Սամի Նասերին եղբոր հետ բազմաթիվ այցեր է կատարել Երեւանում, բայց տաքսի չի նստել

Ֆրանսիացի հայտնի դերասան, «Տաքսի» ֆիլմաշարի գլխավոր դերակատար Սամի Նասերին եւ նրա եղբայրը՝ ռեժիսոր Բիբի Նասերին, հանդիպեցին Երեւանի պետական համալսարանի ուսանողների հետ: Այսօր՝ փետրվարի 25-ին, նրանք պատասխանեցին ուսանողների հարցերին: Հանդիպումն անցավ ջերմ մթնոլորտում: Նրանք կիսվեցին տպավորություններով, կատակեցին:

Սամին պատմեց, որ իրենց օրերը Հայաստանում բավական հագեցած են անցնում: Նրանք գալիս էին Հայոց ցեղասպանության զոհերին նվիրված հուշարձանից ու ԵՊՀ-ից հետո էլ մի քանի այցեր ունեին:

«Այս 2 օրվա ընթացքում, ինչ այստեղ ենք, բավականին շատ բան ենք տեսել: Այցելել ենք Գագիկ Ծառուկյանի կոնյակի գործարան: Բնականաբար, չենք կարող Երեւանում լինել ու չայցելել Շառլ Ազնավուրի թանգարան, այսօր այցելելու ենք: Այսօր այցելել ենք Հայոց ցեղասպանության զոհերին նվիրված հուշարձան, ծաղիկներ ենք դրել»,- ասաց նա:

Հարցերի մեծամասնությունը «Տաքսի» ֆիլմի մասին էր: Սամին պատմեց, որ հենց այն է իրեն մեծ ճանաչում բերել: Նշեց, որ հայտնիությանը հասնելու ճանապարհի եւ հասնելուց հետո շատ կարեւոր է շրջապատում լավ մարդիկ ունենալ:

««Տաքսի» ֆիլմից առաջ շատ ֆիլմերում եմ նկարահանվել, բայց «Տաքսիից» հետո է, որ շատ արագ հասա բարձունքի: Այս մասնագիտությունն այնքան գեղեցիկ եւ այնքան յուրահատուկ է, նաեւ այնքան դժվար է, որովհետեւ պետք է ընտրություն կատարես ընտանիքի ու դրա միջեւ, պետք է նաեւ ունենաս լավ ընկեներ, որոնք կկարողանան քեզ խորհուրներ տալ, հատկապես, երբ երիտասրադ ես պետք է լավ մարդկանցով, լավ ընտանիքով շրջապատված լինես»,- ասաց նա:

Անկախ նրանց, որ «Տաքսի» ֆիլմն է Սամիի այցեքարտը՝ նա փորձում է դրանով ու նման ժանրի դերերով իրեն չսահմանափակել: Ընդգծում է, որ «Տաքսին» չկա իր առօրյա կյանքում. հարցին՝ արդյոք իրականում այնպես է վարում, ինչպես ֆիլմում, նա պատասխանեց, որ սովորական կյանքում շատ զգույշ է ու մեքենա վարելիս երբեք ռիսկի չի դիմում:

«Դուք հիմա կատակում եք, բայց դա շատ կարեւոր հարց է: «Տաքսի» ֆիլմի նկարահանումների ժամանակ մեզ հետ ոստիկաններ կային, մենք ունեինք պրոֆեսիոնալ վարորդներ, Ժուլյեն ընտանքի անդամներն էին, նրանք լավագույն կասկադյորներ են: Նրանք չեն շփոթում կինոն եւ իրականությունը: Երբ ինչ-որ տեղ ենք գնում, ինչ-որ խնջույքի, տաքսիով ենք գնում, քանի որ չգիտենք՝ որքան կխմենք, կամ էլ մեզնից որեւէ մեկն ընդհանրապես չի խմում,- ասաց նա, իսկ եղբայրը՝ Բիբին, ավելացրեց, - այդ չխմողը երբեք ես չեմ»:

Երեւանում Նասերիները տարբեր տեղեր են գնացել, տեսել, մարդկանց հետ ծանոթացել, շփվել: Տաքսի, սակայն, չեն նստել, ու գնահատել հայ տաքսիստների աշխատանքը Սամին չկարողացավ:

«Տաքսի նստելու ժամանակ չենք ունեցել, միայն տեսել ենք, բայց չենք նստել»,- ասաց նա:

Սամի Նասրին ՀՀ էր եկել՝ ներկա գտնվելու MIX FIGHT 40 մրցաշարին: Այն տեղի ունեցավ երեկ «Միկա» մարզահամալիրում: Առհասարակ Սամին մարզասեր է, եւ նրա ամենասիրած մարզաձեւերից է ֆուտբոլը: Շատ է սիրում ֆրանսիացի աշխարհահռչակ ֆուտբոլիստ եւ մարզիչ Զինեդին Զիդանին ու երբեք չի մոռանա աշխարհի 1998 թ. առաջնությունը: Հարցին, թե որոնք են նրա համար ֆուտբոլային ամենահիշարժան իրադարձությունները հետեւյալ պատասխան է տալիս.

«1998 թ. Զիդանի մասնակցությամբ աշխարհի առաջնությունը, իհարկե նաեւ աշխարհի վերջին առաջնությունը, որը կայացավ Ռուսաստանում, բայց ինձ համար Զիդանը մնում է լավագույնը»,- ասաց նա:

Եղբայրները պատմեցին նաեւ հայերի հետ իրենց մտերմության մասին: Նրանք մանկուց ծանոթ են եղել հայերի հետ: Ունեն ընկերներ:

«Մենք հայկական ծագումով շատ ընկերներ ունենք»,- ասաց Սամի Նասերին

«Մեծացել են այնպիսի թաղամասում, որտեղ հայերը շատ էին: Սամին շատ մտերիմ է եղել Ազնավուրի հետ»,- ավելացրեց Բիբի Նասերին:

Այսօր հարցերի մեծամասնությունը բաժին հասավ Սամի Նասերիին, սակայն եղբայրը չէր ձանձրանում: Նախ նա կատակեց հայկական խոհանոցի մասին:

«Չեմ ուզում վիրավորել հայերին, բայց ավելի լավ բան չկա, քան ֆրանսիական խոհանոցը», - ասաց նա, իսկ հետո ժպիտով ավելացրեց, որ պաշտում է հայկական խոհանոցը:

Հետո նա նկատեց, որ դահլիճում աղջիկների թիվը գերազանցում է տղաների թվին: Նաեւ կոմպլիմենտներ արեց:

«Սա աղջիկների՞ համալսարան է, թե՞ տղաների: Հայ աղջիկներն ավելի խելացի են, քան տղաները»,- ասաց նա:

Նասերիները Երեւան են ժամանել փետրվարի 23-ին: Ինչպես երեւում է սոցցանցերից, բացի MIX FIGHT 40 մրցաշարից, հասցրել են մասնակցել «Women’s Club» հաղորդման նկարահանումներին: Ինստագրամյան հրապարակումներից երեւում է, որ այսօր նրանք Ծիծեռնակաբերդից ու ԵՊՀ-ից հետո եղել են «Մեգերյան կարպետ»-ում, Բիբի Նասերին էլ փորձել է գորգ գործել: Հետո Նասերիները հայկական տարազ ենք հագել: Այսօր երեկոյան՝ 19:00-ին նրանք երկրպագուների հետ են հանդիպելու «Լոֆթ» ինքնազարգացման ու ժամանցի կենտրոնում: