Վայոց ձորի մարզպետի օգնականի հետ վեճից հետո ՊՆ փոխգնդապետը հայտնվել է վերակենդանացման բաժանմունքում

Սեպտեմբերի 18-ին Վայոց ձորի Եղեգնաձոր քաղաքում աղմկահարույց միջադեպ է տեղի ունեցել, որին մասնակից է եղել  մարզպետի օգնական Հարություն Գրիգորյանը:

Դեպքը տեղի է ունեցել ժամը 00:00-ի սահմաններում. միջադեպից տուժածը ՀՀ ՊՆ փոխգնդապետ Արա Մխիթարյանն է, որն այնպես է ծեծի ենթարկվել, որ տեղափոխվել է ՀՀ ՊՆ Կենտրոնական կլինիկական հոսպիտալի վերակենդանացման բաժանմունք: ՀԺ-ին հոսպիտալից միայն տեղեկացրին, որ տուժածի վիճակը ծանր է, իսկ թե ինչ վնասվածքներ է ստացել, չասացին:

ՀՀ ոստիկանության ԶԼՄ-ների հետ կապի լրատվության եւ վերլուծության բաժնի պետ Զարզանդ Գաբրիելյանը «Հայկական ժամանակ»-ի հետ զրույցում ասաց, որ սեպտեմբերի 18-ին՝ ժամը 00:08-ին, ոստիկանությունը հաղորդում է ստացել, որ Եղեգնաձոր քաղաքի «Բոնուս» առեւտրի կենտրոնի հարակից շենքերի մոտից վիճաբանության ձայներ են լսվում: Այնուհետեւ 00:20-ին Եղեգնաձոր ԲԿ-ից հաղորդում է ստացվել, որ անգիտակից վիճակում իրենց մոտ է տեղափոխվել Արա Մխիթարյանը: «Մեկնած խումբը պարզել է, որ նույն օրը՝ 00:15-ի սահմաններում, Եղեգնաձոր քաղաքի Արսենյան փողոցի 5 հասցեի բակից գանգուղեղային տրավմա եւ կոմատոզ վիճակով ԲԿ է տեղափոխվել Մխիթարյանը: Նույն օրը՝ ժամը 11:00-ի սահմաններում, Եղեգնաձորի բաժին է ինքնակամ ներկայացել Եղեգնաձորի բնակիչ, 1992 թվականին ծնված մի տղամարդ եւ տվել բացատրություն: Հարուցվել է քրեական գործ 112-րդ հոդվածի 1-ին մասի հատկանիշներով (դիտավորությամբ առողջությանը ծանր վնաս պատճառելը) եւ գործը փոխանցվել է մարզի քննչական վարչություն»,- ասաց Գաբրիելյանը:

Ինքնակամ ներկայացած տղամարդը՝ Վայոց ձորի մարզպետ Տրդատ Սարգսյանի օգնականը, հենց Հարություն Գրիգորյանն է, որը նաեւ որոշ բարեկամական կապեր ունի Վայոց ձորի մարզպետի հետ: ՀԺ-ն փորձեց մարզպետից ճշտել, թե արդյո՞ք տեղյակ է միջադեպից եւ որքանո՞վ է ինքն առնչվում դրա հետ, քանի որ տեղեկություն կար նաեւ, որ մարզպետն էլ է դեպքի վայրում եղել: Ի պատասխան՝ Սարգսյանն ասաց. «Հարություն Գրիգորյանն իմ հորեղբոր թոռան ամուսինն է: Միջադեպից տեղյակ եմ: Ես այնտեղ չեմ եղել: Հիմա նախաքննություն է ընթանում, բան չեմ կարող ասել: Միայն գիտեմ, որ բակում եղել են հարբած զինվորականներ, շատ խմած վիճակում, զրույց են ունեցել միմյանց հետ: Տուն վերադառնալիս իմ օգնականը միջադեպին մասնակից է եղել»:

Սարգսյանի խոսքով՝ իր օգնականը զինվորականներին հորդորել է բակում չհայհոյել, չաղմկել. «Այնուհետեւ հասել են իր վրա: Մնացածը նախաքննությունը ցույց կտա»:

Հարցին՝ Գրիգորյանի ընդունակությունները հաշվի առնելո՞վ է աշխատանքի ընդունել, թե՞ որոշակի բարեկամական կապերից ելնելով, Սարգսյանը պատասխանեց. «Ինքը աշխատում է մարզպետի օգնական իր որակների համար՝ թե՛ մասնագիտական, եւ թե՛ մարզը լավ ճանաչելու»:

Ուշագրավ է, որ Վայոց ձորի մարզպետի օգնականի մասին մոտ 2 շաբաթ առաջ ֆեյսբուքյան ուղիղ եթերի միջոցով խոսել էր նաեւ մարզպետի արդեն նախկին տեղակալ Ռազմիկ Տոնոյանը: Տոնոյանը մասնավորապես նշել էր. «Մարզպետի օգնականի մականունը «Քերոփ» է: Ես «Քերոփ»-ի հետ պետք է նստեմ ինչի՞ց խոսեմ: Դրա համար էլ ես պետք չէի այդ մարզպետարանին»:

Միջադեպի վերաբերյալ մեր մի քանի հարցերին է պատասխանել նաեւ Հարություն Գրիգորյանը:

-Պարո՛ն Գրիգորյան, ի՞նչ միջադեպ է տեղի ունեցել, ինչո՞ւ է այն վերածվել ծեծկռտուքի։

-Երկար հարց է, մի կես ժամանոց, կարճ հարցեր տվեք՝ պատասխանեմ։

-Տրդատ Սարգսյանը կռվի միջադեպի ժամանակ Ձեզ հե՞տ է եղել։

-Ո՛չ, այդ ինչ թյուրիմացություն է։ Դա չգիտեմ՝ ինչ տեսակի մարդ է եղել այդպիսի բան ասողը։

-Տեղյա՞կ եք, թե ինչ վիճակում է գտնվում Արա Մխիթարյանը։

-Ես գիտեմ, որ ծանր կայուն։

-Դուք ոստիկանությունում ընդունե՞լ եք ձեր մեղքը, նշե՞լ եք, որ Դուք եք ծանր վնասվածք հասցրել։

-Ո՛չ։ Ես մեր շքամուտքից դուրս եմ եկել, ինքը անշարժ այնտեղ պառկած է եղել։

-Դուք վեճի հետ կապ չունե՞ք։

-Ես վեճի ժամանակ այնտեղ եմ եղել, քաշքշոց է եղել, բայց հետո նա դուրս է եկել քայլելով, իր ընկերներն իրեն տարել են, քանի որ նա հարբած վիճակում ինչ-որ կռիվ էր ուզում ստեղծել։ Երեւի սայթաքել, ընկել է, չգիտեմ՝ ինչ է եղել, ով է քաշել, գցել։

-Այսինքն՝ Ձեզ հետ վիճաբանության հետեւանքով չի՞ այդ վնասվածքը առաջացել։

-Ո՛չ, իմ հետ վիճաբանության ժամանակ մենք կարող է իրար քաշքշել ենք, իրար բան ենք ասել, բայց իմ ու իր ընդհարման ժամանակ ոչ մեկիս վրա ոչ մի բան չի եղել։

-Ձեր ու մարզպետի բարեկամական կապի շնորհիվ հնարավո՞ր է գործը կոծկվի։

- Գործի կոծկվելը ո՞րն է, կպարզվի, քննություն են անում։ Կպարզեն՝ ով է մեղավոր ու կպատժվի մեղավորը։

Նյութը տպագրվել է «Հայկական ժամանակ» օրաթերթի այսօրվա համարում

Տպել
5241 դիտում

Զգուշացնում ենք՝ ոչ մի գնդակ չպետք է արձակվի մեր սահմանների ուղղությամբ. Իրանի սահմանապահ ուժերի հրամանատարի տեղակալ

ՄԱԿ-ի գլխավոր քարտուղարը Փաշինյանի հետ զրույցում խոր մտահոգություն է հայտնել Արցախում ստեղծված իրավիճակի մասին

Թուրքիան սիրիացի մարտիկներ է ուղարկում՝ օգնելու իր հավատակից Ադրբեջանին. պատմել են զինյալները․ Reuters

Պետք է պատրաստ լինենք շատ ավելի ծանր ու երկար մարտական գործողությունների. ԱՀ նախագահ

Հայկական կողմի զոհերի թիվն ավելացել է եւս 26–ով. Արցախի ՊՆ-ն նոր ցանկ է հրապարակել

Առաջնագիծ մեկնեց օգոստոսին Լիբանանից հայրենադարձված պահեստազորի լեյտենանտ Արեգ Ասրապեանը. Զարեհ Սինանյան

Սահմանափակված է ՀՀ տարածքից ելքը պահեստազորում հաշվառված անձանց համար

Վիրավորվել է մոտ 30 քաղաքացիական բնակիչ. Արցախի ՄԻՊ-ի խոսքով՝ մարդկանց ոգին բարձր է, բայց զգուշավոր են

Վրացի իրավապահները ջավախահայերին թույլ չեն տալիս հումանիտար օգնությունը հասցնել սահման եւ փոխանցել հայկական կողմին

Փաշինյանը Մերկելին կոչ է արել գործադրել բոլոր ջանքերը՝ Թուրքիայի ապակառուցողական կեցվածքը սանձելու համար

Հայ ազգը եղել է, կա ու կլինի. միասին մենք ուժեղ ենք. Արթուր Աբրահամ

Ադրբեջանի ռազմաօդային և հրթիռային հարձակումներն ուղեկցվում են էթնիկ հայերի նկատմամբ մեծ ծավալի ատելության խոսքով. ՄԻՊ

Տեսանյութում բաց աղբյուրներով ապացուցվում է, որ Ադրբեջանն է հարձակվել հայկական կողմի վրա. Հովհաննես Մովսիսյան

Խնդիրը միայն Արցախը չէ, և սա պետք է բոլորս իմանանք. Արայիկ Հարությունյան

ՄԱԿ-ի Անվտանգության խորհուրդը վաղը կքննարկի Արցախում ստեղծված իրավիճակը

ՀՀ վարչապետ Նիկոլ Փաշինյանի գլխավորությամբ կառավարությունում տեղի է ունեցել Անվտանգության խորհրդի արտահերթ նիստ

Հայ դպրոցականները Մաթեմատիկայի միջազգային 61-րդ օլիմպիադայում նվաճել են 5 մեդալ

Գործ ունենք մի իշխանության հետ, որը ստում է ամբողջ աշխարհին, և աշխարհը գիտի այդ մասին. Արցախի նախագահ

Էս անգամ ուրիշ է. Գյումրու զինկոմիսարիատից շարունակում են մեկնել պահեստազորայինները

Արցախում հակառակորդի կրակից վիրավորված հղի կինն արու զավակ է ծնել, անունը՝ Մոնթե