ԵՄ-ն տնտեսությունների վնասի վերականգնման գումարներ հավաքելու եւ բաշխելու մասին հեռակա գագաթնաժողով է անցկացրել

 Տեսակոնֆերանսի ձեւաչափով անցկացվել է Եվրամիության անդամ երկրների ղեկավարների եւ կառավարությունների առաջնորդների առաջին հանդիպումը: Կորոնավիրուսի համաճարակն ու դրանից հետո սահմանված կարանտինային կանոնները ջախջախիչ հարված են հասցրել ԵՄ անդամ երկրների տնտեսություններին: Առաջնորդներն այսօր գագաթնաժողովի ընթացքում քննարկել են՝ ինչպես եւ ինչ քանակությամբ գումարներ հավաքել եւ ինչ հատկացումներով վերականգնել պետությունների տնտեսությունները: Այս մասին հայտնում է Euronews-ը:

Պաշտոնական Բրյուսելը առաջարկել է ստեղծել 750 միլիարդ եվրոյի չափով ֆոնդ, եւս 1,1 տիրլիոն եվրո վերցնել Եվրամիության հաջորդ 7 տարիների բյուջեից:

Եվրահանձնաժողովի նախագահը գագաթնաժողովի մասնակիցներին կոչ է արել շտապ համաձայնել դայս գաղափարին:

«Այս առաջարկը հավակնոտ է և հավասարակշռված: Սա այն հնարավորությունն է, որը Եվրոպան չի կարող թույլ տալ բաց թողնել»,-ասել է Եվրահանձնաժողովի ղեկավար Ուրսուլա ֆոն դեր Լյայենը:

ԵՄ-ն առաջին անգամ գնում է ընդհանուր պարքի ստեղծման ճանապարհով:

Դրամական միջոցների հոսքի սխեման Euronews-ին բացատրում է Դուբլինի համալսարանի եվրոպական իրավունքի պրոֆեսորը.

«Պատմության մեջ առաջին անգամ ԵՄ-ն կֆինանսավորի իրեն պարտատոմսեր թողարկելու միջոցով, այլ ոչ թե պետական բյուջեներից փոխանցումների միջոցով: Եվ այդ հսկայական գումարը պետություններին կվերադարձվի դրամաշնորհների տեսքով, եւ ոչ թե վարկերի տեսքով, ինչպես դա տեղի ունեցավ եվրոյի հետ ճգնաժամի ընթացքում: Հետեւաբար զարմանալի չէ, որ անդամ պետությունները պետք է շատ բանակցություններ վարեն ՝ անհրաժեշտ համաձայնությունը գտնելու համար», - ասել է Ֆեդերիկա Ֆաբբրինին:

Վարկի ու դրամաշնորհների համադրման այս պլանը ունի Ֆրանսիայի եւ Գերմանիայի, ինչպես նաեւ հարավային երկրների աջակցությունը, որոնք համեմատաբար շատ են ծախսում:

Նախօրենին Գերմանիայի կանցլեր Անգելա Մերկելը կոչ է արել արտասահմանցի գործընկերներին համերաշխություն դրսեւորել: Անգելա Մերկելը նշել է, որ Եվրոպային առաջարկվել է պատմական նախագիծ, որը «տանում է դեպի ապագա»:

Բայց ԵՄ-ի 4 երկրներն ավելի սկզբունքային ու զգուշորեն են ազգային եւ միութենական գումարները վարելու հարցում: Նրանց թվում է Նիդեռլանդները: Այնտեղ դեմ են չվերականգնվող դրամաշնորհների բաշխմանը եւ նախընտրում են վարկեր տրամադրել:

Առաջնորդների բանակցությունները դժվար թե ավարտվեն համաձայնագրով: Եթե հնարավոր լինի խուսափել ԵՄ-ի ներսում հետագա պառակտումից, ապա դա արդեն կարող է համարվել հաջողություն:

Բանակցությունների արդյունքներով Եվրահանձնաժողովի ղեկավարը  լավատեսական եզրակացություն է հրապարակել:

«Առաջնորդները միաձայն համաձայնել են, որ այս ճգնաժամի ծանրությունը թելադրում է հավակնոտ համատեղ պատասխան, որը համատեղելու է իր մեջ համերաշխությունը, ներդրումները եւ բարեփոխումները»,-ասել է Ուրսուլա ֆոն դեր Լյայենը:

«Ես նաեւ ուրախ էի լսել, որ շատ առաջնորդներ խոստացան անել հնարավոր ամեն ինչ մոտ ապագայում համաձայնության գալու համար: Սա նշանակում է, որ մինչ ամառային արձակուրդների ավարտը մենք պետք է գումարենք եւս մեկ Եվրոպական խորհուրդ»:

Չնայած Եվրահանձնաժողովի ղեկավարի այս հայտարարությանը, Եվրախորհրդի ղեկավարը խոստովանել է, որ չի հաջողվել համաձայնության գալ բոլոր տարաձայնությունների շուրջ:

«Կոնսենսուս է հայտնվել, ինչը շատ գովելի է, սակայն մենք չպետք է թերագնահատենք դժվարությունները»,-ասել է Շառլ Միշելը:

Առավել զգուշավոր երկրները, այդ թվում՝ Ավստրիան, առաջարկում են տրամադրել վարկեր եւ պահանջում են բարեփոխումներ: Կանցլեր Սեբաստյան Կուրցը թվիթերում այս մասին գրել է, որ պետք են  քննարկումներ այն մասին, թե ինչի վրա են ծախսվում գումարները, ինչպես դրանք բաշխել եւ ինչպես տեղավորել:

Իտալիան եւ հարավային մյուս երկրները նախընտրում են անվերադարձ դրամաշնորհներ ստանալ: Երկրի վարչապետ Ջուզեպպե Կոնտեն նախագծի մասին նշել է, որ Եվրամիությունը եւս մեկ քայլ առաջ կատարեց:

Առաջընթաց կարելի է համարել այն, որ Գերմանիայի կանցլեր Անգելա Մերկելը տվել է իր համաձայնությունը բոլոր երկրների, այդ թվում ՝ Գերմանիայի կողմից պարտքերի բեռը կիսելու գաղափարի հետ: Եթե այդպես լինի, ԵՄ-ն կկարողանա իր բոլոր անդամների անունից վարկեր վերցնել կապիտալի շուկաներում:

Եվրամիության հաջորդ գագաթնաժողովը նշանակվել է հուլիսի կեսերին: