Էջմիածնի միաբանությունը մատուցել է Լուիզ Մանուկյան Սիմոնի մահվան 40-օրեքի հոգեհանգստյան կարգ

31/03/2019 schedule19:20

Մայր Աթոռ Սուրբ Էջմիածնի միաբանությունը, Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի նախագահությամբ, Ս. Գայանե վանքում մարտի 31-ին մասնակցել է Ս. Պատարագի արարողությանը: Պատարագիչն է եղել Մայր Աթոռի միաբան Հոգեշնորհ Տ. Թադեոս վարդապետ Զիրեկյանցը: Հավարտ Սուրբ Պատարագի կատարվել է հոգեհանգստյան պաշտոն Հայաստանյայց Առաքելական Սուրբ Եկեղեցու և Մայր Աթոռ Սուրբ Էջմիածնի՝ ազգային մեծ բարերար, Հայկական Բարեգործական Ընդհանուր Միության երկարամյա նախագահ բարեհիշատակ տիկին Լուիզ Մանուկյան Սիմոնի մահվան 40-օրեքի առիթով: Այս մասին «Արմենպրես»-ին տեղեկացրին Մայր Աթոռի տեղեկատվական համակարգից։

Հաղորդագրության մեջ նաև նշված է. «Հոգեհանգստյան արարողությունից առաջ Ամենայն Հայոց Կաթողիկոսը ներկաներին ուղղեց իր հայրական խոսքը: Վեհափառ Հայրապետը, մասնավորապես, ասաց. 
«Սիրելիներ,

Աղոթական ոգով, տխրությունը մեր սրտերում համախմբվել ենք Հայ Եկեղեցու և Մայր Աթոռ Սուրբ Էջմիածնի, ազգային մեծ բարերար Լուիզ Մանուկյան Սիմոնի մահվան քառասնօրյա արարողության առիթով: 

Այսօրվա կիրակին անվանակոչված է Դատավորի կիրակի, որ բերում է հորդորը անձանձրույթ աղոթքով, աստվածահաճո վարքով ու գործերով քրիստոնեական հավատքը վկայելու: Հավատավոր այսպիսի ընթացքով է զարդարված հոգելույս Լուիզ Մանուկյան Սիմոնի երկրային կյանքը: 

Նրա մահը մեծ կորուստ է մեր Սուրբ Եկեղեցու և ժողովրդի համար: Քառասնօրյա այս շրջանում ապրեցինք և՛ կորստի ցավը, և՛ նրա պայծառ հիշատակի, թողած վաստակի մխիթարությունը: Եվ թեպետ ժամանակն ու հեռավորությունն են բյուրեղացնում անհատականությունների իրական արժեքը, սակայն Լուիզ Մանուկյան Սիմոնի գործունեության բարի արգասիքները վկայում են նրա ինքնության մեծությունը: Մեր ժողովրդի ու Եկեղեցու պատմության վերջին քառասուն տարիներին, թե՛ դժվարին և թե՛ ուրախ պահերին, հոգելույս Լուիզ Մանուկյան Սիմոնը բազում անգամներ իր բարերար գործունեությամբ շենություն է հավելել ազգային-եկեղեցական մեր կյանքին ի Հայաստան և ի սփյուռս աշխարհի: 

Լուիզ Մանուկյան Սիմոնը եղավ իր ծնողների՝ Ալեք և Մարի Մանուկյան նվիրյալ ամոլի ավանդների շարունակողը: Նրա նախագահությամբ նորովի արգասավորվեց Հայկական Բարեգործական Ընդհանուր Միության առաքելությունը ի սփյուռս աշխարհի, բարի արդյունքներով զարդարվեցին նրա ձեռնարկումները կրթական, մշակութային, առողջապահական, եկեղեցաշինության ոլորտներում: 

Իր կյանքի ու գործունեության համապատկերի մեջ պայծառությամբ վեր է հառնում Լուիզ Մանուկյան Սիմոնի վառ կերպարը՝ զարդարված բարեհոգությամբ, հայրենասիրությամբ, ազգանվիրումով ու եկեղեցանվիրումով: Լուիզ Մանուկյան Սիմոնի անձն առինքնող էր` իր հոգու և ոգու ուժականությամբ, որում զուգորդվում էին սթափ ու հաստատուն միտքը և նուրբ ու բարի սիրտը: Միայն անսասան նվիրումի ու կամքի տեր անձը, ինչպիսին էր Լուիզ Մանուկյան Սիմոնը, կարող էր միաձուլել այս երկու հատկությունները: 

Ազգասեր ծնողներից ժառանգած հայրենասիրությամբ` նա անհոգնաբեկ էր ազգային կյանքն ու հայրենիքը ավելի լավը դարձնելու իր ձգտումներում ու ջանքերի մեջ՝ լինելով անչափ բարի ու կարեկից շրջապատի ու մարդկանց հանդեպ: Նա մեր ժողովրդի կողքին էր դժվարությունների ու պայքարների մեջ, ուրախությունների ու հաղթանակների ժամանակ և հենց այս կարողությամբ Լուիզ Մանուկյան Սիմոնը նույնանում է այն քչերին, ովքեր հազարավորներից առանձնանում են իրենց կատարած բարի գործերով, կրած արժեքներով և արթնացրած հույսերով: Արդարև, իր կյանքով ու գործով նա հավերժի ճամփորդ է և իր անձով ու կերպարով ոգեշնչելու է սերունդներին և լուսավորելու նրանց կյանքի ընթացքը:

Մեր սրտերը պիտի շարունակեն կրել մեր ժողովրդի արժանավոր դստեր բարի հիշատակը: Այսպիսի պահերին բառերը բավարար չեն փարատելու այն տխրությունը, որ պատճառել է մահը: Մխիթարված ենք, որ Աստված մեր ազգին պարգևեց Լուիզ Մանուկյան Սիմոնի պես արժանավոր դուստր, ով ապրեց ու արարեց և կարողացավ իր մեծ գործերի հարուստ վաստակով անմահ հիշատակ թողնել և իրենով լույս ավելացնել հայ կյանքի անդաստանում: Նրա հիշատակի առջև պիտի խոնարհվեն ազգիս զավակները սերնդեսերունդ՝ որպես երախտիք նրա անանձնական սիրո ու ամենաանկեղծ նվիրումի առ ազգը, հայրենիքն ու Եկեղեցին: 

Ի խորոց սրտի հայցում ենք, որ Ողորմածն Աստված երկնային բարձունքներում հավիտենական երանության մեջ հանգչեցնի հոգին երախտարժան Իր աղախնու՝ Լուիզ Մանուկյան Սիմոնի, և Սուրբ Հոգու մխիթարությունը պարգևի զավակներին, թոռներին, եղբորը, հարազատներին, բոլոր վշտացյալներին և մեզ ամենքիս: «Յիշեսցէ Տէր զհոգի նորոգ ննջեցելոյն և հանգուսցէ զնա ի լոյս երեսաց Աստուածութեան Իւրոյ. զի “ոգիք արդարոց ի ձեռին Աստուծոյ են… և յոյս նոցա լի է անմահութեամբ” (Իմաստ. Գ 1,4)»: 

Խունկ, աղոթք և օրհնություն Լուիզ Մանուկյան Սիմոնի լույս հիշատակին. ամեն»: 

Արարողությանը ներկա էին Գերագույն հոգևոր խորհրդի անդամներ, Մայր Աթոռի բարերարներ, ՀԲԸՄ Կենտրոնական վարչական ժողովի անդամ, ՀԲԸՄ-Հայաստանի նախագահ տիար Վազգեն Յակուբյանը և ՀԲԸՄ անդամներ:

Հոգևոր դասը և հավատավոր ժողովուրդը աղոթք բարձրացրեցին առ Աստված լուսահոգի տիկին Լուիզ Մանուկյան Սիմոնի հոգու խաղաղության և հանգստության համար»:

Տպել
528 դիտում

Լուսանկարներ Արփի Գաբրիելյանի ու Միհրան Ծառուկյանի հարսանիքից

Մարմնի 90 տոկոս այրվածք ստացած տղամարդը մահացել է, իրավապահները հայտնաբերել են դեպքի վայրը

Սուր-կտրող գործիքից ստացված վնասվածքներով «Էրեբունի» բժշկական կենտրոն 3 պատանի է տեղափոխվել

Ամերիկյան բալետի պարուհի Միստի Կոպլանդը Մոսկվայի «Մեծ թատրոնին» մեղադրել է ռասիզմի մեջ. Lenta.ru

«Wizz Air»-ի Գյումրիից թռիչքներ իրականացնելու լուրերն իրականությանը չեն համապատասխանում». Տաթեւիկ Ռեւազյան

Վրաերթ Տիչինա և Սեբաստիա փողոցների խաչմերուկում. տուժածի վիճակը կայուն ծանր է

Երեւանում կայացած «Լազարյան ակումբ»-ի հերթական նիստը ֆինանսավորվել է ՌԴ նախագահ Վ. Պուտինի գրասենյակի կողմից

Շիրակի մարզի և Չինաստանի Հայնան նահանգի միջև ստորագրվել է Միջտարածաշրջանային հուշագիր

Մասիսում բնակարանագողը բռնվել է հանցանքի վայրում

ՀՀ նախագահ Արմեն Սարգսյանը հանդիպել է Կատարի փոխվարչապետ, պաշտպանության նախարար Խալիդ բին Մոհամեդ Ալ Աթիյայի հետ

Ռուբեն Բալաբանյանն ընտրվեց ՀՀ Հանրային խորհրդի պետաիրավական հարցերի հանձնաժողովի նախագահ

Թանկ Ամանորն ու էժան պոպուլիզմը

ՀՀ նախագահ Արմեն Սարգսյանը կմասնակցի «Դոհա ֆորում-2019»-ին

Ռուսաստանում անոմալ եղանակ է սպասվում. РИА Новости

«Սևան» քրեակատարողական հիմնարկում թմրամիջոցների իրացման դեպք է կանխվել

Օդի ջերմաստիճանը կբարձրանա 5-ից 7 աստիճանով

«Արաբկիր» բկ-ում քաղաքացին գլխով հարվածել է բժշկին. Արսեն Թորոսյանն իրավապահներին կոչ է արել գտնել եւ պատժել մեղավորին

Դալար գյուղի բնակիչը վճարային տերմինալ է գողացել

Դեկտեմբերի 8-ից 14-ը հայ դիրքապահների ուղղությամբ արձակվել է 1500 կրակոց

Կենտրոնական իշխանությունը ՏԻՄ ընտրությունների ժամանակ այլեւս չի ճնշում, երբեմն էլ չի հաղթում