Դավիթ Անանյանն էլ չգիտեմ քանի գլխանի է եղել, որ չի եկել ձեր հանձնաժողովի նիստերին․ Արման Բաբաջանյանը՝ Սերգեյ Բագրատյանին

Ազգային ժողովում Մետաղական հանքարդյունաբերության ոլորտում ներդրումային ծրագրերի շրջանակներում գործադիր իշխանության մարմիններին ներկայացված եւ նրանց կողմից ընդունված ֆինանսական եւ այլ հաշվետվությունների օրինականությունը, հիմնավորվածությունը եւ արժանահավատությունը ուսումնասիրող քննիչ հանձնաժողովի կատարած աշխատանքների վերաբերյալ զեկույցի  քննարկման ընթացքում Արման Բաբաջանյանը հանձնաժողովի նախագահ Սերգեյ Բագրատյանին ասաց, որ վերջինիս աշխատանքում նկատել է հետևողականության պակաս։ «Նրանք, ովքեր այդ տվյալները ձեզ չէին ներկայացնում, հավանաբար դուք պիտի գնայիք չներկայացնողներին ուղղակի պարտադրեիք, որպեսզի ձեզ անհրաժեշտ տեղեկությունները ձեզ տրամադրվեր»։

Ըստ Բաբաջանյանի՝ հանձնաժողովի աշխատանքը քիչ է լուսաբանվել։ «Եթե մամուլը աշխատեր ձեզ հետ այնպես, ինչպես Ապրիլյան քննիչ հանձնաժողովի հետ է պարագայում, ավելի հեշտ կլիներ «բերման ենթարկել» նրանց, ովքեր պարտավոր էին ձեզ տեղեկություններ տրամադրել։ Հասկանալի է, որ ահռելի շահեր կան այդտեղ, այդ շահերը տնտեսական են, դրանք ունեն քաղաքական բնույթ՝ նաև նախկին իշխանությունների հետ կապված, դրանց սեփականատերերի մեծ մասը կոնկրետ մեր երկրին մեծ վնաս հասցրած հայտնի քաղաքական շրջանակներ են, և դուք պիտի իմանայիք, որ այսպիսի հարցեր առաջ են գալու»։

Բաբաջանյանը հետաքրքրվեց՝  ի սկզբանե դրված նպատակը՝ քննիչ հանձնաժողով ստեղծելու, կազմավերելու  գոնե մասամբ իրագործվե՞լ է, թե ոչ։

Բագրատյանն էլ արձագանքելով անկախ պատգամավորին, նշեց, որ պատգամավորի որոշ դիտարկումների հետ համաձայն է, որոշ դիտարկումների հետ՝ ոչ։ «Մասնավորապես դուք ասում եք՝ Ապրիլյանին հրավիրեցին և պահանջեցին, Ապրիլյանը հրավիրեց պահանջեց, բայց Խաչատուրովը չեկավ, չեմ կարծում՝ որևէ մեկը կարողացավ ստիպել, որ գա։ Մեր դեպքում եթե Անանյանը չեկավ, ի՞նչ կարող էի անել։ Խնդրել եմ իմ գործընկեր Բաբկեն Թունյանին և Վարազդատ Կարապետյանին, քանի որ Անանյանը ձեր կազմած կառավարության անդամ է, խնդրում եմ դուք ասեք, որ գա։ 10-15 անգամ զանգահարել եմ,  նիստի ժամանակ հատուկ մոտեցել եմ, խնդրել եմ, որ մասնակցի, ոչ մի անգամ չի ասել՝ չէ, բայց չի եկել։ Հիմա ես չունեմ այլ լծակ նրան ստիպելու»։

Բագրատյանը նաև նշեց, որ բավարար չի համարում իր կատարած ոչ մի աշխատանք։ «Բավարա՞ր է, արդյոք կատարված աշխատանքը։ Ես չգիտեմ մի աշխատանք, որ բավարար համարեմ ես ինքս։ Որևէ աշխատանք չկա, որ ես կատարել եմ, համարեմ, որ դա բավարար է, միշտ համարում եմ, որ անբավարար է, սա էլ եմ համարում, որ անբավարար է։ Խնդիրը, որ դրել եմ իմ առաջ ,մասամբ լուծել եմ։ Հայտարարում եմ, որ թափանցիկություն և արժանահավատություն չկա, խնդիրը այդպես է դրված։ Ձեզանից շատերի մոտ հանձնաժողովի նկատմամբ այլ սպասումները կան, բայց իրապես այդ սպասումները ձևակերպված չեն հանձնաժողովի նպատակներով։ Այսինքն՝ ձեր մտահոգությունները մեր մտադրությունները չեն։ Խիստ տարբեր են մեր մոտեցումները, մենք ընդամենը պետք է նայենք՝ թափանցիկ են աշխատել, թե ոչ, որը ապացուցվել է»։

Բագրատյանը նաև նշեց, որ պատերազմը և կորոնավիրուսի համավարակը խանգարել են հանձնաժողովի աշխատանքներին։ «Երբ մենք ցանկանում էինք որևէ ընկերության ղեկավարի ներկայանալ, ասում էին, որ կովիդով հիվանդ է, ի՞նչ անես այդ դեպքում, առողջապահության նախարար չենք, որ փաստաթղթեր հավաքենք, ապացուցենք, որ կովիդով հիվանդ չի»։

Պատգամավորը նաև ընդգծեց, որ հանձնաժողովի անդամներ են եղել և «Լուսավոր Հայսատան»-ի և «Բարգավաճ Հայաստան» -ի և «Իմ քայլ»-ի ներկայացուցիչները։ «Հանձնաժողովի անդամները ունեցել են նույն լիազորությունները, ինչ հանձնաժողովի նախագահը։ Եվ եթե մենք մեղադրելու բան ունենք, կամ անբավարար աշխատանքի, ուրեմն մենք բոլորս, Ազգային ժողովի կողմից առաջադրված բոլոր անդամները հետևաբար նաև այդ խմբակցությունները հավասարաչափ պատասխատու են աշխատանքի որակի համար»։

Բաբաջանյանն էլ արձագանքելով  առաջարկեց պատասխանատվությունը չբաշխել, քանի որ հանձնաժողովը ստեղծելու գաղափարը հենց Բագրատյանինն է եղել, ինքն է ստանձնել հանձնաժողովի նախագահի պաշտոնը։ «Դավիթ Անանյանն էլ չգիտեմ քանի գլխանի է եղել, որ այդքան ժամանակ չի եկել ձեր հանձնաժողովի նիստերին»։

Բաբաջանյանը նաև հետաքրքրվեց՝ արդյոք բնապահպանների հետ աշխատանք տարվել է, թե ոչ, ինչին ի պատասխան Բագրատյանը նշեց, որ բնապահպանները ակտիվ մասնակցել են հանձնաժողովի աշխատանքներին։

Նա նաև հավելեց, որ  չի խուսափում պատասխանատվությունից, բայց, ըստ նրա, պատասխանատու են նաև  հանձնաժողովի մյուս անդամները։