Հնդկաստանում անհայտ ծագման հիվանդության բռնկում է. ախտանշանները նման են էպիլեպսիային

Հնդկաստանում անհայտ ծագման հիվանդություն է հայտնվել, որով վարակվել են մի քանի հարյուր մարդիկ: Հիվադնությունն արդեն հասցրել  է 1 մարդու   մահվան պատճառ դառնալ, ավելի քան 450 հոգի հիվանդանոցում են, իսկ պատճառները հայտնաբերել չի հաջողվում: Անհայտ հիվանդության բռնկումը տեղի է ունեցել հանգստյան օրերին,  Հնդկաստանի հարավային Անդհրա Պրադեշ նահանգի Էլուրու քաղաքում, փոխանցում է The Hindu թերթը:

Բժիշկների խոսքով, հիվանդության ախտանշանները տարաբնույթ են: Հիմնականում՝ սրտխառնոց, մկանացավեր, գիտակցության կորուստ, ծակող ցավեր:

Հիվանդությունը Հնդկաստանում է հայտնվել կորոնավիրուսի համաճարակի ամենապիկ շրջանում: Երկիրն աշխարհում երկրորդ տեղում է գտնվում՝ կորոնավիրուսի վարակակիրների թվով՝ մոտ 9,7 միլիոն մարդ, նաեւ երրորդ տեղն է զբաղեցնում աշխարհում՝ մահացածների թվով՝ ավելի քան 140 հազար մարդ:

Անդհրա Պրադեշը, Covid-19-ի ավելի քան 800 հազար վարակակիրներով, երրորդն է Հնդկաստանի 28 նահանգների եւ 8 միութենական տարածքների մեջ:

Այնուամենայնիվ, նահանգի առողջապահության նախարար Կալի Կրիշնա Շրինավասի խոսքով, բոլոր այն մարդիկ, որոնք անհայտ այս հիվանդությամբ անցած 2 օրերին հոսպիտալացվել են, կորոնավիրուսի թեստավորում են անցել, պատասխանը եղել է բոլորի մոտ բացասական: Նրանց մոտ չեն հայտնաբերվել նաեւ վիրուսային այլ վարակիչ հիվանդություններ:

«Հիվանդների, հատկապես՝ երեխաների մոտ, ամեն ինչ սկսվել է աչքերի այրող ցավից: Դրան հաջորդել են սրտթափոցի հանկարծակի նոպաները, այնուհետ՝ գիտակցության կորուստը կամ ցնցումները, որոնք առավել հաճախ նման են էպիլեպսիայի նոպաների»,- Indian Express-ին պատմել է Էլուրուի հիվանդանոցի գլխավոր բժիշկը:

170 հիվանդներ արդեն դուրս են գրվել, մյուսները շարունակում են բուժումը:

Նահանգի գլխավոր նախարար Յագանմոհան Ռեդին հայտարարել է, որ Հնդկաստանի առաջատար մասնագետներին գործուղել են Էլուրու ՝ հիվանդության պատճառները պարզելու համար, եւ որ նա պատրաստվում է հանդիպել հիվանդների ու նրանց ընտանիքների հետ:

«Այցելելով այն վայրերը, որտեղ մարդիկ վարակվել են, մենք բացառել ենք ջրի կամ օդի աղտոտումը՝ որպես հիվանդության պատճառ, - ասացել է Կալի Կրիշնա Սրինավասը, - սա ինչ-որ առեղծվածային հիվանդություն է, եւ միայն լաբորատոր ուսումնասիրությունները կօգնեն մեզ հասկանալ, թե դա ինչ է»:

Ընդդիմադիր «Թելուգու Դեսամ» կուսակցությունը, սակայն, կասկածում է զանգվածային թունավորման մասին եւ պահանջում է առավել մանրակրկիտ հետաքննություն անցկացնել:

The Times of India-ն հայտնում է, որ հիվանդության ծագման մասին մի քանի վարկածներ են շրջանառվում, այդ թվում՝ սննդային թունավորման, օդի կամ ջրի աղտոտվածության, ինչպես նաեւ նահանգում առկա մեծաթիվ մոծակների դեմ ցողված թունաքիմիկատից հնարավոր ռեակցիայի դրսեւորման տարբերակները: Շրջանառվում է նաեւ նահանգում ինչ-որ տեղ քիմիական պահեստի վթարման, քիմիական նյութի՝ մարդկանց օրգանիզմ թափանցման վարկածը: Ճշտման համար բոլոր հիվանդներից արյան նմուշառում է կատարվել, արդյունքները դեռ հայտնի չեն:

Այժմյան հիվանդության բռնկման ուսումնասիրությամբ զբաղվելու են Սննդառության ազգային ինստիտուտի, Քիմիական տեխնոլոգիայի ինստիտուտի եւ Համահնդկական բժշկական գիտությունների ինստիտուտի մասնագետները: Լրատվամիջոցների հաղորդմամբ, հոսպիտալացվածների շրջանում, որպես կանոն, մեծամասամբ 20- 30 տարեկան երիտասարդներ են: Բայց 12 տարեկանից ցածր առնվազն 45 երեխա կա:

Առհասարակ, Հնդկաստանը հայտնի է որպես շատ վարակների, մասնավորապես խոլերայի վարակման եւ տարածման տեսանկյունից  էնդեմիկ եւ ակտիվ երկիր: Այնտեղ բազմիցս անհայտ հիվանդություններ են հայտնվել, ուսումնասիրվել, քննարկվել, հայտնաբերվել եւ ներառվել հիվանդությունների շարքում:

Վերջին շրջանում անհայտ ծագման հիվանդությունների բռնկումներ էլի են գրանցվել այլ երկրներում: Օրինակ, Նիգերիայում ինչ-որ անհայտ վարակը խլել է 80 մարդու կյանք: Մահացածների մեծ մասը 18-25 տարեկան երիտասարդներ են: Վարկածներից մեկի համաձայն, մահերի պատճառ կարող էր լինել հեմորագիկ տենդը, որի տարածման պատճառն էլ իր հերթին դեռ ուսումնասիրվում է: Սա վիրուսային հիվանդություն է, որը բնութագրվում է տենդով, հեմոռագիկ սինդրոմով (արյունազեղում, արյունահոսություն): Վարակման այս տեսակը ներառում է դենգե, Էբոլա եւ Լասա տենդը:

Ավելի վաղ Սենեգալում մեկ այլ անհայտ ծագման ծովային հիվանդություն էր տարածվել 200 ձկնորսների մոտ:  Այդ ժամանակ հիվանդները ծածկվել էին թեփուկներով, տառապել են ամբողջ մարմնի ուժեղ քորով եւ աչքերի գրգռվածությամբ: Իշխանությունները հայտնել էին, որ բոլոր դեպքերը ստացվել են Ատլանտյան օվկիանոսի նույն տարածքում: