Խմորումներ. ՀՀԿ-ն բարգավաճում է շոգին

Տպագրվել է «Հայկական Ժամանակ» օրաթերթի՝ 2006 թվականի հունիսի 28-ի համարում

Ի՞նչ է լինելու հուլիսի 22-ին նախատեսված ՀՀԿ արտահերթ համագումարում եւ  հատկապես դրանից հետո. երեկ ահա այս հարցն էր քննարկվում քաղաքական տարբեր շրջանակներում։ ՀՀԿ խորհրդի անդամ Գալուստ Սահակյանը, օրինակ, վստահ է, որ ՀՀԿ արտահերթ համագումարից հետո Հայաստանի ներքաղաքական կյանքը զգալիորեն աշխուժանալու է, եւ քաղաքական վերադասավորումները մտնելու են հստակեցման փուլ։ Իսկ երեկ արդեն հայտնի դարձան նաեւ ՀՀԿ մինչհամագումարյան մի քանի անակնկալ եւս, որոնք քաղաքական որոշ ուժերի համար հավասարազոր են սենսացիայի, քանզի կտրուկ փոխելու են տվյալ ուժերի ռազմավարությունը։ Այն, որ ՊՆախարար Սերժ Սարգսյանը մինչեւ հուլիսի 22-ը նա՛խ դառնալու է ՀՀԿ շարքային անդամ, այնուհետ նաեւ, ՀՀԿ կանոնադրության մեջ հուլիսի 22-ին արվող համապատասխան փոփոխությունից հետո, նաեւ ՀՀԿ խորհրդի անդամ, արդեն իսկ հայտնի է։

ՀՀԿ պատգամավորներից մեկը երեկ բացատրեց նաեւ, թե ՀՀԿ-ում ի՞նչ կարգավիճակ է ունենալու Սերժ Սարգսյանը։ Ինչպես վստահեցնում է մեր զրուցակիցը, Սերժ Սարգսյանն ընտրվելու է ոչ թե ՀՀԿ համանախագահ, այլ առաջին փոխնախագահ՝ ՀՀԿ նախագահ Անդրանիկ Մարգարյանի հետ դե ֆակտո կիսելով կուսակցության ղեկավարությունը։ Այսօր ՀՀԿ-ն ունի երեք փոխնախագահ. Տիգրան Թորոսյանը ՀՀԿ առաջին փոխնախագահն է, Ռազմիկ Զոհրաբյանը ՀՀԿ երկրորդ փոխնախագահն է, որը զբաղվում է կուսակցության կազմակերպչական հարցերով, իսկ Մուշեղ Լալայանը ՀՀԿ երրորդ փոխնախագահն է, որի վրա դրված են կուսակցության գաղափարական խնդիրները։ ՀՀԿ մեր աղբյուրները պնդում են, որ հուլիսի 22-ից հետո Տիգրան Թորոսյանն առաջին փոխնախագահի իր կարգավիճակը կզիջի Սերժ Սարգսյանին՝ բավարարվելով ՀՀԿ երկրորդ փոխնախագահի կարգավիճակով, որը զբաղվելու է կուսակցական-քաղաքական խնդիրներով։

Այսպիսով, հուլիսի 22-ի ՀՀԿ արտահերթ համագումարից հետո ՀՀԿ փոխնախագահների թիվը կդառնա չորսը։ Բայց սա եւս ՀՀԿ-ի խոստացած ողջ անակնկալը չէ։ Առաջիկա օրերին ՀՀԿ անդամ կդառնա Վայոց ձորի մարզպետ Սամվել Սարգսյանը, որը մինչեւ վերջերս դե յուրե ՕԵԿ-ական էր, սակայն դե ֆակտո միշտ էլ կատարել է ՀՀԿ-ի հրահանգները, որոնք այդ մարզպետին փոխանցում էր իր անմիջական շեֆ, ԱԺ հանրապետական պատգամավոր Աշոտ Արսենյանը։ ՀՀԿ անդամ կդառնա նաեւ Նոր Նորքի թաղապետ Դավիթ Պետրոսյանը, որը վերջինիս հոր անկեղծ խոստովանությամբ միայն ձեւականորեն էր «Օրինաց երկիր» կուսակցության անդամ։

Ինչ վերաբերում է առանց կուսակցական պատկանելության մնացած միակ մարզպետին՝ Արմավիրի  մարզպետ Ալբերտ Հերոյանին, ապա, ինչպես ասում է ՀՀԿ պատգամավոր մեր մի զրուցակիցը, Հերոյանին հանրապետական դարձնելու որեւէ անհրաժեշտություն չկա. Հերոյանն առանց ավելորդ թիթիզությունների միշտ էլ անձնազոհաբար ծառայում է օրվա իշխանությանը։ Սրանով եւս ՀՀԿ սյուրպրիզները չեն ավարտվի։ Ըստ մեր հանրապետական զրուցակիցների, ՀՀԿ անդամ է դառնալու նաեւ «Ժողպատգամավոր» խմբի ղեկավար Կարեն Կարապետյանը՝ իր գլխավորած խմբի մի քանի անդամների հետ։ Ավելին, Կարեն Կարապետյանին ընտրելու են նաեւ ՀՀԿ խորհրդի կազմում։ Հասկանալի է, որ ՀՀԿ շարքային անդամ կդառնան նաեւ «Ժողպատգամավոր» խմբի բոլոր սերժականները՝ Լեւոն Սարգսյանի (Ալրաղացի Լյովի) գլխավորությամբ։

ՀՀԿ-ում վստահեցնում են, որ մի շարք հայտնի գործարարներ եւ անկախ պատգամավորներ եւս մինչեւ հուլիսի 22-ի արտահերթ համագումարը անդամակցելու են ՀՀԿ-ին։ Ուստի, պատահական չէր, որ մեկ ամիս առաջ ՀՀԿ ինտերնետ կայքին տված հարցազրույցում ՀՀԿ նախագահ Անդրանիկ Մարգարյանը հարցին, թե ճի՞շտ է, որ ՀՀԿ արտահերթ համագումարում մի շարք հայտնի քաղաքական-հասարակական գործիչներ են մտնելու կուսակցության շարքերը, տվել էր դրական պատասխան։ Իհարկե, այս դեպքում հայտնի հասարակական-քաղաքական դեմք ձեւակերպումը մի քիչ անհարմար է հնչում, քանզի շատ մեծ երեւակայություն պետք է ունենալ, ասենք, Ալրաղացի Լյովին, Վայոց ձորի մարզպետին ու էլի ոմանց հասարակական-քաղաքական դեմք համարելու համար։

Ինչեւէ, անկախ նրանից, թե ի՞նչ է Ալրաղացի Լյովը, ակնհայտ է, որ ՀՀԿ-ն համալրելով իր կադրերով (քանզի միանշանակ է, որ նշված բոլոր գործիչները ՀՀԿ են մտել ու մտնելու են բացառապես ՊՆախարարի առաջարկով կամ պահանջով)՝ այդ կուսակցությունը դառնում է իշխանական դաշտի թիվ մեկ գործոնը, որն էլ, ըստ ՀՀԿ-ի ծրագրերի, պետք է որոշի 2007-ի խորհրդարանական եւ 2008-ի նախագահական ընտրությունների ելքը։ Ի դեպ, ՀՀԿ-ն այդ երկու համապետական ընտրությունների ելքն իր համար արդեն որոշել է։ 2007-ին ԱԺ-ում մեծամասնություն ունեցող ՀՀԿ-ն Սերժ Սարգսյանին առաջադրում է վարչապետ, իսկ Անդրանիկ Մարգարյանը դառնում է ԱԺ նախագահ՝ պահպանելով ԱԺ առնվազն մեկ փոխնախագահի պաշտոնը, ուր կրկին կուղարկեն Տիգրան Թորոսյանին։ Իսկ 2008 թվականին արդեն ՀՀԿ-ն նախագահական ընտրությունների կգնա սեփական թեկնածուով՝ Սերժ Սարգսյանով։

Հանրապետական կուսակցությունում վստահ են, որ ամեն ինչ հենց այդպես էլ լինելու է։ Ի դեպ, ՀՀԿ-ում հերքում են պարզ եւ տրամաբանական այն եզրակացությունը, որ ողջ այս ղալմաղալն ուղղված է «Բարգավաճ Հայաստանի» դեմ, որի այս տեմպով բարգավաճումն արդեն ուղղակի վտանգ էր ՀՀԿ գոյության համար ընդհանրապես: «Նման բան չկա. ՀՀԿ-ն ու «Բարգավաճ Հայաստանն» իրար հետ են, եւ 2007-ի ընտրություններին, եթե անգամ մեկ միասնական դաշինքով չգնանք, ապա գնալու ենք իրար հետ համաձայնեցված՝ 2008-ին պաշտպանելով նախագահի մեկ միասնական թեկնածուի»,- վստահեցնում է ՀՀԿ պատգամավորներից մեկը։ Չնայած, չի բացառվում, որ ՀՀԿ այս պատգամավորին, որը նաեւ ՀՀԿ խորհրդի անդամ է, իր շեֆերը, որոնք երեք-չորս հոգով են կայացնում բոլոր որոշումները, պարզապես չեն ասել, թե իրականում ի՞նչ նպատակ է հետապնդում ուշաթափ անող շոգին ՀՀԿ-ի հրատապ այս ակտիվությունը։

Նաիրա Զոհրաբյան

Խմբ. կողմից -  Հիմա Անդրանիկ Մարգարյանը կգնա վիրահատության, կգա, կպարզվի, որ նրա առողջական վիճակը թույլ չի տալիս միանգամից իր փխրուն ուսերին տանել ե՛ւ հանրապետության, ե՛ւ կուսակցության հոգսերը, դրա համար անհրաժեշտ է կուսակցության կառավարման համակարգը մի փոքր փոխել: Կանոնադրության փոփոխություններով կուսակցությունում կհաստատվի համանախագահի պաշտոն, որում եւ կընտրվի Սերժ Սարգսյանը: Սրանից հետո արդեն կսկսվի ամենադժվարը. այն, ինչի մասին երազում են իշխանական ուժերը, եւ որը դժվար կլինի իրականացնել: Շատ դժվար, համարյա թե անհնար: