Քաղաքացու մահ, կորոնավիրուս, սպառնալիքներ․ շենքն ախտահանվել է, հոգեբանական աջակցություն ցուցաբերվել բնակիչներին

Երեւանի Նոր Նորք վարչական շրջանի բազմաբնակարան շենքերից մեկում հունիսի 17-ի գիշերը քաղաքացի է մահացել, որը ինչպես նշում են հարեւանները, ունեցել է կորոնավիրուսային հիվանդություն։

Մահից հետո նրա աղջիկը, մեղադրելով հարեւաններին անտարբերության մեջ, սկսել է բոլորին վիրավորել, խաթարել նրանց հանգիստն ու լուսադեմին մահացածի անկողնային պարագաները դրել է հարկում, հետո պատերին քսելով իջեցրել՝ ահաբեկելով հարեւաններին, թե այսուհետ չի թողնելու հանգիստ քնեն, ապրեն։

Այս մասին ֆեյսբուքյան իր էջում գրել է օգտատերերից Լուսինե Նահապետյանը՝ հրավիրելով պատկան մարմինների ուշադրությունը։

«Նրա կողմից ամբողջ գիշեր հնչել են հարեւանների կյանքին ու առողջությանը սպառնացող գոռոցներ, քանի որ անտարբեր ենք եղել, սակայն նախօրոք տեղեկացված ենք եղել, որ շփում չլինի նրանց հետ, քանզի հիվանդներից մեկը Նորքի ինֆեկցիոն հիվանդանոցում է, մյուս երկուսը տանը, որոնցից մեկը՝ հայրը, մահամերձ էր»,- գրել է օգտատերը՝ հավելելով, որ շենքի բնակիչներն այս պահին օգնության կարիք ունեն։

Գրառմանն արձագանքել էին հարեւանները։ «Ամբողջ գիշեր դժոխքի մեջ ենք եղել, վախենում ենք տնից դուրս գալ»,- գրել է նրանցից մեկը։ «Գիշերվա ժամը 2-ից ոտքերով հարվածել է հատակին, ձեռքի տակ ընկած պարագաները գցում էր գետնին, բարձր գոռում, ճչում, աննկարագրելի ու մղձավանջային իրավիճակ էր, խեղճ երեխաներս վախից եկել էին մոտս եւ չէին կարողանում քնել»,- ավելացրել է մյուս օգտատերը։

Մեկնաբանություններում նաեւ նշված էր, որ մահացածը 82 տարեկան էր, ունեցել է թոքի քաղցկեղ, տան անդամներից մեկը եւս վարակված է COVID-19-ով եւ այժմ գտնվում է «Նորք» ինֆեկցիոն կլինիկական հիվանդանոցում։ Այդ դեպքում ինչո՞ւ է տանը եղել քաղաքացին, հարեւանները չգիտեն:

ՀՀ արտակարգ իրավիճակների նախարարի մամուլի քարտուղար Էդմոն Զարգարյանը մեզ հետ զրույցում նշեց, որ առավոտյան ժամը 09։06 ահազանգ են ստացել հարեւանի կողմից, որ կորոնավիրուսից մարդ է մահացել եւ նրա աղջիկը, մահացածի իրերը պատերին քսելով, տեղափոխում է տնից։ Ըստ կարգի՝ օպերատիվ հերթափոխը տեղեկացրել է ՀՀ առողջապահության նախարարություն, ՀՀ ոստիկանություն եւ Երեւանի քաղաքապետարան։ Քանի որ ԱԻՆ-ում կա նաեւ հոգեբանական ծառայություն, համապատասխան աշխատակիցը գնացել է դեպքի վայր՝ հոգեբանական աջակցություն ցուցաբերելու։

ՀՀ ոստիկանությունից մեզ տեղեկացրին, որ նման բովանդակությամբ ահազանգ ստացել են, այս պահին նյութեր են նախապատրաստվում։ Երեւանի քաղաքապետի մամուլի քարտուղար Հակոբ Կարապետյանն էլ տեղեկացրեց, որ շենքն արդեն ախտահանվել է։

Ինչպես մեզ հայտնեց Երեւանի «Շտապ օգնություն» ծառայության տնօրեն Թագուհի Ստեփանյանը, կանչ է գրանցվել, թե քաղաքացին շնչահեղձ է լինում, սակայն, որ նա կորոնավիրուսով հիվանդ է եղել, նման տեղեկատվություն չկա։ Իրենց միայն ասել են, թե տվյալ անձը կոնտակտավոր է, քանի որ նրա տղայի մոտ հաստատվել է վիրուսը, եւ նա այժմ գտնվում է հիվանդանոցում։ Ստեփանյանը մեր հարցին ի պատասխան հավելեց, որ իրենց չեն տեղեկացրել, թե հիվանդը թոքի քաղցկեղ է ունեցել։ Բրիգադը ժամանակին է հասել, սակայն հիվանդի վիճակը եղել է բավականին ծանր, նա շնչահեղձ էր լինում եւ հենց բրիգադի ներկայությամբ էլ մահացել է։

Դեպքի հետ կապված առողջապահության նախարարությունից հրաժարվեցին որեւէ մեկնաբանություն տալ։

Ավելի ուշ արդեն սոցիալական ցանցում հայտնվեց վերոնշյալ օգտատիրոջ մյուս հրապարակումը, որտեղ նա շենքի բոլոր բնակիչների անունից շնորհակալություն էր հայտնում ԱԻՆ-ին, ոստիկանությանը, բուժաշխատողներին, հոգեբաններին, Նոր Նորքի թաղապետարանին՝ արագ ու պրոֆեսիոնալ արձագանքի համար։

Հիշեցնենք, որ այսօր ՀՀ կառավարության նիստի ժամանակ ՀՀ առաղջապահության նախարար Արսեն Թորոսյանը տեղեկացրեց, որ առավոտյան 09։00-ի դրությամբ ունենք 143 հոգի, որ կարիք ունի COVID հոսպիտալներում հոսպիտալիզացիայի, որից 25-ը գտնվում է տանը, որոնցից էլ 9-ը թեթեւ ծանրության են, բայց կարիք ունեն հոսպիտալիզիացիայի, իսկ 16-ը միջին ծանրության է, բայց էլի կարիք ունեն հոսպիտալիզացիայի։

«Բարեբախտաբար, 80 եւ ավելի ցածր թթվածնի պարունակությամբ քաղաքացիները, որոնք համարվում են ծանր, չունենք այս պահին տանը, սակայն ունենք բազմաթիվ քաղաքացիներ, որոնք գտնվում են այլ բժշկական կենտրոններում, որտեղ նեղ մասնագիտացված կորոնավիրուսային հիվանդության բուժում չի իրականացվում, նրանք կարիք ունեն տեղափոխվելու իմ ասած ուղղվածությամբ հիվանդանոցներ»,- նշել էր Թորոսյանը։