Լոս Անջելեսում ՀՀ գլխավոր հյուպատոսությունը դարձել է Հայաստանի հետ կապող հաստատուն կամուրջ. Աննա Հակոբյան

09/04/2019 schedule11:19

ՀՀ վարչապետի տիկին, «Իմ քայլը» և «Ժպիտների քաղաք» բարեգործական հիմնադրամների հոգաբարձուների խորհրդի նախագահ Աննա Հակոբյանն ապրիլի 7-ին ներկա է գտնվել ԱՄՆ-ում ՀՀ գլխավոր հյուպատոսության հիմնադրման 25-ամյակի միջոցառմանը:

Ինչպես հայտնում են Աննա Հակոբյանի գրասենյակի մամուլի ծառայությունից, միջոցառմանը ներկա են գտնվել համայնքի բազմաթիվ ներկայացուցիչներ, մտավորականներ, հասարակական ու քաղաքական կազմակերպությունների ղեկավարներ: Միջոցառումը մեկնարկել է ՀՀ  և ԱՄՆ օրհներգերով և ԱՄՆ հայ համայնքի հոգևոր առաջնորդների ելույթներով: Ելույթներով հանդես են եկել ԱՄՆ-ում ՀՀ դեսպան Վարուժան Ներսեսյանը, Լոս Անջելեսում ՀՀ գլխավոր հյուպատոս Արմեն Բայբուրդյանն ու ՀՀ ԱԳՆ գլխավոր քարտուղար Վահագն Մելիքյանը:

Արմեն Բայբուրդյանը ներկաների համար ընթերցել է նաև ՀՀ վարչապետ Նիկոլ Փաշինյանի, իսկ Վահագն Մելիքյանը ՀՀ ԱԳ նախարար Զոհրաբ Մնացականյանի շնորհավորական ուղերձները: Տիկին Հակոբյանը շեշտել է, որ հյուպատոսությունը դարձել է հայրենիքի հետ կապող փոքրիկ, բայց ամուր ու հաստատուն կամուրջ, հարազատ օջախ ինչպես համայնքի, այնպես էլ հյուպատոսության անձնակազմի, Հայաստանից գործուղված դիվանագետների համար:

 Ստորև ներկայացնում ենք ՀՀ վարչապետի տիկին Աննա Հակոբյանի ելույթը ԱՄՆ-ում ՀՀ գլխավոր հյուպատոսության հիմնադրման 25-ամյակի միջոցառմանը ամբողջությամբ:

Ուրախ եմ ողջունելու ձեզ,

Միացյալ Նահանգների արևմտյան ափի հայ համայնքի մեծարգո՛ հոգևոր առաջնորդներ,

Այսօրվա միջոցառման հյուրընկալ՝ Լոս Անջելեսում ՀՀ գլխավոր հյուպատոս, հարգելի՛ պարոն Բայբուրդյան,

Պարոն ԱԳՆ գլխավոր քարտուղար,

ԱՄՆ-ում Հայաստանի արտակարգ և լիազոր դեսպան,

Նահանգային, շրջանային և քաղաքային մարմինների հարգարժա՛ն պաշտոնյաներ,

Հայկական կուսակցությունների և կազմակերպությունների սիրելի՛ ղեկավարներ,

Գլխավոր հյուպատոսության 25-ամյակի կազմակերպական կոմիտեի անդամներ և միջոցառման հանդիսավար,

Սիրելի՛ քույրեր ու եղբայրներ,

Ինձ համար թե՛ պատիվ է, թե՛ հաճելի և թե՛ զգացական առումով շատ հուզիչ՝ ներկա գտնվել այս գեղեցիկ միջոցառմանը՝ նվիրված Լոս Անջելեսում Հայաստանի գլխավոր հյուպատոսության հիմնադրման 25-ամյակին:

Եկեք միասին մի փոքր հետ շրջենք մեր նորանկախ պատմության էջերը ու մտաբերենք սոցիալ-տնտեսական այն ծանրագույն իրավիճակը, որի պայմաններում, Արցախյան պատերազմից անմիջապես հետո հիմնադրվեց Լոս Անջելեսում Հայաստանի գլխավոր հյուպատոսությունը։ Սա ընդգծում է այն մեծ կարևորությունը, որ Հայաստանի Հանրապետությունը հատկացնում է Կալիֆորնիայի հետ հարաբերություններին. մի նահանգի, որ ապաստանել է ձեզ, սիրելի հայրենակիցներ և ապրելու ու արարելու անսպառ հնարավորություն ստեղծել: Սա ընդգծում է այն մեծ կարևորությունը, որ Հայաստանի Հանրապետությունը տալիս է ձեզ, սիրելի՛ հայրենակիցներ, Կալիֆորնիայի ստվար ու ծաղկուն համայնքին։

Սիրով եմ փաստում, որ հյուպատոսությունը դարձել է հայրենիքի հետ կապող փոքրիկ, բայց ամուր ու հաստատուն կամուրջ, հարազատ օջախ ինչպես մեր սիրելի համայնքի, այնպես էլ հյուպատոսության անձնակազմի, Հայաստանից գործուղված մեր դիվանագետների համար:

Հարգարժա´ն հյուրեր, տիկնա´յք և պարոնա´յք,

Ամեն անգամ Հայաստանում հպարտությամբ և ուրախությամբ ենք լցվում, զգալով, թե որքան հաղորդակից եք ու որքան սրտացավ Հայրենիքում կատարված յուրաքանչյուր իրադարձության նկատմամբ, որքան հաղորդակից եք մեր բոլոր համազգային խնդիրներին։

Անգերագնահատելի էր ձեր բոլորի հոգատարությունն ու զորակցությունը ապրիլյան պատերազմի օրերին, ինչպես նաև ձեր պատրաստակամությունը՝ անհրաժեշտ պահին նաև հայրենիքի թիկունքին ֆիզիկապես կանգնելու։

Նույնքան թանկ էր մեզ համար ձեր աջակցությունն ու նվիրվածությունը Հայաստանում տեղի ունեցած թավշյա, ոչ բռնի հեղափոխությանը: Իսկապես, արժևորում ենք ձեր համերաշխությունը սիրո և հանդուրժողականության մթնոլորտում իրականացված ու մեր բոլորի կողմից երկար սպասված հեղափոխությանը։ Դրա հաջողությունը նաև մեր կուռ միասնության արդյունքն է:

Օգտվելով ընձեռնված հնարավորությունից, ցանկանում եմ խորին շնորհակալություն հայտնել Կալիֆորնիայի մեր սիրելի համայնքին այն բարոյական աջակցության համար, որ մենք զգացել և ստացել ենք հեղափոխության շրջանում, դրան նախորդող և հաջորդող օրերին: Դա, հիրավի, լրջագույն ազդակ էր, որ մենք միայնակ չենք մեր պայքարում՝ հանուն մեր երեխաների ապագայի, հանուն մեր Նոր Հայաստանի: Հայաստան, որտեղ այլևս տեղ չունեն անարդարությունները, օրենքի չարաշահումները, մեր հանրային կյանքն արատավորող զազրելի երևույթները:

Ուրախ եմ արձանագրել, որ հեղափոխությունն արդեն իսկ տալիս է իր պտուղները։  Ինձ համար անչափ հուզիչ է, պարոն Բայբուրդյան, որ այսօր հենց Դուք եք ինձ հյուրընկալում այստեղ։ Դուք գերադասեցիք կանգնել արդարության կողքին և համերաշխություն հայտնեցիք մեր ժողովրդին՝ դրանով իսկ թանկ գին վճարելով ձեր ընտրության համար: Վաղ թե ուշ արդարությունը վերականգնվում է։ Ահավասիկ, Դուք այսօր այստեղ եք և ղեկավարում եք մեր ամենակարևոր դիվանագիտական ներկայացուցչություններից մեկը: Արդարությունը վերականգնվել է նաև նմանատիպ այլ դեպքերում։  

Շատ ուրախալի է իմանալ նաև, թե որքան է այսօր մեծացել Լոս Անջելեսում Հայաստանի գլխավոր հյուպատոսության աշխատանքի ծավալը փոփոխությունների արդյունքում. կարծում եմ, որ հեղափոխությունից հետո  Հայաստանի գրավչության ուժն է կտրուկ մեծացել:

Ես ուրախ եմ, որ ԱՄՆ-ում ծնված, մեծացած, ուսում ստացած երեխաների, պատանիների ծնողները հենց Հայաստանն են դիտում այն լավագույն վայրը զավակների ամառային հանգստի, ուսումնական կամ գործարար ծրագրերի համար:

Սիրելի´ հայրենակիցներ,

Ուզում եմ հատուկ ընդգծել նաև, որ հեղափոխությունը մեծ ազդեցություն ունեցավ առաջին հերթին մտածելակերպի փոփոխության և կարծրատիպերի հաղթահարման գործում: Մասնավորապես՝ խոսքս վերաբերում է մեր հասարակությունում կանանց դերակատարության և ներգրավվածության շեշտակի բարձրացմանը: Ուղղակի ապշեցնող էր հեղափոխությանը մեր կանանց մասնակցելու վճռականությունն ու հաստատակամությունը, մեծ պատրաստակամությունն ու նվիրվածությունը՝ հեղափոխությանը հաղորդելով անսպառ ուժ ու էներգիա, դառնալով դրա ոգին և կոտրելով իրենց մասին ավանդական բոլոր պատկերացումները: Հուսով եմ, որ այսուհետ կանայք ավելի մեծ դերակատարություն և պատասխանատվություն կստանձնեն մեր հայրենիքի շենացման գործում` բացարձակապես չնսեմացնելով ընտանիքի դերը կնոջ կյանքում։ Ես ինքս փորձում եմ իմ գործունեությամբ օրինակ ծառայել՝ չնայած չորս երեխաների մայր եմ և ունեմ բազում պարտականություններ ընտանիքում։

Այնքան հարցեր  ու թեմաներ կան, որ կցանկանայի արծարծել և խոսել ձեզ հետ, սակայն հասկանալով նաև ժամանակի սղությունը, ցանկանում եմ մի փոքր անդրադառնալ իմ գործունեությանը և հակիրճ ներկայացնել «Իմ քայլը» և «Ժպիտների քաղաք» բարեգործական հիմնադրամների առաքելությունն ու նպատակները:

«Իմ քայլը» բարեգործական հիմնադրամը նպատակ ունի նպաստել Հայաստանում այնպիսի հասարակության և միջավայրի ձևավորմանը, որտեղ յուրաքանչյուր անհատ կունենա զարգանալու և իր, իր ընտանիքի ու համայնքի բարեկեցությանը հետամուտ լինելու հնարավորություն։ Հիմնադրամի նպատակը սոցիալական, մշակութային, կրթական, գիտական, առողջապահական, բնապահպանական ոլորտների զարգացմանն ուղղված ծրագրերի մշակումն ու իրականացումն է, որոնք մեր պետության զարգացման գործում միտված են ունենալու երկարաժամկետ ազդեցություն: Այս համատեքստում առանձնակի տեղ է հատկացվում մարդկային կապիտալի զարգացմանն ուղղված ծրագրերի իրականացմանը՝ օժանդակելով մեր երիտասարդներին սովորելու աշխարհի լավագույն համալսարաններում, և ստացված գիտելիքն ու փորձը ներդնելու մեր երկրի զարգացման և առաջխաղացման գործում: Աղքատության հաղթահարմանն ուղղված մեր ծրագրերը միտված են անապահով ընտանիքներին դուրս բերել աղքատության ճիրաններից և հնարավորություն տալ սեփական ուժերով հոգալ ընտանիքի բարեկեցությունը։

Այսօր, աշխարհը սրընթաց կերպով սլանում է առաջ, և մենք այլևս հապաղելու, ժամանակի լաբիրինթոսում խճճվելու իրավունքը չունենք: Մեր քայլերը պետք է լինեն նպատակային, արդյունավետ և երկարաժամկետ ազդեցությանը միտված։

Ինչ վերաբերում է «Սիթի օֆ սմայլ» կամ «Ժպիտների քաղաք»  բարեգործական հիմնադրամի գործունեությանը, ապա դրա առաքելությունն է օգնել քաղցկեղով և արյան հիվանդություններով տառապող երեխաներին և երիտասարդներին, լինել նրանց կողքին՝ աջակցելով նրանց ու նրանց ընտանիքներին արժանապատվորեն անցնել քաղցկեղը հաղթահարելու դժվարին ճանապարհը։

Մեծարգո հյուրեր, սիրելի տիկնայք ու պարոնայք,

Պատահական չէր, որ մեր հեղափոխության շարժիչը «քա´յլ արա» կարգախոսն էր: Օգտվելով ինձ ընձեռնված այս առիթից՝  խնդրում և կոչ եմ անում ձեզ բոլորիդ կատարել «ձե´ր քայլը»՝ Հայրենիքին նաև մեր ծրագրերի միջոցով աջակցելու գործում: Սա բարի և արդար գործ է ու արժանի ներդրում է, որի արդյունքները, վստահեցնում եմ, տեսանելի կլինի մոտակա ապագայում:

Եզրափակելով ելույթս՝ կրկին շնորհավորում եմ մեզ բոլորիս Հայաստանի գլխավոր հյուպատոսության հիմնադրման 25-ամյակի առթիվ:  Ուրախ եմ տեսնել, որ այն, իրոք, հարազատ վայր է դարձել մեր համայնքի, ձեզանից յուրաքանչյուրի համար: Շարունակեք սիրել ու փայփայել մայր հայրենիքի փոքրիկ հողակտորը այս երկրում, ինչպես որ պարտավորվել ենք փայփայել ու ծաղկեցնել հայրենիքի ամեն թիզ հողը՝ հանուն մեր սերունդների բարեկեցիկ ապագայի, հանուն մեր երազանքների երկրի, հանուն մեր տաղանդաշատ ժողովրդի առաջընթացի ու բարեկեցության:

Հայկական ինքնության, հող ու ջրի և հայրենակիցների սիրո հազարավոր կապերի վրա խարսխված՝ Նոր և վերածնունդ ապրող Հայաստանը մեծագույն սիրով և խանդավառությամբ է սպասում ձեզ բոլորիդ և ձեզանից յուրաքանչյուրին:

Շնորհակալ եմ ջերմ հյուրընկալության համար և ակնկալում եմ շուտով հանդիպել ձեզ հետ Հայաստանում:

Տպել
593 դիտում

Պոտենցիալ «վեթինգվածների» երկակի ստանդարտները

Հարգանքի տուրք է մատուցվել ՀՀ ոստիկանության պարեկապահակետային ծառայության գնդում (տեսանյութ)

Սիրիայում 9 ժամ կտտանքների ենթարկելուց հետո քարերով սպանել են 60-ամյա հայուհու

Տեղի է ունեցել ընդունելություն ԱՄՆ-ում ՀՀ դեսպանությունում` ի պատիվ ԱԺ նախագահ Արարատ Միրզոյանի

Իջևանում տեղի ունեցած բախումից տուժած 12 ոստիկաններից մեկը հիվանդանոց է տեղափոխվել գանգուղեղային վնասվածքով. մանրամասներ

Ռուսաստանը հայտնել է Թուրքիային ռազմական ինքնաթիռներ վաճառելու պատրաստակամության մասին

Նպատակը վեթինգը չէ, այլ անաչառ դատարան ունենալը. որ ասենք՝ մեր անկախ, սկզբունքային դատարանը որոշեց. Ն. Փաշինյան

Բախում Իջեւանում. 9 վիրավոր ոստիկան տեղափոխվել է հիվանդանոց

Վրաստանի վթարից տուժած ծայրահեղ ծանր վիճակում գտնվող 14-ամյա տղան գիտակցության է եկել. նա սկսել է ինքնուրույն շնչել

Եթե Քոչարյանը քաղբանտարկյալ է, ուրեմն ես իրավունք ունեմ տանկերի տակ ճզմել ցանկացած ընդդիմադիր շարժում. վարչապետ

Երեւան-Սեւան ավտոճանապարհին ձորն ընկած բեռնատարի վարորդը մահացել է

100 հազար դոլար, 18 մլն դրամ. ԱԱԾ քննչական դեպարտամենտի պետի ունեցվածքը

Հայաստանի և Ադրբեջանի միջև թեժ գիծն աշխատում է, բայց դա չի երաշխավորում, որ մենք զոհեր չենք ունենա. վարչապետ

Երեւանում Իսպանիայի ու Պորտուգալիայի 19 տարեկանները ցույց տվեցին այն, ինչ Հայաստանում չկա

Վենետիկի հանձնաժողովի կողմից պաշտոնական միայն մի դիրքորոշում է եղել. Նիկոլ Փաշինյան

Թուրքական դատարանը Հրանտ Դինքի սպանության գործով տարբեր ժամկետներով դատապարտել է 9 մարդու

Խաչիկ գյուղի մոտակայքում խոտածածկ տարածք է հրդեհվել

Մի բուդկայի պես սեփականաշնորհվել է ՍԴ-ն. եղել է քաղաքական առեւտուր, 4 մարդիկ ստացել են իրենց հասանելիքը. վարչապետ

Իսպանիայի նորանշանակ դեսպանն իր հավատարմագրերի պատճենն է հանձնել ՀՀ ԱԳ փոխնախարարին

Ապօրինի ծառահատում Ահնիձոր գյուղի հարակից անտառում