2021 թվականին սպասվող կարևոր սպորտային իրադարձությունները

Սպասվում է, որ 2021թ․-ը պետք է հարուստ լինի սպորտային իրադարձություններով, թեև համաճարակի պայմաններում, դժվար է ասել՝ որքանով այդպես կլինի։ 2020թ․-ի սպորտային հիմնական իրադարձությունները տեղափոխվել են 2021թ․, աշխարհն էլ կարծես թե համակերպվում է վիրուսի պայմաններում սպորտային իրադարձությունների անցկացմանը, այնպես որ հույսեր կան 2021թ․-ին տեսնելու այն, ինչ չենք տեսել 2020-ին։ Հայկական ժամանակն առանձնացնում է տարվա գլխավոր սպորտային իրադարձությունները՝ առաջին հերթին հայ մարզասերների տեսանկյունից։

Օլիմպիական խաղերի վարկանիշային մրցաշարեր

Վարկանիշային մրցաշարերի մեծ մասը հիմնականում անցկացվելու է փետրվարից հունիս ընկած ժամանակահատվածում։ Հայ մարզասերներին առաջին հերթին հետաքրքիր են ըմբշամարտի, ծանրամարտի, բռնցքմաարտի, ձյուդոյի վարկանիշային մրցաշարերը, որտեղ սպասելիքները մեծ են հայ մարզիկներից։

Ֆուտբոլի աշխարհի առաջնության ընտրական փուլ

Մարտ ամսին Հայաստանի հավաքականը երեք հանդիպումներով կմեկնարկի ֆուտբոլի աշխարհի առաջնության ընտրական փուլում։ Ազգերի լիգայում հաջող ելույթներից հետո ֆուտբոլասերներն անհամբեր սպասում են ազգային հավաքականի հաջորդ հանդիպումներին։

Օլիմպիական խաղեր

2021թ․-ի մարզական խոշորագույն իրադարձությունը, անկասկած 32-րդ օլիմպիական խաղերն են, որոնք պետք է տեղի ունենան Ճապոնիայի մայրաքաղաք Տոկիոյում՝ հուլիսի 23-ից օգոստոսի 8-ը։ Հայաստանն առայժմ օլիմպիական 4 ուղեգիր ունի, սակայն դրանց թիվը, անկասկած, դեռ կմեծանա։ 

Հայաստանի առաջնություն․ ֆուտբոլ

Ֆուտբոլի Հայաստանի Պրեմիեր լիգայի հերթական առաջնությունն անցնում է շատ հետաքրքիր պայքարում։ Չեմպիոնության համար պայքարում են 6 թիմեր․ 1-6-րդ տեղերին այս պահին բաժանում է ընդամենը 3 միավոր։ Հայաստանի առաջնության և գավաթի խաղարկությնան արդյունքներով նաև կորոշվեն նաև այն 4 թիմերը, որոնք ամռանը Հայաստանը կներկայացնեն եվրագավաթների խաղարկություններում։

Շախմատ․ հավակնորդների մրցաշար, չեմպիոնական մրցամարտ

2020թ․-ին շախմատային գլխավոր իրադարձությունը պետք է լիներ չեմպիոնական մրցամարտը աշխարհի չեմպիոն Մագնուս Կառլսենի և հավակնորդների մրցաշարի հաղթողի միջև: Սակայն հավակնորդների մրցաշարը, որը մեկնարկել էր Եկատերինբուրգում գարնանը, անավարտ մնաց, տեղի չունեցավ նաև չեմպիոնական մրցամարտը: 2021թ.-ի մարտի 17-ին մրցաշարը պետք է վերսկսվի, 11 օր անց հայտնի կդառնա շախմատի աշխարհի չեմպիոնի հավակնորդի անունը: Այս պահին լավագույն շանսերն ունեն Մաքսիմ Վաշյե-Լագրավն ու Յան Նեպոմնյաշչին, որոնք մրցաշարի ընհատման պահին վաստակել էին 4.5-ական միավոր և 1 միավորով գերազանցում էին Ֆաբիանո Կարուանային, Անիշ Գիրիին, Վան Հաոյին և Ալեքսանդր Գրիշչուկին: Ցավոք, այս մրցաշարին մասնակցելու իրավունք չէր կարողացել նվաճել Լևոն Արոնյանը, և ներկայումս համաշխարհային դասակարգման աղյուսակում 6-րդ տեղը զբաղեցնող Արոնյանը հնարավորություն չունի պայքարել աշխարհի չեմպիոնի կոչման համար: Իսկ թե երբ կանցկացվի չեմպիոնական մրցամարտը դեռ հայտնի չէ: Ամենայն հավանականությամբ դա տեղի կունենա 2021թ.-ի վերջում:

Շախմատի համաշխարհային օլիմպիադա

2021թ.-ին հայ շախմատասերների համար շախմատային մեկ այլ սուպերմրցաշար կա: Մոսկվայում պետք է տեղի ունենա շախմատային օլիմպիադան: Օլիմպիադայի եռակի չեմպիոն Հայաստանի հավաքականը, ինչպես միշտ, մոտենալու է մրցաշարին ֆավորիտներից մեկի կարգավիճակով: Ճիշտ է, վերջին տարիներին Ռուսաստանի, Չինաստանի և ԱՄՆճի հետ պայքարելն ավելի է դժվարացել, սակայն բոլորին էլ հայտնի է, որ հայ շախմատիստներն օլիմպիադաներում իրենց լավագույն խաղն են ցուցադրում, իսկ Արոնյանի պես առաջատար ունենալն էլ ինքնաբերաբար հավաքականին դասում է ֆավորիտների շարքին: Ինքը՝ Արոնյանը, մրցաշարերով հագեցած ամառ է ունենալու. Երեք ամսվա ընթացքում Լևոնը նախատեսում է մասնակցել 6 տարբեր մրցաշարերի:

Ֆուտբոլի Եվրոպայի առաջնություն

Թեև Հայաստանի հավաքականը եվրոպական ֆուտբոլային խոշորագույն իրադարձության մասնակից չէ, սակայն հայ ֆուտբոլասերների համար, անկասկած, տարվա իրադարձություններից մեկը լինելու է հունիսի 11-ից հուլիսի 11-ը կայանալիք Եվրոպայի առաջնությունը: Այն նախատեսվում է անցկացնել 12 տարբեր երկրներում, թեև բացառված չէ, որ համաճարակով պայմանավորված փոփոխություններ լինեն: Ամռանը Եվրոպայի ուժեղագույն հավաքականները պայքարելու են Անրի Դելանեի գավաթի համար, մնում է հուսալ, որ երկրպագուները մինչ այդ կվերադառնան մարզադաշտեր և իրենց ներկայությամբ էլ ավելի կգեղեցկացնեն ֆուտբոլային տոնը: