Ուրբաթ երեկոներ, հոգատարություն, տաք թեյ, երբեմն էլ՝ գինարբուք. կայացավ «Ժամացույցի զարկերը» ներկայացման պրեմիերան

Երեւանի տիկնիկային թատրոնը հստակ վարքագիծ ունի, այն է՝ ներկայացումն սկսելուց հետո՝ ուղիղ ժամը 19:00-ին, դռները փակվում են: Սայաթ-Նովայի փողոցով շնչակտուր վազում եմ՝ մտքումս կրկնելով՝ հիմա կփակվի՝ արդեն 7-ն է լինում, կրկնում եմ ու վազում:

Բարձրակրունկներով եմ, (ինքս ինձ մտքում կշտանբելով՝ թե որ օրվա բարձրակրունկ հագնողն էիր): Մի ձեռքով գլխարկս եմ պահել, մյուսով՝ ծանր նոթբուկն ու վազում եմ: Վազում եմ մայթով, լուսացույցի՝ կարմիր լույսի տակով, աչքս՝ ժամացույցի սլաքներին: Վերջապես հասնում եմ Հ. Թումանյանի անվան Տիկնիկային թատրոնի շենք... տեսնելով հսկայական ապակե պատերից այն կողմ հանդարտ սպասող ու ժպտացող դեմքերին՝ սկսում եմ կարգավորել նախ շնչառությունս, ապա մտքերս: Երբ երեւում են թատրոնի գեղարվեստական ղեկավար Ռուբեն Բաբայանն ու ներկայացման բեմադրող ռեժիսոր Սամսոն Մովսեսյանը, շունչս վերջնականապես տեղն է գալիս, բայց ժամը 7-ն անց է:

Պատահաբար աչքս ընկնում է գլխավոր մուտքի մոտ՝ հենց դռան կողքի նստարանին նստած երկու տիկնանց, հարցնում եմ՝ դեռ չի՞ սկսվել, տիկինները ժպիտով պատասխանում են. «Մենք էլ 7-ին գիտեինք, պարզվեց՝ 19:30 է սկսվում: Տոմսի վրա ժամը գրված էր, բայց ուշադիր չէինք եղել»: Ապա նրանցից մեկը հորդորում է հեռու չգնալ, որ էլի ստիպված չլինեմ վազել: Ժպտում եմ: Պետք է խոստովանեմ, որ տիկնոջ գեղեցիկ արեւմտահայերենն ինձ ստիպեց հետ դառնալ ու մի քանի հարց էլ ուղղել նրան:

Մոտենում եմ, ներկայանում, ասում, որ լրագրող եմ: «Սփյուռքահայե՞ր եք»,- իմանալով հարցիս պատասխանը՝ միեւնույն է, տալիս եմ այն: Մեր զրույցի արդյունքում պարզվում է՝ տիկնայք սոցիալական ոլորտի աշխատողներ են, բարեգործներ: Տիկին Գոհարը հեղափոխությունից հետո Անգլիայից տեղափոխվել է Հայաստան, օտար լեզվի դասընթացներ է անցկացնում, իսկ տիկին Սօսին (անվան բացատրությունն ու գրությունը պարտադիր է համարում ինձ բացատրել) արդեն երկար տարիներ է՝ ԱՄՆ-ից տեղափոխվել է այստեղ, զբաղվում է տարբեր սոցիալական ծրագրերի համակարգմամբ:

Այս տիկնանց Հայաստան է բերել տեղի մշակութային կյանքը: «Թատրոնները շատ ենք սիրում, մեր մշակութային կյանքը վեր է ամենից: Նախկին Հայաստանն ու այսօրվանը նույնը չեն, տարբերություն կա: Շատ մեծ առաջընթաց ունի թատրոնը»,- ասացին նրանք: Եվ պատմեցին, որ ներկայացումները, մշակութային միջոցառումներն իրենց առօրյայի մի մասն են կազմում, առանց որի չեն պատկերացնում կյանքը:

Իսկ հիմա ներկայացման մասին...

Օսվալդ Զագրադնիկի պիեսի հիման վրա բեմադրված «Ժամացույցի զարկերը» ներկայացումը Սամսոն Մովսեսյանը ներկայացրեց յուրովի: Հանդիսատեսին անչափ դուր էր եկել դերասանական խաղն ու նուրբ անցումները: Եվ ինչպես մեր զրուցակիցներից մեկը նկատեց, տխրությունը համեմված էր նուրբ հումորով, խոսքի ու ժեստերի դիպուկ շեշտադրումներով: Արագ ու դինամիկ զարգացող իրադարձություններ, հումոր ու ժպիտներ:

«Ժամացույցի զարկերը» ներկայացման դերասանական կազմում էին Արտաշես Շահվերդյանը, Հայկուհի Խուդավերդյանը, Գեորգի Հովակիմյանը, Վանիկ Մկրտչյանը, Կարեն Մարտիրոսյանը, Մարիետա Դովլաթբեկյանն ու Հրայր Եղիազարյանը: 

Ներկայացման մեջ տխուր պատմություններն այնպիսի թեթեւությամբ են ներկայացված, որ նախ ծիծաղ են առաջացնում, ապա լրջանում ու սկսում ես մտածել, թե ով, ինչ իրավիճակում է, եւ թե ինչ կարող է թաքնված լինել մի քանի րոպե տեւող այդ պարզունակ բառախաղերի տակ:

