Մինչև սահմանադրական փոփոխությունները ՍԴ-ում ճգնաժամ չի եղել. Արևիկ Պետրոսյան

Առաջադրումներ իմ կողմից չեն կատարվելու, ինքնաառաջադրում չի կատարվելու: Լրագրողների հետ զրույցում այս մասին հայտնեց Սահմանադրական դատարանի դատավոր Արևիկ Պետրոսյանը:

«Այս պահին առաջադրված թեկնածու չկա: Տեսնենք՝ ովքեր կառաջադրեն իրենց թեկնածությունները, ինչպիսի ելույթներ կունենան, ինչ տեսլական են պատկերացնում, ինչպիսի գնահատական կտան ստեղծված իրավիճակին, ինչպես կպատկերացնեն ստեղծված իրավիճակի հանգուցալուծումները, ըստ այդմ՝ կլինի նաև մոտեցումներ և դիրքորոշումներ»:

Պատասխանելով իր և Հրայր Թովմասյանի՝ նիստերին չմասնակցելու հարցին՝ Պետրոսյանը նշեց՝ Սահմանադրական դատարանում առ 2020 թ.-ի հունիսի 26-ը, այսինքն՝ մինչև սահմանադրական փոփոխությունների ուժի մեջ մտնելը, որևէ խնդիր չի եղել քվորումի իրավազորության հետ կապված, որոշումների կայացման հետ կապված: «ՍԴ-ում ստեղծված իրավիճակի վերաբերյալ 3 խումբ հարցեր, որոնք պայմանավորված են սահմանադրական փոփոխություններով, Սահմանադրական դատարանի օրենքի փոփոխություններով և բնականոն գործունեության կազմակերպման հետ կապված հարցերով, հանգամանալից, մանրամասն գործընկերներին ներկայացրել եմ, այդ թվում՝ նաև բնականոն գործունությունը կազմակերպելու պատասխանատուի հետ, և առաջարկներ է կատարվել այդ խնդիրները հանգուցալուծելու առումով»:

Արևիկ Պետրոսյանը նշեց, սակայն, որ որևէ քայլ չի կատարվել այդ ուղղությամբ, որպեսզի խնդիրը հանգուցալուծվի: «Սպասում ենք առ այս պահը, որպեսզի այդ հարցերը իրենց լուծումները ստանան, և Սահմանադրական դատարանը իր օրինական գործունեությունը՝ սահմանադրական արդարադատությունը, սահմանադրական առաքելությունն իրականացնի»:

Արևիկ Պետրոսյանը նաև ընդգծեց՝ անկախ ամեն ինչից, շարունակելու է մասնակցել Սահմանադրական դատարանի աշխատանքներին: «Ես չեմ կիսել իմ մեկ գործընկերոջ մոտեցում, որը ևս ՍԴ օրինականության հետ կապված խնդիր ուներ և բացարձակապես ՍԴ աշխատանքներին չէր մասնակցում: Իմ մոտեցումը այդպիսին չէր: Իմ մոտեցումը հետևյալն է, որ ես իմ գործընկերների հետ պետք է շարունակեմ ներկայացնել իմ տեսակետները, իմ մոտեցումները, իմ դիրքորոշումները, իրենց տեսակետների վերաբերյալ իմ կարծիքները, կարծիքը, կտեսնեմ՝ ինչպես կզարգանան իրադարձությունները, ըստ այդմ՝ իմ սահմանադրական առաքելությունը կիրականացնեմ, աշխատանքներին մասնակցություն ես ունեցել եմ և շարունակելու եմ ունենալ»:

Արևիկ Պետրոսյանը նաև կարծիք հայտնեց, որ հունիսին տեղի ունեցած սահմանադրական փոփոխություններից առաջ ՍԴ-ում ճգնաժամ չի եղել: «Ճգնաժամի հետ կապված ես արդեն պատասխանեցի, որ մենք առ 2021 թ.-ի հունիսի 26-ը ճգնաժամ չենք ունեցել, որովհետև ՍԴ-ն իր բնականոն գործունեությունն իրականացրել է, և ՍԴ-ի գործունեությամբ հանրային իշխանության այլ ճյուղերի բնականոն գործունեության հետ կապված որևէ խնդիր չի առաջացել»:

Լրագրողներից մեկն էլ հետաքրքրվեց՝ ՍԴ-ն նոր կազմով կվայելի՞ հանրության վստահությունը: «Վստահության հետ կապված հարցը պայմանավորված է նախևառաջ նրանով նաև, թե ինչպես է դա գեներացվում քաղաքական ուժերի կողմից, ինչպիսի շեշտադրումներով են դրանք ներկայացվում, ինչ նպատակներ են հետապնդում: Բնականաբար, Սահմանադրական դատարանի գործունեության վստահության հետ կապված հարցերը, թե ինչպես էին պատկերացնում և ինչպիսին ստացան և ինչպիսին կլինի, նույն ձևով թող գան, տեսնեն՝ համեմատությունների մեջ ինչպես կլինի:

Պետրոսյանը կոռեկտ չհամարեց կարծիք հայտնել ՍԴ նորընտիր դատավորների վերաբերյալ: «Մարդկային առումով որևէ մեկի հետ՝ ոչ միայն ձեր թվարկած 3 գործընկերների, այլ նա մյուսների մասով, որևէ խնդիր չունեմ: Ինչ վերաբերում է՝ որպես ՍԴ դատավորի, թույլ տվեք իմ կարծիքը չբարձրաձայնել, չհնչեցնել»:

Հարցին, թե տեսնո՞ւմ է Հրայր Թովմասյանին ՍԴ նախագահի պաշտոնում, Պետրոսյանն ասաց. «Պետք է տեսնենք՝ առաջադրում լինելու է, թե ոչ, որից հետո կարծում եմ՝ կունենանք այս հարցերի վերաբերյալ տեսակետներ արտահայտելու հնարավորություն»:

Նա նաև նշեց՝ Սահմանադրական դատարանի նախագահ Հրայր Թովմասյանը իր պաշտոնավարման 2 տարիների ընթացքում իր գործունեությունը իրականացրել է այնպես, որ ՍԴ-ի բնականոն գործունեության առումով որևէ խնդիր չի եղել: «Ստեղծվել են նորմալ, մարդկային, աշխատանքային փոխհարաբերություններ, ՍԴ դատարանը վերջին 2 տարիների ընթացքում բարդագույն իրավիճակներում է եղել, և այդ ընթացքում մենք մեր մասնագիտական առաքելությունը, մեր սահմանադրական առաքելությունը սահմանադրական արդարադատություն իրականացնելու առումով իրականացրել ենք»:

Նա նաև շնորհակալություն հայտնեց Թովմասյանին 2 տարիների ընթացքում ՍԴ նախագահի պարտականությունները, լիազորությունները բարձր մակարդակով իրականացնելու համար, նաև 3 գործընկերներին, որոնց լիազորությունները դադարեցվել են: «Իրենք զբաղվում են իրենց խախտված իրավունքների վերականգմամբ, տեսնենք՝ իրադարձությունները ինչպես կզարգանան, կշարունակենք աշխատել, էլի շնորհակալությամբ և գոհունակությամբ շարունակենք մեր գործընկերների հետ աշխատել, եթե ոչ, կտեսնենք՝ կյանքը ինչ ցույց կտա»:

Հրայր Թովմասյանի՝ քաղաքական հայտարարություններ անելու հարցին անդրադառնալով՝ Պետրոսյանը նշեց՝ հայտարարությունները քաղաքական են եղել, թե քաղաքական չեն եղել, սուբյեկտիվ ընկալման հարց է: «Ինչ վերաբերում է Թովմասյանի կողմից կատարված հայտարարություններին, նրա կողմից կատարվել են այն հայտարարությունները, ինչ ինքը նպատակահարմար է համարել»: