Երիտասարդ, տաղանդավոր կազմ և բարենպաստ վիճակահանություն. ինչ ակնկալել ազատոճային ըմբիշներից

Բելգրադում ընթացող ըմբշամարտի աշխարհի անհատական գավաթի խաղարկությունում իրենց ելույթներն ավարտեցին հունահռոմեական ոճի ըմբիշները՝ նվաճելով մեկ արծաթե (Մալխաս Ամոյան) և մեկ բրոնզե մեդալ (Սլավիկ Գալստյան): Շատ մոտ էր բրոնզե մեդալ նվաճելուն նաև Դավիթ Օվասափյանը, սակայն վճռական գոտեմարտի ավարտից երկու վայրկյան առաջ ձեռքից բաց թողեց հաղթանակը:

Իսկ արդեն դեկտեմբերի 16-ին պայքարը կսկեն ազատոճային ըմբիշները: «Հայկական ժամանակը» ներկայացնում է Հայաստանի 8 պատվիրակների հնարավորություններն ու ակնկալիքները առաջիկա մրցաշարում: Գլխավոր մարզիչ Հաբենթակ Կուրղինյանը Բելգրադ է տարել երիտասարդ ու խոստումնալից ըմբիշներով համալրված կազմը, որ առաջին հերթին պետք է միջազգային մեծ փորձ ձեռք բերի այս մրցաշարում:

Ամենամեծ սպասելիքները 57 կգ քաշային կարգում հանդես եկող Արսեն Հարությունյանից են: Եվրոպայի 2018թ.-ի չեմպիոնն ու 2020թ.-ի բրոնզե մեդալակիրը շարունակում է առաջադիմել, վստահ հաղթանակ տարավ Հայաստանի առաջնությունում: 21-ամյա ըմբիշի հետ մասնագետները մեծ հույսեր են կապում, Բելգրադում էլ բոլոր հնարավորությունները կան լավ արդյունք գրանցելու համար. ուժեղ ըմբիշներ ունեցող ԱՄՆ և Վրաստանի հավաքականները չեն ժամանել, վիճակահանությունն էլ Հարությունյանին և մրցաշարի գլխավոր ֆավորիտ ռուսաստանցի Զաուր Ուգուևին (աշխարհի վերջին երկու տարիների չեմպիոն) ուղարկել է ցանցի տարբեր հատվածներ. նրանք միայն եզրափակչում կարող են հանդիպել: Հարությունյանը սկսելու է ռումին Ռազվան Կովաչի հետ գոտեմարտով, հաղթելու դեպքում հանդիպելու է կամ ադրբեջանցի Իսլամ Բազարգանովին կամ ուկրաինացի Անդրեյ Յացենկոյին: Կիսաեզրափակչի հավանական մրցակիցներից է հնդիկ Ռավին, որին Հարությունյանը պարտվեց 2019թ.-ի աշխարհի առաջնությունում: Եթե ըմբիշները հանդիպեն, Արսենը լավ հնարավորություն կունենա ռևանշի հասնելու:

61 կգ քաշային կարգում Ռազմիկ Պապիկյանը պայքարը սկսելու է 1/8 եզրափակչից, որտեղ մրցակիցը լինելու է Լեհաստանը ներկայացնող ազգությամբ ռուս Էդուարդ Գրիգորևը: Առհասարակ ազատ ոճի ըմբշամարտում տարբեր երկրների (Հունգարիա, Լեհաստան, Ադրբեջան, Ֆրանսիա, Սլովակիա, Սերբիա, Մակեդոնիա և այլն) կազմում շատ են նախկին ռուսաստանցի մարզիկները, որոնց մեծ մասը Դաղտսանից, Չեչնիայից կամ Օսեթիայից են: Եվ նրանցից յուրաքանչյուրը կարող է հաղթանակի իրական հավակնորդ լինել: Գրիգորևը, սակայն, ամենևին էլ անհաղթահարելի չէ: Երիտասարդ Պապիկյանի համար սա առաջին փորձերից է մեծահասակների ասպարեզում, և հաղթանակի դեպքում նա լավ հնարավորություններ կունենա մեդալի համար պայքարելու, քանի որ հաջորդ փուլում այս դիմակայության հաղթողը, ամենայն հավանականությամբ, հանդիպելու է Ռուսաստանը ներկայացնող Աբասգաջի Մագոմեդովին, որը հաղթողի ֆավորիտներից է: Եթե նույնիսկ Պապիկյանը պարտվի ռուսաստանցուն, ամենայն հավանականությամբ հաջորդ օրը հնարավարություն կունենա սփոփիչ գոտեմարտեր անցկացնելու:

Վազգեն Թևանյանը (65 կգ) իր ընկերոջ՝ Արսեն Հարությունյանի հետ միասին ազատ ոճի ըմբշամարտի Հայաստանի հույսերից մեկն է: Պատանիների ու երիտասարդների մրցաշարերում փայլուն ելույթներով աչքի ընկած Թևանյանը դեռ չի կարողանում իրեն լիարժեք դրսևորել մեծահասակների ասպարեզում (խանգարում են վնասվածքները), սակայն նրա ներուժը շատ մեծ է: Հայաստանի առաջնությունում Թևանյանն իրեն հավասարը չունեցավ՝ իրենից հետ թողնելով նաև փորձառու Վալոդյա Ֆրանգուլյանին: Լավ վիճակահանությունը թույլ է տալիս արտաշատցի ըմբիշին ամենաբարձր տեղերի համար պայքարելու հույսեր ունենալ. Նա հայտնվել է ցանցի ներքևի հատվածում, մինչդեռ մյուս ֆավորիտները՝ Հաջի Ալիևը (Ադրբեջան), Հաջիմուրադ Ռաշիդովը (Ռուսաստան), Իսմայել Մույուկաևը (Հունգարիա) ցանցի մյուս հատվածում են, ընդ որում, Ալիևն ու Ռաշիդովը միմյանց հանդիպելու են հենց մեկնարկում: Իսկ Թևանյանի առաջին մրցակիցը մոլդովացի Նիկոլայ Գրամեզն է, որն ուժեղ ըմբիշ է, բայց ամենևին էլ անհաղթելի չէ: Դեպքերի բարենպաստ զարգացման դեպքում, հնարավոր է կիսաեզրափակչում «հայկական դերբի» լինի. Թևանյանի հավանական մրցակիցների թվում Ուկրաինան ներկայացնող Գոռ Հովհաննիսյանն է, որին, ի դեպ, Թևանյանը հաղթելու փորձ ունի:

Հայաստանը ներկայացնող մյուս 5 ըմբիշները՝ Արման Անդրեասյանը (70 կգ), Հրայր Ալիխանյանը (74 կգ), Արամ Ավագյանը (79 կգ), Հովհաննես Մխիթարյանը (86 կգ) և Հովհաննես Մաղաքյանը (125 կգ) նույնպես շատ երիտասարդ են, նրանցից միայն Ալիխանյանն ու Մխիթարյանը մեծահասակների ասպարեզում խոշոր մրցաշարերում հանդես գալու փորձ ունեն: Անդրեասյանի նկատմամբ վիճակահանությունը շատ անբարենպաստ է գտնվել. նույն ցանցում են Լեհաստանն ու Ռուսաստանը ներկայացնող դաղստանցի ուժեղ ըմբիշները: Անդրեասյանը տաղանդավոր ըմբիշ է, սակայն փորձի պակասը կարող է խանգարել: 

Ալիխանյանը պայքարը սկսելու է 1/16 եզրափակչից. Եթե նա հաղթահարի լեհ Անջեյ Սոկալսկու արգելքը, ապա հաջորդ փուլում կարող է հանդիպել փորձառու հնդիկ ըմբիշ Նարսինխ Յադավին: Միայն այդ դեպքում Ալիխանյանը կարող է հույս ունենալ մեդալների համար պայքարելու. քառորդ եզրափակչում հավանական մրցակիցներից է Իտալիան ներկայացնող Ֆրանկ Չամիզոն, որը հաղթողի գլխավոր ֆավորիտներից է և մեծ է հավանականությունը նրան եզրափակչում տեսնելու:

Ավագյանին հենց մեկնարկում բաժին է հասել ասիական խաղերի չեմպիոն ղրղզ Արսալան Բուդաժապովը, հաջորդ փուլում հավանական մրցակիցը Սլովակիայի ներկայացուցիչ Ախսարբեկ Գուլաևն է: Երկու դեպքում էլ Ավագյանի համար շատ դժվար կլինի, բայց Արամը լավ պայքարող ըմբիշ է և հաստատ հեշտ չի հանձնվի:

Մխիթարյանն այս կազմում ամենափորձառուն է, բայց դեռ չի կարողանում լուրջ հաջողություններ ունենալ մեծահասակների ասպարեզում. 1/8 եզրափակչում Իսպանիայի ներկայացուցիչ Թեյմուրազ Ֆրիևը լուրջ արգելք կլինի վանաձորցի ըմբիշի համար, որը հաղթահարելու դեպքում հաջորդ փուլերում ավելի ուժեղ մրցակիցներ են լինելու:

Մաղաքյանն իր նորամուտն է նշելու մեծահասակների ասպարեզում, ու թեև սպասելիքներ նրանից այս մրցաշարում այդքան էլ մեծ չեն, բայց լավ վիճակահանությունը թույլ է տալիս Մաղաքյանին պայքարը սկսել միանգամից քառորդ եզրափակչից: Բելառուսի ներկայացուցիչ Դենիս Խրամիկովին հաղթելու դեպքում Մաղաքյանը կհայտնվի կիսաեզրափակչում, իսկ դա արդեն հնարավորություն է տալիս պայքարել մեդալների համար: Ճիշտ է, այդքանով վիճակահանության նվերներն ավարտվում են. կիսաեզրափակչում մրցակիցը լինելու է կամ ռուսաստանցի Շամիլ Շարիպովը կամ ուկրաինացի Օլեգ Խոտյանովսկին: Երկուսի դեմ էլ Մաղաքյանին անչափ դժվար կլինի:

Ազատոճայինները պայքարի մեջ կլինեն դեկտեմբերի 16-18-ը: