ՌԴ-ն իր հակակորոնավիրուսային պատվաստանյութի տրամադրման գործարքներ է կնքում աշխարհով մեկ. ինչ է հայտնի

Ռուսաստանը նախնական պայմանավորվածություններ ունի covid-19-ի իր պատվաստանյութը Ասիայի, Հարավային Ամերիկայի եւ Մերձավոր Արեւելքի ավելի քան 10 երկրներ մատակարարելու վերաբերյալ, որոնք կարող են միջազգային եւ տնտեսական արժեքավոր լծակներ ապահովել երկրի համար:

Ռուս պաշտոնյաները նշում են, որ իրենք նախնական պայմանավորվածություններ են ձեռք բերել պատվաստանյութեր մատակարարելու վերաբերյալ այնպիսի երկրների հետ, ինչպիսիք են Բրազիլիան, Մեքսիկան, Սաուդյան Արաբիան եւ Հնդկաստանը: Եվս 20 երկիր հետաքրքրված է ռուսական պատվաստանյութով, ու սա դեռ այն դեպքում, երբ պատվաստանյութը փորձարկման փուլում է գտնվում:

Բացի այդ, Ռուսաստանը հայտարարում է, որ պատվաստանյութ գնելու շուրջ բանակցությունները եւս 10 երկրների հետ տարբեր մակարդակներում են: Ընդհանուր առմամբ, Մոսկվան ստացել է 1,2 միլիարդ դեղաչափի վերաբերյալ հայց կամ գնման մտադրություն:

Այս մասին գրում է The Wall Street Journal-ը՝ նշելով, որ պատվաստանյութերը կարտադրվեն արտերկրում եւ ամբողջ աշխարհով մեկ կտարածվեն  նոյեմբերին: Պաշտոնյաներն ասում են, որ դեղամիջոցի տարածումը կպահանջի տեղական կարգավորող մարմնի հաստատումը: 

Պատվաստանյութը, որը ստացել է Sputnik V անվանումը՝ ի պատիվ Սովետական Միության սառը պատերազմի շրջանում տիեզերական մրցարշավում ԱՄՆ-ից առաջ արձակված տիեզերանավի, անցյալ ամսվա սկզբին հաստատվեց Ռուսաստանի իշխանությունների կողմից, չնայած Արեւմուտքը շտապեց բարձրաձայնել հապճեպ որոշումների վերաբերյալ իր թերահավատությունը:

Իշխանությունների կողմից հաստատում ստանալու համար ռուս հետազոտողները սահմանափակ փորձեր են անցկացրել 76 կամավորների վրա, այդ թվում՝ հայտնիների: Սկզբնական փորձարկումները ցույց են տվել, որ պատվաստանյութը անվտանգ է օգտագործման համար եւ առաջացրել է իմունային պատասխան, սակայն մասնագետներն ասում են, որ առանց լայնածավալ փորձարկումների հնարավոր չէ որոշել դրա արդյունավետությունը: Օգոստոսի վերջին Ռուսաստանում սկսվեցին փորձարկումներ ՝ 40 000 կամավորների մասնակցությամբ:

Ռուսաստանն ակնկալում է զանգվածային պատվաստումներ իրականացնել իր տարածքում մինչեւ տարեվերջ: Միաժամանակ, հարեւան Չինաստանն արդեն փորձարկել է սեփական արտադրության փորձնական պատվաստանյութը հարյուր հազարավոր մարդկանց վրա: ԱՄՆ-ի պատասխանատու պաշտոնյաները նշել են, որ Նահանգները դժվար թե օգտագործի ռուսական կամ չինական արտադրության պատվաստանյութ`փորձարկման ընթացակարգերի վերաբերյալ ունեցած կասկածների պատճառով:

Կայքը գրում է, որ ՌԴ սահմաններից դուրս ռուսական պատվաստանյութի տարածքումը նպատակ ունի կենտրոնացնել Վլադիմիր Պուտինի հանձնարարականը՝ covid-19-ի դեմ պատվաստանյութի որոնման մրցավազքում առաջին տեղում հայտնվելու համար: ռուսաստանի համար սա կարող է դառնալ քաղաքական գործիք:

Բացի այս ամենը, Ռուսաստանը նախատեսում է Sputnik-V-ի 30 միլիոն չափաբաժին արտադրել սեփական բնակչության համար՝մինչեւ այս տարեվերջ: Երկրի վրա վիրուսը ծանր հետեւանքներ է թողել եւ դեպքերի քանակով (ավելի քան մեկ միլիոն մարդ), ՌԴ-ն աշխարհում չորրորդ տեղում է:

Ըստ Ռուսաստանի ուղղակի ներդրումների ֆոնդի (երկրի ազգային հարստության ֆոնդի) ղեկավար Կիրիլ Դմիտրիեւի, որը ղեկավարել է պատվաստանյութի ստեղծման աշխատանքային խումբը, Ռուսաստանը պատվաստանյութերի մատակարարման նախնական համաձայնագրեր ունի ավելի քան տասը երկրների հետ:

Այս պահանջը բավարարելու համար Ռուսաստանը տեխնոլոգիաներ է տեղափոխում Հնդկաստանի, Բրազիլիայի եւ Հարավային Կորեայի արտադրական կենտրոններ, լաբորատորիաներ, որտեղից էլ բաժանվելու է պատվաստանյութը:

Նախնական պայմանավորվածությունների համաձայն ՝ Հնդկաստանը կստանա 100 միլիոն դոզա, իսկ Բրազիլիայի Բահիա նահանգը ՝ 50 միլիոն:

Այլ երկրների հետ բանակցությունները չեն հրապարակվում, սակայն անցած ամիս փոխվարչապետ Տատյանա Գոլիկովան հայտնել է, որ շատ երկրներ «շահագրգռված են համագործակցության տարբեր ձեւերով ՝ ներառյալ պատվաստանյութերի համատեղ մշակումը, կլինիկական փորձարկումները, գնումները, իրենց տարածքում արտադրության տեղայնացումը եւ հումանիտար օգնությունը»: Ռուսաստանն արդեն իսկ հայտարարել է նաեւ իր գործընկեր Բելառուսի, ինչպես նաեւ Արաբական Էմիրությունների ու Եգիպտոսի հետ համատեղ կլինիկական փորձարկումների մասին:

Մեքսիկայի Արտաքին գործերի նախարար Մարսելո Էբրարդը նախորդ շաբաթ հայտարարել է,  որ իր երկիրը հետաքրքրված է ռուսական պատվաստանյութով եւ  ցանկանում է մասնակցել լայնածավալ փորձարկմանը, որին մասնակցում են 500-1000 կամավորներ ամեն երկրից: Մեքսիկայի պաշտոնատար անձինք հայտնել են, որ պատվաստանյութերի փորձարկման և հաստատման վերաբերյալ վերջնական որոշումները կայացնելու են առողջապահական մարմինները:

Միացյալ Նահանգները, Եվրամիությունը, Ճապոնիան եւ Մեծ Բրիտանիան պայմանավորվել են գնել առնվազն 3,7 միլիարդ դեղաչափ՝ արեւմտյան դեղագործական ընկերություններից: Դա կծանրաբեռնի պատվաստանյութերի համաշխարհային արտադրության զգալի մասը, և զարգացող երկրները կարող են բախվել բուժամիջոցների պակասի հետ:

Զարգացող երկրներն ունեն իրենց արտադրական հարմարությունները, բայց սովորաբար նրանք ստիպված են լինում աշխատել հարուստ երկրների դեղագործական ընկերությունների հետ `արտադրական նոու-հաու ձեռք բերելու համար:

