Երեւանում շահագործման կհանձնվի նոր մանկապարտեզ. բացվում են նաեւ նոր խմբասենյակներ

Երեւանի քաղաքապետարանը նախատեսում է Նուբարաշեն վարչական շրջանում այս տարի շահագործման հանձնել նոր մանկապարտեզ, որը կկոչվի «Արեւամանուկ»:

Նշված վարչական շրջանում առայժմ գործում է նախակրթական միայն մեկ հաստատություն, որտեղ հերթագրվող երեխաների թիվը տարեկան հասնում է 200-300-ի: «Այնտեղ կան հերթագրված բավականին երեխաներ, բայց ընդունելությունը կատարվում է մեկ-երկու խմբում, նայած՝ քանի ավագ խումբ է ավարտում եւ գնում դպրոց: Այսինքն՝ մանկապարտեզը տարեկան կարողանում է ընդունել ամենաշատը 60-70 երեխա: Հինգ խմբանոց, վերանորոգված, ջեռուցվող, գույքով ապահովված, լավ մանապարտեզ է, սակայն դա քիչ է: Եվ եղավ մի ծրագիր՝ Նուբարաշենում կառուցել եւս մեկ մանկապարտեզ, որովհետեւ կա դրա պահանջարկը»,- մեզ հետ զրույցում ասաց Երեւանի քաղաքապետարանի աշխատակազմի հանրակրթության վարչության նախնադպրոցական բաժնի պետ Նունե Սարգսյանը:

Նոր մանկապարտեզը կգործի Չնքուշի փողոց, 12/2 հասցեում: Կրթօջախն արդեն պատրաստ է ընդունել սաներին: Մնում է Կրթության եւ գիտության նախարարությունը համապատասխան ընթացակարգով տրամադրի լիցենզիա: Մանկապարտեզը ստեղծվել է արդեն իսկ գոյություն ունեցող շենքում, որը կառավարության որոշմամբ այդ նպատակով տրամադրվել է Երեւան համայնքին:

«Շենքն ունի 664 քմ տարածք եւ սպասարկման համար անհրաժեշտ 1862 քմ: Այն բավականին լավ վիճակում էր, բայց ուներ վերակառուցման կարիք: 2018 թվականին վարչական շրջանում ստեղծվեց «Արեւամանուկ» կոչվող մանկապարտեզը, եւ շենքն անժամկետ ու անհատույց օգտագործման իրավունքով ամրացվեց Նուբարաշեն վարչական շրջանի այդ ՀՈԱԿ-ին (համայքնային ոչ առեւտրային կազմակերպություն): Աշխատանքները 2017 թվականից էին սկսվել, բայց միանգամից հնարավոր չէր ավարտել, որովհետեւ դրանք պահանջում են խոշոր ֆինանսական միջոցներ: Շենքը ոչ միայն հիմնանորոգվել է որպես մանկապարտեզ, այլ նաեւ ներկա դրությամբ ապահովված է բոլոր տեսակի անհրաժեշտ գույքով: Աշխատակազմը նույնպես պատրաստ է աշխատելու: Միայն մի քանի տեխնիկական հարցեր կան՝ սպասքի ապահովում եւ այլն, որոնք ընթացքում կլուծվեն, երբ երեխաները սկսեն հաճախել մանկապարտեզ»,- մանրամասնեց նախնադպրոցական բաժնի պետը: «Արեւամանուկ» մանկապարտեզի շենքային պայմանները հնարավորություն են կտան ընդունել շուրջ 130 երեխա:

Մեր զրուցակիցը կարծիք հայտնեց, որ ծրագիրը շարունակական կլինի, եթե այլ վարչական շրջաններում նույնպես մանկապարտեզի ձեւափոխելու հնարավորություն ընձեռող շենքեր լինեն: Իսկ մինչ «Արեւամանուկն» իր դռները կբացի առաջին սաների առաջ, մայրաքաղաքի տարբեր հատվածներում գործող մանկապարտեզներում ստեղծվում են նաեւ նոր խմբեր:

«2019 թվականի փետրվարին ավարտվեց նոր բացվող խմբերի առաջին փուլը: 11 խումբ՝ 460 երեխա: Դա բավականին մեծ թիվ է քաղաքի բյուջեի համար: Գիտեք, որ նախադպրոցական կրթությունը Երեւանում անվճար է, այնպես չէ, որ համայնքը միայն աշխատավարձն է հոգում, կոմունալ ծախսերը: Նա հոգում է երեխայի հետ կապված բոլոր տեսակի ծախսերը, այդ թվում սնունդը: 11 խմբերում աշխատելու համար ընդունվել են նոր աշխատակիցներ՝ ընդհանուր առմամբ 22 դաստիարակ եւ դաստիարակի օգնական: Ապրիլին նախատեսել ենք բացել 4 խումբ, մեկը արդեն երեկ բացվել է Մալաթիա Սեբաստիա վարչական շրջանում: Ընդունվեց 33 երեխա եւ մեկական դաստիարակ ու դաստիրակի օգնական: Հաջորդ շաբաթ կբացվեն եւս երեք խմբեր Նոր Նորքում, Դավթաշենում եւ Աջափնյակում, որտեղ ունենք հերթագրում եւ ունենք ազատ ու բարեկարգ խմբասենյակներ: Որտեղ կարելի է, Երեւան համայնքը այդ հնարավորությունը չի բաց թողնում իր ձեռքից եւ կազմակերպում է այդ երեխաների կրթությունը»,- նշեց պաշտոնյան:

Երեւանի քաղաքապետարանն ավելի վաղ հայտարարել էր մանկապարտեզներից օտարված եւ տարբեր կազմակերպություններին տրամադրված տարածքները վերադարձնելու եւ այդտեղ նույնպես նոր խմբեր բացելու մտադրության ու վճռականության մասին: Հայտնի է, որ նախակրթարան հաճախելու համար հերթագրված երեխաների թիվը հասնում է մի քանի հազարների: Նունե Սարգսյանն ասաց, որ վերոնշյալ խմբերի ձեւավորումն այդ ծրագրի շրջանակում չի եղել, այլ խմբասենյակներ են դարձվել համապատասխան պայմաններ եւ գույք ունեցող տարածքները: Իսկ կրթական գործունեության հետ կապ չունեցող կազմակերպությունների աշխատանքին հարմարեցված տարածքները նորից խմբասենյակներ դարձնելը ժամանակատար աշխատանք է: Բացի այդ հանրակրթության վարչությունը ղեկավարությանն առաջարկել է նոր խմբասենյակներ ձեւավորել ու կահավորել միայն այն մանկապարտեզներում, որտեղ հերթերը մեծ են, հակառակ դեպքում միջոցներ չծախսել՝ դա հետաձգելով մինչեւ պահանջարկի ձեւավորումը:

Ինչ վերաբերում է մանկապարտեզներում գոյություն ունեցող հերթերին, Նունե Սարգսյանի խոսքով, դրանք տարեկան լինում են 5-6 հազարի սահմաններում եւ սպառվում են հիմնականում մեկ տարվա ընթացքում, ի տարբերություն մի քանի տարի առաջվա պատկերի, երբ պատահում էր՝ ծնողները հաշվարկում էին, որ երեխայի մանկապարտեզ հաճախելու հերթը կարող է հասնել արդեն նրա չափահաս դառնալուց հետո: Քաղաքապետարանը մանկապարտեզ ընդունելիս սկսել է նախապատվությունը տալ 4-6 տարեկան երեխաներին, որպեսզի դպրոց գնալուց առաջ նրանք մեկ-երկու տարի կարողանան մանկապարտեզ հաճախել: Այս տարի առաջին հերթին մանկապարտեզ կընդունվեն 2014-2015 թվականներին ծնվածները: Տեղերը չսպառվելու դեպքում կընդունվեն նաեւ 2016-2017 թվականներին ծնվածները:

Տպել
2525 դիտում

Մեկ օրում ՀՀ տարածքում գրանցվել է խոտածածկ տարածքներում բռնկված 75 հրդեհ

G7-ի ղեկավարները դեմ են Իրանի՝ միջուկային զենք ունենալուն

Գյումրին պատրաստ է քաղաքի տոնին. միջոցառմանը ներկա է լինելու նաեւ վարչապետ Նիկոլ Փաշինյանը

«Մալաթիա մոլ»-ի շենքում բռնկված հրդեհը մեկուսացվել է. հրդեհաշիջման աշխատանքներին մասնակցում է 13 մարտական հաշվարկ

ԱԻ նախարարը հրդեհի վայրում է. ձևավորվել է 30 հոգուց կազմված աշխատանքային խումբ, աշխատում է 19 մարտական հաշվարկ

Հրդեհի հետևանքով Հանրապետական հիվանդանոց տեղափոխված 2 քաղաքացիները դուրս են գրվել

Վայոց Ձորում վթարի հետևանքով զոհվել է 3 քաղաքացի, եւս 3-ը հիվանդանոցում են

Հրդեհի ծավալը մեծ էր, հարկ համարեցի գալ. Վ. Օսիպյանը ժամանեց հրդեհի վայր ու նկատողություն արեց ոստիկաններին

ՀՀ վարչապետը ելույթ է ունեցել «Քայլ դեպի տուն» ծրագրի փակման արարողության ժամանակ (տեսանյութ)

Մալաթիայում տեղի ունեցած հրդեհի հետևանքով ևս 1 տուժած տեղափոխվում է «Աստղիկ» Բ/Կ

«Մալաթիա մոլ»-ի հրդեհը դեռ չի մարվել. նախնական վարկածով՝ կրակը բռնկվել է «ՎԵԳԱ»-ի պահեստում

Մալաթիայի հրդեհի հետեւանքով տուժած քաղաքացիները ծխահարվել են, 6 անձ է տուժել. ԱՆ խոսնակ

Մալաթիայի խոշոր հրդեհի հետևանքով 4 անձ տեղափոխվել է «Աստղիկ» Բ/Կ, 2-ը՝ Ճառագայթային բժշկության կենտրոն

Խոշոր հրդեհ «Մալաթիա մոլ»-ի շենքում. բարձրացվել է բարդության «Թիվ 3» կանչ, կան տուժածներ (տեսանյութ). ԹԱՐՄԱՑՎԱԾ

Շոգ, առանց տեղումների եղանակը կպահպանվի առաջիկա օրերին. եղանակն այս շաբաթ

ՃՏՊ Կրասնոդարի երկրամասի Ռ-217 ավտոճանապարհին. զոհերն ու տուժածները հայեր են (լուսանկարներ)

Դատարկ ապարների լցակույտի տարածքի ուսումնասիրությունները ոչ լիարժեք են. Ամուլսարում ուրանի և թորիումի առկայության մասին

Երևանում և Ագարակ գյուղում փրկարարները բռնել են 1 շահմար, 1 սահնօձ և 1 գյուրզա

«ԳեոՊրոՄայնինգ» ընկերությունը աջակցեց մանկական քաղցկեղի կենտրոնին (լուսանկարներ, տեսանյութ)

Ստեփանակերտում 16-ամյա երեխայի նկատմամբ բռնության դեպքը կանխվել է