Պատասխան. Քոչարյանը հեռացվեց միաձայն

Տպագրվել է «Հայկական Ժամանակ» օրաթերթի՝ 2005 թվականի դեկտեմբերի 13-ի համարում

Մինչեւ այս գումարման խորհրդարանի լիազորությունների ավարտը, սկսած հունվարյան նստաշրջանից, ԵԽԽՎ հայաստանյան պատվիրակությունում «Արդարություն» դաշինքն այսուհետ կներկայացնի դաշինքի ղեկավար Ստեփան Դեմիրճյանը: Երեկ տեղի ունեցած «Արդարություն» խմբակցության նիստում որոշում է կայացվել ԵԽԽՎ ՀՀ պատվիրակությունից ետ կանչել Շավարշ Քոչարյանին: Որոշումն անցել է առանց որեւէ դեմ ձայնի, իսկ քվեարկությանը չեն մասնակցել միայն Ստեփան Դեմիրճյանն ու Շավարշ Քոչարյանը: Այսպիսով, ավարտվեց երեք գումարումների պատգամավոր Շավարշ Քոչարյանի «ճանապարհորդական» էպոպեան, քանզի թե՛ նախորդ երկու գումարումների եւ թե՛ այս գումարման ԱԺ-ում նա ամենաճանապարհորդ պատգամավորների առաջին եռյակում էր, իսկ առաջին գումարման խորհրդարանում ճանաչվել էր թիվ մեկ ճանապարհորդը:

Այսպիսով, «Արդարությունն» իր այս որոշմամբ հստակություն մտցրեց ՀՀ խորհրդարանական ընդդիմություն-ԵԽԽՎ հարաբերություններում. Եվրախորհրդի ներկայացուցիչները ոչ մի կերպ չէին կարողանում հասկանալ հայաստանյան խորհրդարանական ընդդիմության գործողություններն ու վարքագիծը, քանզի այդ ընդդիմության խոսնակը ԵԽԽՎ-ում՝ Շավարշ Քոչարյանը, ըստ դաշինքի ներկայացուցիչների, բոլորովին այլ ինֆորմացիա էր տալիս ԵԽԽՎ-ին ընդդիմության ծրագրերի, նպատակների եւ քաղաքական գնահատականների վերաբերյալ: Եւ այն, որ ԵԽ բարձրաստիճան պաշտոնյաների վերջին հայտարարություններում որոշակի բացասական վերաբերմունք է եղել ընդդիմության գործողությունների հանդեպ, դա, ըստ դաշինքի անդամների, բացառապես Շավարշ Քոչարյանի մեղքն է, որը տեւական ժամանակ թյուրիմացության մեջ է գցել ԵԽԽՎ-ին՝ չներկայացնելով հայաստանյան խորհրդարանական ընդդիմության իրական տեսակետները:

Ի դեպ, երեկ խմբակցության նիստի քննարկումն անցել է բավականին լարված մթնոլորտում: Մեր ունեցած տեղեկությամբ, «Արդարություն» խմբակցության քարտուղար Վիկտոր Դալլաքյանն առաջարկել է Շավարշ Քոչարյանին ինքնակամ հրաժարական ներկայացնել, սակայն վերջինս հրաժարվել է եւ պնդել է, որ ԵԽԽՎ ՀՀ պատվիրակության կազմից իրեն հեռացնելու հարցը դնեն բաց քվեարկության, որովհետեւ ինքը կամավոր հրաժարական չի տալու: 

Հարցը դրվել է բաց քվեարկության, եւ արդյունքում Շավարշ Քոչարյանն այլեւս ԵԽԽՎ-ում չի ներկայացնելու «Արդարություն» դաշինքը: Իսկ կամավոր հրաժարական չներկայացնելը,  ըստ դաշինքի անդամ մեր զրուցակիցների, շատ պարզ է՝ Շավարշ Քոչարյանը որոշակի պարտավորություններ է ստանձնել թե՛ հայաստանյան իշխանությունների եւ թե՛ ԵԽԽՎ-ի առաջ, ուստի իրենց համար հասկանալի էր, որ նա ոչ մի դեպքում ինքնակամ հրաժարական չէր տալու: Ավելին, Շավարշ Քոչարյանը ոչ միայն հրաժարական չի ներկայացրել, այլեւ հայտարարել է, որ իրեն հեռացնելով ԵԽԽՎ պատվիրակության կազմից՝ ընդդիմությունը կատարում է իշխանությունների պատվերը, քանզի ժամանակին արտգործնախարար Վարդան Օսկանյանն էր պահանջում փոխել ԵԽԽՎ ՀՀ պատվիրակության ընդդիմադիր անդամներին:

Շ.Քոչարյանին պատասխանել են, որ իրեն Գառնիկ Իսագուլյանով չեն փոխում, ուստի իշխանություններին հղում անելն այս դեպքում արդարացված «տրյուկ» չէ: Իսկ դաշինքի նիստից Շավարշ Քոչարյանը դուրս եկավ, մեղմ ասած, զայրացած ու արեց հետեւյալ հայտարարությունը. «Խմբակցության այս որոշումով ԵԽԽՎ-ում մենք կորցրեցինք մոնիտորինգի հանձնաժողովի անդամի, մշակութային ժառանգության վեհաժողովի ենթահանձնաժողովի նախագահի տեղակալի տեղերը, մենք կորցրեցինք զեկուցողի տեղը, որովհետեւ արդեն նշանակված էի ժողովրդավարության եւ դեմոգրաֆիայի հարցերով զեկուցող, եւ դա ես էի, ինչպես նաեւ՝ կորցրեցինք առողջապահության կոմիտեում դիտորդի տեղը: Նման կորուստները պետք է ինչ-որ կերպ հիմնավորված լինեին, եւ երեւի միակ հիմնավորումն այն է, որ սահմանադրական փոփոխությունների հարցով կային տարաձայնություններ ԱԺԿ-ի եւ դաշինքի միջեւ:

Իմ տպավորությունն այն է, որ ընդդիմությունը կտրում է այն ճյուղը, որի վրա նստած է: Մեր զգուշացումները, թե այդ ճյուղը կտրել չի կարելի, անցան ապարդյուն. կտրեցին ճյուղն ու երբ ընկան, մեզ մեղադրեցին կախարդ եւ գուշակ լինելու մեջ: Այսօր ԱԺԿ-ն հայտնվել է ահա այդ կախարդի կարգավիճակում: Իսկ ողջ այս պատմության ընթացքում երկիրը հայտնվել է շատ ավելի ծանր վիճակում. արդյունքում, հանրաքվեից հետո ունենք է՛լ ավելի հիասթափված ժողովուրդ, է՛լ ավելի դիրքերը թուլացած եւ վստահությունը կորցրած ընդդիմություն եւ, որպես արդյունք, է՛լ ավելի ուժեղացած ռեժիմ»,- իր հայտարարությունն ավարտեց Շավարշ Քոչարյանը եւ, հրաժարվելով պատասխանել որեւէ հարցի, մասնավորապես՝ ինքը կշարունակի՞ մնալ «Արդարություն» դաշինքում, թե՞ ոչ, լրագրողների առաջ ամուր փակեց իր սենյակի դուռը:

Եւ չնայած դաշինքը որեւէ անդամի հեռացնելու իրավական լիազորություն չունի, սակայն «Արդարություն» դաշինքում ակնկալում են, որ Շավարշ Քոչարյանն ինքը կհասկանա, որ իր տեղը բոլորովին ուրիշ քաղաքական հարթություններում է, եւ այս դեպքում կամավոր կհեռանա դաշինքից: Հատկապես որ, ինչպես ասում է դաշինքի անդամներից մեկը՝ դաշինքից հեռանալուց նա ոչինչ չի կորցնում, ինչը չի կարելի ասել ԵԽԽՎ-ի ամբիոնը կորցնելուց, որտեղ Շավարշ Քոչարյանի ներկայությունը, պարզվում է, խիստ անհրաժեշտ է եղել ընդդիմությանը փչացնելու եւ խաղից հանելու համար: Ինչ վերաբերում է Շավարշ Քոչարյանի թվարկած կորուստներին, որոնք կրելու է ընդդիմությունը ԵԽԽՎ-ում իր չլինելով, ապա «Արդարություն» դաշինքում կարծում են, որ առանց ԵԽԽՎ առողջապահության կոմիտեում դիտորդ Քոչարյանի բացակայության աշխարհը հաստատ փուլ չի գա: 

Նաիրա  Զոհրաբյան