Հայկական «Արարատ» հոկեյի թիմը լուծարման եզրին է

Հայկական «Արարատ» հոկեյի թիմը, որը հանդես է գալիս Բելառուսի երիտասարդական բաց առաջնությունում, լուրջ խնդիրներ ունի: «Հայկական ժամանակ»-ին այդ մասին պատմել է հիմնադիր-տնօրեն Ռուբեն Ստեփանյանը: Ակումբը փաստաթղթային խնդիրներ ունի, որոնք լուծելու համար տարիներ շարունակ դիմել է ՀՀ հոկեյի ֆեդերացիա, սակայն անարդյունք: Ակումբը կազմված է մեծամասամբ հայազգի խաղացողներից, ու ղեկավարները ցանկանում են, որ նրանք ՀՀ հավաքականի կազմում մասնակցեն միջազգային մրցաշարերի: Դրա համար անհրաժեշտ է, որպեսզի ՀՀ ֆեդերացիան հայտ ուղարկի Հոկեյի միջազգային ֆեդերացիա, ինչը չի անում:

«Պահանջում ենք, որ կատարեն իրենց պարտականությունը. պատրաստեն մեր խաղացողների փաստաթղթերը, որպեսզի նրանք ՀՀ հավաքականի կազմում կարողանան մասնակցել մրցաշարերի: Պետք է Հայաստանի քաղաքացիություն, անձնագրեր ստանան՝ պայմանով, որ բանակ չգնան: Կան նաեւ այլ հարցեր, որոնք կապված են միջազգային ֆեդերացիայի պահանջների հետ: Օրինակ, պայման կա, որ նրանք պետք է մասնակցեն ՀՀ առաջնությանը, բայց կարող են մասնակցել, եթե առաջնություն անցկացվի, եթե չի անցկացվում, ինչպե՞ս մասնակցեն»,- ասաց նա՝ ավելացնելով, որ պատրաստ են հանդես գալ ՀՀ առաջնությունում, եթե այն լինի:

Լուծում ստանալու համար նա դիմել է ոչ միայն ՀՀ ֆեդերացիա, այլեւ ՀՀ Սպորտի եւ երիտասարդության հարցերի 4 նախարարների: Քննարկումներ է ունեցել Յուրի Վարդանյանի, Գաբրիել Ղազարյանի, Հրաչյա Ռոստոմյանի հետ: Թավշյա հեղափոխությունից՝ իշխանափոխությունից հետո որոշել է եւս մեկ անգամ փորձել: Նամակ է գրել ՀՀ վարչապետ Նիկոլ Փաշինյանին: Դիմել է ԱԺ պատգամավոր Ալեն Սիմոնյանի, որը հանդիպում է կազմակերպել սպորտի եւ երիտասարդության հարցերի ներկայիս նախարար Լեւոն Վահրադյանի հետ, որը խոստումներ է տվել:

«Ասաց լավ կլինի, բայց տեսնում եմ, որ ոչինչ չի փոխվում: Հոկեյի ֆեդերացիան իր ասածը ասում է, հավատում են, չեն ստուգում»,- ասաց Ստեփանյանը:

2019 թ. մրցաշարերին մասնակցելու համար միջազգային ֆեդերացիա հայտ ուղարկելու վերջնաժամկետը սեպտեմբերն է: Ակումբի ղեկավարությունը ցանկանում է նաեւ այն Բելառուսի երիտասարդական առաջնությունից տեղափոխվել Ռուսաստանի երիտասարդական լիգա: Դրա փաստաթղթերը ՀՀ ֆեդերացիան եւս դեռ չի ուղարկել: Ստեփանյանը նշում է, որ, եթե այս անգա էլ ֆեդերացիան իրենց չօգնի, «Արարատը» կդադարեցնի գործունեությունը, քանի որ ակումբը գումար չունի հոկեյիստներին աշխատավարձ վճարելու համար, միայն պարգեւավճարներ է տալիս, եւ նման պայմաններում մարզիկները չեն կարող երկար համբերել:

«Անմիջապես թիմը կցրվի, որովհետեւ մարդիկ արդեն հավատը կորցրել են, ու հաջորդ տարիներին պայմաններ չենք ունենա: Չենք կարող մեծասահակ մարդկանց առանց գումարի խաղացնել: Մեծահասակների ակումբ ունենալը լրիվ այլ ծախսեր է պահանջում»,- ասաց նա:

ՀՀ հոկեյի ֆեդերացիայից նշում են, որ «Արարատն» է մեղավոր ստեղծված իրավիճակի համար: ՀԺ-ի հետ զրույցում ֆեդերացիայի նախագահ Սամվել Զախարյանը նշեց, որ տարիներ առաջ իրենք պայմանավորվել են Սերժ Սարգսյանի հետ, որ մարզիկները կարող են քաղաքացիություն ստանալ եւ ազատվել պատրադիր զինվորական ծառայությունից, սակայն նրանք չեն եղել՝ անձնագիր ստանալու ու պատճառաբանություններ են բերել:

