Դուք շարունակում եք կատարել դեկորատիվ բարեփոխումներ․ ԱԺ-ում քննարկվեց հակակոռուպցիոն դատարաններ ստեղծելու նախագիծը

Ազգային ժողովի հերթական նիստերում առաջին ընթերցմամբ քննարկվեց հակակոռուպցիոն և հակակոռուպցիոն վերաքննիչ դատարաններ ստեղծելու վերաբերյալ Կառավարության ներկայացրած օրենսդրական փաթեթը։

Դատական օրենսգիրք սահմանադրական օրենքում և կից ներկայացված օրենքներում լրացումներ և փոփոխություններ կատարելու նախագծերի փաթեթը ներկայացրեց արդարադատության նախարար Ռուստամ Բադասյանը։ «Այս նախագծերով նախատեսվում է հակակոռուպցիոն և հակակոռուպիցիոն վերաքննիչ դատարանների ստեղծում, և մեր հերթական քայլն է, որը բխում է հակակոռուպցիոն բարեփոխումների ռազմավարությունից, որի արդյունքում հուսով ենք, որ կապահովվի կոռուպցիոն բնույթի գործերով մասնագիտացված դատական քննությունը, ըստ այդմ՝ նպաստելով կոռուպցիայի դեմ իրականացվող պայքարի արդյունավետության աստիճանի բարձրացմանը»։

Բադասյանն ասաց նաև, որ նախագծերով առաջարկվում է ստեղծել մասնագիտացված հակակոռուպցիոն դատարան, առնվազն՝ 25 դատավորի թվակազմով՝ ապօրինի գույքի բռնագանձման գործընթացում մասնագիտացվածությունը ապահովելու համար։ «Նախատեսվում է, որ 20 դատավոր կքննի կոռուպցիոն բնույթի հանցագործությունները, իսկ 5 դատավոր կունենա մասնագիտացում՝ ապօրինի ծագում ունեցող գույքի բռնագանձման քաղաքացիական հայցեր քննելու»,- ասաց Բադասյանը՝ հավելելով, որ դատավորների թվաքանակը վերջնական չէ և առաջինից երկրորդ ընթերցմամբ քննարկման ընթացքում կարող է փոխվել։

Նախագծի քննարկման ընթացքում ելույթ ունենալով՝ «Լուսավոր Հայաստան» խմբակցության պատգամավոր Անի Սամսոնյանը նշեց, որ այս նախագծով ոչ թե նվազեցվելու է կոռուպցիան, այլ դատական համակարգում ծաղկելու է։ «Ինչո՞ւ։ Որովհետև հակակոռուպցիոն դատարանների ստեղծմամբ ես տեսնում եմ խտրականություն դատական համակարգում։ Նայում ենք, օրինակ, հակակոռուպցիոն դատարանի նախագահի պաշտոնային դրույքաչափը և համեմատում, օրինակ, Վարչական դատարանի նախագահի դրոույքաչափի հետ։ Երկուսն էլ մասանգիտացված դատարանի նախագահներ են։ Կամ հակակոռուպցիոն դատարանի դատավորի դրույքաչափը համեմատում ենք, օրինակ, ՀՀ առաջին ատյանի դատարանի դատավորի դրույքաչափերի հետ և այսպես շարունակ մենք կտեսնենք, որ ավելի բարձր դրույքաչափերով են սահմանված հակառուպցիոն դատարանի դատավորների դրույքաչափը, քան մյուս դատավորներինը»։

Ըստ Անի Սամսոնյանի՝ արդարադատության նախարարը դատաիրավական ոլորտում դեկորատիվ փոփոխություններ է կատարում։ «Տպավորություն է, որ ծաղկամանի ջուրը չփոխած՝ ծաղկամանի մեջ դնում եք մի նոր ծաղիկ, որը շատ արագ թոշնելու է, այդպիսին է դատաիրավական բարեփոխումների ձեր ամբողջ բնութագիրը այս 2 տարվա ընթացքում, և դուք ինքներդ անկեղծորեն դժգոհ եք ձեր իսկ կատարած դատական բարեփոխումներից, բայց դուք շարունակում եք կատարել դեկորատիվ բարեփոխումներ, որոնք խնդիրը չեն լուծելու և ավելի են խոչընդոտներ ստեղծելու և խորացնելու դատական համակարգի պրոբլեմները»։

Անկախ պատգամավոր Արման Բաբաջանյանը նույնպես նշեց, որ բարեփոխումները կոսմետիկ են։ «Հնարավոր չէ այն գործիքակազմով և ընթացակարգերով, որն ապահովել է ամբողջատիրական համակարգում կոռուպցիայի և այլ արատավոր երևույթների զարգացումը, երաշխավորել անցումը դեպի ժողովրդավարական, իրավական համակարգ։ Այդօրինակ նախաձեռնությունները դատապարտված են ձախողման, սակայն ամենավտանգավոր բացասական իրողությունն այն է, որ միայն այն ժամանակ, երբ արդեն շատ ուշ կլինի, և համակարգի բարեփոխման համար բազմաթիվ կենսական և էական հնարավորություններ վատնված և կորսված կլինեն, տապալված բարեվարքության և/կամ ֆինանսական և/կամ այլ էական չափանիշների ստուգման ձախողումների կամ այդպիսի ստուգումների հնարավորության բացթողման դեպքում մենք, ըստ էության, մեծ՝ և՛ ժամանակի, և՛ սպասումների իմաստով, կորուստներ կունենանք»։

Արդարադատության նախարարն էլ եզրափակիչ ելույթում անդրադարձավ պատգամավորների դիտարկումներին։ Անի Սամսոնյանին հիշեցրեց՝ արդարադատության նախարարի պաշտոնում նշանակվել է 2019 թվականի հունիսին։ Արման Բաբաջանյանին էլ առաջարկեց ներկայացնել արմատական փոփոխությունների ճանապարհային քարտեզ։ «Ինձ մոտ տպավորություն է, որ գիտեք արմատական փոփոխությունների ճանապարհը և բանալին, բայց ինձնից թաքուն եք պահում։ Խնդրում եմ՝ թաքուն մի՛ պահեք, ներկայացրեք այդ արմատական փոփոխությունների ճանապարհային քարտեզը, բայց ավելի լավ է՝ նախագիծը, որովհետև ինձ պարբերաբար տրամադրում են տարբեր առաջարկների փաթեթներ, կարծես թե նաև այդ մասնագետները ձեզ հետ են աշխատում։ Ես անձնական որևէ խնդիր չունեմ որևիցե մեկի հետ, ոչ էլ մեծամիտ եմ, որ չնկատեմ, եթե ավելի լավ բան են առաջարկում, քան ես եմ առաջարկում։ Ինձ մինչ այս պահը փոխանցվել են կետերով առաջարկներ՝ 40 կետանոց, 30 կետանոց։ Պետք չէ բոլոր կետերը կարդալ, ես բոլոր կետերը կարդացել եմ։ Այնտեղ մի կետ կա․ ուզում ենք՝ լավ լինի, ես էլ եմ ուզում՝ լավ լինի, բայց դա ունի ճանապարհ, և այդ ճանապարհը պետք է բխի Հայաստանի օրենսդրությունից, Սահմանադրությունից, մեր կարգավորումներից»։