաջ իր ներկայացուցչի միջոցով դրա մասին հայտարարելու, սակայն անցած նստաշրջանի ընթացքում ընդդիմադիր խմբակցություններն այդպես էլ չօգտվեցին ԱԺ կանոնակարգով իրենց համար արված «ադալժենիից»: Ուստի, չնայած կանխատեսելի պատասխանին, երեկ դիմեցինք «Արդարություն» եւ «Ազգային միաբանություն» խմբակցություններին, ճշտելու՝ նրանք որեւէ տեղեկանք պատրաստվո՞ւմ են ներկայացնել խորհրդարանին:

Ներկայացնում ենք այդ պատասխանների առավել կոռեկտ հատվածները. «Ո՛չ»,- ասաց «Արդարություն» խմբակցության քարտուղար Վիկտոր Դալլաքյանը: Իսկ Արտաշես Գեղամյանն ասաց. «Երբ անօրինական իշխանություններին օրենքով պահանջված տեղեկանք ես ներկայացնում, անուղղակի կերպով ինքդ քեզ ես դնում վատ վիճակի մեջ, որովհետեւ այդ քայլով լեգիտիմացնում ես անօրինական իշխանությանը: Ի տարբերություն ոմանց, «Ազգային միաբանության» պատգամավորները զուրկ չեն տրամաբանությունից, ուստի մենք անօրեն իշխանություններին մեր օրինական բացակայությունների համար որեւէ տեղեկանք չենք պատրաստվում ներկայացնել»: Իսկ հարցը, թե այդ դեպքում հնարավոր է սեպտեմբերին զրկվեք մանդատներից, առաջացրեց ընդդիմության բուռն ու երկարատեւ ծիծաղը:

Այսպիսով, սեպտեմբերին, արդեն երրորդ անգամ, կրկնվելու է ձանձրալի  դարձած նույն սցենարը: ԱԺ պետաիրավական հարցերի մշտական հանձնաժողովն ընդդիմադիր պատգամավորների բացակայությունները  համարելու է անհարգելի եւ երրորդ անգամ առաջարկելու է լիագումար նիստում քննարկել պատգամավորներին մանդատից զրկելու հարցը: Մինչդեռ ԱԺ նախագահը, որի քաղաքական ծրագրերի մեջ չի մտնում ընդդիմությանը նեղացնելը, երրորդ անգամ նույն համառությամբ քննարկման չի դնելու ընդդիմությանը մանդատից զրկելու հարցը: Եւ այսպես՝ երեւի մինչեւ այս խորհրդարանի լիազորությունների ավարտը:

Նաիրա Զոհրաբյան

Տպել
804 դիտում

Ավազակույտերով է ծածկված նաև Ռանչպարի շրջակա վարելահողերի մի մասը. ուսումնասիրող թիմի զեկույցը

Մարտի 26-ին կհրավիրվի Ազգային ժողովի արտահերթ նիստ

Վահագն Վերմիշյանը նշանակվեց քաղաքաշինության կոմիտեի նախագահ

Ինչպե՞ս է հնարավոր, որ պետական համակարգի աշխատողները 3 ամիս աշխատավարձ չստանան․ Փաշինյանն ու Ավինյանը բանավիճեցին

ԱՄՀ-ն ու ՀԲ-ն կանխատեսում են տնտեսական ակտիվության տեմպի դանդաղում․ հավատա՞լ, թե՞ ոչ

ՀՀ ֆուտբոլի ընտրանու վիճակագրությունը առաջիկա մրցակիցների դեմ խաղերում տխուր է

Նախկինների ռազմավարությունը կամաց-կամաց ուրվագծվում է. նրանք «մանրուքները» հաշվի չեն առնում

ԵՊՀ ռեկտորի գործով Էթիկայի հանձնաժողովն արձանագրել է խախտումներ Դավիթ Սանասարյանի գործողություններում

Մեկնարկել է ՀՀ կառավարության հերթական նիստը․ օրակարգում ընդգրկված է 33 հարց, որից 2-ը՝ գաղտնի

Դանակով ավազակային հարձակում են կատարել Չարենցավանում. ձերբակալվել է երկու անձ

Գորիսի և Սպիտակի ավտոճանապարհներին մառախուղ է

Սկսվեց ԱԺ պատգամավոր Էդուարդ Բաբայանի գործով նիստը. նա ասաց, որ չի ընդունում մեղադրանքը

Դադարեցվել է որոշ դեղերի շրջանառությունը. առողջապահական եւ տեսչական մարմինն իրազեկում է

Ուկրաինայում հաջողությամբ փորձարկվել են թուրքական «Bayraktar TB2» ԱԹՍ-ները. Պորոշենկոն անձամբ է հետեւել

Վթար Երեւանում. մեքենան հարվածել է էլեկտրասյանը. վարորդն ու ուղեւորը հիվանդանոցում են

Այսօր ու առաջիկա օրերին առանց տեղումների եղանակ է սպասվում, ջերմաստիճանը կբարձրանա

ՔԿՀ աշխատակիցները տեսակցության եկածների կոշիկներում բջջայիններ, 2 wi-fi սարք ու քարտեր են գտել

Գետափ-Մարտունի ավտոճանապարհին ձյան մեջ արգելափակվել էր մոտ 20 ավտոմեքենա

ՖՄԿ-ն, ՅՈՒՆԵՍԿՕ-ն և Հայաստանը 2020-ին միջոցառում կանցկացնեն «Ապրել միասին» կարգախոսի ներքո

Սյունիքի մարզում ձյուն է տեղում, Գորիս-Կապան ավտոճանապարհին տեղ-տեղ մերկասառույց և մառախուղ է