Մեր հարեւանը. Թորոսյանի բախտը բերեց երկու առումով

Տպագրվել է «Հայկական Ժամանակ» օրաթերթի՝ 2006 թվականի հունիսի 14-ի համարում

ԱԺ նորընտիր խոսնակ Տիգրան Թորոսյանի ու նրա ընտանիքի մասին մի քանի խոսք ասելու հարցում հարեւանությամբ ապրող բնակիչները խիստ ժլատ էին: Զարմանալիորեն այնպիսի տպավորություն էր ստեղծվում, թե նրանք ինչ-որ բանից կամ, ավելի ճիշտ, ինչ-որ մեկից վախեցած են: Մարդիկ չէին ցանկանում պատմել, թե ինչպիսի հարեւան է Տիգրան Թորոսյանը, ո՞ր հարկում է գտնվում նրա բնակարանը, ո՞ւմ հետ է նա ապրում եւ այլն: «Մենք մեր հոգսերով տարված՝ չենք հետեւում նրան: Հուսահատվել ենք, ոչ մեկի չենք հավատում»,- կարճ է կապում բակի կանանցից մեկը: «Հա, վերջերս լսել եմ, որ էստեղ ա ապրում»,- ասում է մեկ ուրիշը: Բայց շուտով պարզվում է, որ նրանք ոչ այնքան խուսափում են խոսել ու պատմել, այլ պարզապես ասելիք չունեն: Մի քանի կցկտուր տեղեկություն միայն հատուկենտ մարդիկ ունեն:

Իրենց իմացածը մեզ հետ կիսել ցանկացողներն էլ Թորոսյանի նկատմամբ վատ վերաբերմունք էին հայտնում՝ առանց բացառության: «Նրան չի էլ հետաքրքրում՝ իր կողքին ովքե՞ր են ապրում, ինչո՞վ են ապրում»,- համոզված է Թորոսյանի հարեւան շենքի ծերունի բնակիչը: «Բակում նրան ոչ ոք չի տեսել: Մի բնակչի մի անգամ չի ասի՝ բարի լույս, ո՞նց ես»,- նորընտիր խոսնակի պահվածքն է ներկայացնում հարեւան շքամուտքի մեկ այլ բնակիչ: Մինչդեռ, ինչպես վերջինս է ասում, Ազգային ժողովում ազգի ընտրյալներն են հավաքված, իսկ Թորոսյանն էլ, ըստ էության, ստացվում է, որ ընտրյալների ընտրյալն է, որին, սակայն, նույնիսկ հարեւաններից ոչ մեկի վիճակը հետաքրքիր չէ: «Գաղտագողի, կրիայի պես պատյանի մեջ քաշված է ապրում, վախեցած է՝ ինչից՝ չգիտեմ»,- կարծում է այս բնակիչը:

Մեկ ուրիշն էլ մեզ մեղադրում է սխալ ընտրության մեջ՝ ասելով, թե Թորոսյանն այն մարդը չէ, ում մասին կարելի է գրել: «Նրա մեջ անհատականություն չկա, նա դեմք չունի»,- վստահ է պատկառելի տարիք ունեցող կինը: ԱԺ խոսնակն իրենց բակ չի մտնում ու ամեն առավոտ էլ աշխատանքի գնալիս դուրս է գալիս շքամուտքի՝ դեպի պողոտա բացվող դռներից: Ի դեպ, ի տարբերություն հարեւան շքամուտքերի, միայն Տիգրան Թորոսյանի ապրած շքամուտքի դռներն են ամուր կողպված: Ասում են՝ նա մի որոշ ժամանակ առաջ, երբ արդեն ԱԺ փոխխոսնակ էր, քիչ է մնացել ավտոտնակ ունենա: Ձեւակերպված են եղել բոլոր փաստաթղթերը, ընդ որում՝ ամեն ինչ օրինականության սահմաններում, ինչը թեեւ առանձնապես առավելություն էլ չէ, սակայն շենքի բնակիչներից մեկը՝ Սարգիս Հացպանյանը, ամեն ջանք գործադրել է՝ արդեն սկսված այդ շինարարությունը թույլ չտալու համար՝ համոզված լինելով, որ «օրենքը երեխաներն են», ու նրանց խաղահրապարակից զրկելով՝ ավտոտնակ չի կառուցվելու:

Այդպես էլ եղել է: Տիգրան Թորոսյանը մնացել է առանց ավտոտնակի: Թորոսյանի հարեւանությունը վայելող մարդիկ համոզված են, որ ինչպես ԱԺ ներկայիս խոսնակը, այնպես էլ մյուս բարձրաստիճան այրերը չեն սիրում Հայաստանը եւ դեռ ավելին՝ թքած ունեն դրա վրա: Բնակիչները համոզված են, որ ամեն ինչ սկսվում է մանրուք թվացող բաներից, ու հենց դրանցից պետք է դատել, թե Հայաստանը ով որքանով է սիրում: Իսկ կոնկրետ Թորոսյանի՝ Հայաստանը չսիրելու մասին մարդիկ դատում են, օրինակ, նրա ապրած պողոտան մայթից բաժանող հողածածկույթը տեսնելով, որտեղ առանձնապես մեծ ծախսեր չպահանջող խոտ անգամ չեն աճեցնում, ձմեռը իր իսկ շենքի տանիքից կախված սառույցների նկատմամբ ունեցած անտարբերությունից եւ, վերջապես, երեխաներին խաղահրապարակի հաշվին ավտոտնակ ունենալու ցանկությունից:

Շուտով, սակայն, այդ ավտոտնակը գոնե միառժամանակ Թորոսյանին պետք չէր լինի, եթե անգամ հաջողեցրած լիներ այն կառուցել: ԱԺ խոսնակը, որ մինչեւ հիմա ապրել է զոքանչի հետ՝ նրա բնակարանում, պատրաստվում է տեղափոխվել կառավարական ամառանոց: Որոշ իրեր արդեն փոխադրվել են: Միայն թե մեզ չհաջողվեց պարզել՝ արդյոք զոքանչին նույնպե՞ս Տիգրան Թորոսյանը պատրաստվում է տանել կառավարական ամառանոց: Ամենայն հավանականությամբ՝ ոչ: Թաղի բնակիչներն ասում են, որ նրա զոքանչը շատ ակտիվ կին է ու խեղճացրած է պահում ԱԺ խոսնակ իր փեսային: «Զոքանչից վախեցող մարդ է: Զոքանչը հենց ձայնը բարձրացնում է, Տիգրան Թորոսյանը կուչ է գալիս»,- այսպես են պնդում նրանք: Ու փաստորեն, Արթուր Բաղդասարյանի հրաժարականը Թորոսյանի համար նպաստավոր եղավ երկու առումով: Նախ որ՝ հանրապետության երկրորդ դեմքի աթոռն իրեն բաժին հասավ, հետո էլ, տեղափոխվելով կառավարական ամառանոց՝ նա կազատվի զոքանչի հալածանքներից:   

Աննա Զախարյան