Ա. Թումանյանի հետքերո՞վ. հրահանգված է առայժմ պասիվանալ

Տպագրվել է «Հայկական Ժամանակ» օրաթերթի՝ 2006 թվականի հունիսի 23-ի համարում

Խանջյան 41. այս հասցեն կարծես թե սկսում է դառնալ ճակատագրական։ Ժամանակին այս հասցեում էր տեղակայված Արտաշես Թումանյանի «Նոր երկիր» կուսակցության գրասենյակը, որը անհասկանալի հանգամանքներում փակվեց։ Արտաշես Թումանյանը մարդ ուղարկեց գրասենյակ՝ տեղեկացնելու, որ իրեն կուսակցություն այլեւս պետք չէ, ու Խանջյան 41 հասցեն «Նոր երկրից» հետո վարձակալեց «Միավորում հանուն Հայաստանի» կուսակցությունը։ Եւ չնայած այս մի կուսակցության նախաձեռնողների պնդումներին, թե իրենց ոչ մի նավս չի կպնի, պատմությունը, կարծես, կրկնվում է։ Այս երեքշաբթի օրը «Միավորում հանուն Հայաստանի» կուսակցության նախաձեռնող խմբի անդամ, ԱԺ պատգամավոր Վահրամ Բաղդասարյանն իր գործավարի միջոցով գրասենյակի պերսոնալին տեղակացրել է, որ առժամանակ կուսակցությունն անցնում է պասիվ աշխատանքային ռեժիմի, եւ եթե իրենք անհրաժշետ լինեն, ապա իրենց զանգով կկանչեն։

«Միավորում հանուն Հայաստանի» կուսակցության մյուս նախաձեռնողը եւս՝ պատգամավոր Լյովա Խաչատրյանը, ժամանակավորապես դադարեցրել է կուսակցաշինարարությունն ու բոլոր զանգողներին պատասխանում է, թե ինքն իր հայրենի գյուղում ջրում է գարու սեփական արտերը։ Համենայնդեպս, երեկ Խանջյան 41 հասցեում գտնվող կուսակցության գրասենյակը փակ էր, եւ որեւէ մեկը չգիտեր, թե ե՞րբ են իրենց կանչելու։ Ինչպես մեզ փոխանցեց կուսակցության գրասենյակի աշխատակիցներից մեկը, դադարեցված են նաեւ հանդիպումները ժողովրդի հետ: «Մոտ երկու ամիս առաջ կուսակցությունը շատ ակտիվ սկսեց ձեւավորվել, եւ Վահրամ Բաղդասարյանն ու Լյովա Խաչատրյանը օրական երկու հանդիպում էին ունենում հանրապետության տարբեր բնակավայրերում։

Բավականին մարդաշատ հանդիպումներ են կազմակերպվել Վանաձորում, Տաշիրում, Ճամբարակում, Լուսակերտում, Երեւանի Նոր Նորք եւ Արաբկիր համայնքներում։ Բայց մոտ մեկ ամիս է՝ կուսակցական շինարարությունը կանգ է առել, որեւէ հանդիպում չի կազմակերպվում, իսկ երեքշաբթի օրն էլ մեզ ասվեց, որ եթե անհրաժեշտություն լինի՝ զանգով բոլորիս կհավաքեն։ Մենք ինքներս չենք հասկանում, թե ինչ է իրականում կատարվում»,- պատմում է մեր զրուցակիցը։ Ի դեպ, անգամ նրանց համար, ովքեր այդ կուսակցությունում որոշակի ոլորտների համար պատասխանատու են, այդպես էլ հասկանալի չէ, թե ո՞վ է այդ կուսակցության «պապան»։ «Կենտրոնական գրասենյակում ուշ ժամերին հավաքվում էին միայն «Ժողպատգամավոր» խմբի երեք-չորս անդամներ, որոնք, սակայն, կուսակցության հետ ոչ մի կապ չունեին։

Նրանք պարզապես գալիս էին Վահրամ Բաղդասարյանի եւ Լյովա Խաչատրյանի հետ զրուցելու։ Կուսակցության գործերով  էլ ավելի շատ զբաղվում էր Վահրամ Բաղդասարյանը, իսկ Խաչատրյան Լյովան ընդամենը կուսակցության գրասենյակից Աստրախանում եղած իր բիզնեսի գործերն էր կարգավորում՝ այստեղ-այնտեղ ֆաքսեր ուղարկելով։ Գրասենյակ գալիս էր նաեւ Ռուբեն Գեւորգյանը (Ծաղիկ Ռուբոն), որը զբաղվում է կուսակցության Դավիթաշենի կառույցով։ Այլ գործիչ կենտրոնական գրասենյակում չի երեւացել։ Ինչ վերաբերում է «Ժողպատգամավոր» խմբի ղեկավար Կարեն Կարապետյանին, ապա նա եւս մի քանի անգամ եկել է գրասենյակ, բայց մեզ հստակ ասվել է, որ Կարեն Կարապետյանը «Միավորում հանուն Հայաստանի» կուսակցության հետ ոչ մի կապ չունի»,- ասում է մեր զրուցակիցը։

Իսկ առժամանակ պասիվանալու հրահանգը, մեր զրուցակիցների ենթադրությամբ, կապված է այն բանի հետ, որ Աղվան Հովսեփյանին նախագահականից հստակ ասվել է, որ եթե վերջինս շարունակի միավորել հանուն Հայաստանի, նրան սպառնալու է Արտաշես Թումանյանի ճակատագիրը։ Արագածոտնի ոստիկանապետ Գոռ Ալեքսանյանի տեղափոխումն այլ աշխատանքի եւս կապվում է այդ կուսակցության հետ, քանզի դաշնակները հանրապետության նախագահին մի քանի անգամ բողոքել են, որ Աղվան Հովսեփյանի մտերիմ Ալեքսանյանը մարզում զբաղված է ոչ թե իր անմիջական պարտականություններով, այլ «Միավորում հանուն Հայաստանի» կուսակցության գործերով։ Ի դեպ, նավսի մասին. «Նոր երկիր» կուսակցությունը հանրապետական մամուլում իր ծրագիրը հրապարակելուց մի քանի օր հետո փակվեց։

Պատրաստ է նաեւ «Միավորում հանուն Հայաստանի» կուսակցության ծրագիրը, որը գրել են Համալսարանի եւ այլ բուհերի քաղաքագիտության, տնտեսագիտության ֆակուլտետների ուսանողները, որոնք էլ պետք է ձեւավորեին կուսակցության երիտասարդական կառույցը։ Ըստ մեր զրուցակցի, կուսակցության ծրագիրը ազատական է՝ պոպուլիզմի եւ սոցիալիզմի բազմաթիվ տարրերով։ Միակ ծրագրային դրույթը, որը դուր է եկել մեր զրուցակցին, դա այն է, որ «Միավորում հանուն Հայաստանի» կուսակցությունը խոստանում է ռեգիոնալ համաչափ զարգացում եւ իշխանության ապակենտրոնացում դեպի մարզերը։ Եթե, իհարկե, ընտրողը 2007-ին այդ կուսակցությանը վստահի։

Ինչեւէ, «Միավորում հանուն Հայաստանի» կուսակցությունն առայժմ իր կուսակիցներին ու գրասենյակների աշխատողներին հրահանգել է ժամանակավորապես պասիվանալ եւ սպասել հաջորդ հրահանգին։ Թե ինչի՞ կամ ո՞ւմ հետ է կապված լինելու հաջորդ հրահանգը, որեւէ մեկը չգիտի։ Վահրամ Բաղդասարյանը հայրենի Վանաձորում գործեր ունի, իսկ Լյովա Խաչատրյանը զբաղված է իր արտերով։ Գլխավոր դատախազն էլ արդեն հարյուր անգամ ասել է, որ ինքը քաղաքականությամբ չի զբաղվելու, որովհետեւ քաղաքականություն չի սիրում։

Նաիրա Զոհրաբյան