Համագումարին սպասելիս. ՀՀԿ-ում սենսացիա չեն խոստանում

08/07/2019 schedule10:05

Տպագրվել է «Հայկական Ժամանակ» օրաթերթի՝ 2006 թվականի հուլիսի 8-ի համարում

Ի՞նչ է լինելու Հանրապետական կուսակցության 10-րդ արտահերթ համագումարում։ ՀՀԿ-ում ասում են՝ ըստ էության ոչ մի հետաքրքիր եւ սենսացիոն բան, քաղաքական կուլիսներում ենթադրում են, որ այդ համագումարը հստակեցնելու է քաղաքական դաշտի վերադասավորումը։ Այդ հստակեցումը, բնականաբար, պայմանավորված է ՊՆախարար Սերժ Սարգսյանի անձով, որը մինչեւ ՀՀԿ արտահերթ համագումարը պատրաստվում է անդամակցել այդ կուսակցությանը։ Այսինքն, նա արդեն հարազատ կուսակցության արտահերթ համագումարին կներկայանա որպես կուսակցական եւ մեխանիկորեն, ինչպես ՀՀԿ մնացած նախարարները, կհամարվի ՀՀԿ խորհրդի անդամ։ Արդյո՞ք ՀՀԿ արտահերթ համագումարը Սերժ Սարգսյանին կընտրի նաեւ կուսակցության փոխնախագահ՝ ինչը ենթադրվում է։

Այդ հարցին այս պահին ՀՀԿ-ում դժվարանում են պատասխանել. ամեն ինչ պարզ կլինի առաջիկա օրերին եւ արդեն ՀՀԿ խորհրդի նիստում, որը նախատեսված է անց կացնել մյուս շաբաթ, բոլոր այդ հարցերի պատասխանները տրված կլինեն։ Իսկ երկու օրից լրանում է Սերժ Սարգսյանի խոստացած հերթական վերջնաժամկետը, երբ ինքը պետք է վերջնականապես կողմնորոշվի։ Ահա այդ կողմնորոշումից էլ կախված է մի շարք այլ գործարարների եւ պատգամավորների կողմնորոշումը, որոնք սպասում են  ՊՆախարարի ամենավերջնական կողմնորոշմանը։ Ուստի, որոշ գործարարներ եւ պատգամավորներ, որոնց անունը արդեն գրված է ՀՀԿ անդամության ցուցակում, որոնցից մեկ-երկուսի անունը կա նաեւ ՀՀԿ խորհրդի կազմում, հաստատելով իրենց անդամակցության ցանկությունը ՀՀԿ-ին, այնուամենայնիվ, սպասում են` առաջինը Սերժ Սարգսյանը ստանա ՀՀԿ անդամատոմսը, հետո նոր իրենք։

Ի դեպ, ԱԺ «Գործարար» խմբի որոշ պատգամավորներն էլ միայն երեկ ԱԺ-ում իմացան, որ իրենց անունը եւս ՀՀԿ անդամների ցուցակում է եւ այդ կապակցությամբ խիստ ուրախացան։ Ինչեւէ, թե Սերժ Սարգսյանի հետ է՞լ ով է գալու ՀՀԿ, պարզ կլինի մինչեւ համագումարն ընկած այս օրերին։ Համենայնդեպս, ՀՀԿ խմբակցության քարտուղար Գագիկ Մելիքյանը չափազանցված է համարում լուրերը, թե մարդիկ իրար կոտորելով գալիս են ՀՀԿ, կամ նրանց բռնակցում են ՀՀԿ-ին: «Եթե նայում ենք կուսակցությանն անդամագրվելու դինամիկան, ապա անցած տարվա համեմատ այն էական փոփոխություն չի կրել։ Ավելին, միայն անցած 6-7 ամիսներին մենք մոտ 3 հազար կուսակցականի տարբեր պատճառներով հեռացրել ենք ՀՀԿ-ից։ Ու եթե մենք բռնակցումներով զբաղվեինք, ապա այդքան մարդ չէինք հեռացնի ՀՀԿ-ից»,- ասում է Մելիքյանն ու խորհուրդ տալիս ՀՀԿ արտահերթ համագումարում որեւէ անակնկալի չսպասել:

«Մեզ համար մի քիչ տարօրինակ էր մամուլի այս աժիոտաժը մեր արտահերթ համագումարի շուրջ, որտեղ, բացի ծրագրային փոփոխություններից, որեւէ այլ բան չի լինելու։ Իսկ ովքեր անդամագրվելու են կուսակցությանը, դա, բնականաբար, չի լինելու համագումարում»,- ՀՀԿ համագումարից սենսացիա չսարքելու եւ հետո լրջորեն չհիասթափվելու խորհուրդ է տալիս ՀՀԿ խորհրդի անդամը։ Իսկ ի՞նչ ծրագրային փոփոխություններ է նախատեսված անցկացնել ՀՀԿ ծրագրում։ Դատելով առաջարկած փոփոխություններից եւ լրացումներից` Հանրապետական կուսակցությունը որոշել է շատ ավելի գաղափարական եւ ազգային տեսք տալ իրեն` հասկանալի պատճառներով մյուս, հատկապես նորաստեղծ կուսակցություններից առանձնանալու համար։ Եւ եթե մինչ օրս ձեւակերպված չէր, թե ի՞նչ գաղափարախոսության կրող է ՀՀԿ-ն, ապա կուսակցության ծրագրում առաջարկված է ավելացնել հետեւյալ հստակեցումը.

«ՀՀԿ-ն ազգային պահպանողական կուսակցություն է։ ՀՀԿ աշխարհայացքն ու գործունեությունը բխում են Ազգի եւ Հայրենիքի հավիտենության գաղափարից»։ Ահա այս հստակեցումից հետո համագումարի հաստատմանը կառաջարկվի նաեւ կուսակցության ծրագրում ամրագրել հայ ազգի գերագույն նպատակը, որը, ըստ ՀՀԿ ծրագրի, հետեւյալն է. «Հայ ազգի գերագույն նպատակը հարատեւումն է Հայրենիքում, հաստատումը իր կենսական ուժի, ստեղծագործ հանճարի եւ ազատ կամքի։ Այդ նպատակի իրագործման գրավականը Ազգային գաղափարախոսությունն է, որի հիմքում ՀՀԿ-ն տեսնում է Գարեգին Նժդեհի ուսմունքը»։ Կուսակցության ծրագրում կատարվելու է եւս մեկ փոփոխություն, որը հստակեցնում է ՀՀԿ-ի եւ Աստծո հարատեւ կապը. «Աստծո կամոք մենք արարվել ենք որպես հայեր, հետեւապես՝ մեր եւ Աստծո հարատեւ կապն ապահովում է Հայ տեսակը հավիտենացնելու ճանապարհով։

Այս ելակետն ունենալով` ՀՀԿ-ն մեր պատմության հեթանոսական եւ քրիստոնեական ժամանակաշրջանները արժեւորում է ազգային առաջնայնության սկզբունքով»։ Որոշակի լրացումներ են կատարվել նաեւ Հայոց պետության եւ հայության նպատակների դրույթներում։ Առաջարկվող ծրագրային փոփոխությունից  հասկանալի է դառնում, որ մեր օրերին ՀՀԿ-ն ոչ թե ռեւոլյուցիայի, այլ էվոլյուցիայի կողմնակիցն է, ինչն էլ կուսակցությունը հարմար է գտել ամրագրել իր ծրագրում. «Պետությունը պետք է աջակցի քաղաքական կառույցների զարգացմանը, ժողովրդավարական համակարգի կայացմանը, մասնակի եւ փուլային բարեփոխումների ճանապարհով՝ հասարակության անընդհատ բարելավմանը»։ Ահա սրանք են այն հիմնական ծրագրային փոփոխությունները, որոնք առաջարկվելու են ՀՀԿ 10-րդ արտահերթ համագումարի հաստատմանը։ Իսկ այն, ինչին սպասում են բոլորը, եւ այն, ինչը կարող է որոշակի տեղաշարժեր եւ հստակեցումներ բերել քաղաքական դաշտում, ենթադրվում է, որ տեղի է ունենալու մինչեւ համագումարը կամ դրանից հետո։

Նաիրա Զոհրաբյան 

Տպել
809 դիտում

Երևանում 2 երիտասարդի վեճն ավարտվել է դանակահարությամբ ու կրակոցներով. կան տուժածներ

ՌԴ-ում ՀՀ դեսպանությունը մանրամասներ է ներկայացրել Կրասնոդարի երկրամասում հայերի մասնակցությամբ վթարի մասին

ԱՄՆ վարչակազմը որոշել է վերականգնել արտաքին օգնության ծրագրերը, այդ թվում` ՀՀ-ի համար օժանդակությունը

Կառավարությունը շուրջ 11 միլիարդ դրամի հարկային արտոնություն է տրամադրել 3 ընկերությունների

Մենք ի զորու ենք նոր որակ հաղորդել. Փաշինյանը շնորհավորել է Զելիսնկիին՝ Ուկրաինայի Անկախության օրվա առթիվ

Շուտով կառավարության օրակարգում կլինի հանրաքվեի ինստիտուտը, որով հնարավոր կլինի 50+1 քվեարկությամբ ազատել համայնքապետին

Ջրամբարի մոտ մետաղ սղոցելելու ժամանակ արձակված կայծից հրդեհ է բռնկվել. այրվել է 8 հա տարածք

Սառնարանների պահեստում օգոստոսի 19-ին բռնկված հրդեհն այսօր մարվել է (տեսանյութ)

Ժամանակավորապես կդադարեցվի Վանաձորի մի շարք թաղամասերի գազամատակարարումը

Էրդողանի հրամանագրով Սահակ եպիսկոպոս Մաշալյանը սքեմ կրելու արտոնություն է ստացել

Բալահովիտ գյուղի ակումբներից մեկի տնօրենը գարեջրի շշով հարվածել է 36-ամյա երեւանցուն

Թույլ տրված թերությունների պատճառով Երևանի և 3 մարզերի դադարեցված ջրամատակարարումը 4 ժամ ուշ կվերականգնվի

Էկոնոմիկայի նախարարությունը դեղձով բեռնված բեռնատարների հարցով կապի մեջ է Վերին Լարսի անցակետի հետ

Քննչական կոմիտեն արձագանքել է Ամուլսարի մասին 3D հոլովակի պատրաստման վերաբերյալ լուրերին

ԿԳՄՍ-ում քննարկվել է «Կումայրի» արգելոցը ՅՈՒՆԵՍԿՕ-ի հուշարձանների ցանկում ընդգրկելու հարցը

Վրաերթ Վանաձորում. Mersedes-ը վրաերթի է ենթարկել միջին տարիքի կնոջը (լուսանկարներ)

Հրդեհ Շաքի գյուղում. այրվել է կուտակած անասնակեր (տեսանյութ)

Երկրորդ բալիկին սպասող Աննա Թովմասյանը եւ Արամեն ջերմ լուսանկար են հրապարակել

Armtimes.com-ը փնտրում է վեբ կայքի և սոցիալական ցանցերի ղեկավարի

Հայկ Սեխլիյանի բուժման համար անհրաժեշտ գումարի գրեթե կեսը հանգանակվել է. պետությունը եւս փորձելու է աջակցել