Դա շատ լավ որոշում է, եթե այս գներով լինի, ապա մեր գրպանն էլ կթեթեւանա. Հովհաննիսյան

ՀՀ կառավարությունը հավանություն է տվել 2019 թվականի հուլիսի 1-ից էլեկտրական շարժիչով ավտոմեքենաների եւ մոտոցիկլետների (ոչ հիբրիդային) ներկրումն ԱԱՀ վճարումից ազատելու վերաբերյալ օրենքի նախագծին: Արտոնությունը գործելու է մինչեւ 2022 թվականի հուլիսի 1-ը: Այս տարի էլ կստեղծվի էլեկտրական մեքենաների լիցքավորման կայանների ցանց՝ 23 լիցքավորման կայանով, որոնք հասանելի կլինեն Հայաստանի ողջ տարածքում:

«Դա շատ լավ որոշում է»,- այս մասին ՀԺ-ի հետ զրույցում ասաց «Ավտովարորդների պաշտպանության լիգայի» նախագահ Տիգրան Հովհաննիսյանը:

- Պարոն Հովհաննիսյան, վարորդներին ի՞նչ կտա էլեկտրոմոբիլ մեքենաները ԱԱՀ վճարումից ազատելը:

- Կառավարության այդ նախագիծը կուզեի ասել՝ նաեւ ուշացված է: Դա դեռ 10 տարի առաջ պիտի լիներ: Դա հրաշալի մոտեցում է, պարզապես պիտի մեր քաղաքացիները փորձեն այդ մեքենաները, տեսնեն՝ որտեղ են լիցքավորում, ինչ պայմաններում: Ես դեռ անցած տարի 2500 դոլարով մաքսազերծում եմ իրականացրել 2015 թվականի Կորեայից ներմուծված էլեկտրոմոբիլի` դա խայտառակություն էր: Ուղղակի վատն այն է, որ մինչեւ հիմա մոտ 10 հոգի արդեն բերել էր այդ մեքենաներից` մաքսազերծման գումարը վճարելով եւ նրանք արդյունքում տուժվում են:

- Ի՞նչ եք կարծում՝ արդյո՞ք մինչեւ 2022 թվականը Հայաստան մեծ քանակությամբ էլեկտրոմոբիլներ կներմուծվեն:

- Ես կարծում եմ, որ մոտ 10 տարի հետո ամբողջ քաղաքը կսկսի էլեկտրոմոբիլներով շրջել: Դա ճիշտ է, որ 3 տարին մեկ անդրադառնան, մարդիկ կփորձեն, կտեսնեն: Համենայնդեպս, 2020 թվականին ԵԱՏՄ տարածքում էլ ընդհանրապես հին մեքենա չեն ներմուծելու, միայն մինչեւ 5 տարեկան մեքենաներ հնարավոր կլինի ներմուծել, որովհետեւ մաքսազերծումը էժան է լինելու:

Ես ուզում եմ վարչապետի հետ հանդիպել՝ նաեւ հասկանալու համար, թե ի՞նչ է լինելու ավտոներկրողների վիճակը: Պետք է առաջընթաց ունենալ, բայց միեւնույն ժամանակ պիտի հասկանանք՝ մենք կարո՞ղ ենք գնալ ավտոսրահներից մեքենա գնել:

- Ի՞նչ հեռանկար է բացում էլեկտրոմոբիլների մուտքը Հայաստան, զբոսաշրջիկներին կգրավի՞ սա:

- Ամենակարեւոր խնդիրը օդի ախտոտումն է: Մենք մի քիչ փրկվել ենք, որ գազ ենք տեղադրել: Ամերիկյան մասնագետներն էլ են ասում, որ Երեւանում օդը մի քիչ մաքուր է, որովհետեւ գազ են տեղադրել, ոչ թե բենզինով են վարում: Զբոսաշրջիկին հետաքրքիր չէ՝ դա էլեկտրոմոբիլ է, թե հարմարավետ մեքենա է:

- Էլեկտրոմոբիլները թա՞նկ արժեն:

- Թանկ չեն, արդեն 10 տարի է՝ դրանք թողարկվում են ու նորմալ գներ են լինելու 5, 6, 7 հազար դոլարի չափով, ու ամենակարեւորը՝ բարձր թվականների:

- Սոցիալական առումով սա կթեթեւացնի՞ վարորդների բեռը:

- Պարզ է, որ մեր գրպանն էլ կթեթեւանա: Եթե այս գներով մոտեցումը լինի, ապա հայերի համար լավ կլինի: Դա շատ լավ որոշում է: