Բուհերի հոգաբարձուների խորհուրդները կուսակցականացված չեն, բայց տեւական ժամանակ է պետք դրանց զարգացման համար

Հայաստանի բուհերի հոգաբարձուների խորհուրդներում անելիք շատ կա, սակայն դրանք կուսակցականացված չեն:

Այս կարծիքին է ՀՀ կրթության, գիտության, մշակույթի եւ սպորտի նախարարի տեղակալ Ժաննա Անդրեասյանը: Նա լրագրողների հետ զրույցում նշեց, որ կուսակցականացված լինելու որեւէ դիտարկման հետ չի կարող համաձայնել, որովհետեւ նման բան պարզապես չի տեսնում:

«Ցավոք սրտի, մեր նախորդ փորձը բոլորովին լավը չէ, խորհուրդներն ավելի շուտ գործել են իբրեւ նոմինալ, քան բուհի կյանքում իրական դերակատարություն ունեցող մարմիններ: Մեզ տեւական ժամանակ պետք է լինելու ջանք դնել, որպեսզի հոգաբարձուների խորհուրդները բուհերում լինեն իրապես դրանց զարգացմանը նպաստող եւ այդ աշխատանքը տանող մարդկանց խմբեր»,- նշեց Անդրեասյանը:

Հիշեցնենք, որ նա Երեւանի պետական համալսարանի հոգաբարձուների խորհրդի անդամ է: Երեկ տեղի ունեցավ այդ խորհրդի անդրանիկ նիստը, որտեղ ՀԽ նախագահ վերընտրվեց Գեւորգ Մուրադյանը, իսկ ԵՊՀ պատմության ֆակուլտետի դեկանի տեղակալ Միքայել Մալխասյանն ընտրվեց ՀԽ քարտուղար:

Անդրադառնալով նշված նիստին՝ ԿԳՄՍ նախարարի տեղակալը նշեց, որ համալսարանում հնչած առաջարկությունները թույլ են տալիս հասկանալ, որ ունենք խորհուրդների զարգացմանը շահագրգիռ մարդկանց խումբ եւ լավ պայմաններ: Հետեւողական լինելու դեպքում դրանց արդյունավետությունը կբարձրանա:

Լրագրողի դիտարկումը, թե կարծիք կա, որ Մուրադյանը չի վայելում համալսարանականների վստահությունը, բայց ընտրվել է ՀԽ նախագահ, քանի որ ընկալվում է որպես ԿԳՄՍՆ-ի թեկնածու, Անդրեասյանը չմեկնաբանեց: Նրա խոսքով՝ վստահելիությունը մեկնաբանելու համար անհրաժեշտ են տվյալներ, ուսումնասիրություն, որը կարելի է կատարել՝ վերջնական հասկանալու համար՝ ի՞նչ հանրային կարծիք կա համալսարանականների շրջանում ոչ թե կոնկրետ անձի, այլ տարբեր մարդկանց վերաբերյալ:

Հիշեցնենք, որ ԵՊՀ հոգաբարձուների խորհրդի նոր կազմը հաստատվել էր շաբաթներ առաջ ՀՀ վարչապետի հրամանով: Այն բաղկացած է ուսանողների, պրոֆեսորադասախոսական կազմի, լիազոր մարմնի (ԿԳՄՍՆ) եւ բուհի հետ համագործակցող գործատուներից, որոնց առաջադրում է հիմնադիրը (Կառավարությունը): Յուրաքանչյուր կողմից՝ ութ ներկայացուցիչ, ընդհանուր՝ 32 անդամ:

Ստորեւ լիազոր մարմնի եւ հիմնադրի անունից առաջադրված խորհրդի անդամների գործող ցանկը.

Հիմնադրի անունից առաջադրված խորհրդի անդամներն են՝

Ժ. Անդրեասյան – ՀՀ կրթության, գիտության, մշակույթի և սպորտի նախարարի տեղակալ

Ա. Մարտիրոսյան - ՀՀ կրթության, գիտության, մշակույթի և սպորտի նախարարի տեղակալ

Ա. Սիմոնյան – ՀՀ տարածքային կառավարման և ենթակառուցվածքների նախարարի տեղակալ

Վ. Պողոսյան – ՀՀ բարձր տեխնոլոգիաների արդյունաբերության նախարարի տեղակալ

Ա. Ապիտոնյան – ՀՀ արտաքին գործերի նախարարի տեղակալ

Ս. Վ. Սիսեռյան – ՀՀ փոխվարչապետի գրասենյակի ղեկավար

Ս. Հայոցյան - ՀՀ կրթության, գիտության, մշակույթի և սպորտի նախարարության գիտության կոմիտեի նախագահ

Վ. Պապիկյան - ՀՀ վարչապետի աշխատակազմի գործերի կառավարիչ

Լիազոր մարմնի կողմից առաջադրված խորհրդի անդամներն են՝

Մ. Գալստյան - ՀՀ կենտրոնական բանկի նախագահ (համաձայնությամբ)

Գ. Հարությունյան - «Ակադեմիական փոխճանաչման և շարժունության ազգային տեղեկատվական կենտրոն» հիմնադրամի տնօրեն (համաձայնությամբ)

Ա. Սարգսյան - «Հայաստանի հանրային հեռուստաընկերություն» ՓԲԸ-ի տնօրենի պաշտոնակատար (համաձայնությամբ)

Վ. Յակուբյան - ՀԲԸՄ-ի հայաստանյան մասնաճյուղի նախագահ (համաձայնությամբ)

Գ. Մուրադյան - «Մետրիկա» ՍՊԸ-ի հիմնադիր (համաձայնությամբ)

Ն. Կոստանդյան - Կոմիտասի թանգարան ինստիտուտի տնօրեն (համաձայնությամբ)

Հ. Արշամյան - «Հայաստան» համահայկական հիմնադրամի տնօրեն (համաձայնությամբ)

Հ. Նավասարդյան - Երևանի Ա. Շահինյանի անվան ֆիզիկամաթեմատիկական հատուկ դպրոցի տնօրեն:

Համեմատելով այս ցանկը նախորդ ՀԽ կազմի հետ՝ կարող ենք ասել, որ այն մեծ մասամբ փոփոխվել է: Նախորդ հոգաբարձուների խորհրդի կազմում հիմնադրամի անունից առաջադրված խորհրդի անդամների մեջ էին Բարձրագույն որակավորման կոմիտեի (ԲՈԿ) նախագահ Սմբատ Գոգյանը, ԿԳՄՍՆ Լեզվի կոմիտեի նախագահ Դավիթ Գյուրջինյանը, Երեւանի քաղաքապետի տեղակալ Տիգրան Վիրաբյանը եւ այլք: Փոխարենն այս անգամ ընդգրկած են ԿԳՄՍ նախարարի տեղակալներ Ժաննա Անդրեասյանը, Արթուր Մարտիրոսյանը, ԿԳՄՍՆ գիտության կոմիտեի նախագահ Սարգիս Հայոցյանը, ՀՀ բարձր տեխնոլոգիաների արդյունաբերության նախարարի տեղակալ Վիկտորիա Պողոսյանը եւ այլք:

Լիազոր մարմնի կողմից առաջադրված անդամները եւս մեծամասնությամբ փոփոխվել են: Նախկինում այս ցանկում ներառված էին «ՎիվաՍել-ՄՏՍ» ՓԲԻ-ի տնօրեն Ռալֆ Յիրիկյանը, «Սինոփիս Արմենիա» ՓԲԻ-ի տնօրեն Հովիկ Մուսայելյանը եւ այլք: Այժմ անդամներից են Կոմիտասի թանգարան ինստիտուտի տնօրեն Ն. Կոստանդյանը, ՀՀ կենտրոնական բանկի նախագահ Մարտին Գալստյանը եւ այլք: Ինչպես նախորդի ժամանակ, այս անգամ եւս խորհրդի անդամների մեջ են «Մետրիա» ՍՊԸ-ի հիմնադիր, արդեն հոգաբարձուների խորհրդի նախագահ Գեւորգ Մուրադյանը եւ Հայկական բարեգործական ընդհանուր միության նախագահ Վազգեն Յակուբյանը:

Ստորեւ նախորդ կազմի անդամների ցանկը.

Հիմնադրի անունից առաջադրված խորհրդի անդամներ՝

 Հ․ Հովհաննիսյան – ՀՀ ԿԳՆ տեղակալ

Հ․ Արշամյան – «Հայաստան» համահայկական հիմնադրամի գործադիր տնօրեն

Ս․ Գոգյան- ՀՀ ԿԳՆ բարձրագույն որակավորման կոմիտեի նախագահ

Ա․ Իսրայելյան – ԵՊՀ միջազգային հարաբերությունների ֆակուլտետի դեկանի արտաքին կապերի գծով տեղակալ, պ․գ․թ․, դոցենտ

Դ․ Գյուրջինյան – ՀՀ ԿԳՆ լեզվի կոմիտեի նախագահ

Ա․ Շագաֆյան – ՀՀ ԿԳՆ տեսչական մարմնի ղեկավար

Տ․ Վիրաբյան – Երեւանի քաղաքապետի տեղակալ

Ռ․ Սուքիասյան – ՀՀ ԿԳՆ բարձրագույն եւ հետբուհական մասնագիտական կրթության վարչության պետ

Լիազոր մարմնի կողմից առաջադրված խորհրդի անդամներ՝

Ռ․ Յիրիկյան – «Վիվասել-ՄՏՍ» ՓԲԸ-ի տնօրեն

Ռ․ Կարապետյան- ՀՀ արտակարգ եւ լիազոր դեսպան

Հ․ Մուսայելյան – «Սինոփսիս Արմենիա» ՓԲԸ-ի տնօրեն

Վ․ Յակուբյան – Հայկական բարեգործական ընդհանուր միության նախագահ

Գ․ Մուրադյան- «Մետրիկա» ՍՊԸ-ի հիմնադիր

Հ․ Դանիելյան – «Գյուլբենկյան» հիմնադրամի հայաստանյան ծրագրերի ներկայացուցիչ

Ա․ Թորոսյան – Երեւանի թիվ 198 ավագ դպրոցի տնօրեն

Ա. Թադևոսյան- ՀՀ ԳԱԱ ազգագրության ինստիտուտի գիտաշխատող, ազգագրագետ