Կա փաստ, կա դիմում. Արամ Սարգսյանը չի պատրաստվում խնդրել

Տպագրվել է «Հայկական Ժամանակ» օրաթերթի՝ 2005 թվականի սեպտեմբերի 3-ի համարում

«Հանրապետություն» կուսակցության նախագահ Արամ Զավենի Սարգսյանը ամենեւին էլ չի պատրաստվում ետ վերադարձնել իրենց դիմումի հիման վրա կուսակցությունից հեռացած քաղխորհրդի 7 անդամներին: Հիշեցնենք, որ օգոստոսի 30-ին «Հանրապետություն» կուսակցության քաղխորհրդի 7 անդամներ Ալբերտ Բազեյանի եւ Վաղարշակ Հարությունյանի գլխավորությամբ դադարեցրել են իրենց անդամակցությունը: Սակայն ինչպես նախօրեին մեր թղթակցի հետ զրույցում ասել էր Ալբերտ Բազեյանը, ինքը չի բացառում կուսակցության ներկայիս ղեկավարության հետ հաշտության եզրեր գտնելու հավանականությունը, եթե, իհարկե, վերջիններս նման պատրաստակամություն հայտնեն:

«Իրենց ներկայացրած դիմումի մեջ իրենք պարզ տեսքով գրել են, որ դադարեցնում են իրենց անդամակցությունը «Հանրապետություն» կուսակցությանը: Եթե մարդիկ դուրս գալու համար դիմում են ներկայացրել, դրանից հետո ի՞նչ քննարկվի կամ ի՞նչ առաջարկվի: Առաջարկությունները լինում են մինչեւ դիմումները, իսկ հիմա կա դիմում, կա կայացած փաստ: Մեր խորին համոզմամբ եւ ՀՀ օրենքների համաձայն քաղաքական կուսակցություններին եւ հասարակական կազմակերպություններին մարդիկ մասնակցում են կամավորության սկզբունքով, եւ այստեղ ուրիշ որեւէ մեկը որեւէ տեսակետ ասելու իրավունք չունի»,- մեզ հետ զրույցում ասաց Արամ Սարգսյանը: Եվ հիմա նրա խոսքերով, տեղի ունեցածի վերաբերյալ մեկնաբանություններ պետք է անեն կուսակցությունից դուրս գալու վերաբերյալ դիմում ներկայացրածները:

Իսկ ինքն այդ ամենը բավական հանգիստ է ընդունում եւ այդտեղ որեւէ արտառոց բան չի տեսնում: Ավելին, Արամ Սարգսյանի համոզմամբ, դա կուսակցության առողջացման ու ժողովրդավարության հետեւանք է: «Ես չէի ուզենա, որ նման բան լիներ եւ ես միշտ կողմնակից եմ եղել, որ քաղաքական գործընթացը միասին սկսած մարդիկ միասին էլ հասնեն վերջնական հաղթանակի: Բայց եթե քաղաքական գործունեություն սկսած մարդիկ տեսակետների տարբերություն ունեն, շատ ավելի ճիշտ է, որ յուրաքանչյուրը իր գործունեությունը իր ուղիով շարունակի: Դա յուրաքանչյուր անհատի խնդիրն է»,- գտնում է Արամ Սարգսյանը: Սակայն անկախ տեղի ունեցածից, «Հանրապետության» նախագահը վստահեցնում է, որ մարդկային առումով իր վերաբերմունքը կուսակցությունից հեռացած մարդկանց հանդեպ չի փոխվել եւ իրենց հարաբերությունները մարդկային հարթության վրա մնացել են նույնը:

Մանավանդ, որ Արամ Սարգսյանի խորին համոզմամբ, կուսակցությունից հեռացած մարդիկ չեն փոխի իրենց քաղաքական դիրքորոշումն ու կշարունակեն պայքարել իշխանությունների դեմ: «Մեր կուսակցությունից դուրս եկած մարդիկ այս իշխանություններին միանշանակ դեմ են, եւ այս առումով ես որեւէ կասկածներ կամ այլ կարծիքներ հայտնելու իրավունք չունեմ: Ես բացառում եմ, որ այդ մարդիկ կարող են ինչ-որ տեղ իշխանությունների հետ համագործակցել»,- ասում է «Հանրապետություն» կուսակցության առաջնորդը: Բայց չէ՞ որ Ալբերտ Բազեյանն, օրինակ, անդամակցում է «Ոգու փորձություն» կազմակերպությանը, որի նախաձեռնող խմբի անդամ Սասուն Միքայելյանը ժամանակին հայտարարել էր, թե առաջիկա նախագահական ընտրություններում Սերժ Սարգսյանի թեկնածությունն առաջադրելու դեպքում, իրենք կսատարեն նրան:

«Մեր նախկին կուսակիցները էդ կազմակերպությանը մասնակցում են զուտ հասարակական սկզբունքներով եւ ազատամարտիկների հոգսերի լուծման մեխանիզմ որպես տեսնում են «Ոգու փորձությունը»: Ես անձամբ ԵԿՄ անդամ եմ, եւ ես ճիշտ մեխանիզմը տեսնում եմ ԵԿՄ հավերժ նախագահ Վազգեն Սարգսյանի դրած հիմքերով եւ նրա ստեղծած կազմակերպությունում»,- կարծում է Սարգսյանը: Ի դեպ, նկատենք, որ «Հանրապետություն» կուսակցության քաղխորհրդի 7 անդամների հեռանալը կուսակցությունից որոշակի դժվարություններ է ստեղծել քաղխորհրդի նիստեր գումարելու համար: Բանն այն է, որ կուսակցության կանոնադրության համաձայն նիստն անցկացնելու համար քվորումն ապահովված է համարվում, եթե ներկա են 15 անդամներից առնվազն երկու երրորդը, այսինքն` տասը հոգի:

Փաստորեն, հիմա կուսակցությունում մնացել են 8 հոգի, իսկ դա բավական չէ քվորում ապահովելու համար: Փոխարենը կուսակցությունը կարող է քաղխորհրդի անդամների առնվազն մեկ երրորդի նախաձեռնությամբ արտահերթ համագումար հրավիրել, ինչը որ այս ամսվա ընթացքում անելու են: ««Հանրապետություն» կուսակցությունը հայտարարել էր, որ մոտ ապագայում ինքը անելու է արտահերթ համագումար՝ երկրի ներքաղաքական իրավիճակի եւ ապագա զարգացումների հետ կապված: Ես նորից կրկնում եմ՝ հասել է այդ համագումարն անելու ժամանակը, եւ մենք մեր մոտեցումները հիմնավոր կներկայացնենք հասարակությանը եւ կառաջարկենք քայլերը: Այդ համագումարի ժամանակ կանդրադառնանք նաեւ կուսակցության նոր քաղխորհրդի անդամների քանակի եւ կազմի ընտրությանը: Այնպես որ, «Հանրապետություն» կուսակցությունը իր որդեգրած ուղուց կես քայլ ետ չի կանգնելու, եւ թող ոչ մեկը նման հույս չունենա»,- վստահեցրեց Արամ Սարգսյանը:

Արման Գալոյան