«Ֆլեշ մոտորս»-ի տնօրենը պնդում է՝ իր նկատմամբ բռնություն են գործադրել Ֆլեշի Բարսեղի ցուցումով. նա մանրամասներ պատմեց

«Ֆլեշի Բարսեղ» մականունով հայտնի Բարսեղ Բեգլարյանը չի ընդունում իրեն առաջադրված մեղադրանքը:

Բարսեղյանը, հիշեցնենք, մեղադրվում է 2016թ. մարտ-ապրիլ ամիսների ընթացքում Արման Մայիսի Մկրտումյանի նկատմամբ բռնություն գործադրելով, ինչպես նաեւ կյանքի եւ առողջության համար վտանգավոր բռնություն գործադրելու սպառնալիքներով ինքնիրավչություն կատարելու համար:

Երեւան քաղաքի ընդհանուր իրավասության դատարանում (Ավան եւ Նոր Նորք նստավայր) դատավոր Դավիթ Հարությունյանի նախագահությամբ այսօր մեկնարկեց սույն գործով դատական նիստը:

Ամբաստանյալներն են Բարսեղ Բեգլարյանը եւ Հրայր Հովսեփյանը:

Մինչ նիստը սկսվելը Բարսեղ Բեգլարյանից հետաքրքրվեցինք, թե ընդունո՞ւմ է իրեն առաջադրված մեղադրանքը, ինչին ի պատասխան Բեգլարյանը միայն ասաց. «Ինչ եք կորցրել, ինչի հետեւից եք ընկել», ապա խորհուրդ տվեց հարցերի պատասխանները ստանալ իր պաշտպան Կրոմվել Գրգորյանից: Վերջինս լրագրողների հետ զրույցում նշեց, որ իր պաշտպանյալի նկատմամբ ընտրված խափանման միջոցը անձնական երաշխավորությամբ փոխելու վերաբերյալ միջնորդությունն ինքն է ներկայացրել դատախազություն, որպես երաշխավոր հանդես է եկել «Արարատ» բանկի գործադիր տնօրեն Աշոտ Օսիպյանը: Նշենք, որ սույն հոդվածի նկատմամբ համաներումը կիրառելի է, սակայն Բեգլարյանը հրաժարվել է, որ իր նկատմամբ համաներում կիրառվի այն պատճառով, որ ինքը, ըստ պաշտպանի, հանցավոր արարք չի կատարել: Մեր հարցին, թե ի վերջո մեղադրանքի հիմքում ի՞նչ ապացույցներ են դրվել, Կրոմվել Գրիգորյանը պատասխանեց, որ մեղադրանքի հիմքում դրվել են բացառապես գործի ելքով շահագրգռված անձի ցուցմունքները՝ տուժողի եւ երկու ենթադրյալ վկաների։ Նրա խոսքով՝ տուժողը բանկից ստացած գումարները ծախսել է իր կարիքների համար։ Նա նշեց, որ իր պաշտպանյալի կողմից բռնություն գործադրելու սպառնալիք չի եղել, ինքնիրավչության հետեւանքը չկա, այն, որ մեղադրանքում նշված է՝ գումար է մուտք արել հետ՝ «Ֆլեշ Մոտորս» ՍՊԸ, նման ապացույց չկա, ինչը բավարար է, որ գործը կարճվեր։ Մեր մյուս հարցին, թե իր պաշտպանյալի մասնակցությամբ առերեսումներ կատարվե՞լ են, պաշտպանը պատասխանեց, որ առերեսումներ են կատարվել տուժողի հետ. «Կոնֆերանսների դահլիճում եղել են բազմաթիվ այլ անձինք, 8 հոգուց ավելի, բազմիցս միջնորդել եմ առերեսումներ կատարվի, քանի որ բռնություն եւ բռնության սպառնալիքներ չի եղել, նախաքննական մարմինը չի կատարել»,- ասաց պաշտպանը: Հարցին, թե մասնավորապես ինչ գործողություններ են արել մեղադրյալները տուժողի նկատմամբ, Գրիգորյանն ասաց. «Իբր թե կոնֆերենս սրահում մեղադրյալ Հրայր Հովսեփյանը երկու ձեռքով հարվածել է տուժողի ուսերին, նա էլ դա ռեալ սպառնալիք է ընդունել եւ զբաղվել է, որպեսզի գրավադրվի բնակարանն, այդ գումարը ստանա»: Հարցին, թե Բարսեղ Բեգլարյանը ինչ գործողություններ է արել, պաշտպանն ասաց, որ նա ըստ մեղադրանքի՝ սպառնալիքներ է հնչեցրել կոնֆերենս դահլիճում, սակայն դրա վերաբերյալ տեսագրություն չկա, ըստ նրա՝  կան բազմաթիվ վկաներ, որ ասել են՝ ոչ բռնություն է եղել, ոչ էլ բռնության սպառնալիք։ Հարցին, թե ո՞րն է տուժողի շահագրգռվածությունը, որ նրա դեմ հաղորդում է ներկայացրել, պաշտպանը պատասխանեց։ «Տուժողը շանս ունի, իրավիճակ է փոխվել, երկրում իշխանություն է փոխվել եւ նա հույս ունի, որ իր գումարը, որն իր անձնականի համար ծախսել է, մի գուցե հետ գա»,- ասաց Գրիգորյանը: Գրիգորյանի խոսքով՝ տուժողն էլ է ընդունում, որ 120 մլն-ի վնաս են պատճառել «Ֆլեշ Մոտորս»-ին, որը տուժողը չի վերականգնել։ Պաշտպանը նշեց, որ տուժող Արման Մկրտումյանի նկատմամբ ներկայումս քաղաքացիական գործ կա, որը քննվում է վերաքննիչ քաղաքացիական դատարնում։

«Ֆլեշ մոտորս» ընկերության նախկին կոմերցիոն տնօրեն Արման Մկրտումյանն էլ լրագրողների հետ զրույցում պնդեց, որ ընկերության Քանաքեռ բազայի պետ Հրայր Հովսեփյանն իր նկատմամբ բռնություն է գործադրել ընկերության նախագահ, «Ֆլեշի Բարսեղ» անունով հայտնի Բարսեղ Բեգլարյանի ցուցումով եւ նրա ներկայությամբ: Արման Մկրտումյանը պատմեց, որ «Ֆլեշ մոտորս» ընկերության երկու մենեջեր ընկերությունից յուրացում են կատարել, որի համար այս պահին արդեն մեղավոր են ճանաչվել ու դատապարտվել ազատազրկման: Յուրացման դեպքի մասին հայտնի դառնալուց հետո, ըստ Մկրտումյանի խոսքի, իր նկատմամբ բռնություն է գործադրվել ընկերության կոնֆերենս սրահում: «Հրայր Հովսեփյանը հարվածել է իմ ուսերին, գցել է գետնին, եւ այլն, եւ այլն…չմանրամասնեմ»,- ասաց տուժող Մկրտումյանը՝ հավելելով, որ այդ բռնությունների հետեւանքով է, որ գրավադրել է իր բնակարանը: Հարցին՝ Մկրտումյանն առձե՞ռն է հանձնել գումարը Բեգլարյանին, տուժողը պատասխանեց, որ ինքը բնակարանը գրավադրել է «Արարատ» բանկում, եւ դրանցից հետո, փաստացի, գումար չի ստացել: «Այդ գումարը ես չեմ ստացել, քանի որ Բեգլարյանն «Արարատ» բանկի տերն է, հետեւաբար այդ գումարը անուղղակի ձեւով փոխանցվել է նրան»,- լրագրողների հետ  զրույցում նշեց տուժող Մկրտումյանը: Վերջինս խոսքով՝ գումարը վերցնելուց հետո Բարսեղ Բեգլարյանն իր վերաբերյալ հաղորդում է տվել Քննչական կոմիտեում եւ 6-7 ամիս գործը քննելուց հետո որոշում է կայացվել իր՝ Մկրտումյանի նկատմամբ քրեական հետապնդում չիրականացնել հանցակազմի բացակայության հիմքով: Տուժողը պնդեց, որ ընկերությունից յուրացում չի կատարել: Հարցին՝ այդ դեպքում ինչո՞ւ են հենց իրեն պարտադրել, որ գրավադրի իր բնակարանը, Մկրտումյանը պատասխանեց, որ ինքն է եղել յուրացման մեջ մեղադրված անձանց ղեկավարը:

Արման Մկրտումյանը հավելեց նաեւ, որ իր գործողությունները վարչական դատարանը գնահատել է որպես հասարակ անզգուշություն եւ իր նկատմամբ վարչական տուգանք են նշանակել 280 հզ դրամի չափով, ինքը որոշումը բողոքարկել է, սակայն Վերաքննիչ դատարանը մերժել է այն, ու եթե դատական ակտն օրինական ուժ ստանա, ապա կվճարի նշված գումարը: Հարցին՝ գործի քննության ընթացքում Բեգլարյանի կողմից ճնշումներ եղե՞լ են տուժողի նկատմամբ, թե ոչ, արդյոք առաջարկե՞լ են ետ վերցնել բողոքը, Մկրտումյանը պատասխանեց, որ ճնշումներ չեն եղել, սակայն պատրաստակամություն են հայտնել գումարը փոխհատուցել: Հարցին՝ անձամբ Բեգլարյա՞նն է առաջարկել, որպեսզի փոխհատուցի գումարը, Մկրտումյանը պատասխանեց, որ առաջարկը եղել է նրա փաստաբան Կրոմվել Գրիգորյանի միջոցով, սակայն ինքն այդ առաջարկը մերժել է: Մկրտումյանը հույս հայտնեց, որ արդար դատաքննություն կլինի ու դրա արդյունքում Բարսեղ Բեգլարյանը կդատապարտվի:

Դատական նիստը սկսվեուն պես նախագահող դատավոր Դավիթ Հարությունյանը ներկայացրեց դատավորին ինքնաբացարկ հայտնելու հիմքերը: Մինչ դատավարության մասնակիցների դիրքորոշում հայտնելը Հարությունյանը տեղեկացրեց, որ լայն հրապարակումներ կան այն մասին, թե դատավորն այս գործով կաշկանդվածություն ունի: Նա նշեց, որ ամբաստանյալներին չի ճանաչում, դատավարության մասնակիցներից ճանաչում է միայն ամբաստանյալների պաշտպան Կրոմվել Գրիգորյանին եւ մեղադրող դատախազ Աբգար Առաքելյանին:

Դատավոր Դավիթ Հարությունյանը նշեց, որ այս գործով քննչական վարչության պետ Հովհաննիսյանը եղել է իր համակուրսեցին, որի հետ ունեցել է ջերմ հարաբերություններ, սակայն վերջին տարիներին նրա հետ շփում չի ունեցել:

Մեղադրող դատախազ Աբգար Առաքելյանն ասաց, որ դատավորին ինքնաբացարկի միջնորդություն չունի եւ որ նման հանգամանքները հիմք չեն ինքնաբացարկի միջնորդություն ներկայացնելու համար: Նման միջնորդություն չուներ նաեւ պաշտպանական կողմը:

Նշենք, որ մամուլում տեղեկություններ էին շրջանառվել, որ Բարսեղ Բեգլարյանի գործով դատավորը լինելու է Սերժ Սարգսյանի թիկնազորի նախկին ղեկավարի՝ ՀՀ պետական պահպանության ծառայության նախկին պետ Հրաչյա Հարությունյանի որդին՝ Դավիթ Հարությունյանը: Մամուլը այս հիմքով չէր բացառել, որ այս փաստը հիմք հանդիսանա դատավորին ինքնաբացարկ հայտնելու համար:

Այնուհետեւ դատարանն անցավ ամբաստանյալների ինքնությունների ճշտմանը: Ըստ այդմ՝ ամբաստանյալներ Հրայր Հովսեփյանը եւ «Ֆլեշի Բարսեղ» մականունով հայտնի Բարսեղ Բեգլարյանը ծնվել են Արցախի Հանրապետության Ասկերանի շրջանում: Բարսեղ Բեգլարյանն ասաց, որ ունի բարձրագույն կրթություն, դատավորի հարցին՝ առո՞ղջ եք, Բեգլարյանը պատասխանեց.«Փառք տիրոջը»:

Բարսեղ Բեգլարյանի պաշտպան Կրոմվել Գրիգորյանը դատավորի հարցին ի պատասխան ասաց, որ մեղադրող դատախազ Աբգար Առաքելյանի դեմ բացարկի միջնորդություն ունի, սակայն այն ներկայացնելու համար պաշտպանական կողմին ժամանակ է հարկավոր, ուստի միջնորդեց հետաձգել այսօրվա նիստը:

Դատարանը որոշեց մինչ նիստը հետաձգելը ամբաստանյալներին եւ տուժողներին ծանոթացնել իրենց իրավունքների եւ պարտականությունների հետ, ապա հետաձգեց նիստը: Հաջորդ նիստը տեղի կունենա 2019 թվականի հունվարի 29-ին ժամը, 14:00-ին:

Ըստ Քննչական կոմիտեի՝ մինչդատական վարույթում ձեռք բերված տվյալների համաձայն՝ Բարսեղ Բեգլարյանի որդուն՝ Նարեկ Բեգլարյանին պատկանող «Ֆլեշ Մոտորս» ՍՊ ընկերությունից 2015թ. ընթացքում իրականացվել է առանձնապես խոշոր չափերի գույքի հափշտակություն, որի կատարման մեջ ընկերության սեփականատերն ու հարազատները մեղադրել են «Ֆլեշ Մոտորս» ՍՊ ընկերության նախկին կոմերցիոն տնօրենին և պահանջել վերականգնել ենթադրաբար պատճառված գույքային վնասը։

Տպել
1674 դիտում

Մարտի մեկը պետք է քննություն անցնի, ես կարծեմ 2009-ին ցուցմունք չեմ տվել. Խաչատուր Սուքիասյան

Ամուլսարի շահագործմանը փայլուն եմ վերաբերվում. Խաչատուր Սուքիասյան

Պետք է զարգացնենք հայոց պետականության նվիրական արժեքը. Արման Թաթոյան

100 փաստերը չեն տալիս ելակետային տվյալներ, որպեսզի համեմատություններ անցկացվեն. Վարդանյան

Փոխվարչապետ Ավինյանն Ուրբասեր ընկերության պատվիրակության հետ քննարկել է բիզնես և ներդրումային միջավայրի հարցեր

ՀՀ պաշտպանության նախարարն ընդունել է Բելառուսի զինված ուժերի գլխավոր շտաբի պետին

Հայաստանի ազատ ոճի ըմբիշները ձեռնունայն կվերադառնան Աշխարհի առաջնությունից

Ադրբեջանում գտնվող Ղազարյանները պետք է վերադարձվեն Հայաստանին. Զոհրաբ Մնացականյան

Ծանրամարտի Աշխարհի առաջնություն. Իզաբելա Յայլյանը 6-րդն է B խմբում

Վարչապետը շնորհավորական ուղերձ է հղել Մալթայի վարչապետին Անկախության օրվա կապակցությամբ

Գյումրիում տոնը շարունակվում է (լուսանկարներ)

ՀՀ վարչապետի գլխավորած պատվիրակությունը Գյումրիից մեկնել է ԱՄՆ

Ամենօրյա պայքար հանուն անկախության

Իմ դեմ կեղծ ցուցմունք են տվել. Վայոց ձորի մարզպետը՝ իր օգնականի մասնակցությամբ միջադեպի մասին

Քաջարան-Մեղրի ավտոճանապարհին մառախուղ է՝ տեսանելիությունը 1-2 մետր

Միայն հարգանքից ելնելով է առաջարկվել Վանեցյանի եւ Օսիպյանի ազատումը ձևակերպել հրաժարականի դիմումներով. ԱԺ նախագահ

«Մուլտի Գրուպ» կոնցեռնի տնօրենին մեղադրանք է առաջադրվել նաև առանձնապես խոշոր չափի փողերի լվացման համար. ՔԿ

Մենք ունենք 2 պետություն, բայց 1 հայրենիք եւ մեր նպատակը 1 պետություն, 1 հայրենիք ունենալն է. Դավիթ Բաբայան

Հայաստան է ժամանել Բելառուսի Զինված ուժերի գլխավոր շտաբի պետը

Ես Արցախ եմ հրավիրելու այս բոլոր մրցանակակիրներին և նորից մեծարելու եմ նրանց. Բակո Սահակյան