«Յանս»-ից հափշտակված գումարի չափը հասել է 90 միլիոնի. Ռուզաննա Բեգլարյանի փաստաբանը հակադարձում է նախկին հաշվապահին

«Յանս» ակումբից հափշտակված գումարը գերազանցել է 25 միլիոնը:

Այս մասին այսօր մեր զրույցում հայտարարեց «Յանսի» սեփականատեր Ռուզաննա Բեգլարյանի փաստաբան Սամվել Անդրիասյանը: Վերջինս անդրադարձել է նաեւ օրեր առաջ «ՀԺ»-ին բացառիկ հարցազրույց տված Սուսաննա Արիստակեսյանի մի շարք հայտարարություններին:

Հիշեցնենք, որ Արիստակեսյանը մեր զրույցում հայտարարել էր, որ Ռուզաննա Բեգլարյանը իրենից 40 միլիոն դրամ է պահանջել կամ առաջարկել ինքնասպան լինել:

Արիստակեսյանի կողմից ենթադրյալ հափշտակության դեպքը տեղի է ունեցել դեռեւս մեկ տարի առաջ: Այս դեպքի մասին հայտնի դարձավ միայն այս տարվա ամռանը, երբ ընկերությունում քննիչի որոշմամբ՝ ոստիկանությունը սկսեց խուզարկություններ իրականացնել թե՛ «Յանս» ակումբում եւ թե՛ Վաչագան Ղազարյանի բնակարանում:

Բեգլարյանի փաստաբան Սամվել Անդրիասյանը մեր զրույցում հայտարարեց, որ հափշտակպված գումարի չափը հասնում է մոտ 90 միլիոնի:

Նրա հետ զրույցը ստորեւ.

- Պարոն Անդրիասյան, «Յանսի» նախկին հաշվապահը մեր զրույցում նշել է, որ Ռուզաննա Բեգլարյանը 80 հազար դրամ չեկի փոխարեն իրենից 40 միլիոն է պահանջել, կամ էլ առաջարկել ինքնասպան լինել: Սա ինչպե՞ս կպարզաբանեք:

- Նախ, պետք է նշեմ, որ Ռուզաննա Բեգլարյանը ընդհանրապես կապ չի ունեցել «Յանս» ռեստորանային համալիրում բիզնես գործունեություն ծավալող ընկերության հետ: Բիզնես գործունեություն ծավալել է «Սելենա» ՍՊ ընկերությունը, որի փաստացի սեփականատերը եւ միաժամանակ տնօրենը հանդիսանում է Սերգեյ Կարապետյանը: Հաշվապահի կողմից տարածվող ապատեղեկատվությունը կարելի է դիտարկել, որպես պաշտպանական կողմի անհիմն հայտարարություն, որպես պաշտպանության միջոց, մինչդեռ քրեական գործով տվյալները այլ բանի մասին են վկայում: Ի սկզբանե, ընկերությանը պատճառված վնասի պահանջ ներկայացրել է «Սելենա» ՍՊ ընկերության տնօրեն Սերգեյ Կարապետյանը: Նախնական հաշվարկների արդյունքում՝ վնասը կազմել է 25 միլիոն դրամ՝ 6 ամսվա ընթացքում, բայց հետագայում նաեւ խորացված ուսումնասիրություններ կատարելու արդյունքում պարզվել է, որ ընդհանուր գումարը գերազանցում է 25 միլիոնը եւ այստեղ այդ փոփոխությունների արդյունքում կազմած գումարի չափը մոտ 90 միլիոն դրամ է:

- Այսինքն՝ հափշտակված գումարի չափը հասել է 90 միլիոնի՞:

- Այո, բայց 40 միլիոն որ վճարվել է, դա եղել է Սուսաննայի քրոջ եւ ամուսնու կողմից առաջարկված գումար. այսինքն՝ այդ հաշվարկների արդյունքում երբ պարզվել է, որ 25 միլիոնը գերազանցել է, իրենք առաջարկել են՝ 40 միլիոն իրենք պատրաստ են պատճառված վնասը վերականգնել: 40 միլիոնը վերականգնելուց հետո, բնականաբար նաեւ տնօրենը գրել է ստացական, որ ընկերությանը պատճառված գումարն ամբողջությամբ վերականգնված է, բողոք պահանջ չունի:

- Ուսումնասիրություններն ո՞ւմ կողմից են արվել՝ նախաքննական մարմնի՞ թե՝ տնօրինության:

- Ընկերության ամբողջ բիզնես գործունեությունը ղեկավարվում եւ կազմակերպվում է համապատասխան ծրագրի միջոցով, որը ներդրված է նաեւ ընկերության համակարգիչներում: Այդ համակարգչի տվյալների վերծանումների արդյունքում հաղորդում ներկայացնելուց հետո հետագայում սկսել են ռեստորանի բացված օրվանից մինչեւ դեպքի օրը կատարված հաշվարկների ուսումնասիրություն, որից պարզ է դարձել, որ 25 միլիոնը գերազանցել է: Դա հաստատված է նաեւ նշանակված փորձաքննության արդյունքներով:

- Ի վերջո ի՞նչ մեխանիզմներով է այդ խոշոր չափի գումարը յուրացվել:

- Համալիրի ողջ տնտեսական գործունեությունը, մասնավորապես գնված եւ վաճառված ապրանքների շարժը, ռեստորանի բարում, պահեստում, խոհանոցում առկա ապրանքների ստացումը եւ ծախսը կարգավորվում է ռեստորանում ներդրված համակարգչային ծրագրի միջոցով, որտեղ մուտք գործելու եւ դրանով աշխատելու համապատասխան ծածկագրերին տիրապետել են ռեստորանի հաշվապահ Սուսաննա Արիստակեսյանը եւ մենեջերը: Սուսաննա Արիստակեսյանը 2012թ. հոկտեմբեր ամսից մինչեւ 2017թ. մայիսի 14-ն ընկած ժամանակահատվածում ունենալով «Սելենա» ՍՊ ընկերությունից գումար հափշտակելու միասնական հանցավոր դիտավորություն` 2016թ. հոկտեմբեր ամսից կարգադրել է մենեջերին ռեստորանային համալիրում հիշյալ ժամանակահատվածում տեղի ունեցած միջոցառումներից հետո հաճախորդներից ստացած եւ նրա մոտ հավաքված գումարները մուտք չանել ընկերության դրամարկղ եւ դրանք հանձնել իրեն, որից հետո ունենալով դեռևս դրամարկղ գումար մուտք չեղած լինելու պայմաններում իր ծածկագրով ծրագիր մուտք գործելու եւ հաշիվներում փոփոխություն կատարելու հնարավորություն, դրանցում կատարել է պատվերների ծավալի եւ գումարի փոփոխություն` այդ կերպ մաս-մաս յուրացնելով իրեն վստահված եւ ընկերությանը պատկանող առանձնապես խոշոր չափերի հասնող գումարները: Իսկ տնօրինության կողմից Սուսաննա Արիստակեսյանը ունեցել է բացառիկ վստահություն եւ վերջինիս է վստահված եղել ընկերության ամբողջ ֆինասատնտեսական գործառույթները: Բացի այդ համակարգչային ծրագրին տիրապետել է միայն Սուսաննա Արիստակեսյանը:

- Պարոն Անդրեասյան, այսինքն՝ 2012-ից մինչեւ 2017-ը տնօրինությունը ստուգումներ չի արել՝ վստահելով հաշվապահի՞ն:

- Այո:

- Այդ դեպքում ինչո՞ւ հենց 2017-ին սկսեցին ստուգումները: Արիստակեսյանը նշում է, որ գուցե պատճառը նաեւ քաղաքական է: Նա մեր զրույցում ասել է, որ Սերգեյ Կարապետյանը իրեն պարբերաբար ասել է, որ Սերժ Սարգսյանի եւ Վաչագան Ղազարյանի մասին հակաբաներ է խոսել եւ որ դրա ձայնագրությունը կա:

- 2017թ. ապրիլ ամսին հաճախորդի կողմից տնօրենին փոխանցվել է 80.000 ՀՀ դրամ գումար՝ հետագայում այն հաշվապահին փոխանցելու եւ դրամարկղ մուտքագրելու նպատակով: Գումարը փոխանցել է գլխավոր հաշվապահին: Մի քանի օր անց տնօրենը կասկածներ է ունեցել, որ իր կողմից փոխանցված գումարը համապատասխան հաշվապահական ձեւակերպում չի ստացել եւ համակարգչային ծրագրի ստուգման արդյունքում պարզվել է, որ նշված գումարը դրամարկղ չի մուտքագրվել, իսկ հաշիվը եղել է զրոյացված: Դա հիմք է հանդիսացել, որպեսզի վերծանվի ամբողջ դրամարկղային շարժը եւ վեր հանվի զրոյացված եւ փոփոխության ենթարկված հաշիվները:

- Հաճախորդը Վաչագան Ղազարյա՞նն էր: Սուսաննա Արիստակեսյանն ասաց, որ 80 հազար դրամի չեկը հենց նրանն էր:

- Ոչ, նման բան չկա: Ներքին ստուգումների արդյունքում հայտնաբերված խախտումները չեմ կարող որեւէ կերպ կապել քաղաքական գործընթացների հետ, քանի որ Վաչագան Ղազարյանը որեւէ առնչություն չի ունեցել «Յանս» ռեստորանային համալիրի գործունեության հետ:

- Դուք ասացիք, որ սկզբում 25 միլիոնի հափշտակության մասին է հաղորդում ներկայացվել: Ե՞րբ է պարզ դարձել, որ իրականում խոսքը գնում է 90 միլիոնի մասին, որովհետեւ ըստ հաշվապահի՝ ի սկզբանե Ռուզաննա Բեգլարյանն իրենից 40 միլիոն է պահանջել:

- Սերգեյ Կարապետյանի կողմից հանցագործության մասին հաղորդում ներկայացնելու ժամանակ վերջինիս նախնական հաշվարկների արդյուքում հափշտակված գումարը կազմել է 25.000.000 ՀՀ դրամ, սակայն հետագայում հստակ ժամանակահատվածը չեմ կարող նշել, ստուգումներ է իրականացվել ընկերության գործունեության ամբողջ ժամանակահատվածի վերաբերյալ, որից պարզ է դարձել, որ պատճառված վնասը շատ ավելի է, քան հայտնի է դարձել նախնական ստուգմամբ: Ինչ վերաբերում է Ռուզաննա Բեգլարյանի կողմից նման պահանջ ներկայացնելուն, ցանկանում եմ նշել , որ վերջինս որեւէ առաչություն չի ունեցել ռեստորանի գործունեությանը, ինչպես նաեւ կառավարամանը:

- Պարոն Անդրեասյան, դուք ասացիք նաեւ, որ երբ իմացել են, որ իրականում խոշոր գումարի մասին է խոսքը, հաշվապահի քույրն ու ամուսինը 40 միլիոն են վճարել: Բայց հաշվապահն ասում է, որ իրեն ստիպել են, բացի դա ասում է նաեւ, որ անձամբ Վաչագան Ղազարյանն է հանդիպել ամուսնու հետ եւ 20 միլիոն պահանջել: Սա ինչպե՞ս կպարզաբանեք:

- Նշեմ, որ վնասը վերականգնելու գործընթացում թե՛ Վաչագան Ղազարյանը եւ թե՛ Ռուզաննա Բեգլարյանը որեւէ առանչություն չեն ունեցել, իսկ հաշվապահի կողմից իմ պաշտպանյալներին յուրացման գործի մեջ ներքաշելը մեղմ ասած անձանց անունների անհարկի շահարկելու միտում է: 40.000.000 ՀՀ դրամ վնասի փոխհատուցումը կատարվել է հաշվապահի, նրա ամուսնու եւ քրոջ ցանկությամբ:

- Այսինքն՝ որեւէ սպառնալիք չի՞ եղել ձեր պաշտպանյալների կողմից:

- Ոչ, նման տեղեկատվությունը բացարձակ սուտ է, իսկ պատճառված վնասի փոխհատուցման գործընթացը կատարվել է Ս.Կարապետյանի մասնակցությամբ եւ ձևակերպվել է օրենքով սահմանված կարգով:

- Պարոն Անդրեասյան, դուք ասացիք, որ 2012-2017 թվականների ընթացքում հափշտակված գումարի չափը կազմում է 90 միլիոն դրամ, ի վերջո այդ ծավալի յուրացումը տնօրինության համար ակնհայտ չի՞ եղել: Ինչպե՞ս կարող էր տարեկան մոտ 18 միլիոն հափշտակվեր եւ դա չերեւար:

- Սուսաննա Արիստակեսյանին է վստահված եղել ընկերության գործունեության ամբողջ ֆինանսական հոսքերի կազմակերպումը, ըստ իս՝ տվյալ չարաշահումների նկատմամբ դրսեւորած անփութությունը կարող է բացարձակ վստահության արդյունք լինել: Նրան առաջադրված մեղադրանքը, ըստ մեզ, հիմնավորված է ոչ միայն քրեական գործով ձեռք բերված տվյալներով, այլ նաեւ՝ վերջինիս հետ համագործակցած անձի ցուցմունքներով, բացի այդ վերջինիս գործողությունների արդյունքում բացի ընկերությունից նաեւ վնաս է կրել նույն ընկերության աշխատակիցը, որին հաշվապահի կողմից վճարվել է ավելի քիչ արձակուրդային գումար, որքան հասու է եղել օրենքով սահմանաված կարգով: Ուստի կարծում եմ, որ քրեական գործով ձեռք բերված բավարար ապացույցների համակցությունը բավարար է, որպեսզի յուացման փաստով հարուցված քրեական գործով կազմվի մեղադրական եզրակացություն եւ գործն ուղարկվի դատարան:

- Ո՞ւմ մասին է խոսքը: Սուսաննա Արիստակեսյանը նշում է, որ ինքն ունի ձայանգրություններ ու ապացույցներ, որով կապացուցվի իր անմեղությունը:

- Հաշվապահի հետ միասին յուրացման մի քանի դրվագներով մասնակից է եղել նաեւ ընկերության մենեջերը, իսկ Սուսաննա Արիստակեսյանի կողմից արված ձայնագրությունների մասին տեղեկություններ չունեմ, եթե նույնիսկ նման ձայնագրություններ կան, ապա դրանք որպես ապացույց չեն կարող օգտագործվել քերական վարույթի ընթացքում, քանի որ դրանք օրենքի խախտմամբ ձեռք բերված ապացույցներ են:

Հիշեցնենք, որ Վաչագան Ղազարյանը եւ Ռուզաննա Բեգլարյանը մեղադրյալի կարգավիճակ ունենք, նրանք մեղադրվում են ապօրինի հարստացման մեջ: