Համոզված եղեք, որ որեւիցե խնդիր չունենք. ՊՆ փոխնախարարը՝ Ապրիլյանից 3 տարի անց

02/04/2019 schedule15:10

Այսօր լրանում է Ապրիլյան քառօրյա պատերազմի 3-րդ տարին: Այս 3 տարիների ընթացքում ՀՀ Զինված ուժերի գրեթե բոլոր ճյուղերում փոփոխություններ են տեղի ունեցել:

«Համոզված եղեք, որ որեւիցե խնդիր չունենք»,- այս մասին «Հայկական ժամանակ»-ի հետ զրույցում ասաց ՀՀ պաշտպանության նախարարի տեղակալ Գաբրիել Բալայանը:

- Պարոն Բալայան, արդեն 3 տարի է անցել Ապրիլյան պատերազմից, սպառազինության առումով ի՞նչ վիճակում ենք հիմա: Ի՞նչ փոփոխություններ են կատարվել այս 3 տարվա ընթացքում:

- Միանշանակ փոփոխություններ կան, ոչ միայն աճի, այլեւ որակի տեսանկյունով՝ այդ թվում շփման գծում տեխնիկական հագեցվածության առումով: Այն ամենն, ինչը որ կա, կառավարության ծրագրով իրականացվում են: Այսինքն՝ քանակը փոխարինելով որակով: Դա շարունակական պրոցես է եւ կարող եմ ասել, որ 2018 թվականի ընթացքում արդեն իսկ բավական հաջողություններ ենք գրանցել՝ այդ թվում հայրենի արտադրության սպառազինության մասով: Մեր գործընկերների հետ աշխատանքի արդյունքում ձեռք բերված սպառազինության առումով էլ ենք բավական հաջողություններ գրանցել: Տենդենցը շատ դրական է գնում 2019 եւ մնացած տարիների ընթացքում պլանավորված սպառազինությունների մատակարարման մասով եւս կարող եմ ասել, որ այս պահի դրությամբ որեւիցե խնդիր չունենք:

- Այսինքն, տարեցտարի սպառազինության առումով ավելի՞ ենք զարգանում:

- Միանշանակ: Փաստաթղթեր կան, որոնք հրապարակման ենթակա չեն, օրենքով է սահմանված: Մասնավորապես՝ մեր սպառազինության ռազմավարական զարգացման ծրագիրը, այդ ծրագրով նախատեսվածն իրականացվում է: Կարող եմ ասել, որ որեւիցե անհանգստանալու տեղ չունենք այս առումով:

- Առաջնագծի կահավորվածությունը այս 3 տարիների ընթացքում փոփոխությունների ենթարկվե՞լ է: 3 տարի առաջ շատ էր խոսվում, թե ամոթ է, որ դեռ մինչեւ հիմա պահածոների տուփերով է պատված առաջնագիծը:

- Այն, ինչ-որ եղել է 2016 թվականի ապրիլին եւ այն, ինչ որ հիմա է, էական տարբերություն կա: Այդ պահածոների տուփերն այդքան էլ վատ բան չեն, դրանք իրենց դերն ունեն: Բայց դրա հետ համատեղ նաեւ տեխնիկական միջոցներ են ներդրվել: Հիմա չեմ կարող ասել, թե քանի պահածոյի տուփ կա առաջնածում, բայց դրանց պետք չէ շատ վատ վերաբերվել: Այն, որ դրա հետ համատեղ պետք է տեխնիկական հագեցվածություն, ինչը որ մինչ այսօր կատարվել եւ կատարվելու է, դա միանշանակ է:

- Այս ընթացքում, փոփոխությունների ենթարկվե՞լ է զինծառայողների մարտական պատրաստության ծրագիրը:

- Այո, որոշակի փոփոխություններ կրել են: Մենք մի քանի ուղղվածություն ունենք՝ կախված, թե որ զորատեսակի մասին ենք խոսում: Ըստ զորատեսակների՝ այդ փոփոխություններն անընդհատ տեղի են ունենում: Տարբեր անձնակազմերի մասին ենք խոսում՝ պարտադիր ժամկետային, պայմանագրային եւ սպայական: Ինչպես բուհերում կամ դպրոցներում են ուսումնական ծրագրերն անընդհատ ենթարկվում փոփոխությունների եւ լրացումների, կրճատումների եւ ավելացումների, նույնը տեղի է ունենում նաեւ Զինված ուժերում: Մարտական կանոնադրությանը համապատասխան՝ այդ աշխատանքը մշտական բնույթ ունի:

- Այսինքն 3 տարի առաջ եւ հիմա մարտական պատրաստության առումով որակական տարբերություն ունե՞նք:

- Այո, դա անընդհատ փոփոխվող պրոցես է: Դուք գիտեք՝ տարին մի քանի անգամ զորավարժություններ են անցկացվում, այդ զորավարժությունների արդյունքներով մենք նաեւ վերլուծություն ենք անում եւ մենք մեր մեջ հասկանում ենք, թե ինչն է պետք փոխել, ինչն է պետք ուղղել, ինչ ծավալով է պետք ինչ-որ մի բանը նվազեցնել, մյուսն ավելացնել: Ինչն է պետք հանել, ինչն է պետք ներդնել: Զորավարժությունները միտված են նաեւ դրան:

- Ապրիլյան պատերազմից հետո շատ էր խոսվում, որ մարտական դիրքերում փամփուշտի պակաս է եղել: Այս ընթացքում փամփուշտներն արդեն բավարար չափի տրամադրվո՞ւմ են:

- Ամեն ինչ բավարար չափի տրամադրվում է՝ առաջադրված մարտական խնդիրը լուծելու համար՝ ոչ միայն փամփուշտները:

- Նաեւ թիկունքայի՞ն մասով է ամեն ինչ բավարար չափով տրամադրվում:

- Այո, այդ մասով անհոգ եղեք: Համոզված եղեք, որ որեւիցե խնդիր չունենք: Կախված ստորաբաժանումից՝ այդ ստորաբաժնման խնդրի հետ կապված ե՛ւ հանդերձանքի առումով, ե՛ւ սպառազինության առումով ե՛ւ բարոյահոգեբանական առումով ամեն ինչ պլանավորված ընթանում է:

- Այժմ հնարավոր չէ՞ հանկարծակիի բերել ՀՀ Զինված ուժերին:

- Բացարձակ հնարավոր չէ: Ասեմ ավելին՝ վերջին օրերին Պաշտպանության նախարարի կողմից արված հայտարարությունները դրա վառ ապացույցն են: Առաջին ձեռքից իմանալով տեղեկատվություն Զինված ուժերի մարտական պատրաստության վերաբերյալ՝ եւս մեկ անգամ կարող եմ նույն հայտարարությունը կրկնել, որ որեւիցե խնդիր չենք տեսնում: Ցանկացած զարգացման՝ այդ թվում քաղաքական, մենք պատրաստ ենք:

Հիշեցնենք, որ ՀՀ պաշտպանության նախարար Դավիթ Տոնոյանը մարտի 29-ին Նյու Յորքում հայ համայնքի հետ հանդիպմանը հայտարարել է, որ «տարածքներ՝ անվտանգության դիմաց» ձեւաչափ չի լինելու. «Ես՝ որպես պաշտպանության նախարար, ասում եմ, որ այդ ձեւաչափը՝ «տարածքներ՝ խաղաղության դիմաց», չի լինելու, ես այն վերաձեւակերպել եմ՝ «նոր պատերազմ՝ նոր տարածքներ»:

Տպել
971 դիտում

«Ռոսատոմ»-ի գլխավոր տնօրենը կայցելի Հայաստան. Պապիկյանը նրա հետ կարճատև զրույց է ունեցել

Վերցնենք Թումանյանի հեքիաթների ժողովածուն, մեր անունից տպագրենք ու ասենք՝ հղումը մոռացա. Գոգյանը՝ Հայրապետյանի մասին

Հայաստան կայցելի ԱՄՆ-ի կոնգրեսականների պատվիրակություն

Մեր նպատակն է կառուցել բռնությունից ազատ հասարակություն. Արդարադատության փոխնախարար

Ինչպե՞ս բարձրացնել Ռուսաստանում Հայաստանի ճանաչելիությունը. համաժողով

Վարչապետը Վալերի Օսիպյանին աշխատանքից ազատելու առաջարկ է ներկայացրել ՀՀ նախագահին

Վնասը կազմել է մոտ 48մլն դրամ. հափշտակություն «Արմավիր» քրեակատարողական հիմնարկի կառուցման գործընթացում

Նրա միջոցով արտահանվում է հայկական մշակույթը. կհամատեղի՞ Սմբատյանը Մալթայի հրավերը տեղի աշխատանքի հետ

Ինչպես տեսնում եք՝ իմ հրաժարականի մասին լուրերն արդարացված չեն․ Դավիթ Տոնոյան

Օսիպյանի հրաժարականի թեման ԱԱԽ նիստում չի շոշափվել. Արարատ Միրզոյան

Հայաստանը հետամուտ է իր սեփական շահերին. քննարկում ԱՄՆ-ում

Արթուր Վանեցյանն իմ ընկերն ու գործընկերն է, բոլոր մեկնաբանությունները կթողնեմ իրեն. Դավիթ Տոնոյան

Վրաստանի նախագահը համաներում է շնորհել հետախուզման մեջ գտնվող անձի. նախարար

Ներդրումային քաղաքականություն և խթանում. քննարկում Միջազգային ֆինանսական կորպորացիայի ներկայացուցիչների հետ

Զոհրաբ Մնացականյանը Լատվիայի նախագահի ուշադրությունը հրավիրել է Հայաստանում ընթացող բարեփոխումների վրա

Կրակոցներ եւ սպանության փորձ՝ Արմավիրի մարզում. հանգամանքները պարզվում են

Մոսկվայում տեղի կունենա Կոմիտասի 150-ամյակին նվիրված համերգ. կմասնակցի նաեւ Հասմիկ Պապյանը

Չեմպիոնների լիգայի գործող չեմպիոնը պարտվեց մրցաշարի առաջին տուրում (տեսանյութ)

Ծանրամարտի աշխարհի առաջնությունում Հայաստանը ներկայացնելու է 9 մարզիկ. ԿԳՄՍՆ

Արդարադատության փոխնախարարներն ընդունել են Վենետիկի հանձնաժողովի փորձագիտական խմբի պատվիրակությանը