Անկուսակցականը. Զախարյանը քավում է մեղքերը

Տպագրվել է «Հայկական Ժամանակ» օրաթերթի՝ 2006 թվականի ապրիլի 18-ի համարում

Նախկինում մարզ համարվող Երեւան քաղաքը նոր Սահմանադրությամբ դարձել է համայնք: «Երեւանը համայնք է, եւ Երեւան քաղաքում տեղական ինքնակառավարման եւ տեղական ինքնակառավարման մարմինների ձեւավորման առանձնահատկությունները սահմանվում են օրենքով»,- նշված է Սահմանարության 108-րդ հոդվածում: Սակայն Սահմանդրության մեջ նշված չէ, թե ինչ մեխանիզմով պետք է ընտրվի Երեւանի քաղաքապետ, եւ դա պետք է կարգավորվի «Երեւան քաղաքի մասին» օրենքով, որը պետք է պատասխանի` արդյո՞ք Երեւանի քաղաքապետը պետք է ընտրվի ուղղակի` Երեւանի քաղաքացիների կողմից, թե՞ անուղղակի` ավագանիների միջոցով: Այսօր «Երեւան քաղաքի մասին» օրենքը դեռեւս մշակման նախնական փուլում է, սակայն արդեն հայտնի են որոշակի տարբերակներ, որոնք մասնավորապես Երեւանի գործող քաղաքապետ Երվանդ Զախարյանը ցանկանում է ամրագրել օրենքով:

Առաջին հերթին դա վերաբերում է Երեւանի քաղաքապետի ընտրությանը: Բնականաբար, Երվանդ Զախարյանը «լոբբինգ» է անում այն տարբերակի օգտին, որ նոր օրենքով Երեւանի քաղաքապետի ընտրությունը լինի անուղղակի` ավագանիների միջոցով: Հասկանալի է, որ Երեւանի քաղաքապետի ընտրություններն անցկացվեն ուղղակի, ապա Երվանդ Զախարյանը այդ պաշտոնում ընտրվելու որեւէ շանս չի ունենա, քանի որ մայրաքաղաքում վերջին տարիներին իրականացված սեփական տների իրացումները, կանաչ գոտիների կառուցապատումները եւ ընդհանրապես բոլոր ապօրինությունները Երեւանի բնակչությունը կապում է հենց Զախարյանի անվան հետ: Համենայնդեպս, վերջինս այն պաշտոնյաներից է, որի հրաժարականի պահանջով կառավարության եւ Երեւանի քաղաքապետարանի շենքերի առջեւ գրեթե ամեն շաբաթ հանրահավաքներ են անցկացվում:

Դրա համար Երվանդ Զախարյանին օդի, ջրի պես անհրաժեշտ է, որ ընտրություն կատարեն համայնքապետերի կողմից գրեթե հարյուր տոկոսով վերահսկելի ավագանիները: Այդ մասին մի քանի անգամ հայտարարել է հենց ինքը` Երեւանի քաղաքապետը, որը երեկ հրավիրված ասուլիսում վերահաստատեց իր դիրքորոշումը: «Ես իմ կարծիքն արդեն ասել եմ, ճիշտ կլինի, որ Երեւանի քաղաքապետն ընտրվի ավագանու կողմից, որը կընտրվի ուղիղ ընտրությունների միջոցով»,- պատասխանելով Երեւանի քաղաքապետի ընտրովիության վերաբերյալ մեր հարցին՝ հայտարարեց Երվանդ Զախարյանը: Նրա խոսքերով, «Երեւան քաղաքի մասին» օրենքը նոր է սկսել մշակվել, սակայն կառավարության 2006 թվականի ծրագրով այն պետք է ընդունված լինի մինչեւ այս տարվա վերջը:

Այսինքն` օրենքն ուժի մեջ կմտնի այն ժամանակ, երբ 2007 թվականի խորհրդարանական ընտրությունների նախընտրական քարոզարշավն արդեն մեկնարկած կլինի: Երվանդ Զախարյանի հաշվարկը թերեւս այն է, որ նախընտրական շրջանում Երեւանի քաղաքապետի փոփոխություն չի լինի եւ արդեն խորհրդարանական ընտրություններից հետո` նաեւ առաջիկա ԱԺ մեծամասնության հետ համաձայնեցնելով, ինքը կկարողանա կազմակերպել իր ընտրությունները: Համենայնդեպս, մեր հարցին, թե արդյոք պատրաստվում է ընտրություններից առաջ անդամագրվել որեւէ կուսակցության, Երվանդ Զախարյանը բավական բազմանշանակ պատասխան տվեց:

«Ես չեմ գտնում, որ Երեւանի քաղաքապետը, իսկ այսօր ես եմ Երեւանի քաղաքապետը, մինչեւ ընտրությունները որեւէ մի կուսակցության պետք է անդամակցի, որպեսզի շահարկումներ չլինեն, թե Երեւանի քաղաքապետը ամբողջ քաղաքը տրամադրում է այս կամ այն կուսակցությանը»,-շեշտելով «մինչեւ ընտրությունները» արտահայտությունը՝ հայտարարեց Երվանդ Զախարյանը՝ ըստ էության չբացառելով, որ 2007 թվականի խորհրդարանական ընտրություններից հետո ինքը կարող է որեւէ, ասենք, իշխող կուսակցության անդամ դառնալ: Պատկերացրեք մի այսպիսի վիճակ. 2007 թվականի ԱԺ ընտրություններից հետո Երվանդ Զախարյանը դառնում է, օրինակ, խորհրդարանում մեծամասնություն ունեցող կուսակցության անդամ եւ արդեն որպես կուսակցական առաջադրում է իր թեկնածությունը Երեւանի քաղաքապետի ընտրություններում: Համենայնդեպս, պրն Զախարյանն արդեն գիտի, թե ինչպես պետք է աշխատի հաջորդ քաղաքապետը:

«Հաջորդ քաղաքապետը, որը կլինի արդեն, այսպես ասած, քաղաքական քաղաքապետ, նա պարտավոր կլինի աշխատել այն թիմի հետ, որը կգա իշխանության»,- ահա այսպես է պետկերացնում Երեւանի գործող քաղաքապետը արդեն ընտրված քաղաքապետի գործունեությունը: Եւ եթե խորհրդարանական ընտրություններից հետո Երվանդ Զախարյանն անդամակցի, ասենք, «Բարգավաճ Հայաստան» կամ Հանրապետական կուսակցությանը, ամենեւին պետք չէ զարմանալ, քանի որ ներկայումս ոչ պաշտոնապես նրա թիկունքին կանգնած «Օրինաց երկրի» հեռանկարները շատ մշուշոտ են: Ինչ վերաբերում է Երվանդ Զախարյանի երեկվա ասուլիսին, ապա այն ամբողջովին նվիրված էր անցած երեք ամիսներին քաղաքային իշխանությունների կատարած տքնաջան աշխատանքին:

Գրեթե բոլոր ոլորտներում Երեւանի քաղաքապետարանը կա՛մ կատարել, կա՛մ գերակատարել է նախատեսված ցուցանիշները` կապիտալ շինարարություն, կանաչապատում, կոմունալ տնտեսություն եւ այլն եւ այսպես շարունակ: Իսկ եթե հիշենք, որ այս տարի Ռոբերտ Քոչարյանն առաջինը այցելել էր Երեւանի քաղաքապետարան եւ «ջղայնացել» էր նրա աշխատակիցների վրա, ապա Երվանդ Զախարյանի երեկ ներկայացրած թվերը կարելի է համարել որպես մեղքերը քավելու փորձ:

Գառնիկ Գեւորգյան