Ներկայացման մեջ առանձնահատուկ է նաեւ երիտասարդ զույգի խաղը. նրանց փոխհարաբերությունները, հարազատների՝ զույգի միասին լինելու համար երբեմն չափն անցնող պահանջները: Գաղափարական առումով հանդիսատեսին անչափ դուր էր եկել հատկապես այն մոտեցումը, որն ունեին ներկայացման տարեց հերոսներն իրենց անկատար մնացած երազանքների եւ տարիքի նկատմամբ:

Ամբողջ պատմությունը պտտվում է ժամացույցների եւ ժամանակի շուրջ: Ներկայացված է, թե ինչպես են ծերանոցում ապրող երկու տղամարդ ու մի կին ընկերացել մեկ այլ՝ իրենց հասակակից տղամարդու հետ, որն ի տարբերություն իրենց՝ ապրում է սեփական տանը:

Հետաքրքրիր է այս չորսի երկխոսություններն ու ամեն շաբաթ կրկնվող ուրբաթ երեկոները, տաք թեյերը, երբեմն էլ՝ գինարբուքները, նրանց հոգատարությունը միմյանց նկատմամբ, նաեւ այն, թե ինչպես են ձգտում մեկը մյուսին երջանիկ պահեր պարգեւել: Այս քառյակը, քաջ իմանալով, որ իրենց ընկերներից մեկը, օրինակ, անմեղ սուտ է հորինել՝ պատմելով ենթադրյալ որդու զանգերի մասին, ձեւացնում են, թե հավատում են նրան, անգամ կեղծ հեռախոսազանգ են կազմակերպում, որպեսզի տիկինն իրեն վատ չզգա՝ ամեն անգամ ստելով: 

Եվ քանի դեռ ժամացույցի սլաքները պտտվում են, նրանք շարունակում են ապրել ու միմյանց ուրախացնել....

«Ժամացույցի զարկերը» ներկայացվելու է նաեւ Գ. Սունդուկյանի անվան ազգային ակադեմիական եւ Սոս Սարգսյանի անվան Համազգային թատրոններում: Պրեմիերան մարտի 3-ին էր: Ներկայացումը նույն թատրոնում՝ տեղի ունեցավ՝ նաեւ մարտի 4-ին: Ներկայացման մեջ զբաղված են 6 թատրոնների դերասաններ:

Տպել
815 դիտում

Իքս մարդը բարեգործություն է արել, որի գովազդային գինը կպանահջեր ավելի մեծ գումար․ Նիկոլ Փաշինյան

3 օր առաջ իմ աչքերով տեսել եմ ռազմաարդյունաբերական համալիրի մի նմուշ, որին մի քիչ հեշտ չէր հավատալ․ Նիկոլ Փաշինյան

Հայաստանյան գրանցումով ինքնաթիռներն Աֆրիկայում ներգրավված են եղել ապօրինի գործունեության, զենքի վաճառքի մեջ. վարչապետ

Օժանդակություն ստանալու համար կինը մարտի 30-ի դրությամբ պետք է լինի առնվազն 12, առավելագույնը 34 շաբաթական հղի

Բոլորը սկսել են հավատալ, որ իմբիրը կորոնավիրուսի պատվաստանյութ է, դրա համար էլ անվերահսկելիորեն թանկացել է․ վարչապետ

Դա ինձ համար կլինի բարոյական ավարտ. Փաշինյանը՝ նախկին իշխանություններին նմանվելու, նրանց թալանածը հետ բերելու մասին

Տիգրան Համասյանի «ոչՊաշտոնական» համերգը Լոս Անջելեսից. Կառավարության ուղիղ եթերում

Ճամբարակում այս տարի կրկնակի կավելանա գարնանացանը

Տնտեսական փլուզումները բացելու են հնարավորություններ․ Նիկոլ Փաշինյան

Ապրիլյանի հանձնաժողով են հրավիրվել Յուրի Խաչատուրովն ու Սերժ Սարգսյանը. դա կլինի աշխատանքների կուլմինացիան

Ես չեմ ասում՝ Արցախի ընտրությունները կատարյալ են եղել. Փաշինյանը պատասխանեց հարցին՝ ինչո՞ւ է աչք փակում կեղծիքների վրա

Աննախադեպ իրավիճակը թելադրեց շտապ լուծումներ գտնել. դատավորը՝ էլեկտրոնային դատավարության մասին

Գործատուի կողմից տրամադրվող տեղեկանքը ենթարկվել է որոշակի փոփոխությունների. պարետի որոշումը

Արցախում ՀՀ-ից ժամանած երկու քաղաքացիներ են մեկուսացվել. նրանց թեստերի պատասխանները կստացվեն վաղը

Մոտ 550 հազար դոլարի ներդրում ենք արել՝ Հայաստանում թեստերի տեղական արտադրություն ունենալու համար․ ՀՀ վարչապետ

Մասնագիտական պատրաստության պարապմունք է անցկացվել 3-րդ զորամիավորումում. ՊՆ

Կրակոցներ Երևանում. մոտ 40 տարեկան տղամարդը հրազենային վնասվածքներով հիվանդանոցում է

Եթե պարգեւավճարներն ուղղվեին թոշակների բարձրացմանը՝ դրանք կբարձրանային 165 դրամով. վարչապետը հաշվարկ ներկայացրեց

Եթե բոլորին տանք օգնություն, կնշանակի, որ ռեսուրսը օգտագործում ենք նաեւ նրանց համար, որոնք դրա կարիքը չունեն․ վարչապետ

Արմավիրում գյուղատնտեսական աշխատանքներն ակտիվորեն շարունակվում են