Պետությունը քցել է Բաղդասարովին եւ պարտքի դիմաց նրան է տվել ավելի «քիչ արժեցող» հողեր

Տպագրվել է «Հայկական Ժամանակ» օրաթերթի՝ 2006 թվականի ապրիլի 4-ի համարում

Մինչ Հայաստանում բոլորը սպասում են, թե երբ կպարզվի Ռուսաստանից մեր հանրապետություն ներկրվող գազի նոր սակագինը, «Միկա լիմիթեդ» ընկերության նախագահ Միխայիլ Բաղդասարովը ապրիլի 1-ին կայացած ասուլիսում հայտարարեց, որ գազի գինը 100 դոլարը չի գերազանցի: Ըստ Միխայիլ Բաղդասարովի ունեցած տեղեկությունների, ՌԴ սահմանի վրա Հայաստանը ռուսական գազը ձեռք կբերի հազար խորանարդ մետրը 68 դոլար սակագնով: Հայաստան հասնելուց հետո գազի կարժենա մոտ հարյուր դոլար: «Ամեն դեպքում, գազի գինը հարյուր դոլարը չի գերազանցի»,- կանխատեսեց Բաղդասարովը:

Նման կանխատեսումների անհրաժեշտությունն առաջացավ այն բանից հետո, երբ լրագրողները նրանից փորձեցին պարզել, թե գազի գնի թանկացումն ինչպիսի՞ հետեւանքներ կունենա տնտեսության համար: Տվյալ դեպքում առավել հետաքրքիր էր, թե գազի գնի թանկացումից հետո որքանով կբարձրանա Հրազդանի ցեմենտի գործարանի արտադրանքի գինը: Մ. Բաղդասարովը խուսափեց որեւէ կոնկրետ թիվ նշելուց` նկատելով միայն, որ ցեմենտի նոր գինը պետք է լինի այնպիսին, որպեսզի այն տարածաշրջանում լինի մրցունակ: Բաղդասարովը ասում է, որ ՀՀ-ում ցեմենտի գինը պետք է հնարավորություն տա, որ մենք այդ արտադրանքը Վրաստանում վաճառենք 90 դոլարով: Եթե հայկական ցեմենտը ավելին արժենա, ըստ Բաղդասարովի՝ Վրաստանը կնախընտրի այն գնել ուրիշ երկրներից: Ներկայումս Հայաստանում մեկ տոննա ցեմանտը արժե 65-70 դոլար, իսկ Վրաստանի ցեմենտի տարեկան պահանջարկը 300-ից 350 հազար տոննա է: 

Ասուլիսի մյուս թեման Միխայիլ Բաղդասարովի հնարավոր քաղաքական կողմնորոշման հարցն էր: Արդյո՞ք նա պատրաստվում է անդամակցել որեւէ կուսակցության, եթե այո՝ ո՞ր: Միխայիլ Բաղդասարովի խոսքերով, քաղաքականությամբ զբաղվելու համար պարտադիր չէ, որեւէ կուսակցության անդամակցել. կարելի է պարզապես սատարել այն քաղաքական ուժին, որի գաղափարները կիսում ես: Գործարարի կարծիքով, Հայաստանի ներկա կուսակցությունները դեռեւս չեն հստակեցրել, թե ինչ են ուզում եւ որքանով են հավատարիմ իրենց հռչակած սկզբունքներին: «Այն կուսակցությունն է լավը, որը խոստանում եւ անում է»,- ասում է Բաղդասարովը: Այնուամենայնիվ, ո՞ր կուսակցության կամ գաղափարական խմբի կողքին է իրեն տեսնում Միխայիլ Բաղդասարովը: Այս հարցին նա պատասխանեց հետեւյալ կերպ.

«Ով կողմնակից է տնտեսության եւ սպորտի զարգացմանը»: Բնականաբար, միանգամից կարելի է ենթադրել, որ տվյալ դեպքում խոսքը Գագիկ Ծառուկյանի հիմնադրած «Բարգավաճ Հայաստան» կուսակցության մասին է: Բայց նման հեռանկարն ինքը՝ Միխայիլ Բաղդասարովը, հերքեց` ասելով, թե ինքը Գագիկ Ծառուկյանին չի ժխտում, բայց միայն նա չէ, որ կողմնակից է տնտեսության զարգացմանը եւ միաժամանակ զբաղվում է սպորտի խնդիրներով: Իհարկե, Մ. Բաղդասարովն այդպես էլ որեւէ կոնկրետ անուն չտվեց, բայց այլեւս ակնհայտ է, որ նրա քաղաքական կողմնորոշումը պայմանավորված կլինի Սերժ Սարգսյանի քաղաքական դիրքորոշմամբ: Ի դեպ, վերջինս այն քաղաքական գործիչն է, որ լինելով ՀՀ պաշտպանության նախարար՝ մշտապես մասնակցում է նաեւ տնտեսության ոլորտում ընթացող հատկապես կարեւոր գործընթացներին, բացի այդ, նաեւ զբաղված է սպորտի խնդիրներով:

Սերժ Սարգսյանը Հայաստանի շախմատի ֆեդերացիայի նախագահն է: Միխայիլ Բաղդասարովի ասուլիսի արդյունքում պարզ դարձավ նաեւ, որ «Դալմայի այգիների» մի մասի նոր տերերից մեկը հենց նա է: «Ազգային միաբանություն» կուսակցության փոխնախագահ Ալեքսան Կարապետյանը Միխայիլ Բաղդասարովին վերջերս մեղադրել էր նրանում, որ նա տարիներ առաջ «Զվարթնոց» օդանավակայանի ավիովառելիքի մատակարարումը ընդհատելու պատճառով պետությանը միլիոնավոր դոլարների վնասներ է պատճառել: Միխայիլ Բաղդասարովի պնդմամբ, Ալեքսան Կարապետյանը փաստերը խեղաթյուրել է, քանի որ ոչ թե ինքն է ավիացիային ֆինանսական վնասներ պատճառել, այլ հակառակը: Իսկ սնանկ ճանաչված «Հայկական ավիաուղիների» ավիովառելիքի դիմաց կուտակած մի քանի միլիոն դոլար կազմող պարտքի մեկուկես միլիոնի դիմաց ՀՀ կառավարությունը Միխայիլ Բաղդասարովին տվել է հողեր` «Դալմայի այգիներում»:

Հողերի չափը նա հրաժարվեց հրապարակել: Մ. Բաղդասարովը միայն ասաց, որ դրանք գտնվում են ԱՄՆ ներկայիս դեսպանատան դիմաց: «Այդ հողերը ավելի քիչ արժեն, քան այն գումարը, որի դիմաց դրանք ինձ են տրվել: Ավելին, այդ հողերի հետ կապված խնդիրներ կան, քանի որ դրանց վրա կան այգիներ եւ այնտեղ ապրում են մարդիկ»,- պարզաբանեց Բաղդասարովը: Իսկ ինչ վերաբերում է «ԱՄ» փոխնախագահին, ապա, ըստ Մ. Բաղդասարովի, իրենք առայժմ որոշել են ձեւանալ, թե չեն նկատում նրան, որպեսզի նա շարունակի «խոսել»: Միխայիլ Բաղդասարովը խոստացավ Ալեքսան Կարապետյանին տանել դատարան, որպեսզի նա գիտակցի, որ չի կարելի խոսել մի թեմայի շուրջ, որից տեղյակ չէ:

Վահագն Հովակիմյան