«Չեն համապատասխանում միջազգային ֆեդերացիայի օրենքներին: Խաղացողները չունեն ՀՀ քաղաքացիություն, իսկ միջազգային մրցաշարերում խաղալիս նրանք պետք է լինեն ՀՀ քաղաքացի ու ամենաքիչը 1 տարի 8 ամիս պետք է խաղան ՀՀ-ում: Պետք է առաջնություն անցկացնենք, նրանք խաղան»,- ասաց նա՝ ավելացնելով, որ այժմ ՀՀ առաջնություն չի չկա, բայց, եթե «Արարատը» գա, կարող են 3 թիմով մրցաշար կազմակերպել:

«Արարատը» հիմնադրվել է 2014 թ.: Բացի Ռուբեն Ստեփանյանից՝ հիմնադիրների թվում են ՀՀ ֆեդերացիայի նախագահ Սամվել Զախարյանը եւ գլխավոր քարտուղար Վահրամ Սարգսյանը: Զախարյանն ու Սարգսյանը ակումբի գործերով չեն զբաղվում: Ստեփանյանը ինքն է ֆինանսավորում «Արարատը»: Նշում է, որ տարեկան մոտ 150 հազար դոլար ծախս է պահանվում:

Ակումբի հիմնադրումից հետո Ստեփանյանը հավաքագրել է Ռուսաստանում ու Բելառուսում ապրող հայկական ծագումով հոկեյիստներին: 2015 թ. թիմը մասնակցել է Բելառուսի պատանեկան բաց առաջնությանը, 11 թիմերի մեջ զբաղեցրել է 6-րդ տեղը: 2016 թ. Բելառուսի երիտասարդական բաց առաջնությունում 12 թիմերի մեջ եղել է 5-րդը, 2017 թ. նույն մրցաշարում՝ 14 թիմերի մեջ 6-րդը: Ստեփանյանը նշում է, որ թիմում կան այլազգի հոկեյիստներ, որոնք անհրաժեշտ են առաջնություններում մրցունակ լինելու համար, սակայն խաղացողների մեծամասնությունը հայեր են, ու նրանց թիվը բավարար է ՀՀ հավաքական կազմելու համար:

Տպել
1720 դիտում

Կրակոցներ Երևանում. հայտնաբերվել է «Մակարով» ատրճանակի 3 պարկուճ, 1 գնդակ, 2 ավտոմեքենաների վրա՝ կրակոցների հետքեր

Ա. Հարությունյանը Վրաստանի գործընկերոջ հետ քննարկել է Վրաստանի դպրոցներում հայոց լեզվի դասագրքեր ունենալու հարցը

Մրգաշենի նախկին ղեկավարը բնակիչների անուններով գումարներ է դուրս գրել եւ յուրացրել՝ կեղծելով ստորագրությունները

ԱԳ նախարարն ընդունել է ԱՄՆ-ից ժամանած ռեժիսորների և պրոդյուսերների պատվիրակությանը

ԱՄՆ-ը եւ Թուրքիան Սիրիայում կրակը դադարեցնելու մասին պայմանավորվածություն են ձեռք բերել

Եթե Սերժ Սարգսյանը հրաժարվի գալ Ապրիլյան պատերազմի քննիչ հանձնաժողով, դա կլինի քաղաքական ինքնասպանություն. Ա. Քոչարյան

Գյումրիում կրկին տոն էր, իսկ քաղաքի փողոցներով քայլում էին «Ավրորայի» հերոսները, բարերարներ, Ազնավուրի որդին

1-ին զորամիավորման ուսումնական կենտրոնում անցկացվել են հավաքներ

Մխիթար Հայրապետյանն ընտրվել է Երևանի շախմատի ֆեդերացիայի նախագահ՝ փոխարինելով Տարոն Մարգարյանին

Վարչապետը ներկա է գտնվել արցախյան թեմային նվիրված «Դրախտի դարպասը» ֆիլմի պրեմիերային

Հրդեհ «Դիլիջան ազգային պարկ» ՊՈԱԿ-ի տարածքում. 60 ծառի կոճղ է այրվել, ջերմահարվել՝ 20 հաճարենի

Կառավարությունը «Ryanair»-ին ոչ մի 5 միլիոն էլ չի տալու. ինչո՞վ է պայմանավորված ավիատոմսերի էժան գինը

Քաղաքապետ Հայկ Մարությանը հանդիպել է Մեծ Բրիտանիայի լորդերի պալատի անդամ Արա Դարզիի հետ

Դավիթ Տոնոյանը և ԵՄ հատուկ ներկայացուցիչը քննարկել են ԼՂ հակամարտության հետ կապված հարցեր

Փաշինյանը և Ճապոնիայի վարչապետի հատուկ խորհրդականը քննարկել են ենթակառուցվածքների զարգացման ծրագրերը

Սա մեր երկրի նկատմամբ միջազգային հանրության մեծ վստահության վկայություն է. վարչապետը ՀՀ-ի՝ ՄԱԿ-ում ընտրվելու մասին

Հայաստանը 144 ձայնով ընտրվել է ՄԱԿ Մարդու իրավունքների խորհրդի անդամ 2020-2022 թթ. համար. ԱԳՆ

Նոյեմբերյանի ոստիկանները ապօրինի ծառահատումներ են բացահայտել (տեսանյութ)

Թուրքերի ռազմական օպերացիան Փայլանը որակել է որպես տեղահանություն և ցեղասպանության փորձ

Երեւանի բժշկական քոլեջում տեղի ունեցած հանելուկը. մեկ տուժած շմոլ գազից թունավորմամբ տեղափոխվել է հիվանդանոց