Բժիշկները չգիտեն, թե ինչ է մարդկային շփումը, երեխային հիվանդանոցից տարել ենք դեռ չապաքինված. ծնողի ահազանգը

Երեւանի «Նորք» ինֆեկցիոն հիվանդանոցում վերջին օրերին բուժում ստացած մանկահասակ երեխաներից մեկի մայրը սոցիալական ցանցերում ահազանգել է այնտեղ տիրող իրավիճակի մասին, որն, ի վերջո, պատճառ է դարձել փոքրիկին բուժհաստատությունից տանելու՝ դեռ չապաքինված:

Օգտատերը նախ անդրադառնում է բժիշկների անբարյացակամ ու անտարբեր վերաբերմունքին. «Հիվանդանոցի բժիշկները չգիտեն, թե ինչ է մարդկային շփումը: Զոռով են մի բառ ասում, այն էլ՝ մունաթով: Հանուն արդարության պետք է ասեմ, որ միայն մի բուժքույր կար Նառա անունով, ում կարելի էր ինչ-որ հարցով դիմել եւ երիտասարդ բժշկուհի, ով միակն էր հիվանդանոցում եղած 3 օրերի ընթացքում, ով հետաքրքրվեց բոլոր հիվանդների վիճակով (ցավոք անունը չգիտեմ): Բժիշկների կոպտությունը սահմաններ չունի»:

Շարունակելով՝ նա նշում է. «Բժիշկներից ոչ ոք չէր ներկայանում, բայց հետաքրքրվեցի եւ իմացա, որ տղայիս բուժող բժիշկը (ով, իհարկե, բժիշկ կոչվելու իրավունք չունի) Մովսիսյան Լորա Բաբկենովնան է: Հիվանդանոց ենք ընդունվել 22.08-ին, մի ամբողջ օր սպասել եմ, որ ասեն, թե ինչ սնունդ կարելի է տալ երեխային, բայց բժշկից չեմ ստացել ոչ մի ցուցում: 23.08-ին, երբ հարցրի ինչ տամ երեխային, սկսեց բարձր տոնով պնդել, որ ինքն ինձ ասել է ու պարտավոր չէ կրկնել, միայն մի քանի անգամ պահանջելուց հետո, պատասխանեց հարցիս՝ խիստ վիրավորական ձեւով: Բժշկի հետ եկած բաժնի վարիչը սկսեց ինձ վրա գոռալ, որ 1.7 տարեկան երեխային դեռ կերակրում եմ կրծքով, պահանջեց անհապաղ դադարեցնել կրծքով կերակրումը, դեռ ավելին, ասաց, որ առնվազն 6 ամիս ուշացրել եմ (հիշեցնեմ՝ ԱՀԿ-ն խրախուսում է երեխայի կրծքով կերակրումը մինչեւ 2 տարեկանը): Հետո հավելեց, որ երեխան ԿԿ է ուտում, դրա համար էլ հիվանդ է: Նման մոտեցումը ստիպում է մտածել, որ բժշկուհին շատ վաղուց չի անցել ոչ մի վերապատրաստում, ինչը, կարծում եմ, բժշկության ոլորտում անթույլատրելի է: Արդյունքում շրջայցի եկած 2 բժիշկները միայն կոպտեցին ու վիրավորեցին ինձ, չհետաքրքրվեցին պալատում պառկած երեխաների ինքնազգացողությամբ, գիշերը տիրած վիճակով ու գնացին»:

Աղիքային ինֆեկցիայի պատճառով հոսպիտալացված փոքրիկի մայրն ընդգծում է, որ միեւնույն հիվանդասենյակում կողք կողքի պառկած են երեխաներ, որոնց վերջնական ախտորոշումը դեռ հատնի չէ, եւ կա վարակը փոխանցելու վտանգ: Բոլորն, ըստ նրա, օգտվում են նույն սանհանգույցից ու սառնարանից, շատ իրեր ընդհանուր են: «Էլ չեմ խոսում տարրական պայմանների եւ մաքրության բացակայությունից»,- նշում է նա՝ անդրադառնալով նաեւ հիվանդանոցում չվերահսկվող այցելություններին ու երեխաների հանգիստը խանգավելուն:

Օգտատիրոջ առաջ քաշած խնդիրները, որոնք ժամանակ առ ժամանակ բարձրաձայնվում են այս կամ այն բժշկական կենտրոնի վերաբերյալ, նոր չեն ու արդեն հասցրել են խոր արմատներ ձգել: «Նորք» ինֆեկցիոն հիվանդանոցը նորանշանակ տնօրեն ունի արդեն գրեթե մեկ տարի: Մհեր Դավիդյանցից փորձեցինք պարզել, թե այդ ընթացքում ինչ է արվել նկարագրված իրավիճակը փոխելու ուղղությամբ:

Ասաց, որ սոցցանցում հրապարակված գրառմանը ծանոթանալուց հետո հանդիպել է երեխայի ծնողների հետ: Չբացառեց, որ բժիշկն ու բաժանմունքի ղեկավարը կարող են կարգապահական տույժ՝ նկատողություն ստանալ: «Ես ցանկություն հայտնեցի հանդիպել իրենց հետ, որպեսզի նախ լսեմ՝ իրականում ինչ է եղել, եւ ամենակարեւորը, ցանկացած խնդիր, կապված հիվանդանոցի հետ, ինձ մտահոգում է: Խնդիրը հիմնականում առնչվում էր բժշկուհու վերաբերմունքի հետ: Որոշակի դժգոհություններ կային շենքային, սենյակային պայմանների հետ կապված, որոնց մասին մենք խոսել ենք եւ բազմիցս նշվել է, որ հիվանդանոցի բաժանմունքները գտնվում են անմխիթար վիճակում, հետեւաբար կտրուկ դա վերականգնել հնարավոր չէ: Մենք անում ենք որոշակի մասերը քայլ-քայլ: Հիմնական շինարարությունը նախատեսվում է անել կառավարության ծրագրի միջոցով: Դա կլինի երեւի թե եկող տարի՝ արդեն վերակառուցման ծրագրով»,- ասաց «Նորք» ինֆեկցիոն հիվանդանոցի տնօրենը:  

Բուժաշխատողների վերաբերմունքին առնչվող դժգոհությունը եւս նա հիմնավոր է համարում:

«Այո, եղել են որոշակի թերություններ՝ բժշկի մոտեցման, խոսքի հետ կապված: Բոլորը լսել եմ, դրանք քննարկվելու են եւ ստանան իրենց լուծումները: Լուծումներից մեկը սերնդափոխությունն է, որը մենք նախատեսում ենք անել եւ արվում է: Նաեւ որոշակի ընթացակարգերի փոփոխություն է լինելու: Այստեղ ոչ միայն մարդկային գործոնի, այլ ընթացակարգերի եւ հին մոտեցումների փոփոխություն է պետք, որովհետեւ խնդիրը ոչ միայն բացառապես անձի հետ կարող է կապված լինել, այլ պարզապես հին մոդելի եւ հին մոտեցման: Հետեւաբար գնում ենք նաեւ այդ ուղղությամբ, որպեսզի փոխվի հին մոտեցումը»,- նկատեց Դավիդյանցը:   

Ընդունեց նաեւ, որ թեեւ այցելությունները  սահմանափակում են, որոշ դեպքերում ռեժիմները խախտվում են բացթողումների ու անուշադրության պատճառով: «Բնականաբար ավելի խստացվելու է»,- ասաց:

Իր պաշտոնավարման ժամանակահատվածում, ըստ նրա, բուժհաստատության եկամուտներն էապես աճել են: «Մեկ տարվա ընթացքում մենք ունենք ֆինանսական գործունեության զգալի աճ. բոլոր ծառայություններում վճարումները բերվել են օրինական դաշտ: Օրինակ լաբորատոր ծառայությունում ունենք ֆինանսական մուտքերի վեցապատիկ աճ, մյուս ծառայություններում՝ կրկնակի, եռակի, քառակի: Ձեռք ենք բերել մի շարք նվիրատվություններ: Ամբողջովին ասֆալտապատվել է հիվանդանոցի տարածքը, ինչը նախկինում շատ անմխիթար վիճակում էր եւ, բնականաբար, շատ անհարմարություններ էր պատճառում թե՛ պացիենտներին, թե՛ հարազատներին, թե՛ բուժանձնակազմին: Վերանորոգվել, կահավորվել են որոշ հիվանդասենյակներ ինտենսիվ թերապիայի բաժանմունքում, նոր մահճակալներ են ձեռք բերվել»,- ներկայացրեց բուժհաստատության ղեկավարը:

Ըստ նրա, բարձրացվել են նաեւ աշխատավարձերը: Բացի հաստիքների համար նախատեսված աշխատավարձի աճից, տրամադրվել են պարգեւատրումներ: «Բացի աշխատավարձի բարձրացումից, բոնուսային համակարգով պարգեւատրումներ են եղել գրեթե ամեն ամիս եւ գրեթե բոլոր բաժանմունքներում»,- նշեց տնօրենը՝ չհստակեցնելով այստեղ վճարվող աշխատավարձի թեկուզ միջին չափը:

Տպել
8287 դիտում

Մահացել է հուշարձանագետ Սամվել Կարապետյանը

ՀՀ մարմնամարզության այս տարվա առաջնությունը տարբերվում է նախորդներից. ՀՀ հավաքականի գլխավոր մարզիչ

Բակո Սահակյանը խորհրդակցություն է հրավիրել Արցախում կորոնավիրուսի տարածման կանխարգելմանն ուղղված աշխատանքների հարցով

Մայրն ահազանգում է, որ ինքն ու սեռական բռնության ենթարկված իր երեխան վտանգի մեջ են. կոտրել են նրա մեքենան

Տեքստիլի արտադրության հայկական առաջատարները մասնակցում են «CPM 2020 – Collection Premiere Moscow» ցուցահանդեսին

Աշտարակում բացվել է «Քամանչայի թանգարան եւ Գաստրոբակ» յուրատեսակ վայրը

Ալեքսան Պետրոսյանի ազատ արձակման որոշման դեմ Դատախազության բողոքը մերժվել է

Ահազանգ է ստացվել, որ Սյունիքի մարզի երկու դպրոցներում փակցված է վարչապետ Նիկոլ Փաշինյանի նկարը. Մխիթար Հայրապետյան

Հայտնի է՝ ինչու է լեգենդար ֆուտբոլիստ Դել Պիեռոն Երեւան այցելել. պետք է ՌԴ վիզա ստանար

Պողոս Պողոսյանի եղբորորդին քիչ հավանական է համարում, որ նրան կպատժեին առանց Ռոբերտ Քոչարյանի հրամանի

Ծխախոտ կամ այլ իրեր մեքենայից գցելու դեպքերը տեսանկարահանող սարքերի միջոցով արձանագրվում են. ՃՈ պետ

Բռնության կոչերը քրեականացնելու նախագծի ընդունման դեպքում պիտի արգելվի վաճառել Հիտլերի «Իմ կյանքը» գիրքը․ Վարդանյան

Վանաձորի բնակիչը գողացել էր թոշակառու հոր խնայողությունը

Տեսախցիկներով կարող ենք տեսնել, թե ով է մեքենայի ղեկին, ուստի բալ վաճառողները կբացահայտվեն. ՃՈ պետ

Կապան քաղաքի Սպանդարյան փողոցի թունելի հարակից ժայռերից քարաթափում է գրանցվել

Կունենանք անկառավարելի վարակ եւ մեծ թվով պացիենտներ. ՁԻԱՀ-ի կենտրոնի աշխատակիցները բողոքի ցույց են անում

Մասիս Մայիլյանը հայտարարել է քարոզարշավի մեկնարկի մասին

ՀՀ ԱԳՆ-ն հորդորում է չայցելել Իրան, Չինաստան, Հարավային Կորեա, Իտալիա եւ Ճապոնիա

Վիճաբանության ժամանակ 39-ամյա տղամարդը դանակահարել էր եղբորը

Սահմանադրության փոփոխությունների հանրաքվեի շրջանակներում ՀՀ դատախազությունում թեժ գիծ է գործարկվել