Տոքսիկ ելույթ էր․ ձեր ներվայնությունն այս ամբիոնից մի տարածեք․ Էդմոն Մարուքյանը՝ Համազասպ Դանիելյանին

«Իմ քայլը» խմբակցության պատգամավոր Համազասպ Դանիելյանի «պերֆորմանս-ելույթ»-ից անմիջապես հետո ելույթ ունենալու ձայն խնդրեց «Լուսավոր Հայաստան» խմբակցության ղեկավար Էդմոն Մարուքյանը։

«Ես հասկանում եմ, որ ձեր գաղթակղությունը մեծ է իմ հաշվին ինքնահաստատվելու եւ հայտնի դառնալու, որովհետեւ ասում է՝ խփում ես հայտնի մարդուն, իր հաշվին սկսում ես կայանալ, բայց մենք Ձեզ անգամ դա չենք թույլ տալու։ Ձեր ելույթի մեջ 67 անգամ պարոն Մարուքյան նշելով՝ դեռ երկար տարիներ պետք է աշխատեք, որ այդ կլասիկի մակարդակին հասնեք»,- ասաց Մարուքյանը։

Անդրադառնալով ԵՊՀ ռեկտորի պաշտոնակատարի ընտրության շուրջ առաջացած հարցին՝ Մարուքյանն ասաց.

«Ես խոսում եմ սկզբունքայնության մասին, ուզում եմ հասկանալ՝ ձեր իշխանությունն իր հայտարարած սկզբունքները պահո՞ւմ է, թե չէ: Հայտարարել եք, որ համալսարանի դուռը փակողը չպետք է ռեկտոր աշխատի, փաստ եմ ներկայացրել, դուռ փակողին ռեկտոր եք նշանակել, պատասխանը տվեք։ Ձեր իշխանությունը հայտարարել է, որ բուհերն ապաքաղաքականացնելու եք, «Իմ քայլից» քանի՞ պատգամավոր կա բուհերի խորհուրդներում։ Ես չգիտեի, որ Դուք անդամ եք, ինքնախոստովանական ցուցմունք տվեցիք»,-ասաց Մարուքյանը՝ դիմելով Դանիելյանին։

Մարուքյանը ասաց՝ ուրախ է, որ «Իմ քայլ»-ում իր գծով գիտությունների թեկնածուական են ուզում պաշտպանել, հետեւում են իր գրառումներին ու հարցազրույցներին․

«Շատ շոյված եմ Ձեր պահվածքից, բայց ուզում եմ ասեմ հետեւյալը. եթե իմ ասածները ձեզ ներվայնացնում են, նորմալ է, բայց մի բերեք ներվայնությունները այս ամբիոնց տարածեք, թունավոր ելույթ էր դա, տոքսիկ ելույթ։ Մի հատ ժպտացեք, գարնան վերջին օրն է վերջին հաշվով, կարելի՞ է այդքան չկամություն ցուցաբերել այս ամբիոնից»,-ասաց նա` կոչ անելով՝ չխցկվել բուհերի խորհուրդներ։

«Ձեր շատ գործընկերներ, միգուցե նաեւ Դուք ասում եք՝ ընդդիմությունը սաղ օրը խոսում է, գործ չի անում՝ փորձելով մարդկանց մոլորության մեջ գցել։ Ստեղի գործը խոսելն է, գրածը խոսելով ներկայացնել, էդ էլ սովորացնե՞նք, եւ ընդհանրապես, մենք, այո, տրամադրված ենք կառուցողական քննարկումների»,-ասաց Մարուքյանը։

ԱԺ նախագահ Արարատ Միրզոյանը, դիմելով պատգամավորներին, կոչ արեց խորհրդարանի ամբիոնից ոչ մեկ ոչ մեկին բան չսովորեցնի, քանի որ այդպես շատերը կարող են բան սովորեցնել։

Հիշեցնենք՝ Համազասպ Դանիելյանն ԱԺ ամբիոնին էր մոտեցել մածունի բաժակով՝ դրանով Մարուքյանին կոչ անելով չթունավորել աշխատանքային մթնոլորտը։

Մարուքյանի ելույթից հետո ամբիոնին մոտեցավ «Իմ քայլը» խմբակցության պատգամավոր, ԵՊՀ հոգաբարձուների խորհրդի մեկ այլ անդամ՝ Հովհաննես Հովհաննիսյանը։

«Ստիպված եմ նորից անդրադառնալ պարոն Մարուքյանին: Դուք, որպես իրավաբան, պետք է ծանոթ լինեիք բարձրագույն ուսումնական հաստատությունների խորհրդի ձեւավորման կարգին։ Հիմնադրի անունից խորհրդի անդամներ է առաջադրում ՀՀ վարչապետը՝ պետական պաշտոն զբաղեցնող անձանցից 25 տոկոս, ու դա չի ենթադրում, որ քաղաքական գործիչը, խորհրդում լինելով, քաղաքականացում է»,-ասաց Հովհաննիսյանը։

Պատգամավորն ընդգծեց՝ ԵՊՀ խորհրդի նախագահը կուսակցական չէ, Բժշկական համալսարանի, Շիրակի պետական համալսարանի, Պոլիտեխնիկի, մի շարք այլ բուհերի խորհուրդների նախագահները կուսակցական չեն։

«Այդ բոլորը չտեսնելն ու ասել՝ նախկինի պես է, նույն ՀՀԿ-ական բանն եք անում, սա անբարոյականություն է, ինչպես Դուք եք ասում»,-ասաց Հովհաննիսյանը։

Նա հիշեցրեց, որ իրենց իշխանության ժամանակ Վանաձորի պետական համալսարանի խորհրդի անդամ է նշանակվել «Լուսավոր Հայաստան» կուսակցության անդամ, Էդմոն Մարուքյանի եղբայր Քրիստ Մարուքյանը։

«Ես եմ զանգել Ձեր եղբորը, որովհետեւ տեսել ենք, որ նա մեծ գործ է անում COAF սմարթ կենտրոնում ու իր արժանիքները, գիտելիքները գնահատելով՝ խնդրել ենք, որ նա լինի Վանաձորի պետական համալսարանի հոգաբարձուների խորհրդում»,-ասաց Հովհաննես Հովհաննիսյանը։

Անդրադառնալով Մարուքյանի այն արտահայտությանը, որ պետք չէ խցկվել բուհերի խորհուրդների մեջ, Հովհաննիսյանն ասաց՝ որեւէ մեկը չի խցկվում, Մարուքյանի եղբորը՝ Քրիստ Մարուքյանին առաջարկել են, ներառվել է խորհրդում․

«Եւ եսիմ ինչ պաշտոն չի, 99 տոկոսին խնդրել ենք, որ լինեն բուհերի խորհրդում»,-ասաց Հովհաննիսյանը։