Նախարարը «Հայելիին» մեջ. ելիր, ում կյանքը անիծել է

Տպագրվել է «Հայկական Ժամանակ» օրաթերթի՝ 2006 թվականի հուլիսի 15-ի համարում

Արդեն երկար ժամանակ է, քաղաքական կուլիսներում խոսակցություններ են պտտվում, որ ՀՀ գործող նախագահ Ռոբերտ Քոչարյանի համար ՀՀ ԱԳ նախարար Վարդան Օսկանյանի թեկնածությունը կարող է ամենահարմարը լինել 2008 թվականի նախագահական ընտրություններում: Այս խոսակցությունները դեռ լայն տարածում չեն ստացել, եւ, համենայնդեպս, մինչեւ երեկ Վարդան Օսկանյանը եւ նրա վերադասը որեւէ հիմք չէին տվել այս թեմայի շուրջ պտտվող խոսակցություններն ավելի առարկայական դարձնելու համար: Նախկինում Վարդան Օսկանյանը Քոչարյանի նախագահական աթոռը ժառանգելու մասին հարցերին պատասխանում էր անորոշ եւ դիվանագիտորեն: Երեկ, սակայն, կարծես թե առաջին նշանները երեւացին, որ Օսկանյանի նախագահական ապագայի մասին խոսակցությունները անհիմն չեն:

Մասնավորապես, «Հայելի» ակումբում հյուրընկալված պարոն Օսկանյանը խոսեց թեմաների մասին, որոնք ուղղակիորեն առնչվում են Հայաստանում սպասվող նախագահական ընտրություններին եւ ՀՀ-ի քաղաքական ապագային: Այս ամենի մասին խոսելու առիթ դարձավ հետեւյալ հարցը` ի՞նչ է պատրաստվում ՀՀ-ն հակադրել Ադրբեջանին, որն այլեւս օգտվելու է Բաքու-Թբիլիս-Ջեյհան նավթամուղից եւ տարածաշրջանային բազմաթիվ այլ կարեւոր նախագծերի բոլոր բարիքներից: Ըստ ՀՀ ԱԳ նախարարի, ՀՀ-ն միայն մի բան ունի Բաքու-Ջեյհանին հակադրելու, եւ դա նրա ունեցած ռեսուրսներն են: Ռեսուրսները Վարդան Օսկանյանը բաժանեց երեք խմբի` ներքին ռեսուրս, սփյուռքի ռեսուրս, ժողովրդավարության եւ միջազգային ռեսուրս: Ներքին ռեսուրս ասելով` ՀՀ ԱԳ նախարարը նկատի ունի քաղաքական եւ տնտեսական բարեփոխումները:

«Մենք մի փուլ ենք ավարտում: Ես այս փուլը բնորոշում եմ նրանով, որ հանրապետության նախագահը իր պաշտոնավարման երկու ժամկետներն ավարտում է, չունի երրորդի հնարավորությունը: Նախագահը պետք է փոխվի, եւ մենք պետք է կարողանանք մեր առջեւ լուրջ խնդիրներ դնել: Նախագահի առաջին ընտրությունից մինչեւ երկրորդ ընտրություն շարունակականության խնդիր կար, կային ծրագրեր, որոնք նախագահը սկսել էր եւ պետք է ավարտին հասցներ: Դրանց մի մասը հասցրել է ավարտին, մյուս մասը ընթացքի մեջ է, այնպես որ, շարունակականության խնդիրը դեռեւս մնում է, բայց մեր առջեւ կա նաեւ մի ավելի մեծ խնդիր` երկիրը դնել որակական նոր հարթակի վրա»,- ասաց Օսկանյանը` հավելելով, որ դրա համար անհրաժեշտ է անցնել քաղաքական եւ տնտեսական` երկրորդ սերնդի բարեփոխումների իրականացմանը:

Հայաստանի ժողովրդավարական ռեսուրսը ճիշտ օգտագործելու համար նույնպես, ըստ Վարդան Օսկանյանի, անհրաժեշտ է սկսել երկրորդ սերնդի բարեփոխումներ, որենք ուղղակիորեն հարվածելու են «էլիտայի տնտեսական եւ քաղաքական շահերին»: Սփյուռքի ռեսուրսի օգտագործումը նույնպես կախված է առաջին երկուսի հետ, քանի որ, Վարդան Օսկանյանի գնահատմամբ, ՀՀ-ն այսօր օգտագործել է սփյուռքի ռեսուրսի մեկ-երկու տոկոսը, որովհետեւ սփյուռքում անվստահություն կա երկրի նկատմամբ: Այսպիսով, ՀՀ ԱԳ նախարարը կոչ է անում մտավորականությանն ու լրագրողներին մինչ սպասվող ընտրությունները, առաջիկա մեկուկես տարվա ընթացքում, ճիշտ ձեւավորել ՀՀ-ի առաջ դրված խնդիրները, ոչ թե կենտրոնանալ քաղաքական ուժերի կամ անհատների վրա, այլ առաջին հերթին` խնդիրների վրա, ապա նաեւ նրա` թե որ ուժը կարող է ստանձնել դրանք իրականացնելու պատասխանատվությունը:

«Մենք պետք է կարողանանք հաջորդ ընտրություններով երկիրը դնել որակական նոր մակարդակի վրա»,- ասաց Վարդան Օսկանյանը եւ հավելեց, որ դրա համար անհրաժեշտ է «ժողովրդի ավելի լայն ներգարավվածությունը, լրագրողների կողմից ավելի առողջ հարցերի ներկայացումը, օբյեկտիվությունը, սկզբունքայնությունը»: Ընդ որում, ըստ պարոն Օսկանյանի, այսօր չպետք է հարցին մոտենալ այնպես, թե ամեն ինչ կախված է նրանից, թե ընտրություններն ինչպես կանցնեն: «Ոչ, ես ասում եմ, որ այդ բոլորը պետք է կանխորոշեն ընտրությունները, չպետք է ասել` ընտրությունները կլինեն, եթե լավ եղավ՝ լավ է, բայց հույս չունենք, որ լավ կլինի, միեւնույնն է, այսպես կմնա»,- ասաց նա: Եւ այնուամենայնիվ, եթե ընտրությունները հերթական անգամ կեղծելու փորձ արվի, պատրա՞ստ է արդյոք ՀՀ ԱԳ նախարարը ՀՀ-ն որակական նոր փուլի վրա դնելու, այդ երկրորդ սերնդի բարեփոխումների, ռեսուրսների ծրագրերի իրականացման համար ընդդիմանալ ընտրությունների կեղծմանը եւ միանալ ժողովրդին:

Մեր այս հարցին Վարդան Օսկանյանն, իհարկե, ոչ մի պատասխան չտվեց, ոչ ասաց` այո, եւ ոչ էլ` ոչ, փոխարենը, սակայն, հայտնեց, որ լավատես է: Իսկ նրա լավատեսությունը հիմնված է այն բանի վրա, որ ժողովուրդն այս անգամ վճռական է տրամադրված: Ավելին, Վարդան Օսկանյանը նույնիսկ կոչ արեց վճռական լինել: «Իրավունքի նկատմամբ հետեւողական լինել, ձեր իրավունքները, մեր իրավունքները պաշտպանելու մեջ սկզբունքային լինել: Ես կարծում եմ, որ այս բոլորի ժամանակը եկել է»,- ահա այսպիսի գրեթե ընտրարշավային նախադասություն արտասանեց ՀՀ ԱԳ նախարարը: Սակայն որպեսզի ամբողջովին ընտրարշավի տպավորություն չստեղծվի, նա նաեւ նշեց, որ այդ ամենն ինքը ասում է միջազգային հարաբերությունների համատեքստում: Այնպես որ, պետք է սպասել, որ ՀՀ ԱԳ նախարարը առաջիկայում հաճախակի կանդրադառնա ՀՀ-ն որակական նոր փուլի վրա դնելու անհրաժեշտությանը` միջազգային հարաբերությունների կոնտեքստում, իհարկե:

Հ.Գ. ՀՀ ԱԳ նախարարը երեկ նաեւ չբացառեց, որ ինքը կարող է հայտնվել որեւէ կուսակցության շարքերում: Նա ասաց, որ ինքը առայժմ այդ մասին չի մտածել, եւ իրեն դեռ ոչ ոք այդ հարցով չի մոտեցել:

Աննա Հակոբյան