Գենետիկ անհամատեղելիություն. «Ա1+»-ը առայժմ կմնա իր տեղում

Տպագրվել է «Հայկական Ժամանակ» օրաթերթի՝ 2006 թվականի մարտի 18-ի համարում

«Ա1+»-ը առայժմ կշարունակի մնալ Գրիգոր Լուսավորիչ 15 հասցեում, քանի դեռ ընկերությանը չի հատկացվել համարժեք նոր տարածք: Այս մասին երեկ լրագրողների հետ զրույցում ասաց «Ա1+» ընկերության նախագահ Մեսրոպ Մովսիսյանը: Հիշեցնենք, որ մարտի 16-ին «Ա1+» էին այցելել դատական ակտերի հարկադիր կատարման աշխատակիցները եւ հեռուստաընկերության տնօրինությանն էին հանձնել կատարողական վարույթ սկսելու մասին որոշման օրինակը: Ըստ այդմ, ԴԱՀԿ-ն սպառնում է հարկադրաբար «ազատել» շենքը, եթե «Ա1+»-ը  ինքնակամ չանի դա: Հարկադիր վտարման գործընթացը սկսվում է մարտի 17-ի ժամը 12.00-ից: Ուստի, երեկ առավոտից «Ա1+»-ում հավաքված լրագրողները եւ իրավապաշտպանները սպասում էին ԴԱՀԿ աշխատակիցներին: Սակայն նրանք այդպես էլ չժամանեցին:

Հետագայում պարզվեց, որ վարչապետ Անդրանիկ Մարգարյանը խոստացել է «Ա1+»-ին տրամադրել նոր տարածք, իսկ մինչ հարցի լուծումը հեռուստաընկերությունը կշարունակի մնալ իր տեղում: Երեկվա դրությամբ «Ա1+»-ին տարածք է առաջարկվել Բուզանդի փողոցում` «Վերնիսաժի» հարեւանությամբ գտնվող բարձրահարկում, որտեղ տեղակայված են Երեւանի քաղաքապետարանի քաղաքաշինության վարչությունը, Երեւանի կառուցապատման ԾԻԳ-ը եւ մի շարք այլ ձեռնարկություններ: Մեսրոպ Մովսիսյանը մեզ հետ զրույցում ասաց, որ առաջարկվող տարածքին ինքը կծանոթանա եկող երկուշաբթի: Եթե ամեն ինչ բարեհաջող ավարտվի եւ առաջարկվող նոր տարածքը բավարարի «Ա1+»-ին, ապա կսկսվեն նոր շենք տեղափոխման աշխատանքները: Դա կտեւի մոտ մեկ ամիս եւ «Ա1+»-ն այդ ժամանակահատվածում հարկադրված կդադարեցնի իր գործունեությունը:

Այս առնչությամբ Մ. Մովսիսյանը նույնիսկ կատակեց, թե իշխանությունները  կարող էին այս գործընթացի համար առավել նպատակահարմար պահ ընտրել, որպեսզի նոր տարածք տեղափոխվելու ընթացքում պարտադրված պարապուրդը իրենց համար առավել նպաստավոր ժամանակ լիներ: Ինչպես արդեն նշեցինք, պաշտոնապես տարածքը պահանջում է ազատել ԳԱԱ-ն: Սակայն համընդհանուր կարծիքն այն է, որ տարածքի պաշտոնական տերը` ԳԱԱ-ն, տվյալ դեպքում ընդամենը գործիք է: Իսկ «Ա1+»-ին իր ներկա տարածքից հանելու որոշման հեղինակը Հայաստանի ղեկավարությունն է: «Ա1+»-ին վտարելու որոշումը կայացվել է, ոչ թե ԳԱԱ-ում, այլ ավելի բարձր օղակում»,- մեզ հետ զրույցում ասաց իրավապաշտպան Ավետիք Իշխանյանը: Վերջինիս կարծիքով, այս ամենի նպատակը «Ա1+»-ի համար հերթական խոչընդոտ ստեղծելն է, որպեսզի ավարտին հասցվի հեռուստաընկերությունը փակելու դեռեւս չորս տարի առաջ սկսված գործընթացը:

Ավետիք Իշխանյանի խոսքերով, «Ա1+»-ին եթերից զրկելով ընկերության խնդիրը լուծելու իշխանությունների հույսերը չարդարացան: Շարունակում է գործել «Ա1+» լրատվական գործակալությունը, ինտերնետային կայքը, «Այբ-Ֆե» շաբաթաթերթը: Ավելին, ընկերությունն այս ընթացքում չի դադարում պայքարել իր իրավունքների համար: ««Ա1+»-ի շուրջ ծավալված այս վերջին իրադարձությունները կրկին անգամ ապացուցում են, որ ներկա իշխանությունները եւ ազատ խոսքը գենետիկորեն անհամատեղելի են»,- ասաց Ա. Իշխանյանը: «Ազգային վերածնունդ» կուսակցության նախագահ Ալբերտ Բազեյանը եւս այն կարծիքին է, որ «Ա1+»-ին իր զբաղեցրած տարածքից վտարելու որոշմամբ ՀՀ իշխանություններն ապացուցում են, որ իրենք հավատարիմ են իրենց գործելաոճին եւ շարունակում են խոչընդոտել այս լրատվամիջոցի գործունեությանը:

Ի դեպ, Բազեյանը միակ քաղաքական գործիչն էր, ով մամուլից տեղեկանալով «Ա1+»-ի շուրջ ծավալված իրադարձությունների մասին՝ երեկ կեսօրին եկել էր «դեպքի վայր»` իր աջակցությունը հայտնելու համար:  Երեւանի մամուլի ազգային ակումբի նախագահ Բորիս Նավասարդյանը մեզ հետ զրույցում ասաց, որ տեղի ունեցող գործընթացները գնահատելու համար անհրաժեշտ է ի վերջո պարզել, թե ԳԱԱ-ն ինչ է պատրաստվում անել Գրիգոր Լուսավորիչի 15 հասցեի այդ շենքը, ինչու են ցանկանում այն ազատել: Եթե պարզվի, որ այն պատրաստվում են մասնավորեցնել, իսկ նման տարբերակը չի բացառվում, ապա «Ա1+»-ը պետք է չազատի տարածքը եւ, որպես 15 տարվա բարեխիղճ վարձակալ, նա պիտի առաջնահերթ իրավունք ունենա այն սեփականաշնորհելու հարցում:

Երեւանի կենտրոնում գտնվող այդ մասնաշենքի հետագա ճակատագրի մշուշոտ լինելուն անդրադարձավ նաեւ Ալբերտ Բազեյանը: «Բազմաթիվ են օրինակները, երբ պետական սեփականություն հանդիսացող տարածքներ չնչին գներով վաճառվել են որեւէ պետական պաշտոնյայի կամ նրանց հետ կապված ինչ-որ սուբյեկտի: Բացառված չէ, որ այս ամենի հիմքում եւս ընկած են շահադիտական ինչ-որ նկատառումներ»,- ասաց Ալբերտ Բազեյանը: ԳԱԱ նախագահ Ֆադեյ Սարգսյանը մեզ հետ զրույցում վստահեցրեց, որ այդ շենքի սեփականաշնորհման մասին խոսք գնալ չի կարող, եւ տարածքը ցանկանում են ազատել, որպեսզի այնտեղ տեղափոխվի Լեզվի ինստիտուտը: Ավելին, Ֆ. Սարգսյանն ասաց, որ ինքը շատ է հարգում եւ սիրում Մեսրոպ Մովսիսյանին, եւ վերջինս «խնդիր չի ունենա, նա տարածքից դուրս չի գա այնքան ժամանակ, մինչեւ որ նոր տարածքի հարցը չի լուծվի»:

Ինչպես հետագայում պարզվեց, հենց ինքը Ֆադեյ Սարգսյանն էր երեկ առավոտյան զանգահարել Մեսրոպ Մովսիսյանին եւ փոխանցել վարչապետ Անդրանիկ Մարգարյանի խոստումը` անպայման «Ա1+»-ին նոր տարածք հատկացնելու վերաբերյալ: Ինչեւէ,  կարծում ենք՝ ժամանակը ցույց կտա, թե այս ամենի իրական նպատակը որն է, եւ ինչու է իշխանություններին այդքան հարկավոր Գրիգոր Լուսավորիչ 15 հասցեի շենքը:

Վահագն Հովակիմյան