Սեւ փողերի տոկոսը. գուցե ձեր օրոք ստացված զինատեսակների պարամետրերն ու տեղաբաշխման ճշգրիտ վայրերն է՞լ հայտնեիք

Եվ այսպես, նախընտրական քարոզարշավը պաշտոնապես մեկնարկեց եւ Հայաստանի բնակչությունն անմիջապես տեղեկացավ, որ եթե մտահոգված է՝ պիտի իր ձայնը տա Հանրապետականին։ Հենց այդպես, սեւ ու սպիտակ գույների մեջ։

Գույների այդ համադրումն, ի դեպ, բավականին ճշգրտորեն է արտացոլում իշխանությունից զրկված հանրապետականների հոգեվիճակը («Մեր սեւ սիրտ, ձեր վարդագույն ցուցապաստառներ»), թեեւ կարգախոսն ինքնին վիճահարույց է, որովհետեւ մտահոգված լինելը (ռուսերեն՝ «озабоченный») անեկդոտիկ իրավիճակների հետ է ասոցացվում։ Ամեն դեպքում՝ հանրապետականների «սեւ» քարոզարշավի մասշտաբները տպավորիչ են։ Երեւի զգացնել է տալիս տասնամյա իշխանության տարիներին վաստակած «սեւ փողերի տոկոսը»։

Իսկ եթե ավելի լուրջ, ապա բովանդակային առումով հանրապետականների քարոզչությունն ուղղակի ծաղրուծանակ է հասարակության հասցեին։ Ի վերջո՝ հանրապետականները կորցրեցին իշխանությունը հենց այն պատճառով, որ պետության ապագայով մտահոգ հարյուր հազարավոր քաղաքացիներ դուրս եկան փողոց։ Դուրս եկան փողոց, որովհետեւ «օդում կախված լուրերի համաձայն»՝ երկրի ղեկավարն ու ՀՀԿ «անփոխարինելի առաջնորդը» միլիարդներ էր կուտակել, իսկ բանակը պատերազմում էր «80-ական թվականների զինատեսակներով»։ Թե՞ սա պետության անվտանգությամբ մտահոգվելու պատճառ չէր։ Կամ ինչպե՞ս է պատահում, որ ամենաակտիվ «մտահոգվածներից» մեկը՝ Էդուարդ Շարմազանովը, հրապարակավ հայտարարում է, թե գիտե՞ք, վերջին յոթ ամիսների ընթացքում Հայաստանը Ռուսաստանից ոչ մի լուրջ զենք չի ստացել։ Գուցե ձեր իշխանության օրոք ստացված զինատեսակների պարամետրերն ու տեղաբաշխման ճշգրիտ վայրերն է՞լ հայտնեիք ու պաշտոնական հրավե՞ր ուղարկեիք Ադրբեջանին՝ հորդորելով օգտվել առիթից։

Կամ՝ ի՞նչ է նշանակում «ավանդական ազգային արժեքները» շահարկելը։ Գուցե ավանդական ընտանեկան արժեքնե՞րը նկատի ունեք։ Բա իհարկե, ձեր պատկերացմամբ՝ ավանդական ընտանեկան արժեքն այն է, որ եթե ընտանիքի հայրը դառնում է երկրի ղեկավար, նրա եղբայրները, փեսաներն ու մյուս ազգականները պիտի անպայման բարձր պաշտոններ զբաղեցնեն ու մուլտիմիլիոնատերեր դառնան, իսկ սովորական «ավանդական հայ ընտանիքների» հայրերը պիտի անպայման արտագնա աշխատանքի մեկնեն, կամ, եթե Հայաստանում են, «ինչ անում ենք, էրեխեքի համար ենք անում» կարգախոսով հլու-հնազանդ ծառայեն իշխանություններին՝ օրվա հացից չկտրվելու համար։

Այո, «քաղաքակիրթ աշխարհը» քաղաքակրթության բարիքներից բացի նաեւ հազարավոր այլասերվածություններ է բերում, որոնք տարատեսակ «ազատությունների» անվան տակ վարակի պես տարածվում են մեր երկրում։ Բայց վարակներն առավելապես ազդում են թույլ եւ հյուծված օրգանիզմների վրա։ Ու՞մ տասնամյա գործունեության արդյունքում է թուլացել եւ հյուծվել մեր օրգանիզմը։

Հասկանալի է, որ հասարակության որոշակի շրջանակներում նոր իշխանություններից նաեւ որոշակի հիասթափություն կա (այդ թվում նաեւ ՀՀԿ-ի՝ «սեւ փողերի տոկոսով» իրականացվող քարոզչության շնորհիվ), որովհետեւ փոփոխությունները բավականաչափ արագ չեն իրականացվում։ Բայց ի՞նչ կապ ունի այդ հիասթափվածների հետ ՀՀԿ-ն, նրանցից որեւէ մեկը ՀՀԿ-ի հետ հույսե՞ր է կապում։ Ճիշտ հակառակը՝ անկախ քաղաքական համակրանքներից, բոլորի հույսն այն է, որ ՀՀԿ-ն քաղաքական ասպարեզից հեռանում է անվերադարձ։

Այնպես, ինչպես Սերժ Սարգսյանն է արել։

Արմեն Բաղդասարյան

Տպել
1829 դիտում

Գյումրու Վարդանանց հրապարակի եղեւնիները կհանվեն

Կոմպոզիտորների՝ Դիլիջանի ստեղծագործական տունը կարճ ժամանակում պետք է դարձնենք ծաղկուն ու խնամված վայր. Աննա Հակոբյան

Հրաժարվեք Հայաստանում օտարերկրյա ներդրողների գործունեության մեջ քաղաքական ենթատեքստ փնտրել. «ԳեոՊրոՄայնինգ»-ը՝ ԶԼՄ-ներին

Վարչապետ Նիկոլ Փաշինյանի մոտ կայացել է խորհրդակցություն երեխաների որդեգրումների թեմայի վերաբերյալ

«Սիթի օֆ Սմայլ/Ժպիտների քաղաք»-ը անհրաժեշտության դեպքում կաջակցի 21-ամյա Արամի բուժմանը

Կեղծված են և՛ ԱԺ պատգամավորի բլանկի ձևը, և՛ իմ ստորագրությունը. Հրաչյա Հակոբյանը մեկնաբանել է ռուսական կայքի հոդվածը

Նիկոլ Փաշինյանի վերջին այցից հետո զբոսաշրջիկների թիվը Գյումրիում կրկնապատկվել է. Սամվել Բալասանյան

Գերմանիայի պաշտպանության նախարարը հրաժարական է տվել Scorpions-ի «Փոփոխությունների քամի» երգի հնչյունների ներքո

Գտնվում ենք այն քոթեջում, որտեղ ապրել և ստեղծագործել է Առնո Բաբաջանյանը, մթնոլորտը հիասքանչ է. Աննա Հակոբյան

Երեւանի ավագանու նախկին անդամ Սոնա Աղեկյանը ազատ է արձակվել

ԿԳՄՍ նախարար Արայիկ Հարությունյանն ընդունել է Ճապոնիայի դեսպան Ջուն Յամադային

Երևանի թիվ 17 հիմնական դպրոցի կառավարման խորհուրդը հայտարարում է տնօրենի թափուր պաշտոնի մրցույթ

Ձերբակալվել է «Սևան ազգային պարկ» ՊՈԱԿ-ի «Արևիկ» մասնաճյուղի անտառագետը

Արցախում 2 տարեկան երեխան թունավորվել է մոր տված սխալ դեղահաբից

Քննարկվել է «Զվարթնոց» օդանավակայանի ընդլայնման հարցը

«Պոբեդա»-ն այսօր կվերականգնի Գյումրիում ձմեռային չվացուցակով թռիչքների ավիատոմսերի վաճառքը

Սոնա Աղեկյանը քաղաքապետարան է ներկայացել կոյաջրերի տարայով. նրան բերման են ենթարկել

Հայաստանում անշարժ գույքի գործարքները աճել են, եւ աճը մարզերի ու ոչ Երեւանի հաշվին է. Նիկոլ Փաշինյան

Մալաթիայի շուկայի տարածքում հրդեհը բռնկվել է արագ սննդի կետում. մանրամասներ

Ծնելիության ցուցանիշի նվազման տեմպը դանդաղում է. Արսեն Թորոսյան