Տեղական ո՞ր տուրքերն են բարձրացել Երեւանում․ տեղական տուրքերի դրույքաչափերը սահմանելու մասին ավագանու որոշման նախագիծը

Երեւանի ավագանին այսօր հաստատեց Երեւան համայնքում տեղական տուրքերի 2019 թվականի դրույքաչափերը սահմանելու մասին Երեւանի ավագանու որոշման նախագիծը:

Ըստ այս որոշման՝ փոփոխության են ենթարկվել Երեւանում ոչ հիմնական շենք-շինությունների համար նախատեսված շինթույլտվության տրամադրման համար տեղական տուրքի դրույքաչափերը: Մինչեւ 20 քմ ընդհանուր մակերեսով շենք-շինությունների համար 2018 թվականի 15 հազար դրամ դրույքաչափի փոխարեն սահմավել է 21 հազար դրամ, իսկ 20 քմ-ից ավելի ընդհանուր շենք-շինությունների համար նախկին 25 հազար դրամի փոխարեն սահմանվել է 35 հազար դրամ: Փոփոխության է ենթարկվել նաեւ Երեւանի վարչական տարածքում հեղուկ վառելիքի, սեղմված բնական եւ հեղուկացված նավթային գազերի վաճառքի թույլտվության համար տուրքերը՝ օրացուցային տարվա համար սահմանվել է 600 հազար դրամ՝ նախկին 350 հազար դրամի փոխարեն:

Փոփոխության են ենթարկվել նաեւ Երեւանի վարչական տարածքում առեւտրի, հանրային սննդի, զվարճանքի, շահումով խաղերի, վիճակախաղերի կազմակերպման օբյեկտների, խաղատների, բաղնիք-սաունաների՝ ժամը 24:00-ից աշխատելու համար տեղական տուրքերը: Առեւտրի օբյեկտների համար նախկին 87 500 դրամի փոխարեն սահմանվել է 120 հազար դրամ, հանրային սննդի եւ զվարճանքի օբյեկտների համար 175 000-ի փոխարեն սահմանվել է 250 000 դրամ, բաղնիքների համար՝ նախկին 875 000-ի փախարեն՝ 1 մլն 400 հազար դրամ, խաղատների համար՝ 1 մլն 750 հազար դրամի փոխարեն 3 մլն դրամ, շահումով խաղերի համար՝  875 հազարի դիմաց 1 մլն 500 հազար դրամ, վիճակախաղերի համար՝ 262 000-ի դիմաց 450 000 դրամ:

Երեւանում նաեւ տեղական տուրք է սահմանվել տեխնիկական եւ հատուկ նշանակության հրավառություն իրականացնելու թույլտվության համար՝ 300 հազար դրամի չափով: Այս ամենի մասին զեկուցեց Քաղաքապետարանի եկամուտների հաշվառման եւ գանձման վարչության պետ Արմեն Հարությունյանը։

Նախքան նախագծի քննարկումը, Երեւանի քաղաքապետ Հայկ Մարությանն ասաց, որ նախագծով որոշ տուրքեր Երեւան քաղաքում բարձրանում են: «Բայց քանի որ մեր քաղաքականությունն է՝ աջակցել մանր ու միջին բիզնեսին, ուստի առաջարկում եմ հունվարի 15-ին արտահերթ նիստ ունենանք եւ սահմանենք բացառություններ մանր ու միջին բիզնեսի համար: Մինչեւ 58.3 մլն դրամ տարեկան շրջանառություն ունեցող կազմակերպությունները կազատվեն այն բարձրացումներից, որոնք տեղի կուենան այս կետով: Այսինքն՝ իրենք կշարժվեն 2018-ի կետերով: Ճիշտ է, արտահերթ նիստը կանենք հունվարի 15-ին, բայց մեր ընդունած որոշումը կազդի հունվարի 1-ից: Այնպես որ, անհանգստանալու կարիք չկա»,- ասաց քաղաքապետը:

ԲՀԿ խմբակցության ղեկավարը հարց հնչեցրեց, թե ինչ սկզբունքով է 58 մլն հաստատվում, Հայկ Մարությանն ասաց, որ դա շրջանառության հարկի շեմն է՝ նշելով, որ դա է տրամաբանությունը։

«Լույս» խմբակցությունից Անի Սամսոնյանը հարցրեց՝ այս նախագծի մշակման ընթացքում հանդիպե՞լ են տնտեսվարող սուբյեկտներին, հարցրե՞լ են նրանց կարծիքը, քանի՞սն են կողմ կամ դեմ եղել նախագծին։ Ի պատասխան՝ Մարությայնն ասաց, որ սա հանրային քննարկման է դրված եղել, հանդիպումներ եղել են։

Հայկ Մարությանը քննադատություններին ի պատասխան ասաց, որ արդար չէ, երբ բենզալցակայանները կամ գազալցակայանները, որոնք միլիոններով շահույթ են ունենում, տարբերակված տուրքեր չվճարեն: Փոքր խանութների համար, ըստ նրա, իհարկե պետք է գործեն արտոնություններ:

«Ինձ ֆինանսիստները համոզել են, որ այս թվերը չեն ազդելու տնտեսվարողների վրա, մեծերի համար ընդհանրապես չի զգացվելու, դա իրենց համար շատ փոքր փոփոխություն է լինելու: Ինձ թվում է՝ իրենք հաճույքով են դա անելու՝ գիտակցելով, որ քաղաքին օգուտ են տալու: Ինչ վերաբերում է փոքր բիզնեսին՝ քանի որ ես ամբողջ կանքում սիրում եմ եւ duble, եւ triple check անել եւ ունենալ պահեստային բուֆերային զոնա, ես առաջարկեցի՝ եկեք փոքր բիզնեսի համար այս շեմը դնենք, որ 100 տոկոսով ոչ մի խնդիր չլինի»,- նշեց Հայկ Մարությանը՝ շնորհակալություն հայտնելով հանրային քննարկումների համար, անհատների դիտարկումների համար․ «Այդ քննարկումները բերում են ճիշտ որոշումների»,-նշեց Մարությանը:

Որոշումն ընդունվեց 51 կողմ, 7 դեմ, 2 ձեռնպահ ձայներով: