«Նարեկ Սարգսյանն իմ նկատմամբ անմարդկային քայլ է արել». վկան ցուցմունք տվեց դատարանում

Երեւանի ընդհանուր իրավասութան դատարանի Շենգավիթի նստավայրում դատավոր Աննա Դանիբեկյանի նախագահությամբ շարունակվեց Սերժ Սարգսյանի եղբոր՝ Ալեքսանդր Սարգսյանի որդու՝ Հայկ Սարգսյանի գործով դատական նիստը:

Ըստ մեղադրական եզրակացության՝ Հայկ Սարգսյանին մեղադրանք է առաջադրվել այն բանի համար, որ նա 2007 թվականի ապրիլի 1-ին` ժամը 16:00-ի սահմաններում, իր բնակության վայրի նկուղային հարկում գտնվող սենյակում քննությամբ չպարզված հանգամանքներում ապօրինի ձեռք բերած և պահվող, հրազեն հանդիսացող տեսակի մոդելի ատրճանակով Դավիթ Սիմոնյանին ապօրինաբար կյանքից զրկելու դիտավորությամբ կրակել է վերջինիս որովայնին, սակայն հանցագործությունն ավարտին չի հասցրել իր կամքից անկախ հանգամանքներում:

Նշենք, որ այս  գործը դատարանում քննվում է 2018 թվականի օգոստոսի 28-ից: Նախաքննության ընթացքում Հայկ Սարգսյանի նկատմամբ որպե խափանման միջոց է ընտրվել կալանավորումը, որը հետագայում փոխարինվել է գրավով:  

Այսօր դատարանում հարցաքննվեց գործով առանցքային վկա Արթուր Ղեւոնդյանը: Վերջինս 17 տարի առաջ հայտարարել էր, թե ինքն է անզգույշ կրակել Դավիթ Սիմոնյանի վրա: Կողմերի հաշտության եւ բողոքի բացակայության հիմքով էլ Ղեւոնդյանի նկատմամբ քրեական հետապնդումը դադարեցվել էր եւ գործը կարճվել:

Դատարանում վկան պատմեց, որ բնակվում է արտասահմանում, այժմ գտնվում է Երեւանում, վերադարձել է իրավապահ մարմինների հրավերով, եւ ինչպես գործով ամբաստանյալ Հայկ Սարգսյանի, այնպես էլ տուժող Դավիթ Սիմոնյանի հետ ունի հարեւանական հարաբերություններ: Դատավորը վկային նախազգուշացրեց, որ համաձայն ՀՀ քրեական դատավարության՝ սուտ ցուցմունք տալու համար նախատեսված է քրեական պատասխանատվություն, ապա առաջարկեց հայտնել այն, ինչ ինքը գիտի:

Վկա Արթուր Ղեւոնդյանը դատարանին հայտնեց, որ ինքն այս գործի հետ ընդհանրապես կապ չունի. «Զուտ Նարեկ Սարգսյանն իմ նկատմամբ անմարդկային քայլ է արել, ես դեպքի հետ կապ չունեմ, ոչ տեսել եմ, թե ով է կրակել, ոչ էլ դեպքի վայրում եմ եղել, լսելով եմ տեղեկացել, ինչպես եւ դուք»: Արթուր Ղեւոնդյանը պատմեց՝ 2007 թվականի ապրիլի 1-ին՝ 19:30-ի սահմաններում, Նարեկ Սարգսյանն իրեն զանգել է, հետաքրքրվել, թե ինքը որտեղ է եւ կանչել հանդիպման. «Սաշիկ ձյան ասաց՝ Հայկոն հանկարծակի Դավիթի ոտքին է կրակել, վերցրու վրադ, ոչ մի բանի մասին մի մտածիր, ամեն ինչ լավ կլինի: Ես սկզբից ասացի, որ թեկուզ եւ հարեւաններ ենք, բայց ոչ, հետո Նարեկ Սարգսյանն ինձ կանչեց նկուղ, հայհոյանքներ հնչեցրեց իմ հասցեին, ասաց՝ «կեթաս, կնստես», իսկ Սաշիկ ձյան էլ եկավ, դիտողություն արեց Նարեկին, ինձ էլ ուղղակի խփեց, ոչ թե որ վնասի, այլ հանգստացնի: Հետո՝ մոտ կես ժամից, ոստիկաններ եկան, ինձ հարցրին իմ տեղը, կավիճով գծեցին, դալանի տակ պարկուճներ գցեցին, նկարեցին ու գնացին: Ոստիկանությունում էլ քննիչն ինչ թելադրել է, գրել եմ, ու ստորագրել, հետո ոչ էլ կարդացել եմ»:

Մեղադրող դատախազ Աբգար Առաքելյանը վկայից հետաքրքվեց՝ եթե սկզբնապես չէր ուզում համաձայնել կատարվածն իր վրա վերցնել, ի՞նչը ստիպեց փոխել որոշումը, եւ արդյոք նա դա սպառնալիքի տակ է արել:  Ի պատասխան՝ վկան նշեց, որ իր կամքին հակառակ է արել, ստիպողաբար: «Հայկը դիտավորյալ երբեք չէր անի այդ բանը, իրենք ընկերներ են եղել, Դավիթ Սիմոնյանի հետ (տուժող-խմբ.) մոտիկություն է արել, եկեք ճիշտը խոսենք, թող բոլորն իմանան, Հայկ Սարգսյանը երբեք կյանքում ոչ մեկին դիտավորյալ չի վնասի»: Մեղադրողը նաեւ հետաքրքրվեց՝ հաճա՞խ է զենք տեսել Հայկ Սարգսյանի ձեռքին, ինչին վկան պատասխանեց՝ ասելով. «Այդ ժամանակ գուցե 1-2 անգամ, իսկ մինչ այդ միշտ մոտն էր պահում, դե, իմ հոպարն էլ նախագահ լիներ, ես էլ կպահեի»: Վկան նշեց նաեւ, որ հստակ չգիտի, բայց լսել է, որ այդ օրը Հայկ Սարգսյանը թմրամիջոցի ազդեցության տակ է եղել:

Վկային հարցեր ուղեց նաեւ գործով ամբաստանյալ Հայկ Սարգսյանի պաշտպան Երեմ Սարգսյանը: Նա հետաքրքրվեց, թե երբեւէ որեւէ մեկից լսե՞լ է, որ Հայկ Սարգսյանը ցանկանում է սպանել Դավիթ Սիմոնյանին: Ի պատասխան պաշտպանի հարցերին՝ վկան դարձյալ նշեց, որ Հայկը դա դիտավորյալ չէր անի: Երեմ Սարգսյանը ընդգծեց, որ Հայկ Սարգսյանի հետ առերեսման ժամանակ վկան ասել է, թե ենթադրյալ հանցագործության համար 8-15 տարվա պատիժ է հասնում, ապա հետաքրքրվեց, թե ո՞վ է իրեն այդ մասին տեղեկացրել, ինչին վկան դժվարացավ պատասխանել. «Չեմ կարող ասել, գուցե ենթադրել եմ, գուցե ձեզնից եմ լսել»: Պաշտպանը նաեւ հարցրեց՝ երբ իրավապահներն իրեն հրավիրում էին, ինքը ցանկանո՞ւմ էր գալ թե՞ ոչ, վկան էլ նշեց. «ճիշտն ասած՝ ոչ, որովհետեւ ես գիտեի, թե ամեն ինչը ոնց է եղել, պարզից էլ պարզ էր:  Եթե ես կրակած լինեի, առանց վախենալու, պարզ կասեի»:

Ցուցմունքից հետո մեղադրող դատախազ Աբգար Առաքելյանը միջնորդեց հրապարակել վկայի նախաքննական ցուցմունքը՝ հակասություններ տեսնելով այսօր դատարանում տված ցուցմունքի հետ: Ըստ դատախազի՝ նախաքննական ցուցմունքում վկան  հստակ ասել է, որ դեպքի վայրում սպասել է մինչ ոստիկանության աշխատակիցների գալը, եւ ոստիկաններն իրենք են իրենց հետ զենք բերել. «Դատարանում դրա վերաբերյալ հարցադրումներ հնչեցին, սակայն նա ոչինչ չնշեց: Դրանից բացի նախաքննության ժամանակ վկան հստակ ցուցմունք է տվել Ալեքսանդր Սարգսյանի կողմից իրեն հարվածելու, ֆիզիկական ցավ պատճառելու վերաբերյալ՝ կապված դեպքը ընդունելու հետ, իսկ այսօր նման բան չասաց: Վկան այսօր չնշեց նաեւ, որ դեպքից հետո հանդիպել է Հայկ եւ Նարեկ Սարգսյաններին, ինչը որ ասել էր իր նախաքննական ցուցմունքում»:

Պաշտպանական կողմը միացավ մեղադրողի այս միջնորդությանը: Մասնավորապես, պաշտպան Երեմ Սարգսյանը նշեց, որ իրենց գնահատմամբ եւս՝ կան էական հակասություններ, թեեւ, օրինակ, Ալեքսանդր Սարգսյանի կողմից հարվածել-չհարվածելու հանգամանքն ինքն այլ կերպ է հակասություն դիտարկում: Լսելով կողմերի դիրքորոշումները՝ դատավոր Աննա Դանիբեկյանը որոշեց բավարարել միջնորդությունը եւ հրապարակել վկայի նախաքննական ցուցմունքը: Նախաքննական ցուցմունքի հրապարակումով ի հայտ եկան մի շարք այլ հակասություններ, սակայն վկան կողմերի հարցերին ըստ էության պարզաբանում չտվեց` պատճառաբանելով, որ շատ ժամանակ է անցել,եւև ինքը շատ բաներ չի հիշում։ Հաջորդ դատական նիստը նշանակվեց դեկտեմբերի 5-ին` ժամը 14:30-ին։

Միլենա Խաչիկյան