Ալեքսանյան-Եվլոև հերթական դիմակայությունը․ ովքեր են հունահռոմեական ոճի հայ ըմբիշների գլխավոր մրցակիցները Բելգրադում

Նոյեմբերի 12-18-ը Սերբիայի մայրաքաղաք Բելգրադում տեղի կունենա աշխարհի անհատական գավաթի խաղարկությունը։ Հայ ըմբիշների համար սա ընդամենը երկրորդ հնարավորությունն է իրենց դրսևորելու 2020թ․-ի ընթացքում։ Տարեսկզբին Հռոմում կայացած Եվրոպայի առաջնությունից հետո ըմբաշամարտի գրեթե բոլոր մրցաշարերը չեղարկվեցին կորոնավիրուսի պատճառով, օլիմպիական խաղերը հետաձգվեցին, աշխարհի առաջնություն տեղի չունեցավ։

Աշխարհի անհատական գավաթի խաղարկությանը չեն ժամանի մի շարք առաջատար երկրներից (ԱՄՆ, Ճապոնիա, Վրաստան և այլն)։ Սակայն տիտղոսակիր ըմբիշների պակաս Բելգարդում չի լինի։ Դեկտեմբերի 12-15-ը պայքարի մեջ կլինեն հունահռոմեական ոճի ըմբիշները:

«Հայկական ժամանակը» ներկայացնում է հայ ըմբիշների գլխավոր մրցակիցներին՝ ըստ քաշային կարգերի։

55կգ - Այս քաշային կարգում Հայաստանը ներկայացնելու է Ռուդիկ Մկրտչյանը։ Սպասելինքերը նրանից մեծ չեն, սակայն քաշային կարգի ոչ բոլոր ուժեղագույններն են ժամանել, այնպես որ լավ վիճակահանության դեպքում Մկրտչյանը կարող է պայքարել մեդալների համար: Մասնակիցների ցուցակից, մասնավորապես, բացակայում է Եվրոպայի այս տարվա չեմպիոն Բուղարիան ներկայացնող Էդմոն Նազարյանը։ Հաղթողի գլխավոր հավակնորդները Ռուսաստանը ներկայացնող Էմին Սեֆերշաևն ու ադրբեջանցի Էլդանիզ Ազիզլին են, որոնց կփորձեն դիմակայել թուրք Սերիֆ Կիլիչին և ղրղզ Բալբայ Դորդոկովը։

60 կգ քաշային կարգում պայքարի մեջ կմտնի Մ-23 աշխարհի չեմպիոն Արմեն Մելիքյանը։ Այս քաշային կարգում Ռուսաստանը ներկայացնելու է աշխարհի չեմպիոն Ստեփան Մարյանյանը։ Հաղթողի հավակնորդներից է նաև Ղրղզստանի ներկայացուցիչ Ժոլաման Շարենբեկովը։

63 կգ քաշային կարգում այս տարվա Եվրոպայի չեմպիոն Գևորգ Ղարիբյանի հիմնական մրցակիցները կլինեն ադրբեջանցի Թալեհ Մամադովը, ռուսաստանցի Ժամբոլատ Լոկյաևը, հունգարացի Էրիկ Տորբան։

67 կգ քաշային կարգում հանդես կգա 63 կգ քաշային կարգում աշխարհի առաջնության բրոնզե մեդալակիր Սլավիկ Գալստյանը։ Սա նրա առաջին խոշոր մրցաշարն է օլիմպիական քաշային կարգում, որտեղ բավականին լուրջ մրցակիցներ կան․ բացի ավանդավար ուժեղ Ռուսաստանի ներկայացուցչից (Նազիր Աբդուլաև), այս քաշային կարգում են Սերբիայում են լինելու նաև օլիմպիական չեմպիոն Դավոր Ստեֆանեկը, որը հանդես է գալու տանտիրոջ կարգավիճակով, ինչպես նաև թուրք Յուկսել Աթաքանը՝ աշխարհի և Եվրոպայի առաջնությունների բազմակի մրցանակակիր։

72 կգ քաշային կարգում երիտասարդ Մալխաս Ամոյանը հերթական փորձն է անելու ամրապդնվել մեծահասակների ասպարեզում։ Մրցակիցների մեջ բավականին շատ տիտղոսակիր ըմբիշներ կան՝ Ուլվու Գանիզադեն (Ադրբեջան), որի հետ Ամոյանը բազմիցս հանդիպել է երիտասարդների և պատանիների մրցաշարերում, Բալինտ Կորպաշի (Հունգարիա), Ալեքսանդար Մաքսիմովիչ (Սերբիա)։ Նրանց հետ միասին հաղթողի ֆավորիտներից են նաև Նարեկ Օհանյանը, որը ներկայացնում է Ռուսաստանը և Հայկ Մնացականյանը՝ Բուլղարիայից։

77 կգ քաշային կարգում Կարապետ Չալյանը փորձելու է իր առաջին ոսկե մեդալը նվաճել մեծահասակների խոշոր մրցաշարերում․ այս քաշային կարգում մրցակցությունը շատ մեծ է, բայց նրանցից շատերին Չալյանն արդեն հաղթել է տարբեր մրցաշարերում։ Բելգրադ է ժամանելու օլիմպիական կրկնակի չեմպիոն Ռոման Վլասովը, բայց պետք է ուշադիր լինել նաև Ղրղզստանի ներկայացուցիչ Ակժոլ Մախմոդովի նկատմամբ․ վերջինս Ասիայի չեմպիոնն է, երիտասարդների աշխարհի նախկին չեմպիոն, և համարվում է ըմբշամարտի ապագա աստղերից մեկը։

82 կգ քաշային կարգում, ի սկզբանե, Հայաստանը պետք է ներկայացուցիչ չունենար, սակայն վերջին պահին որոշվեց, որ Ռուբեն Ղարիբյանը մասնակցելու է։ Ղարիբյանը ֆավորիտների շարքին չի դասվում, ամենայն հավանականությամբ մեդալների համար կպայքարեն Ռուսաստանի, Ադրբեջանի, Բուլղարիայի, Բելառուսի ներկայացուցիչները։

87 կգ քաշային կարգում լուրջ մրցակցություն է լինելու օլիմպիական չեմպիոն Դավիթ Չակվետաձեի (Ռուսաստան), աշխարհի նախկին չեմպիոն Իսլամ Աբասովի (Ադրբեջան), Սերբիան ներկայացնող Զուրաբ Դաթունաշվիլու, հունգարացի Իշտվան Տակաշի միջև, ինչպես նաև Հայաստանի ներկայացուցիչ Արթուր Շահինյանի միջև։

Այս մրցաշարի ամենաինտրիգային պահերից մեկը 97 կգ քաշային կարգում Արթուր Ալեքսանյան - Մուսա Եվլոև (Ռուսաստան) հերթական ակնկալվող գոտեմարտն է։ Ալեքսանյանը զիջել է Եվլոևին վերջին աշխարհի առաջնություններում, որտեղ հանդես է եկել վնասվածքներով։ Այժմ նա առողջ է և պատրաստ է ռևանշի։

130 կգ քաշային կարգում երիտասարդ Դավիթ Օվասափյանի համար դժվար կլինի խառնվել ավելի փորձառուների պայքարին, թեև բացահայտ ֆավորիտներից Բելգրադում է լինելու միայն ռուս Սերգեյ Սեմյոնովը։ Մյուս մարզիկների միջև ուժեղ պայքար է ընթանալու մեդալների համար։

Ռաֆայել Խալաթյան