Ձեր նշանակած ոստիկանապետին դատարանում ասում են «լակոտ», ձեզնից եւ ոչ մեկը համարձակություն չի ունենում նրան զորավիգ լինել

Հարգելինե՛ր, parla՝ խոսք բառից առաջացած խորհրդարանում մեր գործը խոսելն է, ձեր պատկերացրած գործը պետք է գործադիրն անի, մենք էլ մեր խորհրդարանով վերահսկենք նրանց աշխատանքը: Այս մասին այսօր Ազգային ժողովում կառավարության ծրագրի քննարկման ժամանակ ասաց ԼՀԿ խմբակցության պատգամավոր Արման Բաբաջանյանը՝ անդրադառնալով այն մտքին, որ ընդդիմությունն անընդհատ խոսում եւ չի գործում։

Անդրադառնալով «Իմ քայլը» խմբակցության պատգամավորների կողմից ծրագրի մասին պատկերավոր ելույթներին՝ պատգամավորն ասաց․

«Ծափերով ուղեկցված ելույթի մասին. այլաբանական գեղեցիկ համեմատությունները ոչ մի աղերս չունեն մեր կյանքի հետ, որովհետեւ ձեր նկարագրած այգին ու այգեպանը, եթե չունեն ներքին ու արտաքին անհրաժեշտ պաշտպանություն անձրեւից, կայծակից, կարկուտից, այգու ծառերը ոչ մի դեպքում ձեր այդքան գեղեցիկ նկարագրած բերքը չեն ապահովելու»։

«Ձեր նշանակած ոստիկանապետին դատարանում ասում են «լակոտ», ձեզնից եւ ոչ մեկը նրան չի պաշտապանում, համարձակություն չի ունենում նրան զորավիգ լինել: Երեկ էլ արդեն պաշտպանության նախարարին էին հաթաթա տալիս․․․ մինչեւ ե՞րբ: Ի՞նչ այգի, ի՞նչ այգեպան, ի՞նչ հիմն, ի՞նչ դրոշ, երբ պետականության համար կենսական այս ինստիտուտները չենք կարողանում միասնաբար պաշտպանել»,- ասաց Բաբաջանյանը՝ անդրադառնալով իր բուն նյութին․

«Անցած 10 ամիսը բավական էր այնպիսի ծրագրի մշակման համար, որը առաջիկա ոչ միայն 5, այլեւ 15 տարվա զարգացման ուղենիշը կարող էր դառնալ: Այս փաստաթուղթը ապառազմավարական, ապահայեցակարգային փաստաթուղթ է: Կառավարության հնգամյա ծրագիրը չի պարունակում որեւէ ստրատեգիական հենք»,- ասաց պատգամավորը: Նա նշեց, որ ծրագիրը չի ներկայացնում այն առաքելությունը, որը պետք է ստանձնի ՀՀ-ն՝ կարճաժամկետ, միջնաժամկետ եւ երկարաժամկետ հատվածներում։

Բաբաջանյանն այս ծրագրում տեսել է արձանագրում այն մասին, որ մենք առաջիկա տարիներին լինելու ենք ոչ թե համաշխարհային քաղաքակրթության ու անվտանգության մատակարար, այլ ընդամենը սովորական սպառող։

Պատգամավորի խոսքով՝ ըստ ծրագրի՝ Հայաստանը շարունակելու է վարել ինքնամեկուսացվող, միավեկտոր քաղաքականություն ու նոր իշխանության կողմից չեն ձեռնարկվելու միջոցներ՝ ռազմավարական գործընկերներ գտնելու, դաշնակցային հարաբերություններ հաստատելու եւ երկրի արտաքին քաղաքականությունը դիվերսիֆիկացնելու ուղղությամբ․

«Այստեղ նկարագրված արքատին քաղաքական առաջնահերթությունները հանգեցնում են մի շատ կարեւոր եզրակացության․ մենք մեր արտաքին քաղաքական քաղաքականությունը շարունակելու ենք վարել՝ հաշվի առենլով ոչ թե Հայաստանի եւ հայության շահը, այլ ելնելով երրորդ երկրի անփոխարինելիության սկբունքից եւ նրա առջեւ ինչ-ինչ պարտավորություններից։ Այս տեսքով ՌԴ-ն դե ֆակտո հանդես է գալիս մեր արտաքին քաղաքականության խոչընդոտ եւ աշխարհի հետ հարաբերվելու չարաբաստիկ պրիզմա, որը նախորդ իշխանության արատավոր արտաքին քաղաքականության արտահայտությունն է, մինչդեռ Ռուսաստանի հետ հնարավոր է եւ պետք է ոչ միայն պահպանել, այլ նույնիսկ խորացնել հարաբերությունները, բայց մի պայմանով՝ այն պետք է հիմնված լինի ՀՀ արժանապատվության եւ ինքիշխանության հարգանքի վրա»,-իր ելույթում ասաց Արման Բաբաջանյանը:

Նա նշեց, որ կառավարության ծրագրում բացակայում է այն հենքը, որը մեզ աշխարհին կներկայացներ որպես փոքր, բայց ազդեցություն ունեցող կամ դրան ձգտող պետություն։

Մեր դիվանագիտական ամբողջ համալիրը պետք է ծառայի մեր երկրի անվտանգության ապահովմանը։ Այստեղ մեր անվտանգության ապահովումն ամբողջությամբ դրված է զինված ուժերի, նրա մարտունակության ու ոգեղենության վրա։ Այս ծրագրով զինվորին ուղերձ չենք հղում առ այն, որ իր հետ միասին ու զուգահեռաբար անվտանգության ապահովմամբ զբաղվելու է դիվանագետը, քաղգործիչը, բժիշկն ու արվեստագետը եւ մենք՝ այստեղ գտնվողներս։ Այս ծրագրով զինվորին ուղերձ ենք հղում առ այն, որ մեր անվտանգությունը կախված է նրա փամփշտակալի փամփուշտների քանակից, եւ սահմանափակ է այնքան, որքան սահմանափակ են բանակի նյութատեխնիկական միջոցների ապահովման մեր ռեսուրսները»,-ասաց Բաբաջանյանը՝ հավելելով․

«Երկրի անվտանգության երաշխավորը պետությունն է, մինչդեռ այս ծրագրով մենք արձանագրում ենք, որ մեր անվտանգության երաշխավորը միայն բանակն է։ Դա 21-րդ դարում ձախողման տանող մոտեցում է, նույնիսկ եթե մենք հաղթենք ռազմաճակատում»։