Գրագողության խնդիրը չի վերացել, բայց կա նախարարի հանձնարարական. ԲՈԿ-ը՝ Գոգյանի գրառման և գիտական աստիճան շնորհելու մասին

Կրթության, գիտության, մշակույթի եւ սպորտի նախարարության այն աշխատակցին, որին Սմբատ Գոգյանի պաշտոնավարման ընթացքում ԲՈԿ-ը մի քանի անգամ մերժել է գիտությունների թեկնածուի աստիճան շնորհել՝ պատճառաբանելով ատենախոսության մեջ առկա արտագրությունները, վերջերս տրամադրվել է համապատասխան վկայագիրը:

Այս մասին ֆեյսբուքյան էջում հայտնել է ԲՈԿ նախկին նախագահը:

«Վեց ամիս առաջ հեռացա ԲՈԿ-ից ու առաջին անգամ եմ գրում ԲՈԿ-ի մասին։ Ցավոք, այս վեց ամիսների ընթացքում չնշանակվեց նախագահ, ու կառույցը չունի առաջնորդ։ 2019 թվականի մայիսի 22-ին Հ1-ի տաղավարում Պետրոսին ասացի, որ ԿԳՄՍ աշխատակցի ատենախոսության մեջ գտել ենք ծավալուն արտագրություններ, ԲՈԿ-ը նրան չի տվել գիտական աստիճանի վկայագիր, և նա բողոքել է նախարարին։ ԿԳՄՍ նախարարը վարչական վարույթ էր հարուցել ու ձևավորել հանձնաժողով։ Չնայած նրան, որ այդ հանձնաժողովը հաստատեց արտագրությունների փաստը ու գտավ ավելի ծավալուն արտագրություններ, այնուամենայնիվ ԿԳՄՍ նախարարը բավարարեց բողոքն ու ԲՈԿ-ին հանձնարարեց կայացնել նոր որոշում։ Ինքս հայցորդին առաջարկել էի ատենախոսությունը փոխի, վերախմբագրի, բերի պատշաճ տեսքի ու նորից պաշտպանի։ Բայց չէ, իր նպատակն էր այդ արտագրած ատենախոսությամբ ստանալ գիտությունների թեկնածուի վկայագիր»,- նշել է Սմբատ Գոգյանը՝ հավելելով՝

«2019-2020 թվականների ընթացքում չորս, թե հինգ անգամ ԿԳՄՍ նախարարը բավարարել է բողոքն ու ԲՈԿ-ին հանձնարարել կայացնել նոր որոշում: Ամեն անգամ իմ ձեռքով ԲՈԿ-ը մերժեց ԿԳՄՍ աշխատակցին տրամադրել գիտական աստիճանի վկայագիր։ Նա հասկացել էր, որ դատարանում հաջողության չեն հասնի ու այսպես անվերջ շարունակվելու էր, եթե ես չհեռանայի ԲՈԿ-ից»,- ընդգծել է Գոգյանը:

Նա տեղեկացնում է նաեւ, որ ԲՈԿ-ի կայքում չկան հայցորդի պաշտպանության գործընթացի հետ կապված նյութերը:

«Կայքից կորել են պաշտպանության գործընթացի հետ կապված նյութերը, փոխարենը հայցորդի անվան դիմաց հայտնվել է գիտությունների թեկնածու գրառումը։ Հավանաբար սա ռեկորդ է ու առաջին դեպքն աշխարհում, քանի որ սովորաբար կա՛մ գիտական աստիճանը շնորհելուց հետո են ի հայտ գալիս արտագրության փաստերը, կա՛մ էլ բացահայտվում են այդ փաստերն ու գիտական աստիճանը չի շնորհվում։ Ու եթե անցած տարի տեսել էինք, որ առաջին տեսակի հետ մեր հասարակությունը հաշտ ապրում է, ապա երկրորդ տեսակի նորմալ լինելը նոր է ապացուցվում։ Ու հա, մի քանի օր առաջ վերաբացվեց այն մասնագիտական խորհուրդը, որում տեղի էին ունեցել այդ և արտագրություններով հեղեղված այլ ատենախոսության պաշտպանությունները։ Բացվեց նույն խորհրդի նախագահով, առանց անցյալի որևէ գնահատականի։

Ու այս ամենից հետո մոտս միայն մի հարց է առաջանում։ Լավ, բա ես ձեր ինչների՞ն էի պետք։ Ինչո՞ւ կյանքիցս գողացաք այդ երկու տարիները։ Չէ՞ որ ես այդ բոլոր գրագողերի նկատմամբ անտարբեր եմ, անձնական ոչ մի վերաբերմունք չունեմ իրենց նկատմամբ, պարզապես փորձում էի պաշտպանել գիտությունը։ Իսկ 2019 թվականին մշակված ու գիտական հանրության հետ քննարկված աստիճանաշնորհման նոր կանոնակարգն այդպես նախարարը կյանքի չկոչվեց, մինչդեռ այն բավականաչափ դրական ազդեցություն կունենար»,- իր գրառումն այսպես է ամփոփել Գոգյանը։

ԲՈԿ նախագահի տեղակալ, նախագահի պարտականությունները կատարող Լիլիթ Մկրտչյանից հետաքրքրվեցինք՝ գիտական աստիճանաշնորհումից առաջ գրագողության խնդի՞րն է վերացվել, թե համարել են, որ գիտական աստիճան չշնորհելը նախկինում է սխալ եղել: Մեզ հետ զրույցում նշեց, որ գրագողության խնդիրը չի վերացել, պարզապես կա վերադասի՝ ԿԳՄՍ նախարարի կողմից իրենց տրված հստակ հանձնարարական.

«Նախարարը չեղարկել է ԲՈԿ նախկին նախագահի հրամանը, եւ հստակ հանձնարարական է տվել կայացնել գիտական աստիճանի վկայագիր հանձնելու մասին որոշում, որն էլ արվել է»,- նշեց Լ. Մկրտչյանը: Ասել է թե՝ եթե մինչ այս նախարարությունը ԲՈԿ-ին միայն առաջարկում էր նոր որոշում կայացնել, հիմա պահանջը եղել է հստակ՝ գիտական աստիճանը պետք է շնորհվի:

Ինչ վերաբերում է ԲՈԿ-ի կայքից տվյալ ատենախոսության պաշտպանության գործընթացի հետ կապված նյութերի անհետացումը, ըստ տիկին Մկրտչյանի, տեխնիկական խնդրի հետեւանք է:

«Իսկապես այստեղ տեղի է ունեցել տեխնիկական խնդիր: Մենք այս  պահին կարողացանք հղման տեսքով լուծումը տալ, այսինքն՝ հղում է տրված, որի վրա սեղմելով կարող են մտնել, եւ ինֆորմացիան կբացվի: Կկապվենք նաեւ կայքի սպասարկմամբ զբաղվող  ծրագրավորողների հետ, եւ կփորձենք հասկանալ, թե որտեղ է խնդիրը: Գուցե էլի՞ կան գիտական աստիճանի շնորհման հետ կապված ինֆորմացիայի կամ դրա ինչ-որ մասի կորելու հետ կապված խնդիրներ: Ամեն դեպքում, հայցորդները կամ էջի օգտատերերն են տեղյակ պահում, որ նման խնդիրներ են առաջացել: Պատահում է երբեմն, երբ գիտական պարբերականների խմբագիրներների տվյալներն են խառնվում, օրինակ՝ մի պարբերականի խմբագրի անունը հայտնվում է մեկ այլ պարբերականի խմբագրի անվան փոխարեն: Երբեմն պատահում է պարբերականի խմբագրակազմի ինչ-որ տվյալներ են անհետանում: ԲՈԿ-ի կայքը մեկ տարի է, ինչ գործում է, եւ մինչեւ հստակ աշխատանքային հունի մեջ չընկնի կայքը, նման հարցեր ունենում ենք, այո:  Այնուամենայնիվ, պարբերաբար շտկումներ են արվում, եւ դա անընդհատ տարվող աշխատանք է մեզ մոտ: Ամեն դեպքում, չկա որեւէ պրոցես կամ որեւէ ինֆորմացիա փոխելու, հանելու միտում, հակառակը՝ կայքն անընդհատ համալրվում է եւ զուգահեռ շտկման աշխատանքներ են տարվում»,- ասաց նա:

ԿԳՄՍ նախարարի խոսնակ Գեղամ Մելիքբեկյանն էլ մեզ հետ զրույցում նշեց, որ նախարարությունն առայժմ չի մեկնաբանում հարցը:

Ավելի ուշ, լրագրողների հետ զրույցում Վահրամ Դումանյանը, անդրադառնալով Գոգյանի եւ նախարարության տեսլականի տարբերությունների մասին հարցին, նշեց, որ այսօր նախարարության գործընթացները գնում են կարգին համապատասխան:

«Կարգը դուր է գալիս մեր գործընկերոջը, թե դուր չի գալիս, դա այլ խնդիր է, բայց որ ցանկացած որոշում եւ գործընթաց պետք  է լինի գոյություն ունեցող եւ գործող կարգերին համապատասխան, դա փաստ է: Այդ սկզբունքը այսօր կա եւ շարունակվում է: Իհարկե, կան որոշակի կարգեր, որոնք վերանայման կարիք են ունեցել եւ վերանայվել են, այժմ էլ կան վերանայման կարիք ունեցող կարգեր, որոնք շուտով կվերանայվեն»,- ասաց Վ. Դումանյանը:

Նախարարը նշեց նաեւ, որ ԲՈԿ-ը շուտով կունենա նախագահ: Թեկնածուի մասին նշել չցանկացավ՝ ասելով. «Կլինի, կիմանաք»:

Մարիամ Գեւորգյան