Արդյունքում, զարգացող երկրներում մեծ պահանջարկ կա ռուսական պատվաստանյութի նկատմամբ:

Ֆիլիպինների նախագահ Ռոդրիգո Դուտերտեն հայտնել է, որ իր երկիրը, որտեղ ավելի քան 280,000 դեպք կա գրանցված, նպատահարմար է գտնում  Ռուսաստանի եւ Չինաստանի պատվաստանյութերի գնումներին տալ  առաջնահերթությունը `ավելացնելով, որ պատվաստանյութերի արեւմտյան մյուս արտադրողները հիմնականում կենտրոնացած են միայն փող աշխատելու վրա:

Վենեսուելայի նախագահ Նիկոլաս Մադուրոն առաջարկել է առաջիկա ընտրություններում թեկնածուներին տրամադրել ռուսական պատվաստանյութ, որպեսզի նրանք կարողանան անվտանգ քարոզչություն իրականացնել:

Դմիտրիեւն ասել է, որ իրենք միայն փորձում են փոխհատուցել ծախսերը եւ չեն ձգտում դրա վրա գումար աշխատել: Ավելի քան  4 միլիարդ ռուբլի (52.8 միլիոն դոլար) ներդրվել Ռուսաստանում հակակորոնավիրուսային պատվաստանյութի արտադրության մեջ:

Ռուսաստանը դեռ չի հայտնում մեկ պատվաստանյութի արժեքը: Այնուամենայնիվ, պետական լրատվամիջոցները վկայակոչում են փորձագիտական կարծիքներ. Երկու դեղաչափ պատվաստանյութի արտահանման գինը պետք է լինի առնվազն  10 դոլար: ԱՄՆ-ում գները տատանվում են 4-ից 37 դոլար՝ մեկ դեղաչափի համար:

Ռուսաստանը կարող է բախվել Չինաստանի հետ մրցակցությանը.  Պեկինը խոստացել է հաջող պատվաստանյութով  կիսվել արտաքին աշխարհի հետ: Պոտենցիալ ստացողներից շատերը, ինչպիսիք են Ֆիլիպինները, Ինդոնեզիան եւ Բրազիլիան, Չինաստանի համար ռազմավարական հետաքրքրություն են ներկայացնում:

Չինական դեղ արտադրող Sinovac Biotech Ltd.-ն համաձայնել է անվճար տրամադրել Բանգլադեշին 100,000 դեղաչափ պատվաստանյութ: Մեկ այլ չինական ընկերություն ՝ CanSino Biologics Inc.- ը, բանակցություններ էր վարում մի շարք երկրների հետ ՝ պատվաստանյութի հրատապ հաստատում ստանալու համար:

Ի դեպ, սեփական պատվաստանյութ ունի նաեւ Մեծ Բրիտանիան, սակայն  մասնագետները շատ մտահոգված էին AstraZeneca անունը կրող բրիտանական պատվաստանյութի փորձարկումներով, որոնք մեկնարկել էին ապրիլից Բրիտանիայում:

The New York Times –ը գրում է, որ մտահոգություններ են առաջացել այն բանից հետո, երբ ընկերությունը մերժել է` մանրամասներ տրամադրել փորձարկումների երկու մասնակիցների (կանանց) մասին,  որոնք  ստացել են AstraZeneca փորձնական պատվաստանյութը եւ լուրջ նյարդաբանական խանգարումներ ստացել: Այս միջադեպերը ընկերությանը ստիպել են երկու անգամ դադարեցնել փորձարկումները, երկրորդ անգամ ՝ այս ամսվա սկզբին: Այս պատվաստանյութով հետազոտությունները վերսկսվել են Բրիտանիայում, Բրազիլիայում, Հնդկաստանում եւ Հարավային Աֆրիկայում, բայց ԱՄՆ-ում դեռ կանգնած են: Մինչ օրս աշխարհում 18,000 մարդ ստացել է AstraZeneca պատվաստանյութ: