Երկարօրյա խմբեր գործում են 39 մանկապարտեզից միայն 13-ում. ո՞րն է պատճառը

Մանկապատեզ հաճախող երեխաների ծնողները, որոնք աշխատում են, ժամանակ առ ժամանակ առաջ են քաշում մանկապարտեզների եւ իրենց աշխատանքային ժամերի անհամապատասխանության խնդիրը, որովհետեւ նախակրթական ուսումնական հաստատությունները գործում են մինչեւ ժամը 17:30-ը, իսկ մասնավորապես պետական հիմնարկներում աշխատանքն ավարտվում է միայն 18:00-ին: Տարիներ առաջ փորձ էր արվել այս խնդիրը լուծել՝ որոշ մանկապարտեզների հնարավորություն տալով ստեղծել երկարօրյա խմբեր:  

Երեւանի ավագանու «Իմ քայլը» խմբակցության անդամ Աննա Ջավախյանը հարցում է արել քաղաքապետարան ու պարզել, որ երկարօրյա խմբեր ունենալու իրավունք ստացած ոչ բոլոր մանկապարտեզներում են այդ խմբերը ձեւավորված:

«Գաղտնիք չէ, որ Երեւանի որոշ մանկապարտեզներ ունեն երկարօրյա խմբեր, որոնք ստեղծվել են հենց այս խնդրին լուծում տալու համար։ Ես հասկանում եմ, որ սա համակարգային լուծում չէ, այս ուղղությամբ պիտի աշխատանքներ տարվեն։ Բայց եղած երկարօրյաներն այս պահին արդեն կարող էին աշխատող մայրերի թեկուզ մի մասի համար լուծում հանդիսանալ։ Սակայն ես վաղուց նկատել էի, որ այդ խմբերից շատերը փաստացի չեն գործում։ Այդ պատճառով որոշեցի հարցում ուղարկել Երեւանի քաղաքապետարանի հանրակրթության վարչություն՝ պարզելու համար, թե որ մանկապարտեզներում կան երկարօրյա խմբերը, արդյո՞ք դրանք առհասարակ գործում են։ Պարզվեց, որ այո, ինչպես եւ գիտեինք շատերս, Երեւանի «թվով 39 նախադպրոցական ուսումնական հաստատություններում երեխաներին պահելու տեւողությունը սահմանվել է մինչեւ 19.00-ն, սակայն ծնողների կողմից պահանջարկ չլինելու պատճառով երկարօրյա խմբերը գործում են միայն թվով 13 մանկապարտեզներում (հ․ 5, 15, 23, 25, 26, 31, 43, 44, 50, 61, 114, 126, 133)»»,- ֆեյսբուքյան իր էջում գրել է Աննա Ջավախյանը: Կցելով երկարօրյա խմբեր բացելու թույլտվություն ունեցող 39 մանկապարտեզների ամբողջական ցանկը՝ այդ հաստատություններ հաճախող երեխաների ծնողներին ավագանու անդամն առաջարկում է երկարօրյայի կարիք ունենալու դեպքում գրավոր դիմում ներկայացնել տնօրենին:

Երկարօրյա խմբեր ձեւավորելու իրավունք ունեցող, բայց դա չարած որոշ մանկապարտեզներից փորձեցինք պարզել, թե ծնողների դիմումների առկայության դեպքում ինչ կարգով են այդ խմբերը բացվելու, լրացուցիչ հաստի՞ք է ստեղծվելու, աշխատակիցնե՞րն են հավելյալ աշխատելու, առնվազն քանի՞ երեխայի առկայության դեպքում կարող է երկարօրյա խումբ բացվել եւ այլն: Այս մանրամասնությունների մասին ոչ բոլոր մանկապարտեզներում էին տեղեկացված: Համար 64 մանկապարտեզից ասելով, որ տնօրենը տեղում չէ, մեզ պատասխանեցին միայն ոչ պաշտոնապես: Ասացին, որ երկարօրյա խումբ չունեն, որովհետեւ ընդամենը մեկ-երկու ծնող է այդպիսի ցանկություն հայտնել: Վստահեցրին, որ այդ հնարավորության մասին տեղեկացվել են բոլորը: Իսկ վերը նշված հարցերի պատասխանը այստեղ չունեին, միայն մոտավորապես գիտեին, որ երկարօրյա խմբում աշխատելու պարտականությունը դրվում է դաստիարակի օգնականի՝ դայակի վրա:

Համար 18 մանկապարտեզի տնօրեն Գայանե Նալբանդյանը նույնպես ասաց, որ երկարօրյա խումբ չունեն, որովհետեւ ծնողներն այս պահի դրությամբ նման ցանկություն չեն հայտնել: «Բոլոր ծնողներին հայտարարել եմ, որ ով ցանկանում է, մեզ մոտ հնարավորություն կա երկարօրյա խմբի: Տեղյակ չլինելու խնդիր չկա: Նաեւ փակցված է պատին՝ բոլոր ծնողներին տեսանելի վայրում: Հենց մուտքից մտնում են, ամեն ինչ փակցված, կախված, ասված է»,- նշեց Գայանե Նալբանդյանը: Ըստ նրա, մանկապարտեզներին երկարօրյա խումբ ունենալու իրավունքը քաղաքապետարանը տվել է վերջիններիս դիմումների համաձայն: Տնօրենի խոսքով, մինչեւ քաղաքապետի համապատասխան որոշումը մանկապարտեզ հաճախող երեխաների մի խումբ ծնողներ դիմել էին երկարօրյա խումբ ունենալու համար, բայց երբ արդեն որոշումն ընդունվել է, նրանց երեխաներն ավարտած են եղել նախակրթարանը, իսկ հետագայում արդեն մյուս ծնողները ցանկություն չեն հայտնել: Երեւանի քաղաքապետի համապատասխան որոշումն ընդունվել է 2011 թվականի հունիսի 30-ին: «Դա ամեն տարի ասվել է, եւ մեր ծնողները տեղյակ են: Սա թաղամասային մանկապարտեզ է, մի քիչ առանձնահատկություն ունի, կենտրոնական մաս չէ, տարբեր վայրերից աշխատողներ չկան»,- նկատեց Գայանե Նալբանդյանը:

Համար 61 մանկապարտեզում երկարօրյա խումբ է գործում 2011 թվականից սկսած՝ անընդմեջ: Խմբում երեխաների թիվը լինում է 15-20: Տնօրեն Ռուզաննա Ռուշանյանն ասաց, որ ժամը 17:30-ից հետո մինչեւ ժամը 19:00-ն երեխաներին պահում է դայակը: Դրա դիմաց նա ամսական ստանում է հավելյալ մոտ 8 հազար դրամ: Նշեց, որ հիմնական աշխատանքը դայակն ավարտում է ժամը 17-ին: Իսկ ցերեկը հնարավորություն է ունենում մեկ ժամ հանգստի, իհարկե՝ առանց խմբասենյակից դուրս գալու:

Մեր հարցումների ընթացքում հասկանալի դարձավ, որ երկարօրյա խմբերի առկայությունը կամ բացակայությունը պայմանավորված է լինում նաեւ մանկապարտեզների բարեկարգության աստիճանով: Այսինքն՝ որքան բարեկարգ ու գրավիչ է մանկապարտեզը երեխաների եւ նրանց ծնողների համար, այնքան մանկապարտեզներում շահագրգռված չեն հավելյալ հոգս ստանձնել: Իսկ այն դեպքերում, երբ մանկապարտեզը վերանորոգման կարիք ունի, հարուստ է տարբեր խնդիրներում, ընտրվում է երկարօրյա խմբերի միջոցով որոշակի առավելություն ունենալու ճանապարհը:

Տպել
790 դիտում

850 հազար դոլարի ներդրում Կոտայքի մարզում (տեսանյութ)

Դատական համակարգի փոփոխությունը հանրային պահանջ է, հետեւաբար հակառակը լինել չի կարող․ Արթուր Ավագյան

Հրդեհ է բռնկվել Շիրակի մարզի Անուշավան գյուղի տներից մեկում. ամբողջությամբ այրվել է տան տանիքը

Հայաստանի ֆուտբոլի ֆեդերացիայի գործկոմը որոշումներ է ընդունել

Ոստիկանները Վանաձորում չարաշահումներ են բացահայտել․ համայնքին պատճառվել է մոտ 16․9 մլն դրամի վնաս

Հադրութի վարչակազմի ղեկավարն ազատվել է պաշտոնից. Բակո Սահակյանը ներկայացրել է նոր ղեկավարին

ՀՀ գլխավոր շտաբի պետն ընդունել է Կարմիր խաչի միջազգային կոմիտեի պատվիրակությանը

Փամբակ գյուղի բնակիչն ապօրինաբար ծառեր է հատել, օգտագործել տան ջեռուցման համար

Տաշիր համայնքում երեխաները հնարավորություն կունենան բացահայտել իրենց տաղանդները․ Սուրեն Պապիկյան

Վ․ Օսիպյանը խորհրդակցություն է անցկացրել ԿՀԴՊ եւ ՔՀ գլխավոր վարչությունների անձնակազմի հետ. տրվել են հանձնարարականներ

Սա Հայաստանի ժողովրդավարացման ժամանակն է. Լենա Նազարյանի հոդվածը՝ անցումային արդարադատության մասին

Անցնող շաբաթ արցախա-ադրբեջանական սահմանին հակառակորդը հրադադարի ռեժիմը խախտել է շուրջ 120 անգամ

Երեւանի «Տաշիր Պիցցա» արագ սննդի կենտրոններից մեկում հրդեհ է բռնկվել

Ռոբերտ Քոչարյանն այսօր «Իզմիրլյան» բժշկական կենտրոնում է եղել

Շաբաթ օրը ստացված կարելի է համարել, քանի որ fake news-ի ֆաբրիկայի «հեղինակները» գերազանցեցին իրենց․ Աննա Նաղդալյան

Մարկ Փրիթչարդի հետ քննարկվել են բարձր տեխնոլոգիաների եւ ճանապարհաշինության ոլորտներում գործակցության հնարավորությունները

Ադրբեջանում հայերի նկատմամբ ռասիստական դրսեւորումներն անհնար դարձրին Մխիթարյանի մեկնելը Բաքու. ՀՀ ԱԳՆ մեկնաբանությունը

Համաշխարհային մաքսային կազմակերպության փորձագետները տպավորված են վերջին 10 տարիներին ՀՀ ՊԵԿ-ում տեղի ունեցած առաջընթացից

ՊԵԿ նախագահ Դավիթ Անանյանն արձակուրդ է գնում, նրան կփոխարինի Ռաֆիկ Մաշադյանը

Լիոնել Մեսսին 6-րդ անգամ դարձավ «Ոսկե խաղակոշիկ»-ի դափնեկիր