Արծաթե թիթեռնիկներ. սաբոտաժ` ընդդեմ Զախարյանի՞

Տպագրվել է «Հայկական Ժամանակ» օրաթերթի՝ 2006 թվականի հունվարի 24-ի համարում

Այս օրերին հասարակության շրջանում քննարկվող հիմնական թեմաները կապվում են Երեւանի հետ: Առաջինը անցած շաբաթվանից տեղացող առատ ձյան պատճառով մայրաքաղաքում ստեղծված իրավիճակն է, որին մարդիկ տարբեր անուններ են տալիս՝ «խայտառակ», «անմխիթար» եւ այլն: Երեւանին առնչվող մյուս թեման Երեւանի քաղաքապետ Երվանդ Զախարյանի կարիերան է. որքան ավելի առատ է տեղում ձյունը, այնքան Զախարյանի հնարավոր պաշտոնանկության մասին խոսակցություններն ավելի ուժգնանում են: Ընդ որում, այս թեմաները սերտորեն փոխկապակցված են: Երեւանի փողոցները չմաքրելու կամ համարյա չմաքրելու հանգամանքը շատերը համարում են ուղղակի սաբոտաժ` Զախարյանի դեմ: Նպատակը` հասարակության մեջ արդարացնել նրա հնարավոր պաշտոնանկությունը:

Եւ եթե հաշվի առնենք, որ միայն «ծաղկող Երեւան» ներկայացնող մեր իշխանամետ հեռուստաընկերությունների վերջին օրերի եթերը ողողված է քաղաքային իշխանությունների վատ աշխատանքի մասին պատմող ռեպորտաժներով, ապա կարելի է ենթադրել, որ գործ ունենք դասական «զոնդաժի» հետ: Ռոբերտ Քոչարյանի` քաղաքապետարանում կայացած խորհրդակցության լուսաբանումից էլ հասարակությունը տեսավ, թե ինչպես է երկրի ղեկավարը դժգոհում Երեւանի քաղաքապետից: Իսկ այն, որ Քոչարյանը քաղաքապետարան էր գնացել հատկապես Երվանդ Զախարյանի թերությունները բացահայտելու, կարելի էր նկատել քաղաքապետարանի շենքի առջեւ իրեն դիմավորող Զախարյանին նրա ցույց տված ակնհայտ սառը վերաբերմունքից:

Քաղաքապետարանում տեղի ունեցած խորհրդակցության ժամանակ էլ, որին մասնակցել են նաեւ Երեւանի թաղապետերը, մեր տեղեկություններով, Ռոբերտ Քոչարյանն իսկապես «գոռգոռացել» է Զախարյանի ու մի քանի այլ պաշտոնյայի վրա: Նախ` երբ Ռոբերտ Քոչարյանը հատուկ հետաքրքրվել է, թե ով է համակարգում աճուրդների միջոցով հողերի օտարման գործընթացը, խորհրդակցության մասնակիցներից որեւէ մեկը չի արձագանքել նրա հարցին: Եւ երբ Քոչարյանը 3-րդ անգամ հարցրել է` ո՞վ է զբաղվում աճուրդներով, Երվանդ Զախարյանը, դիմելով փոխքաղաքապետ Կամո Արեյանին, ասել է. «Կամո, մի բան ասա»: Ասում են՝ վերջինս այնքան է նյարդայնացել իրեն քավության նոխազ դարձնելու քաղաքապետի քայլից, որ երկար ժամանակ չի կարողացել ուշքի գալ: Իսկ Ռոբերտ Քոչարյանը հետաքրքրվել է աճուրդների անցկացման գործընթացով, քանի որ անցած տարվա օգոստոսից դատախազությունը սկսել է ուսումնասիրություններ կատարել այս ոլորտում, եւ մի շարք քրեական գործեր են հարուցվել: Ինչեւէ:

Քոչարյանի հաջորդ հաթաթան ուղղված է եղել Աջափնյակի թաղապետ Արծրուն Խաչատրյանին` կապված Շինարարների փողոցում տեղադրված առեւտրի կրպակների հետ: Ռոբերտ Քոչարյանն անդրադարձել է հատկապես խնդրի գեղագիտական կողմին` կասկածի տակ առնելով Արծրուն Խաչատրյանի ճաշակը: Վերջինս փորձել է արդարանալ` ասելով, թե դրանք կառուցվել են իր պաշտոնավարությունից առաջ: Հիշեցնենք, որ Աջափնյակը Քոչարյանի ուշադրության կենտրոնում էր հայտնվել անցած տարի, երբ Երվանդ Զախարյանի հետ նա շրջել էր Շինարարների փողոցում: Հետաքրքիր է, որ Ռոբերտ Քոչարյանը որեւէ կերպ չի անդրադարձել Հյուսիսային պողոտային, որը անցած տարվա մայրաքաղաքային թիվ մեկ թեման էր: Թե որքան խիստ է եղել Քոչարյանը Երվանդ Զախարյանի նկատմամբ, կարելի է դատել այդ խորհրդակցությանը հաջորդած օրերին թաղապետերի վարքագծից:

Հավանաբար, վերջիններս նախագահի ցասումն ընդունել են որպես Զախարյանին պատժելու հանձնարարություն, եւ այն, ինչ արվում է (ավելի ճիշտ` չի արվում) այսօր Երեւանի փողոցներում, դրա վկայությունն է: Ուրբաթ օրը տեղացած ձյունից հետո այնպիսի տպավորություն է, կարծես Երեւանը միտումնավոր չի մաքրվում: Չնայած տարբեր փողոցներում  հատուկենտ ձյուն մաքրող մեքենաներ են պտտվում, սակայն անգամ ամենակենտրոնական փողոցներում ձյունը գրեթե չի մաքրվում: Հետեւողականորեն մաքրվում է միայն Հանրապետության Հրապարակը: Եւ մինչ Կենտրոն համայնքի թաղապետ Գագիկ Բեգլարյանը Կրեմլում մասնակցում էր Ռուսաստանում Հայաստանի տարվա բացման արարողությանը, Երեւանը հիշեցնում էր ռուսական հեռավոր գուբերնիաներից մեկը: Եւ եթե քաղաքային իշխանությունները շարունակեն հետեւողականորեն չմաքրել քաղաքի փողոցները, ապա առաջիկա օրերին Երեւանում հնարավոր կլինի տեղաշարժվել միայն սահնակներով:

Գառնիկ Գեւորգյան